Höli​—No ”Buala Soʼahonoa” moroi khö Nama

1. Hadia zi sökhi si tola tatema börö höli?

HÖLI nibeʼe Yesu zangaʼasogö howu-howu. Duma-dumania, höli andre zamokai mbawandruhö ba ngaʼötö Gadamo sangomasiʼö satulö enaʼö tobali ira ösi nomo Lowalangi. Tola göi taʼokhögö waʼauri si lö aetu ba zi so miföna. Baero daʼö, fefu ngawalö gabula dödö si tohude si so ba zi sagörö ulidanö, tola teʼasiwai ia börö me so höli.​—Heberaiʼo 1:8, 9.

2. (a) Hadia niʼangandröi Yesu sabölö tohude salua ba gulidanö hegöi ba zorugo? (Faigi gambara ba wamobörö wamahaʼö.) (b) Hadia manö nidunö-dunöda ba wamahaʼö daʼa?

² Dua fakhe fatua lö mate ia, ifahaʼö ndra sinengenia Yesu ba wangandrö. Imane, ”He Ama khöma si so ba zorugo! Yateʼamoniʼö döiu. Yatobali banuau fefu niha. Yaʼitörö zomasi ndraʼugö, hulö ba zorugo, yasimanö göi ba gulidanö.” (Mataiʼo 6:9, 10) Datatutunö hewisa höli andrö moʼamakhaita ia ba wangamoniʼö töi Yehowa, famatörö Mbanua Lowalangi, hegöi faʼalua gohitö dödö Lowalangi.

”YATEʼAMONIʼÖ DÖIU”

3. Töi Yehowa mosalahini hadia ia? Hewisa wanandrawaisi Zatana döi Lowalangi?

³ Si oföna sibai niʼangandröi Yesu yaʼia daʼö enaʼö teʼamoniʼö döi Yehowa mazui enaʼö sökhi wangunaʼö töi Yehowa andrö. Töi Yehowa zosalahini fefu hadia ia zoʼamakhaita khönia, daʼö zanutunö khöda haniha ia. Yaʼia wondrege zabölö hegöi satua-tua ba gulidanö maʼasagörö. Ikaoni ia Yesu, ”Ama Niʼamoniʼö”. (Yohane 17:11) Börö me no niʼamoniʼö Yehowa, fefu hadia ia nifaluania hegöi goi-goi nifazökhinia oi moʼahonoa. Hizaʼi ba Edena, sifao faʼonekhe itandrawaisi Lowalangi Satana sanandrösa ba wameʼe goi-goi ba niha gulidanö. Iböbögö zi lö duhu khö Yehowa ba itandrawaisi döi Lowalangi.​—I Moze 3:1-5.

4. Hewisa wangamoniʼö Yesu töi Lowalangi?

⁴ Sindruhu-ndruhu iʼomasiʼö döi Yehowa Yesu, ba ifalua gofu hadia ia ba wangamoniʼö töi Yehowa. (Yohane 17:25, 26) Iforomaʼö daʼö ba mbua-buania hegöi ba ngawalö nifahaʼönia. Itolo niha böʼö Yesu enaʼö aboto ba dödöra goi-goi Yehowa satulö. Ifahaʼö göi ita wa fefu niʼandrö Yehowa oi si sökhi khöda. (Baso Zinunö 40:9-11.) Lö irai faröi Yesu hewaʼae itaögö wamakao moroi khö Zatana hegöi faʼamate safökhö sibai. Iforomaʼö wa niha soʼahonoa tola sindruhu-ndruhu laʼoʼö niwaʼö Yehowa.

5. Hewisa wangamoniʼöda töi Yehowa?

⁵ Moroi ba mbua-buada tola taforomaʼö wa taʼomasiʼö döi Yehowa. Iʼandrö Yehowa enaʼö taʼamoniʼö ita. (Baso I Fetero 1:15, 16.) Eluahania, ha Yehowa nifosumangeda ba taʼoʼö niwaʼönia soroi ba dödö. Hewaʼae göna ita folohi, moguna taforege ba wamalua hadia zabölö sökhi enaʼö tefaudu lala waʼaurida ba zi no ifahaʼö ita Yehowa. Ba na taʼoʼö goi-goi Yehowa, tola tafolakhömi döinia. (Mataiʼo 5:14-16) Tola taforomaʼö wa si sökhi goi-goi Yehowa ba si falimo Gafökha. Börö me lö moʼahonoa ita, andrö wa tola manö tafalua zala. Hizaʼi, na no tafalua zala, moguna tafalalini gera-erada ba taböhöli ba wamalua gamuata si möi fangoʼaya döi Yehowa andrö.​—Zinunö 79:9.

6. Hana wa tobali ita niha satulö tödö föna Yehowa hewaʼae na lö moʼahonoa ita?

⁶ He niha nibayoini ita mazui ”mbiri-biri böʼö”, tola iʼefaʼö zalada Yehowa na mamati ita ba höli. Itemaʼö niha si no molulu faʼauri ba wamosumange yaʼia tobali ösi nomonia. Ifatunö wa niha Keriso nibayoini satulö tödö tobali iraononia, ba ”mbiri-biri böʼö” satulö tödö tobali si fahuwu khönia. (Yohane 10:16; Roma 5:1, 2; Yakobo 2:21-25) Iadaʼa, börö me so höli andrö wa tola taʼokhögö wariawösa si sökhi khö Namada hegöi ba wangamoniʼö töinia.

”YATOBALI BANUAU FEFU NIHA”

7. Hadia manö howu-howu niʼasogö höli?

⁷ Imane Yesu ba duma-duma wangandrönia, ”Yatobali banuau fefu niha.” Hewisa wa tola moʼamakhaita höli andrö ba Mbanua Lowalangi? Banua Lowalangi mazui famatörönia yaʼia daʼö famatörö Yesu hegöi si-144.000 niha si no tefili. Börö höli wa tola tesusugi niha si no tefili andre ba zorugo. (Famaʼeleʼö 5:9, 10; 14:1) Tobali ira razo hegöi ere, ba fao ira khö Yesu ba wamatörö ulidanö maʼasögörö ba zi hönö fakhe faʼara. Ba götö daʼö dania, iʼogunaʼö Mbanua andrö Yehowa ba wombaliʼö faradaiso zi sagörö ulidanö hegöi ba wanolo niha gulidanö enaʼö moʼahonoa ira. Niha samosumange Yehowa si so ba zorugo hegöi ba gulidanö, sindruhu-ndruhu tobali ira sambua omo. (Famaʼeleʼö 5:13; 20:6) Ifufu Zatana Yesu ba iheta fefu gabula dödö.​—I Moze 3:15.

8. (a) Hewisa wanolo Yesu ndra nifahaʼönia enaʼö aboto ba dödöra wa moguna sibai Mbanua Lowalangi? (b) Hadia nifaluada ba wanuhini Mbanua Lowalangi iadaʼa?

⁸ Itolo ndra nifahaʼönia Yesu enaʼö aboto ba dödöra wa moguna sibai Mbanua Lowalangi. Me no aefa tebayagö ia idanö, ibörötaigö wanuriaigö ”duria somuso dödö, turia mbanua Lowalangi” gofu hezoso möi ia. (Luka 4:43) Ifahaʼö göi ndra nifahaʼönia enaʼö tobali ira samaduhuʼö yaʼia ”irugi wondrege danö”. (Halöwö Zinenge 1:6-8) Iadaʼa, börö halöwö wanuriaigö andrö wa so ginötö ba niha böʼö ba wamahaʼö yaʼira sanandrösa ba höli, ba tola tobali ira ono mbanua Lowalangi. Tola taforomaʼö wa lö faröi ita ba wanuhini Mbanua Lowalangi na tatolo ndra talifusöda nibayoini ba wanuriaigö turia somuso dödö ba zi sagörö ulidanö.​—Mataiʼo 24:14; 25:40.

”YAʼITÖRÖ ZOMASI NDRAʼUGÖ”

9. Hana wa tola faduhu dödöda wa hasambalö ifalua gohitö dödönia Lowalangi ba niha gulidanö?

⁹ Hadia geluaha wehede Yesu me imane, ”Yaʼitörö zomasi ndraʼugö”? Hasambalö alua hadia zi no iwaʼö Yehowa. (Yesaya 55:11) Lö tola itenawa daʼö Afökha. Hadia zomasi ifalua Yehowa ba gulidanö? Omasi ia na afönu gulidanö andre iraono soʼahonoa moroi khö Gadamo ba Khawa. (I Moze 1:28) Na mate Gadamo hegöi Khawa fatua lö hadöi iraonora, lö tola alua gohitö dödö Lowalangi ba gulidanö. Andrö wa itehegö khöra Yehowa ba wangokhögö iraono. Höli andrö zameʼe inötö ba niha sangoromaʼö famati enaʼö tola moʼahonoa ira ba lasöndra waʼauri si lö aetu. Iʼomasiʼö sibai niha Yehowa, ba omasi ia na fefu niha laʼokhögö waʼauri si sökhi simane ohitö dödönia ba mböröta.

10. Hadia gunania höli andrö ba niha si no mate?

¹⁰ So miliaran niha si mate fatua lö aboto ba dödöra haniha Yehowa. Hewisa göi ira? Omasi Yehowa na fefu niha lasöndra waʼauri. Andrö wa hasambalö isusugi ira. Börö höli wa tola tesusugi ira. Na no tesusugi ira, tola lafahaʼö ira sanandrösa khö Yehowa ba lasöndra waʼauri si lö aetu. (Halöwö Zinenge 24:15) No Umbu fangorifi Yehowa. Andrö, ba ginötö ifuli isusugi niha si no mate, ba daʼö tobali ia Amara. (Zinunö 36:10) Ba duma-duma wangandrö nibeʼenia, iwaʼö Yesu wa Yehowa andrö ’Amada si so ba zorugo’. (Mataiʼo 6:9) Ibeʼe Yehowa halöwö sabölö moguna khö Yesu ba wanusugi niha si no mate. Imane Yesu, ”Yaʼodo wemaoso ba faʼauri.”​—Yohane 6:40, 44; 11:25.

11. Hadia gohitö dödö Lowalangi ba ”zato sibai”?

¹¹ Imane Yesu, ”Soloʼö somasi Lowalangi, daʼö dalifusögu matua ba talifusögu alawe ba inagu.” (Mareko 3:35) Omasi Lowalangi enaʼö fefu niha moroi ba ngawalö soi, niwa hegöi ba ngawalö li, tobali ira samosumange yaʼia. Yaʼira andrö hulö ”zato sibai, si tebai iʼerai niha”. Mamati ira ba höli ba laʼoʼö niwaʼö Lowalangi. Lasuno ia ba lamane, ”Fangorifi khö Lowalangida, sidadao ba dadaoma andrö, ba khö Nono mbiri-biri andrö!”​—Famaʼeleʼö 7:9, 10.

12. Moroi ba wangandrö Yesu, hadia wamahaʼö si tola tahalö sanandrösa ba gohitö dödö Yehowa ba niha gulidanö?

¹² Ba duma-duma wangandrö nibeʼe Yesu, oya wamahaʼö si tola tahalö sanandrösa khö Yehowa hegöi ohitö dödönia ba niha gulidanö. Si oföna, lö tola löʼö tafalua hadia zi tola tafalua ba wangamoniʼö töi Yehowa hegöi ba wamolakhömi yaʼia. (Yesaya 8:13) Höli nibeʼe Yesu zi tola mangefaʼö yaʼita hegöi si möi famolakhömi döi Lowalangi. Sindruhunia, eluaha döi Yesu yaʼia daʼö ”Yehowa No Sangorifi”. Si dua, iʼogunaʼö Mbanua Lowalangi andrö Yehowa enaʼö fefu niha soloʼö khönia tola latema mbua ba höli andrö. Si tölu, so khöda waʼafaduhu dödö wa lö hadöi zi tola manenawa hadia ia gohitö dödö Yehowa.​—Zinunö 135:6; Yesaya 46:9, 10.

FOROMAʼÖ WA ÖʼANDRÖ SIBAI SAOHAGÖLÖ KHÖ YEHOWA BA HÖLI ANDRÖ

13. Hana wa tafabayagöʼö ita idanö?

¹³ Sambua lala si tohude si tola tafalua ba wangoromaʼö wa taʼandrö saohagölö ba höli yaʼia daʼö na talulu waʼaurida khö Yehowa ba tafabayagöʼö ita idanö. Na tafalua daʼö, taforomaö wa mamati ita ba höli, ba tana ”khö Zoaya [Yehowa] ita”. (Roma 14:8) Me tebayagö ita idanö, ba daʼö taʼandrö khö Yehowa enaʼö ibeʼe khöda ”tödö si lö sinegu”. (I Fetero 3:21) Tola ifahowuʼö ita Yehowa börö höli. Faduhu dödöda wa hasambalö ibeʼe khöda gofu hadia ia zi no ifabuʼu.​—Roma 8:32.

14. Hana wa iʼandrö khöda Yehowa enaʼö taʼomasiʼö niha böʼö?

¹⁴ Ifalua gofu hadia ia Yehowa si fao faʼomasi. Omasi ia na fefu zamosumange yaʼia laʼoʼö nifaluania ba laʼomasiʼö nawöra. (I Yohane 4:8-11) Na taʼomasiʼö niha böʼö, ba daʼö taforomaʼö wa omasi ita tobali ”ono Nama[da] andrö, si so ba zorugo”. (Mataiʼo 5:43-48) So dombua fareta sabölö ebua. Si oföna, ba wangomasiʼö Yehowa. Si dua, ba wangomasiʼö niha böʼö. (Mataiʼo 22:37-40) Sambua lala si tola tafalua ba wangoromaʼö wa taʼomasiʼö niha böʼö yaʼia daʼö na tafahaʼö ira ba duria somuso dödö sanandrösa ba Mbanua Lowalangi. Na taʼoʼö fareta Yehowa ba wangomasiʼö niha böʼö, mendrua manö ndra talifusöda si sara lala wamati, tola itugu ”moʼahonoa” waʼomasida khönia.​—I Yohane 4:12, 20.

TEʼASOGÖ HOWU-HOWU MOROI KHÖ YEHOWA BÖRÖ HÖLI

15. (a) Hadia howu-howu nitemada iadaʼa moroi khö Yehowa? (b) Hadia howu-howu nitemada dania ba zi so miföna?

¹⁵ Ifaduhuʼö khöda Yehowa wa börö me mamati ita ba höli, andrö wa tola ’teheta khöda horöda’. Sindruhu-ndruhu iʼefaʼö fefu zalada. (Baso Halöwö Zinenge 3:19-21.) Simane si no tatutunö, börö höli andrö wa so ösa niha gulidanö nisou Yehowa tobali ononia ba zorugo. Tefotöi ira niha nibayoini. (Roma 8:15-17) Ikaoni göi ”mbiri-biri böʼö” enaʼö tobali ira ösi nomonia ba gulidanö. Na no aefa moʼahonoa ira, göna ira fanandraigö safuria. Na lö faröi ira khö Yehowa, itema ira Yehowa tobali iraononia. (Roma 8:20, 21; Famaʼeleʼö 20:7-9) Lö aetu iʼomasiʼö fefu ndraononia Yehowa. Börö höli andrö wa lö aetu fahöna howu-howu. (Heberaiʼo 9:12) No ibeʼe khöda mbuala si sökhi sibai Yehowa, ba lö hadöi niha si tola mangeheta daʼö khöda.

16. Hewisa wa tola teʼefaʼö ita börö höli andrö?

¹⁶ Na no tafalalini gera-erada ba zala si no irai tafalua, lö hadöi si tola ifalua Afökha ba wanaha yaʼita tobali ösi nomo Yehowa. Mate Yesu ”iʼosamuzaigö wolau daʼö”. Ibeʼe höli si lö irai tewuʼa. (Heberaiʼo 9:24-26) Faʼamate niröi Gadamo khöda. Hizaʼi, tasöndra waʼauri si lö aetu börö wamakao si no itaögö Yesu. Höli nibeʼe Yesu zangefaʼö yaʼita moroi ba gulidanö Zatana hegöi faʼataʼu ba waʼamate.​—Heberaiʼo 2:14, 15.

17. Hadia geluaha waʼomasi Yehowa khöu?

¹⁷ Hasambalö alua hadia zi no ifabuʼu Lowalangi. Simane goi-goi si no ifakhoi sanandrösa ba dalu mbanua awö danö si lö irai tebulö, simane daʼö göi Yehowa, lö irai tebulö ia. Lö irai ibeʼe afatö dödöda. (Maleakhi 3:6) Ibeʼe khöda waʼauri sabölö sökhi Yehowa. Iforomaʼö khöda waʼomasinia. ”No aboto ba dödöda waʼomasi Lowalangi ita, ba no faduhu dödöda ba daʼö. Lowalangi ba no faʼomasi.” (I Yohane 4:16) Hasambalö alua zi no ifabuʼu. Ba zi löʼaratö, ulidanö andre tobali faradaiso si sökhi. Fefu niha sanema faʼauri, laʼoʼö Yehowa ba laʼomasiʼö nawöra. Aefa daʼö, fefu nono mbanuania si so ba zorugö hegöi si so ba gulidanö, lamane, ”Howu-howu, ba lakhömi, ba faʼatua-tua, ba fangandrö saoha gölö, ba sumange, ba faʼabölö, ba faʼabeʼe, khö Lowalangida, irugi zi lö aetu! Yaduhu.”​—Famaʼeleʼö 7:12.