FAMAHAʼÖ 10

Hadia Nifotöi Famosumange Lowalangi ba zi Sambua Omo Andrö?

Si sambua omo lafalua wamaha’ö ba nomo — Korea Selatan

Sambua fongambatö lafaha’ö ira ba Zura Ni’amoni’ö — Brasil

Samösa Zamaduhu’ö Yehowa ifaha’ö ia ba Zura Ni’amoni’ö — Australia

Si sambua omo lafatunö sambua tuho Daromali — Guinea

Iʼotarai meföna, omasi Yehowa na owulo zi sambua omo enaʼö tedou ira ba wamati ba enaʼö tedou wahuwusa ba zi sambua omo. (V Moze 6:6, 7) Daʼö mbörö wa ero sambua omo ndra Samaduhuʼö Yehowa owulo ira sakali samigu ba wamosumange Lowalangi—lafatunö daromali si faudu ba zoguna ba nösi nomora sifao faʼomuso dödö. Hewaʼae na ha yaʼugö ba nomo, tola öbeʼe ginötöu ba wamahatö yaʼugö khö Lowalangi yaʼia daʼö fahaʼö ndraʼugö samösa ba Zura Niʼamoniʼö.

Inötö wangaʼaroʼö fahuwusa khö Yehowa. ”Miʼondrasi Lowalangi ba iʼondrasi ami.” (Yakobo 4:8) Na tafahaʼö ita ba gamuata ba banifalua Yehowa moroi ba ngaʼörö Daromalinia si no tesura, awena aboto ba dödöda haniha ia. Sambua lala si sökhi na tabörögö wamosumange Lowalangi ba zi sambua omo yaʼia daʼö taʼebuaʼö li ba wombaso Sura Niʼamoniʼö. Tola laʼodaligö wombaso Sura Niʼamoniʼö si no latatugöi ba zi samigu ba Gangowuloa Faʼauri ba Fanuriaigö. Ba zi sambua omo lafalali-lali ira wombaso Sura Niʼamoniʼö, ba lafatunö hadia zi tola tobali famahaʼöra.

Inötö wangaʼaroʼö fahuwusa ba zi sambua omo. Foʼomo ira matua ba foʼomo ira alawe, satua hegöi iraono, teʼaroʼö wahuwusara ba ginötö lafahaʼö ira ba Zura Niʼamoniʼö. Daʼö ginötö sowua-wua dödö nibaloi-baloira ero samigu. Laʼodaligö hewisa ndröfi ndraono, satua zangila hadia zinangea lafatunö ba ndraonora, tola laʼogunaʼö sambua duho ba Menara Pengawal ba Sedarlah! Mazui ba situs Web jw.org. Tola öfatunö hadia gabula dödö sigöna ndraonou ba zekola ba hewisa lala enaʼö aefa ira ba gabula dödö andrö. Tola mifaigi JW Broadcasting (tv.jw.org) ba mifatunö aefa daʼö. Tola göi mifamaha ami ba zinunö niʼanunöisi ba gangowuloa ba tola göi muʼa gö maʼifu na no aefa wamahaʼö ba zi sambua omo andrö.

Lala halöwö fondrege zi sökhi na fao ita ba wamosumange Yehowa ero samigu tola te tolo fefu nösi nomoda ba wangomasiʼö Taromali Lowalangi, ba ifahowuʼö fefu ngawalö nifaluada.—Zinunö 1:1-3.

Hana wa mabeʼe ginötöma ba wamosumange Lowalangi ba zi sambua omo?
Hewisa wamalua zatua lala halöwö andre enaʼö omuso dödö nösi nomonia fefu?