Taʼameʼegö Tödö Nösi Nomoda
HANA WA MOGUNA?
Na faoma taʼameʼegö tödö nösi nomoda, tasöndra waʼahono dödö yomo ba nomo.
Iwaʼö buku Disayang Suami Sampai Mati wa na faoma laʼameʼegö tödö nawöra si sambua fongambatö, tola lafaehagö waʼomasira ”tenga dali ebua mazui dali laʼila niha sato, hizaʼi tola göi ba ngawalö zi gide-ide nifaluara bongi maʼökhö.”
Moloʼö sambua penelitian, iraono nifahaʼö ba woʼameʼegö tödö niha böʼö, lö khöra fangosebua, itugu ahatö ira khö zatuara, ba lö alio göna ira faʼafawuka wangera-ngera mazui tebulö-bulö nirasoira.
SI TOLA ÖFALUA
Mifahuhuosi yaʼami si sambua ösi nomo. Si oföna, okhögö lala wangera-ngera si tefaudu sanandrösa ba woʼameʼegö tödö niha böʼö. Si dua, sura hadia manö nitötönamö ba nösi nomou ero zamösana ba hadia zi tebai lafalua. Si tölu, mifatunöisi daʼa yaʼami si sambua ösi nomo, enaʼö faoma miʼila hadia zinangea mifalua ba woʼameʼegö tödö ösi nomomi.
Yatobali ndraʼugö duma-duma. Hadia ötahigö nösi nomomö na lafalua zala? Ba ginötö labeʼe mbua gera-erara, hadia öʼoʼaya ira? Mazui, ba ginötö fahuhuo ira khöu hadia öʼosiwawöi mazui ötaba dalu huhuora?
Tips: Forege enaʼö böi tebulö öʼameʼegö tödö ngambatöu hegöi iraonomö gofu hewisa nifaluara khöu.
Hewaʼae no faböʼö-böʼö mbua gera-erami, böi tebulö miforomaʼö wamosumange. Na so nösi nomomö si lö fao tödö, böi waʼö khönia simane, ”No toʼua yaʼugö . . . ” mazui ”Lö irai . . . ” Fehede simane daʼö tola möi fangafökhö dödöra ba abula dödö side-ide tobali ebua.
NIFALUAMA
No lahenaigö artikel, buku, brosur hegöi video si lö muʼandrö kefe ba laʼogunaʼö daʼö ira Samaduhuʼö Yehowa ba wanolo niha böʼö ba woʼameʼegö tödö ösi nomora.
KHÖ ZI NO MONGAMBATÖ: Seri artikel Bantuan untuk Keluarga tola möi fanolo khö zi no mongambatö enaʼö . . .
tobali samondrondrongo si sökhi
lö lalau zi lö hede-hede
lö faʼudu
(Ketik ”bantuan untuk keluarga” ba kotak pencarian ba jw.org/id)
KHÖ NDRA SATUA: Seri artikel Bantuan untuk Keluarga tola möi fanolo khö zatua ba wamahaʼö iraonora enaʼö tola . . .
tobali ono soloʼö-loʼö
latolo ba wangehaogö omo
laʼila lawaʼö ”tolo” hegöi ”saohagölö”
(Ketik ”membesarkan anak” mazui ”membesarkan anak remaja” ba kotak pencarian ba jw.org/id)
Faigi göi mbuku Pertanyaan Kaum Muda—Jawaban Yang Praktis Jilid 1 ba faosatö apendiks ”Pertanyaan Orang Tua”. (Ketik ”pertanyaan orang tua” ba kotak pencarian ba jw.org/id)
KHÖ NDRA SI BOHOU EBUA: Faosatö Anak Muda si so ba situs web jw.org, tesöndra ba daʼö artikel, video, hegöi lembaran kegiatan si tola manolo ndra si bohou ebua enaʼö . . .
lö lalawa zatuara, lö faʼudu ira khö gaʼara hegöi akhira
sökhi wahuhuosara khö zatua ba ginötö lafatunöisi sanandrösa ba gamakhoita yomo ba nomo
tola faduhu dödö zatuara khöra
(Ketik ”bantuan untuk anak muda” ba kotak pencarian ba jw.org/id)
Situs web jw.org tola mubokai ia secara gratis. Lö moguna öbeʼe data pribadi, mendaftar, mazui berlangganan ba wangogunaʼö situs web daʼa.