Mohalöwö ba Wondrouʼö Faʼasökhi Waradaiso ba Wamati

1, 2. Hadia geluahania ”dane-dane gahe” Lowalangi simane si so ba Gamabuʼula Li si Föföna?

IMANE Yehowa: ”Dadaomagu mbanua si yawa ba dane-dane gahegu danö.” (Yesaya 66:1) Imane nasa Lowalangi, ’Ufolakhömi nahia gahegu andrö’. (Yesaya 60:13) Hewisa wamolakhömi Lowalangi nahia gahenia andrö enaʼö itugu sökhi? Ba hadia geluahania ba niha sauri ba dane-dane gahenia andrö ba gulidanö?

² Ba mbuku Gamabuʼula Li si Föföna, ngawua wehede ”dane-dane gahe” tola göi lafoʼeluaha ia osali Lowalangi ba ndraono Gizaraʼeli me götö föna. (I Ngaʼötö 28:2; Zinunö 132:7) Sökhi sibai gosali andrö ba wamaigi Yehowa börö me ba daʼö owulo fefu niha ba wameʼe sumange khönia. Laʼogunaʼö gosali andrö ba wamosumange Yehowa ba gulidanö.

3. Hadia nifotöi angorudua ba wamosumange Lowalangi ba ginötö andre ba hamega tebörögö?

³ Hadia nifotöi angorudua ba wamosumange Lowalangi ba ginötö andre? Tenga osali simane ba götö ndraono Gizaraʼeli. Tobali, osali Lowalangi ba wamati, ba wamolakhömi töinia si töra moroi ba gödo fondrege zebua si no irai lafazökhi niha. Ba hadia geluahania gosali Lowalangi ba wamati? Eluahania goi-goi Lowalangi enaʼö tola tobali niha si fahuwu khönia ba tobali samosumange yaʼia. Andrö wa tola so goi-goi Lowalangi andre börö höli nibeʼe Yesu. Tebörögö so goi-goi andre me döfi 29 tefaudu tebayagö idanö Yesu ba tebayoini ia tobali Ere Sebua ba gosali Yehowa ba wamati.​—Heberaiʼo 9:11, 12.

4, 5. (a) Hadia zomasi lafalua soloʼö khö Yehowa moloʼö Sura Zinunö 99? (b) Hadia zinangea tasofu khöda samösa?

⁴ Taʼandrö saohagölö goi-goi Lowalangi andre ba wamosumange yaʼia. Taforomaʼö wangandrö saohagölö andrö na tadunö-dunö döi Lowalangi ba niha ba tafatunö mbualania khöda fondrege zebua yaʼia daʼö höli. Omuso dödöda börö me töra walu zuta niha Keriso si ndruhu samosumange Yehowa ero maʼökhö! Ato niha ba agama tanö böʼö sangumaʼö wa awena lafosumange Lowalangi ba zorugo dania na no aefa mate ira. Aboto ba dödö nono Mbanua Lowalangi wa moguna sibai wamosumange Lowalangi ba gulidanö iadaʼa.

⁵ Ba ginötö tabeʼe zumange khö Yehowa, no taʼoʼö simane nifalua zoloʼö khö Yehowa si lö faröi simane nidunö-dunönia ba Zinunö 99:1-3, 5. (Baso.) Niha si lö faröi andrö simane Moze, Aʼaroni, ba Samueli laʼodödögö wamalua zi no itatugöi Lowalangi me götö föna. (Zinunö 99:6, 7) Iadaʼa, fatua lö tobali Ere ba zorugo niha nibayoini si fao awö Yesu, moguna lahalö halöwö Lowalangi ua ba gosali Lowalangi ba wamati ba gulidanö andre. Ngahönö ”mbiri-biri tanö böʼö” zanolo yaʼira. (Yohane 10:16) Si dombua ngawawa andre hasambua ira ba wamosumange Yehowa. Na simanö, moguna tasofu khöda samösa, ’hadia soroi ba dödögu woloʼö amakhoita Lowalangi ba wamosumange yaʼia?’

ENAʼÖ TAʼILA HANIHA ZOHALÖWÖ BA GOSALI LOWALANGI BA WAMATI

6, 7. Hadia zalua ba niha Keriso si föföna, ba hadia zalua me 1919?

⁶ Arakhagö otu fakhe me no aefa lafasindro mbanua niha Keriso, ato niha si faröi khö Lowalangi simane si no tefaʼeleʼö. (Halöwö Zinenge 20:28-30; II Tesalonika 2:3, 4) Me no aefa ginötö daʼö, itugu abua wotatugöi haniha zamosumange Lowalangi si ndruhu. Numalö zi ngahönö fakhe awena iʼogunaʼö Yesu Yehowa ba wangombakha haniha si ndruhunia zohalöwö ba gosalinia ba wamati.

⁷ Sagötö ndröfi 1919, itugu aboto ba dödöda haniha zi ndruhunia zohalöwö ba gosali Lowalangi ba wamati. Oya gangetula si sökhi si no lahalö enaʼö sumange nibeʼera omuso dödö Yehowa. (Yesaya 4:2, 3; Maleakhi 3:1-4) Börö daʼö, itugu oroma waʼalua gangilata Waulo.

8, 9. Hadia geluaha ”waradaiso” niʼila Waulo ba gangilatania?

⁸ Ifatunö khöda gangilata Waulo ba zura II Korindro 12:1-4. (Baso.) Ba gangilata andrö iforomaʼö khö Waulo Yehowa hadia zalua ba zi so föna. Hadia geluaha ”waradaiso” niʼila Waulo andrö? Si föföna, eluahania faradaiso si lö aratö alua ba gulidanö. (Luka 23:43) Si dua, faradaiso ba wamati soʼahonoa ba gulidanö si bohou. Ba si tölu, eluahania faʼohahau dödö ba zorugo ba ”waradaiso khö Lowalangi.”​—Famaʼeleʼö 2:7.

⁹ Hana wa iwaʼö Faulo ”Daromali si tebai lawaʼö niha, si lö tola iwaʼö niha, haniha ia göi”? Börö me lö irugi inötö khönia ba wangombakha hadia geluaha zahöli-höli dödö andrö salua ba gangilatania. Awena iadaʼa ibeʼe khöda ginötö Yehowa ba wanutunö howu-howu nitema nono mbanuania iadaʼa!

10. Hana wa faböʼö ira gosali Lowalangi ba wamati faoma faradaiso ba wamati?

¹⁰ Tenga sawena tarongo nifotöi waradaiso ba wamati. Tobali, hadia zi ndruhunia geluaha waradaiso ba wamati andrö? Faradaiso ba wamati faoma osali Lowalangi ba wamati faböʼö geluahania. Osali Lowalangi ba wamati eluahania goi-goi Lowalangi ba wameʼe sumange khönia. Faradaiso ba wamati, yaʼia daʼö faʼohahau dödö nibeʼe Lowalangi ba nono mbanuania. Börö me so waradaiso ba wamati, aboto ba dödöda haniha niʼomasiʼö Lowalangi ba samosumange yaʼia.​—Maleakhi 3:18.

11. Hadia halöwö sabölö sökhi nifaluada ba ginötö andre?

¹¹ Ahöli-höli dödöda me taʼila iʼotarai ndröfi 1919 no itehegö Yehowa ba niha si lö moʼahonoa ba wamazökhi, ba wangaroʼö ba wondrouʼö faʼasökhi waradaiso ba wamati. Hadia no fao ndraʼugö ba halöwö si sökhi andrö? Hadia öʼandrö saohagölö me no falulu fohalöwö ndraʼugö khö Yehowa ba gulidanö andre ba wamosumange töinia?

INÖNÖ WAʼASÖKHI GANGOWULOANIA YEHOWA

12. Hana wa taʼila wa no alua nifaʼeleʼö Yesaya 60:17? (Faigi gambara ba ngaʼörö 11.)

¹² No ifaʼeleʼö Yesaya wa oya wamohouni sahöli-höli dödö salua ba gangowuloa Lowalangi si so ba gulidanö dania. (Baso Yesaya 60:17.) Niha Keriso si bohou ebua, mazui sawena mubayagö idanö, ha tola labaso ba larongo wamohouni salua andrö. Tobali ato ndra talifusöda si no manörö famohouni sahöli-höli dödö daʼö! Ira sawuyu Yehowa si lö faröi andrö faduhu dödöra wa Yesu zi no tobali Razo niʼogunaʼö Yehowa ba wanuturu lala ba gangowuloania! Ba ginötö ladunö-dunö khöda hadia zi no latörö ba waʼaurira, itugu aro ita ba wamati khö Yehowa.

13. Hadia zinangea tafalua moloʼö sura Zinunö 48:13-15?

¹³ Fefu niha Keriso si ndruhu si lö tola löʼö ladunö-dunö sanandrösa ba gangowuloa Yehowa. Daʼö no sambua dandra sahöli-höli dödö, hewaʼae no so ita ba gulidanö tana khö Gafökha andre, tola ohahau dödöda ba waʼafatalifusöta ba zi sagörö ulidanö. Omuso dödöda me no tola tafadunö-dunö khö ndra talifusö ba ”zi sagötö niha dania” sanandrösa ba gangowuloa Yehowa hegöi waradaiso ba wamati.​—Baso Zinunö 48:13-15.

14, 15. Hadia wamohouni salua iʼotarai ndröfi 1970, ba hewisa wa tola moguna ba gangowuloa Yehowa?

¹⁴ Ato ndra talifusöda si no manörö famohouni salua, sonönö faʼasökhi gangowuloa Yehowa ba gulidanö andre. Itörö tödöra me götö föna so nifotöi enoni, iadaʼa lafotöi ia satua sokubaloi. Ero sambua soi so Hamba Cabang, iadaʼa lafotöi ia Panitia Cabang. Mazui me inötö so nifotöi Presiden Menara Pengawal sameʼe fanuturu lala, iadaʼa lafotöi ia Satua Sondröniaʼö Zamaduhuʼö Yehowa ba zi sagörö ulidanö (Badan Pimpinan). Hewaʼae ato ira zi falulu fohalöwö ba gangowuloa andre, ha samösa niha zangai angetula na so zalua ba mbanua niha Keriso, ba gödo si so ba soi böʼö, hegöi ba gödo sebua ba zi sagörö ulidanö. Me no aefa ndröfi 1970, so zui wamohouni, tenga hasamösa zangai angetula na so zalua, tobali fefu zatua sokubaloi.

¹⁵ Hana wa moguna ba gangowuloa Yehowa wamohouni simane daʼö? Börö me famohouni andrö teʼodane-dane ba Zura Niʼamoniʼö. Iadaʼa, tenga ha samösa zangaʼi angetula, tobali angetula ndra satua sokubaloi ’si no iʼamualagö Yehowa ba niha’.​—Efeso 4:8; Gamaedola 24:6.

16, 17. Hadia wamohouni sadöni dödöu salua barö daʼa, ba hadia mbörö?

¹⁶ Faigi hadia zi bohou si no lafaböʼöni ba mbukuda iadaʼa. Börö me ba mbuku andre ibeʼe khöda wanuturu lala soguna ba waʼaurida, andrö wa omasi tabeʼe ba niha na möi ita manuriaigö. Angeraigö zui hewisa wangogunaʼöda waʼatua-tua nisöndra niha gulidanö ba wangombakha turia somuso dödö. Duma-dumania, ato niha si no tetolo börö situs jw.org niʼogunaʼöda. Fefu wamohouni andrö tola aboto ba dödöda hewisa waʼomasi Yehowa ba niha gulidanö.

¹⁷ Taʼandrö saohagölö wamohouni sawena lafalua so amakhaita ba wamalua angowuloa ero migu, irege tola so ginötöda ba wamahaʼö ba zi sambua omo, hegöi ba wamahaʼö yaʼita samösa. Taʼandrö göi saohagölö wamohouni so amakhaita ba gangowuloa sebua nifalua ero röfi. Itugu tedou ndröfi, itugu tedou wa asökhi nifalua ba gangowuloa Yehowa! Taʼandrö göi saohagölö me no itugu oya sekola wamomaha ba Daromali. Fefu wamohouni salua andre zangoromaʼö wa Yehowa zanuturu lala ba gangowuloania, ba itugu tenönö wangaʼazökhi faradaiso ba wamati khönia!

HEWISA ENAʼÖ TOLA FAO ITA BA WONDROUʼÖ FAʼASÖKHI WARADAISO BA WAMATI

18, 19. Hewisa enaʼö tola fao ita ba wondrouʼö faʼasökhi waradaiso ba wamati?

¹⁸ No ibeʼe khöda ginötö Yehowa ba wondrouʼö faʼasökhi waradaiso ba wamati. Hewisa lalania? Yaʼia na terou dödöda ba wanuriaigö Mbanua Lowalangi ba tafahaʼö fefu niha. Ero na tatolo zi samösa niha tobali ono mbanua Lowalangi, no fao ita ba wondrouʼö faʼasökhi waradaiso ba wamati.​—Yesaya 26:15; 54:2.

¹⁹ Tola fao ita ba wondrouʼö faʼasökhi waradaiso ba wamati na taʼoromaʼö gamuata si sökhi sinangea ba niha Keriso. Daʼa zi tola mondröni tödö niha ba weʼamöi ba waradaiso ba wamati. Tenga börö wa onekheda ba daromali wa tola adöni dödö niha ba gangowuloa mazui khö Yehowa hegöi Yesu, tobali börö gamuata si sökhi me omasi ita atulö ba niha.

20. Moloʼö sura Gamaedola 14:35, hadia gangetula nihalöda?

²⁰ Omuso dödö Yehowa faoma Yesu ba wamaigi me no itugu sökhi waradaiso ba wamati ba ginötö andre. Omuso dödöda börö me no fao ita ba wondrouʼö faʼasökhi waradaiso ba wamati, abölö ebua waʼomuso dödöda dania na fao ita wombaliʼö ulidanö andre tobali faradaiso. Moguna tatörö tödöda niwaʼö ba Zura Gamaedola 14:35 imane, ”Enoni satua-tua ba no faʼomasi razo.” Yaʼatua-tua ita ba taforege wohalöwö ba wondrouʼö faʼasökhi waradaiso ba wamati!