Atulöʼö Ndraʼugö khö Dalifusöu—Hewisa Lalania?

Khalaigö na toröi ndraʼugö ba Galilaia ba götö Yesu. Möi ndraʼugö ba Yeruzalema ba wamalua Owasa Nose Ndraha Geu. Afönu mbanua andrö niha samosumange Yehowa moroi ba nahia saröu. Omasiʼö öbeʼe zumange khö Yehowa. Ba weʼamöi ba gosali, öforege wanörö gotalua niha sato ba öʼohe sageu nambi. Me örugi gosali, ato göi niha somasi mameʼe sumange ba daʼö. Iadaʼa, tebeʼe khöu ginötö ba wameʼe nambi khö ndra ere. Ba ginötö daʼö, itörö tödömö wa no öʼafökhöiʼö dödö dalifusöu. Tola manö so ia ba gotalua niha sato mazui ba mbanua daʼö. Itutunö Yesu hadia zinangea öfalua. (Baso Mataiʼo 5:24.) Hewisa enaʼö tola atulö ami simane niwaʼö Yesu? Ero sambua kolom, tandrai hadia wanema li satulö.

MOGUNA . . .

• fahuhuoʼö khönia na öʼila wa so zabao dödönia khömö

• öʼatulöʼö lala wangera-ngerania na öʼila wa yaʼia zi fasala mazui alio abao dödönia

• öhaogö öfondrondrongo na ifatunö nosi dödönia khöu, hewaʼae lö aboto sibai ba dödömö daʼö. Andrö khönia waʼebolo dödö börö me no öʼafökhöiʼö dödönia mazui börö gamuatamö si lö öʼodödögö

NIFALUANIA . . .

• iʼalui niha sangoʼawögö yaʼia ba mbanua niha Keriso ba ifatunö wa no öʼafökhöiʼö dödönia

• mofönu ia khöu ba ifatunö fefu zala si no öfalua ba itötöna enaʼö öfatunö wa fasala ndraʼugö

• ifaduhuʼö wa so khöu wangide-ngideʼö hegöi faʼabarani ba wahuhuosa khönia ba iʼefaʼö zalamö soroi ba dödö

Hewaʼae lö tabeʼe gurifö si tobali sumange khö Lowalangi iadaʼa, hadia wamahaʼö nibeʼe Yesu sanandrösa ba waʼamoguna taʼatulöʼö ita khö ndra talifusöda enaʼö itema wamosumangeda Lowalangi?