Mondrara Tödö Niha Sabu Tödö

Hadia no irai lö öʼila hadia wanolo sinangea öbeʼe ba ginötö mate nösi nomo zi fahuwu khöu? Itaria lö taʼila hadia zinangea tawaʼö mazui tafalua, lua-luania talau zi lö hede-hede. Hizaʼi, so wanolo si tola tabeʼe.

Sabölö moguna yaʼia daʼö, so ndraʼugö ba gotaluara ba öbeʼe wehede fondrara dödö simane ”fao ndraʼo ba waʼabu dödö khöu”. Si toʼölönia ba mbanua böʼö, tandra wa fao ba waʼabu dödö yaʼia daʼö na ögogohe danga mazui ötalagui niha si göna faʼabu dödö. Na fahuhuo khöu niha si göna abula dödö, haogö wamondro-ndrongo. Sabölö baga na so zinangea öfalua. Simane fondrino, mozago iraonora, mazui ölului halöwö irugi ba wogoʼo. Abölö sökhi mbua-bua moroi na ha fehede.

Aefa daʼö, tola fahuhuo ndraʼugö sanandrösa ba niha si no mate andrö. Tola ötutunö gamuatania si sökhi hegöi si no irai ifalua sadöni dödöu. Na irongo daʼö niha si göna faʼabu dödö tola terara dödönia. Duma-dumania, imane Pam sanandrösa khö woʼomonia Ian si no mate önö fakhe silalö, ”Itaria lafatunö khögu niha hadia gamuata si sökhi si no irai ifalua Ian, hewaʼae lö irai uʼila. Terara dödögu wamondrongo daʼö.”

Moloʼö si no lafareso ira sagalawa sekola, ba wamobörö ato zameʼe fanolo ba niha si göna faʼabu dödö. Lö ara aefa daʼö, olifu ba arörö ira ba ngawalö halöwöra zamösana. Börö daʼö, böi aetu-aetu öʼodödögö fahuhuo khöra.a Ato niha si göna faʼabu dödö zangandrö saohagölö börö me so zondrara tödöra.

Datafaigi duma-duma zi samösa ira alawe si bohou ebua sotöi Kaori moroi ba Jepang. Abu sibai dödönia börö me no mate mamania. 15 waŵa aefa daʼö mate göi gaʼania ono alawe. Hizaʼi, itema wondrara dödö moroi khö ndra talifusöda si lö faröi. So samösa zalawa döfi moroi khö Kaori sotöi Ritsuko. Omasi ia na tobali si fahuwu khö Kaori. Imane Kaori. ”Sindruhunia, lö omuso dödögu. Lö omasido na so niha böʼö fogati mamagu, ba lö si tola mosalahini yaʼia. Hizaʼi, börö me sökhi lagu Mama Ritsuko khögu, lua-luania fahuwu sibai ndraʼaga. Fao ndraʼaga weʼamöi manuriaigö ero migu hegöi ba weʼamöi ba gangowuloa niha Keriso. Ikaoni ndraʼo ba wamadu tesi, iʼohe gögu ba oya ifaʼoheʼö zura hegöi kartu si möi fondrara dödögu. Amuata Mama Ritsuko andrö, daʼö zi tola mondrara tödögu.”

No felendrua fakhe me no mate mama Kaori. Iadaʼa, Kaori hegöi foʼomonia fao ira ba halöwö fanuriaigö safönu inötö. Imane Kaori, ”Lö aetu-aetu Mama Rutsiko wangoromaʼö faʼomasinia khögu. Ero mangawulido ba mbanuagu, ufalukhaisi ia ba omuso dödögu me fariawö ndraʼo khönia.”

Duma-duma böʼö sotema fondrara dödö yaʼia daʼö Poli, samösa Samaduhuʼö Yehowa ba Siprus. Sökhi sibai gamuata woʼomonia sotöi Sozos, samösa kubalo si sökhi ba mbanua niha Keriso. Asese ikaoni ba nomonia ndraono si lö ama, si lö ina, hegöi lakha mbanua enaʼö fariawö ba fao ira wemanga. (Yakobo 1:27) Hizaʼi, me 53 fakhe ndröfi Sozos, mate ia börö tumor otak. Imane Poli, ”No 33 fakhe me no mangowalu ndraʼaga, ba uʼamalösi sibai börö me foʼomo si lö faröi ia.”

Me no aefa lakoʼo woʼomonia, findra Poli hegöi ononia Daniel si 15 fakhe ba Kanada. Labörögö fariawö khö ndra Samaduhuʼö Yehowa ba daʼö. Itörö tödö Poli, ”Ira talifusö ba mbanua niha Keriso sawena faböbö ndraʼaga, lö laʼila hadia zi no irai alua khöma hegöi me göna khöma wangabu dödö. Hizaʼi, fariawö ira khöma ba lö aetu-aetu laforomaʼö waʼomasira moroi ba wehede hegöi ba nifaluara. Ebua sibai mböli ba dödögu wanolo nibeʼe ndra talifusöda khöma mendrua manö khö nonogu ba ginötö itörö tödönia bapania! Ira sondröniaʼö ba gangowuloa göi laʼomasiʼö sibai Daniel. Samösa moroi ba gotaluara asese ladönisi Daniel fariawö khö ndra talifusöda mazui möi fabola.” Yaʼira si darua iadaʼa, lasöndra waʼohahau dödö.

Tatu manö, oya wanolo hegöi fondrara dödö si tola tabeʼe ba niha si göna fangabu dödö. So göi khöda wondrara dödö nibeʼe Zura Niʼamoniʼö si tobali fangomuso dödöda ba zi so miföna.