FANOFU ZI BOHOU EBUA

Tehöngö ba Media Sosial—Hadia Moguna Da’ö?

Imane si samösa si bohou ebua sotöi Elaine, ”Ira awögu ba zekola so ngaotu zi fa’awö khöra ba media sosial. Umane tödögu, ’Sindruhu-ndruhu tehöngö ira!’ So khögu ma’ifu wa’afökhö dödö khöra.”

Hadia no irai alua khöu zimane da’ö? Na noa, tola itolo ndra’ugö artikel da’a ena’ö lö talafo so khöu wa’aombö dödö hadia tehöngö ndra’ugö ba media sosial mazui lö’ö.

Hadia manö lua-luania?

Imane Sura Ni’amoni’ö, ”Abölö sökhi döi si sökhi moroi ba harato sebua.” (Amaedola 22:1) Börö da’ö, lö fasala na ö’okhögö döi si sökhi mazui na ato niha somasi khöu.

Hiza’i, börö me so ba dödömö ena’ö la’omasi’ö ndra’ugö niha, tola manö öwa’ö tödöu wa lö ösöndra wa’omuso dödö na lö tehöngö ndra’ugö. Tola möi fama’alamö zimane da’ö. Imane Onya si 16 fakhe:

”So niha samalua ngawalö zi möi fama’ala ha ena’ö tehöngö ia. Duma-dumania ba zekolagu, no irai u’ila niha samazaumba ya’ia moroi ba lantai dua.”

Ena’ö tehöngö ira, so ösa zo-rekam ya’ira samösa ba ginötö lafalua ngawalö zi möi fama’ala ba si lö baga, aefa da’ö la-posting ba Internet. Duma-dumania, so ösa ndra si bohou ebua so-posting video sangoroma’ö me la’a rinso si so zat-zat si möi famunu!

Imane Sura Ni’amoni’ö: ”Böi milau hadia ia . . . ba wanuno” ya’ami.—Filifi 2:3, Lembaga Alkitab Indonesia 2007.

Angeragö:

Molo’ö ya’ugö, hawa’amoguna tehöngö ba media sosial?
Hadia öfa’ala mbotomö hegöi fa’aurimö ha ena’ö la’ame’egö tödö ba la’omasi’ö ndra’ugö ira awöu?

Niwa’ö ndra awö-awöu

”So lua-luania na tatötöna ena’ö la’omasi’ö ita niha sato. Niha sangokhögö lala wangera-ngera simane da’ö, tola lahalö gangetula si lö sökhi. Lawa’ö tödöra wa tola tehöngö ira börö lagu wahuhuosa, model mbaru hegöi amuatara. Tola manö maniasa ndra’ugö na öfalua ngawalö hadia ia zi lö tefaudu molo’ö si no ötatugöi ha ena’ö la’omasi’ö ndra’ugö niha sato.”—Leianna.

”Hulö zi tehöngö ira”

Lö fefu niha somasi tehöngö lafalua ngawalö zi möi fama’ala. Imane Erica si 22 fakhe:

”Omasi niha la-posting kodara si baga, ena’ö oroma ba niha bö’ö wa ato nawöra sasese fao khöra ba wanörö-nörö. Amaedola no tehöngö ira ba wamaigi niha.”

So göi niha somasi falimo ha ena’ö tehöngö ira. Imane Cara si 15 fakhe:

”So niha sokoda ya’ia samösa hulö na ba acara so ia, hiza’i sindruhunia ba nomo so ia.”

No göi irai ifalua da’ö Matthew si 22 fakhe. Imane:

”No irai ube’e kodagu, aefa da’ö ube’e keterangan wa nahia da’ö ba Hili Everest. Sindruhunia sa lö irai möido ba Asia!”

Imane Sura Ni’amoni’ö: ”Omasiga matörö zindruhu ba ngawalö hadia ia.”—Heberai’o 13:18.

Angeragö:

Hadia no irai falimo ndra’ugö ba media sosial ha ena’ö monönö zo-like hegöi follower-mö?
Hadia oroma moroi ba koda hegöi bua gera-era si no öbe’e ba media sosial haniha ndra’ugö sindruhunia hegöi angetula nihalömö?

Niwa’ö ndra awö-awöu

”So ösa niha somasi mamalua hadia ia ha ena’ö ato zo-like ya’ira. Hiza’i, hadia zomasi’ö lawa’ö khöu niha? Hadia niha si lö baga fehede ba fonukha mazui niha sangokhögö bua-bua si sökhi? Hadia sohöni-höni okhöta mazui niha so’ame’egö tödö niha bö’ö? Tatu omuso dödöda na la’omasi’ö ita niha sato. Hiza’i, moguna tatatugöi wa la’omasi’ö ita niha sato börö zi sökhi nifaluada.”—Hannah.

**Hawa’amoguna sibai wa’ato follower hegöi like ba media sosial?**

Ato niha somasi tehöngö ba media sosial laforege ena’ö ato follower hegöi so-like ya’ira. No göi irai ifalua da’ö Matthew si no mututunö moroi yawa mege. Imane:

”Asese usofu ba niha, ’Hauga sa’ae follower-mö?’ mazui ’Hadauga wondrege zato niha si no irai mo-like kodamö?’ Ena’ö monönö follower-gu, u-follow göi niha si lö u’ila. Ba utötöna ena’ö la-follow ndra’o. Media sosial andrö mbörö wa omasido itugu tehöngö.”

Angorudua gambara: 1. Samösa nono alawe si bohou ebua no iboho mbawa me ifaigi zo-like ya’ia ba media sosial. 2. Ono alawe no mege ia sambua mako cokelat. 3. Ibabaya dalunia ono alawe no mege ba abu dödönia. — Amaedola gö si lö baga na tehöngö ita ba media sosial. Ha fa’ami sabata hiza’i lö möi fangomuso dödö

So göi niha sanguma’ö wa pade ira na ato zo-like ba so-follow ya’ira. Imane Maria si 25 fakhe:

”Na so ndra alawe so-posting kodania ba ha ma’ifu zo-like, hulö lö baga ia worasoinia. Ato göi niha sangokhögö lala wangera-ngera simane da’ö, hiza’i sindruhunia lö atulö da’ö. Niha samalua da’ö, hulö no la-bully ira samösa.”

Imane Sura Ni’amoni’ö: ”Böi fayawa ita, fahulö, mazui afökhö dödöda khö nawöda.”—Galatia 5:26.

Angeragö:

Me no ö’oguna’ö media sosial, hadia asese öfaehusi ndra’ugö moroi ba niha bö’ö?
Hezo zabölö moguna: fangodödögömö ba wanöndra follower mazui ba wanöndra sindruhu si fahuwu so’ame’egö tödö ya’ugö?

Niwa’ö ndra awö-awöu

”Ena’ö tehöngö ita ba media sosial, moguna ta’o’ö zomasi niha sato. Eluahania moguna tobali ita simane niha bö’ö. Lua-luania, asese ta’angeragö wangera-ngera niha bö’ö sanandrösa khöda hegöi lala ba wangomusoi’ö tödöra. Sindruhu sa, sinangea omasi ita na ato zangomasi’ö ya’ita. Hiza’i, tola manö te’ala ita na ta’osambua’ö dödöda ena’ö tehöngö.”—Joshua.

Böi hulö zangide-ngide’ö ndra’ugö sindruhunia sa so wayawasa

So ösa niha sangarö-ngarö manö, hiza’i sindruhunia ifalua da’ö börö me so khönia wayawasa. Hadia no irai falukha’ö ba niha simane da’ö?

”Omasi sibai ndra awö-awögu fao ira ba motogu börö me moto si bohou motogu!”
”Afölido na lasuno-suno manö ndra’o börö me afuodo!”

Hulö so wangide-ngide’ö ba niha sanguma’ö da’ö, sindruhunia sa, so khönia wayawasa.

Lua-luania: Na hulö zangide-ngide’ö ita sindruhunia sa so khöda wayawasa, la’ila niha wa tenga soroi ba dödöda wehede da’ö. Niha samalua simane da’ö abölö lö la’omasi’ö ia moroi ba niha sangoroma’ö fa’asiliyawa.

Na ö-posting koda mazui komentar ba media sosial, böi hulö zangide-ngide’ö ndra’ugö sindruhunia sa so wayawasa. O’ö mene-mene Zura Ni’amoni’ö: ”Sökhi na niha böʼö zanuno yaʼugö moroi na bawau samösa.”—Amaedola 27:2.