”Hasambalö Ifuli Auri Dalifusömö”!

1. Hewisa zi samösa iraono wangoromaʼö wa mamati ia ba dötönafö fanusugi?

SO SAMÖSA ndraono töinia Matthew, abölö-bölö sibai wökhönia irege hauga kali muʼoperasi ia. Me fitu fakhe ndröfinia, yaʼia hegöi ösi nomonia lafaigi sambua acara ero waŵa ba JW Broadcasting^®. Ba gafuriata video, so video musik sanandrösa ba wotemaʼö niha nisusugi.b Me no aefa lafaigi video andrö, ifahatö ia Matthew khö zatuania, igogohe dangara, ba imane, ”He Pa, he Ma, böi aombö dödömi he. Na mate ndraʼo, hasambalö mususugi dania simane ba video daʼö. Mibaloi manö irege tesusugi ndraʼo.” Khalaigö hawaʼomuso dödö zatua no mege me laʼila wa mamati sibai nonora ba dötönafö fanusugi.

2-3. Hana wa böi taböhöli woʼangerönusi mbuʼusa li Lowalangi sanandrösa ba wanusugi?

² Böi taböhöli woʼangerönusi mbuʼusa li Lowalangi sanandrösa ba wanusugi. (Yoh. 5:28, 29) Hadia mbörö? Börö me lö taʼila hadia manö dania zalua khöda. Tola manö ba zi lö tadöna-döna göna ita fökhö si möi famunuda mazui mate niha niʼomasiʼöda. (Sango. 9:11; Yak. 4:13, 14) Tötönafö fanusugi zi tola manolo yaʼita enaʼö anau gölöda wanaögö salua andrö fefu. (1 Te. 4:13) Ifaduhuʼö ba dödöda Sura Niʼamoniʼö, wa iʼomasiʼö sibai ita Amada si so ba zorugo, ba aboto ba dödönia haniha ita. (Luk. 12:7) Börö me iʼomasiʼö sibai ita, andrö wa ibeʼe khöda ginötö enaʼö tola auri ita sagötö faʼara. Hewaʼae na mate ita, tola ifuli isusugi ba ifangawuli fefu gamuatada hegöi era-erada börö me aboto ba dödönia ita.

³ Ba artikel daʼa, tatutunö hadia mbörö wa tola tafaduhusi tödö dötönafö fanusugi. Aefa daʼö, tatutunö sambua zalua si möi fangaro wamatida nisura ba Zura Niʼamoniʼö. Ba ginötö daʼö, ifaʼema Yesu ngawua wehede si tobali tuho artikel daʼa: ”Hasambalö ifuli auri dalifusömö.” (Yoh. 11:23) Tatutunö göi hadia zi tola tafalua enaʼö itugu faduhu dödöda ba dötönafö fanusugi.

HANA WA TOLA MUFADUHUSI TÖDÖ DÖTÖNAFÖ FANUSUGI

4. Enaʼö tola faduhu dödöda ba zi sambua buʼusa li, hadia zinangea tafaduhusi tödö? Beʼe duma-duma.

⁴ Enaʼö tola faduhu dödöda ba zi sambua buʼusa li, moguna faduhu dödöda wa niha samaʼema buʼusa li andrö sindruhu-ndruhu omasi ia ba tola ifalua nifabuʼunia. Khalaigö na tekiko nomomö börö nangi sabölö-bölö. Aefa daʼö, tohare nawömö ba ifabuʼu wa itolo ndraʼugö ba wangehaogö omomö. Öʼila wa soroi ba dödönia ba wanolo yaʼugö. Ba na sindruhu-ndruhu onekhe ia ba wangehaogö omo, ba so khönia fakake niʼogunaʼö ba wamazökhi omo, tatu faduhu dödömö wa hasambalö ifalua zi no ifabuʼu. Daʼö mbörö wa öfaduhusi tödö mbuʼusa li andrö. Hewisa mbuʼusa li Lowalangi sanandrösa ba wanusugi? Hadia omasi ia ba tola ifalua mbuʼusa linia andrö?

5-6. Hezo tola taʼila wa sindruhu-ndruhu omasi Yehowa ba wanusugi niha si no mate?

⁵ Hadia omasi Yehowa ba wanusugi niha si no mate? Omasi. Ibeʼe wanuturu lala ba zi hadauga niha sanura Sura Niʼamoniʼö ba wanura buʼusa linia sanandrösa ba wanusugi. (Yes. 26:19; Hos. 13:14; Fam. 20:11-13) Na no fawuʼu li Yehowa, hasambalö ifalua daʼö. (Yos. 23:14) Ba omasi ia na alio isusugi niha si no mate. Hezo tola taʼila daʼö?

⁶ Angeragö atö wehede Yobi. Hewaʼae na mate ia, omasi sibai Yehowa na ifuli auri ia. (Yob. 14:14, 15) Ba simane daʼö göi nirasoi Yehowa ba nono mbanuania si no mate. Omasi sibai ia ba wanusugi yaʼira enaʼö laʼokhögö mboto si sökhi ba larasoi waʼohahau dödö. Hewisa niha si miliaran faʼato si lö fakhamö mamahaʼö yaʼira sanandrösa khö Yehowa fatua lö mate ira? Lowalangida sebua faʼomasi, omasi göi ia ba wanusugi yaʼira. (Hal. 24:15) Omasi ia na tebeʼe khöra ginötö enaʼö tola tobali si fahuwu khönia ba auri ira sagötö faʼara ba gulidanö. (Yoh. 3:16) Ba daʼa oroma, wa sindruhu-ndruhu omasi Yehowa ba wanusugi niha si no mate.

7-8. Hana wa faduhu dödöda wa tola isusugi niha si no mate Yehowa?

⁷ Hadia tola göi isusugi niha si no mate Yehowa? Tola, börö me yaʼia andrö no ’Fondrege Zabölö’. (Fam. 1:8) Tola ikalaisi fefu nudunia, tefarahu ba daʼö faʼamate. (1 Ko. 15:26) Tola möi fondrara dödöda daʼa ba fangabölöda. Nehegö zi no irai alua khö dalifusöda ira alawe sotöi Emma Arnold. Yaʼia hegöi ösi nomonia, göna ira fanandraigö ba wamati sabölö-bölö sagötö Wasuwöta Gulidanö si II. Mate niha niʼomasiʼöra ba kamp konsentrasi Nazi. Irara dödö nononia ono alawe Emma, ifasugi ba dödönia wa tenga siʼogötöʼö niha ba waʼamate, börö me abölö Lowalangi moroi ba waʼamate. Lö hadöi fondrege zabölö baero Yehowa. Lowalangida sebua kuaso zomböwöi faʼauri, daʼö mbörö wa tola ibeʼe waʼauri ba niha si no mate.

⁸ Hadia nasa zamaduhuʼö ba dödöda wa tola isusugi niha si no mate Lowalangi? Tola ifuli itörö tödö Lowalangi gofu hadia ia. Tola ikaoni ndröfi moloʼö töira zamösana. (Yes. 40:26) Baero daʼö, tola itörö tödönia fefu niha si no mate. (Yob. 14:13; Luk. 20:37, 38) Lö olifu ia irugi ba wondrege zide-ide sanandrösa ba niha nisusuginia, tefarahu ba daʼö zikhala, amuata, si no irai alua, hegöi fangera-ngerara.

9. Hana wa faduhu dödömö ba mbuʼusa li Yehowa sanandrösa ba wanusugi?

⁹ Tola faduhu dödöda ba mbuʼusa li Yehowa sanandrösa ba wanusugi, börö me taʼila wa omasi ia ba tola ifalua daʼö. Nehegö hadia dane-dane tanö böʼö wa tola mufaduhusi tödö mbuʼusa li Lowalangi sanandrösa ba wanusugi: No irai isusugi niha si no mate Yehowa. Ba götö Zura Niʼamoniʼö, no ibeʼe waʼabölö ba zi hadauga genoninia, tefarahu ba daʼö Yesu, ba wanusugi niha si no mate. Datatutunö sambua wanusugi nifalua Yesu nitutunö ba Yohane faza 11.

MATE ZI FAHUWU KHÖ YESU NIʼOMASIʼÖNIA

10. Hadia zalua ba Mbetania me manuriaigö Yesu ba zi tambai Nungo Nidanö Yoridano, ba hadia nifaluania? (Yohane 11:1-3)

¹⁰ Baso Yohane 11:1-3. Khalaigö hadia zalua ba Mbetania ba gangohorita ndröfi 32 M. Ba mbanua daʼö so ösa zi fahuwu khö Yesu, yaʼia daʼö Lazaro ba darua dalifusönia alawe sotöi Maria ba Marata. (Luk. 10:38-42) Mofökhö Lazaro, ba abu sibai dödö dalifusönia alawe si darua. Börö daʼö, lafaʼoheʼö goroisa khö Yesu. Me luo daʼö, ba zi tambai Nungo Nidanö Yoridano so Yesu, arakhagö dua hari fofanö iʼotarai Mbetania. (Yoh. 10:40) Alimagö sibai, me ofeta goroisa andrö khö Yesu, no saʼae mate Lazaro. Hewaʼae simanö, toröi nasa Yesu ba daʼö dua hari tö. Me no aefa daʼö, awena numalö ia ba Mbetania. Omasi Yesu ba wamalua hadia ia ba wanolo si fahuwu khönia hegöi ba wamolakhömi Lowalangi.—Yoh. 11:4, 6, 11, 17.

11. Hadia wamahaʼö si tola tahalö sanandrösa ba wahuwusa niforomaʼö Yesu?

¹¹ Moroi ba zalua andre, tola tafahaʼö ita sanandrösa ba wahuwusa. Angeragö atö: Me lafaʼoheʼö goroisa khö Yesu ira Maria hegöi Marata, lö laʼandrö khönia weʼamöi ba Mbetania. Ha daʼö niwaʼöra khö Yesu wa mofökhö zi fahuwu khöu niʼomasiʼöu. (Yoh. 11:3) Me no mate Lazaro, tola manö isusugi ia Yesu moroi ba zaröu. Hizaʼi, ihalö gangetula Yesu weʼamöi ba Mbetania enaʼö tola fao ia khö zi fahuwu khönia, Maria hegöi Marata. Hadia so zi fahuwu khöu si tola manolo yaʼugö hewaʼae na lö niʼandrömö khönia wanolo? Na so, eluahania yaʼia andrö si fahuwu si tola muʼodaligö na alua khöu wangabu dödö. (Amd. 17:17) Dataforege woloʼö duma-duma Yesu enaʼö tobali ita si fahuwu simane daʼö. Iadaʼa, datatutunö hadia zalua aefa daʼö.

12. Hadia nifabuʼu Yesu khö Marata, ba hana wa tola faduhu dödö Marata wa hasambalö alua daʼö? (Yohane 11:23-26)

¹² Baso Yohane 11:23-26. Me iʼila Marata wa no ahatö Yesu ba Mbetania, iʼanemaiʼö ifalukhaisi ba imane, ”He Soʼaya, na so menaʼö ndraʼugö ba daʼa, ba lö mate dalifusögu.” (Yoh. 11:21) Sindruhu sa, tola manö ifadöhö Lazaro Yesu. Hizaʼi, omasi ia ba wamalua si töra moroi ba daʼö. Ifabuʼu, ”Hasambalö ifuli auri dalifusömö.” Ifaduhuʼö ba dödö Marata wa tola ifalua mbuʼusa linia me imane, ”Yaʼodo wemaoso ba faʼauri.” Sindruhu-ndruhu iʼokhögö waʼabölö Yesu moroi khö Lowalangi ba wanusugi niha si no mate. No irai isusugi nono alawe sawena sibai mate. No göi irai isusugi nono matua si bohou ebua lö ara me no aefa mate nono andrö. (Luk. 7:11-15; 8:49-55) Hizaʼi, hadia tola isusugi zi no öfa hari no mate ba si no ibörögö obou mboto?

”HE LAZARO, AE BAERO!”

13. Simane nisura ba Yohane 11:32-35, hadia nifalua Yesu me iʼila mege-ege Maria hegöi niha tanö böʼö? (Faigi göi gambara.)

¹³ Baso Yohane 11:32-35. Khalaigö hadia zalua aefa daʼö. Talifusö alawe Lazaro tanö böʼö sotöi Maria, möi göi ia wamalukhaisi Yesu. Ifaʼema göi wehede si fagölö simane nifaʼema dalifusönia alawe. Imane, ”He Soʼaya, na so menaʼö ndraʼugö ba daʼa, ba lö mate dalifusögu.” Abu sibai dödönia hegöi si fao khönia. Me iʼila ba irongo mege-ege ira, fao göi Yesu ba waʼabu dödö. Börö waʼahakhö dödönia zi fahuwu khönia, ibörögö meʼe Yesu. Aboto ba dödönia waʼafökhö nirasoira ba ginötö mate niha niʼomasiʼöra. Börö daʼö, omasi sibai ia ba wangeheta si tobali mbörö wangabu dödö nirasoira.

14. Hadia wamahaʼö si tola tahalö sanandrösa khö Yehowa ba nifalua Yesu me iʼila mege-ege Maria?

¹⁴ Tola tafahaʼö ita sanandrösa ba waʼahakhö dödö Yehowa moroi ba nifalua Yesu me iʼila mege-ege Maria. Hadia mbörö? Simane nitutunöda ba artikel si no aefa, moʼahonoa woloʼö Yesu lala wangera-ngera hegöi nirasoi Namania. (Yoh. 12:45) Meʼe Yesu börö me abu sibai dödönia me iʼila waʼafökhö nirasoi ndra si fahuwu khönia si göna fangabu dödö. Ba faduhu dödöda waʼabu sibai dödö Yehowa na iʼila göna ita fangabu dödö börö me mate niha niʼomasiʼöda. (Si. 56:8) Tatu omasiʼö na ahatö khö Lowalangida sahakhö tödö.

15. Simane nitutunö ba Yohane 11:41-44, hadia zalua ba lewatö Lazaro? (Faigi göi gambara.)

¹⁵ Baso Yohane 11:41-44. Me irugi Yesu ba lewatö Lazaro, iʼandrö ba niha enaʼö laheta gara sombalugö lewatö andrö. Ba wamobörö, lö fatema khö Marata börö me iʼila wa no saʼae aböu mboto Lazaro. Hizaʼi imane khönia Yesu, ”Hadia tenga no uwaʼö, na faduhu dödöu hasambalö öʼila lakhömi Lowalangi?” (Yoh. 11:39, 40) Aefa daʼö, ifaöga ia Yesu ba ilau mangandrö föna niha sato. Omasi Yesu na aboto ba dödö niha fefu, wa nifaluania andrö dania tola alua ia börö waʼabölö moroi khö Yehowa. Aefa daʼö, ebua li Yesu weʼao imane, ”He Lazaro, ae baero!” Ba möi baero Lazaro moroi ba lewatönia. Ifalua dandra sahöli-höli dödö Yesu si tebai ba wamaigi niha sato.—Faigi keterangan tambahan untuk Yohanes 11:17.

16. Hana wa teʼaroʼö wamatida ba dötönafö fanusugi salua nisura ba Yohane faza 11?

¹⁶ Salua nisura ba Yohane faza 11 möi fangaro wamatida ba dötönafö fanusugi. Hadia mbörö? Törö tödöu mbuʼusa li Yesu khö Marata: ”Hasambalö ifuli auri dalifusömö.” (Yoh. 11:23) Simane Amania, omasi Yesu ba tola ifalua mbuʼusa li andrö. Me meʼe Yesu, daʼö zangoromaʼö wa omasi sibai ia wanusugi niha si no mate, ba iheta wangabu dödö nirasoi niha. Me möi baero Lazaro moroi ba lewatönia, daʼö zangoromaʼö wa tola isusugi niha si no mate. Angeragö hadia niwaʼö Yesu khö Marata me imane, ”Hadia tenga no uwaʼö, na faduhu dödöu hasambalö öʼila lakhömi Lowalangi?” (Yoh. 11:40) Börö daʼö, oya dane-dane waʼafaduhu dödöda wa hasambalö ifalua mbuʼusa linia Lowalangi ba wanusugi niha si no mate. Iadaʼa, hadia zinangea tafalua enaʼö itugu faduhu dödöda ba dötönafö fanusugi andrö?

HEWISA ENAʼÖ ITUGU FADUHU DÖDÖDA BA DÖTÖNAFÖ FANUSUGI?

17. Hadia zinangea tatörö tödöda na taʼangerönusi waö-waö ba Zura Niʼamoniʼö sanandrösa ba wanusugi?

¹⁷ Baso ba angerönusi wanusugi si no irai alua ba götö föna. So walu ngawua wanusugi si no irai alua ba gulidanö nitutunö ba Zura Niʼamoniʼö.c Haogö fahaʼö ndraʼugö ba zi no irai alua andrö. Törö tödöu wa ira matua, ira alawe hegöi iraono nisusugi andrö, sindruhu-ndruhu so ira. Alui wamahaʼö si tola öhalö ba zalua andrö fefu. Angerönusi wanusugi si no irai alua, sangoromaʼö wa omasi sibai Lowalangi ba wanusugi niha si no mate, ba tola ifalua daʼö. Si oföna, angerönusi wanusugi sabölö tohude si no irai alua, yaʼia daʼö fanusugi Yesu. Törö tödöu wa ato sibai niha sangila wa no tesusugi Yesu, daʼö mbörö wa itugu faduhu dödöda ba dötönafö fanusugi.—1 Ko. 15:3-6, 20-22.

18. Hewisa enaʼö tatema mbua ba zinunö nihenaigö organisasida sanandrösa ba wanusugi? (Faigi göi nisura ba gahe zura.)

¹⁸ Haogö wangogunaʼö ”zinunö ba wamati” sanutunö sanandrösa ba dötönafö fanusugi.d (Ef. 5:19) Tola itugu faduhu dödöda ba teʼaroʼö wamatida sanandrösa ba dötönafö fanusugi börö zinunö andrö. Fondrondrongo zinunönia, ba haogö fahaʼö ndraʼugö ba woʼanunöisi daʼö. Tutunö liriknia na öfalua wamahaʼö ba zi sambua omo. Töngöni ba angerönusi liriknia enaʼö tetanögö daʼö ba dödö hegöi ba wangera-ngerau. Na öfalua daʼö, tola terara dödöu ba teʼabölöʼö ndraʼugö na so gabula dödö si möi famaʼala faʼauriu, mazui na mate niha niʼomasiʼöu. Tola itolo ndraʼugö eheha niʼamoniʼö moroi khö Yehowa enaʼö itörö tödöu zinunö andrö.

19. Hadia manö zi tola ökhalaigö sanandrösa ba dötönafö fanusugi? (Faigi kotak ”Hadia Zomasiʼö Ösofu Khöra?”)

¹⁹ Khalaigö so ndraʼugö ba Waradaiso. No ibeʼe khöda waʼabölö Yehowa enaʼö tola takhalaigö hadia nirasoida dania ba gulidanö si bohou. Imane si samösa dalifusöda ira alawe, ”Asese uhorigö ginötögu ba wokhalaigö na so ndraʼo ba gulidanö si bohou, irege hulö tola uʼago hua mbunga mawar si so ba Waradaiso.” Khalaigö me falukha ndraʼugö ba ndra matua mazui ira alawe si lö faröi ba götö Zura Niʼamoniʼö. Haniha zomasiʼö öfalukhaisi? Hadia zomasiʼö ösofu khönia? Khalaigö göi me tola ifuli falukhaʼö ba niha niʼomasiʼöu si no mate. Angeragö hadia zomasiʼö öfatunö khöra. Ba khalaigö hadia nirasoimö me tola öʼila ba ötalagui ira.

20. Hadia gangetulada?

²⁰ Tatu taʼandrö sibai saohagölö ba dötönafö fanusugi nifabuʼu Yehowa. Tola tafaduhusi tödö mbuʼusa li daʼö börö me omasi Yehowa ba tola ifalua mbuʼusa linia andrö. Börö daʼö, datahalö gangetula enaʼö böi taböhöli wangaroʼö famatida ba dötönafö sebua böli andre. Na tafalua daʼö, itugu ahatö ita khö Lowalangida, sangumaʼö khöda, ’Hasambalö ifuli auri niha niʼomasiʼöu!’