Hadia Lua-Luania Teknologi ba Wangera-ngeramö?

Enaʼö tola mofozu ita ba sekola, ba nahia wohalöwö mazui ba danö böʼönia, böi taböhöli wamahaʼö yaʼita. Börö teknologi, aoha khöda wanöndra informasi iadaʼa hewaʼae ba nomo so ita.

Hizaʼi, niha sangodaligö teknologi si toʼölönia . . .

lö isöndra waʼahono dödö na mombaso ia.
mangoloi dödönia wohalöwö.
lö fataha ia na ha yaʼia.

SINANGEA ÖFALUA

Samösa nono alawe si bohou ebua, isamuzaigö wombambaya halöwönia. Ifahaʼö ia ba fa-SMS göi ia ba HP, aefa daʼö fa-video call ia khö nawönia ba laptop. So ba mbuku wamahaʼönia andrö hegöi ba komputer.

BA GINÖTÖ MOMBASO

Si toʼölönia, niha sasese mangogunaʼö HP, lö khöra fanaha tödö ba ginötö labaso sambua artikel mazui buku. Laʼaliokö wombaso ha enaʼö laʼila hadia duhonia.

Sindruhu sa, na ha mangalui informasi ita, so gunania khöda na haʼasala tabaso. Hizaʼi, enaʼö sindruhu-ndruhu aboto ba dödöda duho nibasoda, böi haʼasala tabaso.

ANGERAGÖ: Na öbaso artikel sanau, hawaʼoya informasi nisöndramö? Hadia mbua nitemamö na lö mangaösö-ngaösö ndraʼugö ba wombaso?—AMAEDOLA 18:15.

OSAMBUAʼÖ WANGERA-NGERAMÖ

So zangumaʼö wa tola musamuzaigö wamalua halöwö mato hauga ngawalö (multitasking) börö teknologi, duma-dumania mombaso ba fa-SMS göi. Hizaʼi, sindruhunia tobali famangoloi wangera-ngerara daʼö. Lua-luania, te lö baga wamaluara halöwö si dombua ngawalö andrö, mendrua manö na daʼö iʼandrö enaʼö taʼosambuaʼö wangera-ngerada.

Sindruhu sa, moguna wamorege enaʼö teʼosambuaʼö dödöda ba lö mangoloi wangera-ngerada. Hizaʼi, tenga zaya-zaya gölö na mufalua daʼö. Imane si bohou ebua sotöi Grace, ”Lö oya zi fasala ba halöwöda ba lö baku gutoda. Moloʼö yaʼia, abölö baga na muföfögö wamalua halöwö moroi na tobali multitasking.

ANGERAGÖ: Hadia börö teknologi wa lö teʼosambuaʼö wangera-ngeramö ba asese olifu ndraʼugö ba zi no öfahaʼö yaʼugö?—AMAEDOLA 17:24.

BA ZI HA YAʼUGÖ

So niha si lö fataögö na ha yaʼia. Andrö wa laʼogunaʼö teknologi enaʼö lö aföli ira. Imane Olivia, ”Alio sibai aföli ndraʼo na lö ufaigi HP-gu ba zi 15 menit, tablet mazui TV.

Hizaʼi, gofu hewisa waʼalawa ndröfida, moguna khöda ginötö ba zi hayaʼi-yaʼita ba wamalua foʼangerönusi mazui talau mangera-ngera.

ANGERAGÖ: Ba ginötö ha yaʼugö, hadia öʼogunaʼö ginötö daʼö ba wamalua foʼangerönusi?—1 TIMOTEO 4:15.

SI TOLA ÖFALUA

FARESO HEWISA WANGOGUNAʼÖMÖ TEKNOLOGI

Hewisa enaʼö tola öʼogunaʼö teknologi ba wondrouʼö faʼonekhemö? Hadia zinangea ötimbagö enaʼö lö ifakiko lala wangera-ngeramö teknologi ba wangosambuaʼö tödömö hegöi ba wamomaha yaʼugö ba ngawalö zi bohou?

GOI-GOI ZURA NIʼAMONIʼÖ: ”Rorogö waʼatua-tua ba fangera-ngera si sökhi.”—AMAEDOLA 3:21.

SOFU KHÖU SAMÖSA . . .

Hadia abua khögu wangosambuaʼö fangera-ngeragu na ubaso teks sanau ba HP? Na yaʼia, hadia mbörö wa mangoloi wangera-ngeragu?
Hadia zinangea ufalua enaʼö lö mangoloi wangera-ngeragu?

Tips: Tandraigö fahaʼö ndraʼugö ba wombaso teks sagadogo-dogo. Aefa daʼö, baso teks sabölö anau. Enaʼö lö mangoloi wangera-ngeramö, ebuaʼö limö wombaso.

Hadia zinangea ubulöʼö enaʼö ibönö ginötögu ba woʼangerönusi hadia zi no ubaso?

Tips: Na no aefa mombasoʼö, ogunaʼö ginötö fulu menit ba woʼangeragö zi no öbaso.

Hawaʼara ginötönia adöni dödögu ba wamalua multitasking?
Hadia zinangea ubulöʼö enaʼö lö ufalua multitasking?

Tips: Na mombasoʼö, heta ngawalö zi tola mameʼe khöu famangoloi dödö.

GOI-GOI ZURA ZURA NIʼAMONIʼÖ: ”Alui waʼatua-tua ba alui waʼaboto ba dödö.”—AMAEDOLA 4:5.