ULIDANÖ SAFÖNU ABULA DÖDÖ

4 | Böi Aetu Dötönaföu

HANA WA MOGUNA

Faʼaombö-aombö dödö nirasoi zi samösa niha börö gabula dödö salua ba gulidanö andre, tola iʼasogö wökhö he ba mboto hegöi ba wangera-ngera. Ato niha sorasoi wa lö saʼae tötönaföra, hulö no ilangögö ira abula dödö. Hadia nifaluara?

So ösa niha si lö moʼangeragö faʼaurinia ba zi so miföna.
So göi zamadu-madu tuo mazui samake narkoba enaʼö hulö zi lö abula dödö ira.
So göi zangumaʼö, ”Hadia guna waʼauri andre?” ba lahalö gangetula wamunu yaʼira samösa.

Sinangea Öʼila

So ösa gabula dödö salua khöu te lö arara, ba tola manö taya ba zi sabata.
Hewaʼae na lö iʼila aetu gabula dödöu, so nasa zi tola öfalua enaʼö anau gölöu ba wanaögö yaʼia.
No ihenaigö khöda Sura Niʼamoniʼö lala sabölö sökhi enaʼö aheta ita ba gabula dödö. Hasambalö so wanötönada ba zi so miföna.

Si Tola Öfalua

Imane Sura Niʼamoniʼö: ”Böi mibusi tödö ngaluo mahemolu, börö me mahemolu so zui waʼaombö dödö. Ero maʼökhö oi so gabula dödö.”—Mataiʼo 6:34.

Tobönö salua ba zi sahari öʼangeragö. Böi talafo aombösi tödö ngawalö zi lö salua irege lö öʼila öbabaya halöwömö.

Na talafo öʼaombösi tödö ngawalö zi lö salua, itugu fawuka gera-erau ba aetu wanötönau.

LALA BA WANAÖGÖ—Fanuturu Lala

OSAMBUAʼÖ GERA-ERAMÖ BA NGAWALÖ ZI SÖKHI

Imane Sura Niʼamoniʼö: ”Lö hadöi ngaluo si sökhi ba niha si tosasa, hizaʼi lö tebulö mangowasa niha somuso tödö.” (Amaedola 15:15) Na lö khöu fangera-ngera satulö, tola manö abua khöu ba wangasiwai abula dödö salua. Hizaʼi, na öʼokhögö wangera-ngera satulö, tola manö itugu aoha khöu wanöndra lala wangasiwai yaʼia.

Böi aseseʼö faigi-faigi ba öʼangera-ngeragö duria si lö sökhi.
Ero bongi, angeragö mato dombua mazui tölu ngawalö hadia niʼandröu saohagölö ba zi maʼökhö daʼö.
Ero maʼökhö, sura hadia zinangea öfalua. Na öʼasiwai halöwö sabua, tandraigö sura hadia manö zinangea öfalua ba wangasiwai halöwö daʼö. Na öfalua daʼö, tola öʼila ba zi bonginia hadia manö zi no mofozu nifaluamö.

ANDRÖ WANOLO

Imane Sura Niʼamoniʼö: ”Niha sangoniagö yaʼia . . . fatuwu khönia fefu waʼatua-tua.” (Amaedola 18:1) Na aekhu ndraʼugö ba dögi sabakha, tebai öfuliʼö samösa yawa, moguna khöu wanolo moroi ba niha böʼö.

Andrö wanolo moroi ba nösi nomou mazui si fahuwu khöu.
Alui göi lala hewisa wameʼemö khöra fanolo. Na ötolo niha böʼö, lö talafo aombö dödöu ba gabula dödö salua khöu.
Na aetu wanötönau ba örasoi wa lö saʼae eluaha waʼaurimö, alui wanolo moroi khö ndra doto. Itaria na so khöda wangera-ngera simanö, daʼö dandra wa mofökhö ita, duma-dumania depresi. Ato zi no manöndra bua börö me no latema wanolo moroi khö ndra doto.a

a Majalah daʼa lö itutunö lala wamadöhö fökhö sinangea tafalua.

Tötönafö Saro moroi ba Zura Niʼamoniʼö

So samösa genoni Lowalangi me mböröta si no irai mamaʼema fangandrönia khö Lowalangi, imane, ”Fandru föna gahegu daromalimö andrö, ba haga ba lalagu.” (Sinunö 119:105) Hadia geluahania?

Na tatörö zi bongi, moguna khöda wandru enaʼö taʼila lalada. Simanö göi Daromali Lowalangi, yaʼia daʼö Sura Niʼamoniʼö, ibeʼe khöda mene-mene si sökhi sanolo yaʼita enaʼö taʼila hadia zinangea tafalua na göna ita abula dödö.

Na tara haga wandru, itolo ita enaʼö fandröndröu zi tola taʼila miföna. Simanö göi Zura Niʼamoniʼö, itolo ita enaʼö taʼila wa so dötönaföda ba zi so miföna.

Tenga ha asala ifatunö khöda Sura Niʼamoniʼö hewisa mböröta niha ba wamobörö. Hizaʼi, itutunö khöda dötönafö saro ba zi so miföna. Nehegö atö wanema li ba wanofu-nofu daʼa:

1.

Hadia mbörö wa tefakao niha? Imane Sura Niʼamoniʼö, ”Hulö simane böröta horö andrö, ha samösa niha zamobörö ba faʼamate andrö börö horö, andrö wa ikhamö fefu niha faʼamate börö me no dozi samazökhi horö ira.”—Roma 5:12.

2.

Hadia mbörö wa tebai laheta gabula dödö salua ba gulidanö andre ira samatörö? Imane Sura Niʼamoniʼö, ”Lö faʼabölö ba niha ba wotatugöi bekania.” (Yeremia 10:23) Ngawalö zalua ba gulidanö andre zangoromaʼö wa atulö niwaʼö ba ayati daʼö.

3.

Hewisa dania wangeheta Lowalangi ngawalö zalua ba gulidanö andre? Imane Sura Niʼamoniʼö, ”Iʼosi dawa hörö fefu ba höröra. Lö hadöi saʼae faʼamate, faʼabu dödö, fege-ege, mazui fökhö.”—Famaʼeleʼö 21:4.