Andrö Wanuturu Lala khö Lowalangi Enaʼö So Waʼohahau Dödö

Lowalangi Yehowaa zangaʼasogö fongambatö si föföna. Imane ba Zura Niʼamoniʼö, ifazökhi ndra alawe Yehowa ba ”ifasao ba niha”. Omuso sibai dödö Gadamo, andrö imane, ”Töla föfö dölagu daʼö ba nagole föfö nagolegu.” (I Moze 2:22, 23) Omasi Yehowa na ohahau dödö zi no mongambatö ba ginötö andre.

Na mangowalu ndraʼugö, te ökhalaigö wa ohahau manö dödömi ba wongambatö. Si ndruhunia hewaʼae faoma laʼomasiʼö nawöra si no mongambatö, göna ira fangabu dödö. (I Korindro 7:28) Ba mbuku andre, so goi-goi moroi ba Zura Niʼamoniʼö, na öfalua ia, ohahau dödöu ba wongambatöu.—Zinunö 19:9-12.

1 FALUA HALÖWÖ SI NO IBEʼE YEHOWA KHÖU

HADIA NIWAʼÖ ZURA NIʼAMONIʼÖ: Foʼomo ira matua zi tobali högö ba nomo.—Efeso 5:23.

Na foʼomo ira matua ndraʼugö, iʼandrö khöu Yehowa enaʼö öhaogö-haogö khö ngambatöu. (I Fetero 3:7) Ibeʼe woʼomo ira alawe si faböbö khöu, ba omasi Lowalangi na öʼomasiʼö ba öfosumange woʼomou. (I Moze 2:18) Öʼomasiʼö sibai woʼomou, irege öʼofönaiʼö zomasi ia moroi ba zomasi ndraʼugö.—Efeso 5:25-29.

Na foʼomo ira alawe ndraʼugö, iʼandrö khöu Yehowa enaʼö öfosumange ngambatöu, ba ötolo ia ba wamalua halöwönia ba wondröniaʼö ba nomo. (I Korindro 11:3; Efeso 5:33) Tuhini gangetula nihalönia, ba falulu fohalöwö khönia soroi ba dödö. (Kolose 3:18) Na öfalua daʼö, sökhi ndraʼugö ba wamaigi woʼomou hegöi ba wamaigi Yehowa.—I Fetero 3:1-6.

SI TOLA ÖFALUA:

• Sofu khö ngambatöu hewisa enaʼö tobali foʼomo ira matua mazui foʼomo ira alawe si sökhi ndraʼugö. Haogö fondro-ndrongo ba odödögö wamalalini amuatau

• Mibaseʼö. Ara ginötö niʼogunaʼö ba wangalui lala hewisa enaʼö faoma miʼohahauʼö dödö nawömi

2 FAIGI ZI LÖ AFÖKHÖ DÖDÖ WOʼOMOU

HADIA NIWAʼÖ ZURA NIʼAMONIʼÖ: Moguna miʼameʼegö tödö zoguna khö ngambatömi. (Filifi 2:3, 4) Böi afökhöiʼö dödönia börö me niha sabölö öʼomasiʼö ia. Törö tödöu wa omasi Yehowa na fefu zoloʼö khönia ’lahaogö lira ba niha fefu’. (II Timoteo 2:24) ”So ösa zi falela-lela manö, ba hulö nikhu gari; ba lela zatua-tua, ba no dalu-dalu”. Andrö, angenanöi na muhedeʼö. (Gamaedola 12:18) Itolo ndraʼugö eheha Yehowa enaʼö sökhi wehedeu ba so khöu waʼomasi.—Galatia 5:22, 23; Kolose 4:6.

SI TOLA ÖFALUA:

• Angandrö enaʼö so khöu dödö sohau-hau ba teboka wangera-ngerau fatua lö öfatunö zi so ba dödöu khö ngambatöu

• Angeraigö ua fatua lö öwaʼö niwaʼöu

3 NAʼÖ HA SAMBUA WANGERA-NGERAMI

HADIA NIWAʼÖ ZURA NIʼAMONIʼÖ: Me no mangowalu ndraʼugö, ”ha sambua boto” ami woʼomou. (Mataiʼo 19:5) Hizaʼi, lö fagölö manö niʼera-erami. Andrö, mifamaha ami enaʼö so khömi wahasara dödö. (Filifi 2:2) Moguna sibai daʼa na so gangetula nihalömi. Imane Sura Niʼamoniʼö, ’Mowua na so wamagölö.’ (Gamaedola 20:18) Ya tobali fanuturu lala khöu goi-goi Zura Niʼamoniʼö ba ginötö mihalö gangetula.—Gamaedola 8:32, 33.

SI TOLA ÖFALUA:

• Baero wa faoma mifatunö hadia zalua khömi, mifatunö göi hadia zi so ba dödömi

• Fatua lö öhalö gangetula, fatunö ua khö ngambatöu