Böi Mifaröi khö Nawömi

Omasi Yehowa na lö faröi ita. (Zinunö 31:24) Moguna sibai wa lö faröi ba wongambatö enaʼö faoma faduhu dödömi khö nawömi, ba monönö waʼomasimi nawömi.

Ba ginötö andre, oya zondrönisi fangera-ngera zi no mongambatö enaʼö faröi ira khö woʼomora. Enaʼö aro wongambatömi, moguna mifalua zi dombua ngawalö andre.

1 OFÖNAIʼÖ ENAʼÖ ARO WONGAMBATÖU

HADIA NIWAʼÖ ZURA NIʼAMONIʼÖ: ’Fatimbaisi hadia zabölö sökhi.’ (Filifi 1:10) Ba zi no mangowalu, sabölö sökhi na iʼofönaiʼö wondrorogö fongambatönia.

Omasi Yehowa na öʼomasiʼö ngambatöu, ba faoma ’miʼomusoiʼö dödö’ nawömi. (Zangombakha 9:9) Iʼandrö Yehowa enaʼö böi öʼosiwawöi ngambatöu he ha sakali manö, ba miʼalui lala enaʼö ohahau dödömi. (I Korindro 10:24) Falua gamuata sangoromaʼö wa öfosumange ia ba wa moguna ia khöu.

SI TOLA ÖFALUA:

• Miʼaseseʼö mibeʼe ginötö ba zi ha darua ami, si lö samangoloi tödömi

• Böi waʼö ”yaʼo”, si sökhinia ”yaʼita”

2 ANGELAMAISI DÖDÖU

HADIA NIWAʼÖ ZURA NIʼAMONIʼÖ: ”Dozi, haniha zamaigi ira alawe, wangisö yaʼia, ba no ihoröni tödönia.” (Mataiʼo 5:28) Na iʼangera-ngeraigö wamalua fohorö, no faröi ia khö ngambatönia.

Imane Yehowa, moguna ”faigi-faigi dödöu”. (Gamaedola 4:23; Yeremia 17:9) Moguna göi öʼangelamaisi höröu. (Mataiʼo 5:29, 30) Oʼö duma-duma Yobi si so ba Zura Niʼamoniʼö, si no mamabuʼu wa lö ilekeʼö nono alawe ba wangisö. (Yobi 31:1) Halö gangetula böi faigi gambara zohorö, he ha sakali manö. Gofu hadia lalania, böi falua waʼomasi ba niha böʼö si toʼölö öfalua khö ngambatöu.

SI TOLA ÖFALUA:

• Foromaʼö ba niha böʼö wa si ndruhu-ndruhu lö faröi ndraʼugö khö ngambatöu

• Angeraigö hewisa dödö woʼomou, ba böhöli gamuata sangafökhöiʼö tödönia