1, 2. Moloʼö Hezekieli 47:1-12, hadia niʼila Hezekieli hegöi saboto ba dödönia? (Faigi gambara ba wamobörö wamahaʼö.)

OROMA khö Hezekieli sambua gangilata sahöli-höli dödö sanandrösa ba gosali: So nidanö sangele moroi ba nahia niʼamoniʼö! Khalaigö me iʼosisi nungo nidanö sohau-hau andrö. (Baso Hezekieli 47:1-12.) Mangele nidanö daʼö moroi ba mbawandruhö weʼamöi bakha ba naha niʼamoniʼö, numalö ia ba zi fasui osali sahatö ba mbawa göli gatumbukha. Malaʼika si fao khö Hezekieli, iʼohe ia baero gosali ba lasuʼa hawaʼanau nungo nidanö andrö. No hauga kali iʼötö nungo nidanö daʼö Hezekieli moloʼö niwaʼö malaʼika khönia. Iʼila wa abölö-bölö sibai nidanö andrö ba itugu abakha irege muʼolangisi na muʼötö!

² Ifatunö khö Hezekieli wa mangele nungo nidanö daʼö ba Nasi si Mate, safeto asio ba lö hadöi saliwa-liwa ba danö si tola auri ba daʼö. Ero so zi göna idanö daʼö, ifuli ohahau ba izumaigö oya giʼa. Ba zi sandrohu ungo nidanö andrö, oya ngawalö geu niʼila Hezekieli. Mowua geu daʼö ero waŵa ba tola muʼa mbuania ba bulunia tobali dalu-dalu. Me iʼila fefu daʼö Hezekieli, tatu omuso dödönia ba itugu aro dötönafönia. Hizaʼi, hadia geluaha gangilata daʼa khö Hezekieli hegöi ba niha niʼoloiʼö tanö böʼö? Ba hadia geluahania khöda?

Hadia Geluaha Gangilata Sanandrösa ba Nungo Nidanö Andrö ba Niha Niʼoloiʼö?

3. Hadia mbörö wa laʼila ira niha Yahudi mböröta wa tenga sindruhu-ndruhu ungo nidanö gangilata Hezekieli?

³ Tatu manö aboto ba dödö niha Yahudi me föna wa tenga sindruhu-ndruhu ungo nidanö zi so ba gangilata daʼö. Hizaʼi, te itörö tödöra wamohouni tanö böʼö si no tefaʼeleʼö, nisura Yoeli samaʼeleʼö töra dua ngaotu fakhe silalö. (Baso Yoeli 3:18.) Me labaso wamaʼeleʼö Yoeli ira niha Yahudi niʼoloiʼö, lö manötöna ira wa so zindruhu ’nagu sami sowöi ba hili misa’, ”fahöna susu ba hili-hili” mazui so nungo nidanö ’sangele moroi ba nomo Yehowa’. Tobali, aboto göi ba dödöra wa tenga sindruhu-ndruhu ungo nidanö zi so ba gangilata Hezekieli.a Na simanö, hadia zomasi ifaʼema Yehowa? Itolo ita Sura Niʼamoniʼö enaʼö taʼila ösa geluaha gangilata daʼa. Si löʼö-löʼönia so tölu ngawalö nifaʼeleʼö ba gangilata daʼa, nibeʼe Lowalangi si fao faʼomasi ba wangabölöʼö ono mbanuania.

4. (a) Hadia howu-howu nitötöna niha Yahudi moroi ba gangilata Hezekieli sanandrösa ba nungo nidanö? (b) Hewisa Zura Niʼamoniʼö wangogunaʼönia ”ungo nidanö” mazui ”idanö” enaʼö faduhu dödöda wa ifahowuʼö nono mbanuania Yehowa? (Faigi kotak ”Mangele Howu-Howu moroi khö Yehowa”.)

⁴ Ungo nidanö solohe howu-howu. Asese iʼogunaʼö Sura Niʼamoniʼö nungo nidanö hegöi idanö ba woʼamaedolagö howu-howu Yehowa sangaʼasogö fangorifi. Ungo nidanö niʼila Hezekieli andrö mangele moroi ba gosali. Börö daʼö, angilata daʼa zangaʼaroʼö ono mbanua Lowalangi ba wombaloi howu-howu wamati moroi khö Yehowa nibeʼenia khöra na lö faröi ira ba wamalua famosumange satulö. Hadia manö howu-howunia? Ifuli latema wanuturu lala ba wamati moroi khö ndra ere. Ba börö me ifuli labeʼe zumange ba gosali, faduhu dödöra wa tola teʼefaʼö horö si no lafalua. (Hez. 44:15, 23; 45:17) Ifuli teʼamoniʼö ira hulö nisasai ba nidanö niʼamoniʼö moroi ba gosali andrö.

5. Moroi ba gangilata sanandrösa ba nungo nidanö andrö, hana wa faduhu dödö niha Yahudi wa lö ambö howu-howu Yehowa ba nono mbanuania?

⁵ Hadia obönö howu-howu Yehowa ba niha fefu? Taya waʼaombö dödö simane daʼö ba gangilata daʼa. Hewaʼae awena mato dua kilometer mangele nidanö andrö, hizaʼi tobali ungo nidanö sabölö-bölö börö dandra sahöli-höli dödö! (Hez. 47:3-5) Na itugu monönö waʼato niha Yahudi ba danö si no mubohouni, hasambalö fahöna howu-howu Yehowa ba wombönökhi soguna khöra. Ungo nidanö andrö eluahania faʼafahöna howu-howu sahöli-höli dödö!

6. (a) Hadia mbuʼusa li si tesöndra ba gangilata daʼa? (b)  Hadia wamangelama si tesöndra ba gangilata daʼa? (Faigi nisura ba gahe zura.)

⁶ Idanö fangorifi. Ba gangilata Hezekieli, mangele nungo nidanö andrö ba Nasi si Mate ba arakhagö fefu nidanönia ohahau mangawuli. Oya sibai giʼa ba daʼö irege fagölö simane faʼoya giʼa ba Nasi Sebolo mazui nifotöi Asi Mediterania. So zamawa iʼa ba zi fahene zinga Nasi si Mate, si so ba gotalua mbanua si dombua si no faoma fandröndröu. Imane malaʼika, ”Gofu hezo mangele nidanö andrö, ba nahia daʼö göi so waʼauri.” Hadia daʼö geluahania ikhamö fefu zi sagörö Asi si Mate nidanö sangele moroi ba nomo Yehowa? Löʼö. Itutunö malaʼika andrö wa so ösa danö safönu taimba si lö ikhamö idanö ba ”mutehegö manö moʼasio ia”.b (Hez. 47:8-11) Moroi ba gangilata daʼa, latema mbuʼusa li ono mbanua Lowalangi si fao faʼafaduhu dödö wa möi fangorifi khöra wamosumange satulö ba daʼö zameʼe khöra faʼakayo ba wamati. Hizaʼi, tebeʼe göi khöra wamangelama wa lö fefu ifahowuʼö niha Yehowa mazui ibohouni.

7. Moroi ba gangilata Hezekieli sanandrösa ba döla geu, hadia zi faduhu dödö niha niʼoloiʼö?

⁷ Eu sangaʼasogö balazo hegöi dalu-dalu. Monönö waʼasökhi nungo nidanö andrö börö waʼoya geu si no teʼoli. Hadia geluahania? Tatu omuso dödö Hezekieli hegöi niha si sambua soi khönia na lakhalaigö mbua zinanö sami moroi ba geu daʼö ero waŵa! Duma-duma si sökhi andre zameʼe khöra faʼafaduhu dödö wa iʼasogö zoguna khöra Yehowa ba wamati. Nehegö göi geu daʼö wa ”tobali dalu-dalu” mbulunia. (Hez. 47:12) Aboto ba dödö Yehowa zabölö moguna khö ndra niha niʼoloiʼö si no mangawuli yaʼia daʼö enaʼö tefadöhö ira ba wamati, ba no fawuʼu li ia wa ifalua daʼö. Hewisa wamaluania? Tesöndra wanema linia ba wamaʼeleʼö tanö böʼö sanandrösa ba wamohouni simane nitutunö ba Faza 9.

8. Hezo taʼila wa abölö ebua nasa dania waʼalua gangilata Hezekieli ba zi so miföna?

⁸ Simane si no tatutunö ba Faza 9, niha niʼoloiʼö si no mangawuli, lö niʼilara faʼalua zi no tefaʼeleʼö andrö sabölö ebua ba zi sagörö ulidanö. Hadia mbörö? Börö zala nifaluara. Lö laböhöli wanörö lala si lö sökhi, faröi ira ba laböhöli wamalua famosumange satulö. Andrö wa lö afönu latema howu-howu moroi khö Yehowa. Hewaʼae simanö, so nasa niha Yahudi si lö faröi. Abu dödöra ba afatö dödöra börö gamuata nawöra niha Yahudi, hizaʼi aboto ba dödöra wa hasambalö ifalua mbuʼusa linia Yehowa. (Baso Yosua 23:14.) Na simanö, hasambalö alua gangilata Hezekieli sabölö ebua ba zi sagörö ulidanö. Hawaʼara alua daʼö?

Mangele Nungo Nidanö Andrö ba Götöda Iadaʼa!

9. Hawaʼara alua gangilata Hezekieli sabölö ebua sanandrösa ba gosali?

⁹ Simane nitutunöda ba Faza 14, alua gangilata Hezekieli sabölö ebua ba zi sagörö ulidanö ba ”ngaluo safuria”, yaʼia daʼö ba ginötö teʼalawaʼö wamosumange satulö töra moroi ba zilalö. (Yes. 2:2) Hewisa waʼalua gangilata daʼö ba ginötöda iadaʼa?

10, 11. (a) Hadia manö howu-howu sangele si hulö nungo nidanö ba ginötöda iadaʼa? (b) Hawaʼabölö-bölö waʼamangele howu-howu Yehowa ba wombönökhi soguna si tedou ba götö safuria andre?

¹⁰ Ungo nidanö solohe howu-howu. Hadia nitörö tödöda na tatutunö nidanö sangele moroi ba nomo Yehowa? Ifasugi ba dödöda fefu howu-howu sondrorogö yaʼita enaʼö lö mofökhö wamatida iadaʼa. Howu-howu sebua yaʼia daʼö höli nibeʼe Keriso si tola mangefaʼö horöda irege lö raʼiö ita. Sindruhu andrö moroi ba Daromali Lowalangi, tola göi muʼamaedolagö ia simane idanö fangorifi sanasai yaʼita. (Ef. 5:25-27) Hewisa wa tola mangele howu-howu simane daʼö ba götöda iadaʼa?

¹¹ Me 1919, ha mato hauga ribu nono mbanua Yehowa ba omasi sibai ira latema gö ba wamati soguna khöra. Me no ngafulu fakhe aefa daʼö, itugu monönö waʼatora. Iadaʼa, töra walu zuta nono mbanua Lowalangi! Hadia abölö-bölö nasa wangele nidanö zindruhu niʼamoniʼö andrö? Abölö-bölö! Itaria ambö gölöda ba waʼoya gö wamati si no tehenaigö. Sagötö ba zi otu fakhe silalö, so ngafulu miliar Zura Niʼamoniʼö, buku, majalah, brosur hegöi risalah si no tebeʼe ba nono mbanua Lowalangi. Simane ungo nidanö ba gangilata Hezekieli, itugu abölö-bölö wangele nidanö zindruhu andrö ba wombönökhi soguna ba niha sowökhi tödö ba wamati ba zi sagörö ulidanö. No ara tefazökhi mbuku si teʼodane-dane ba Zura Niʼamoniʼö. Iadaʼa no lahenaigö publikasi elektronik ba situs web jw.org, ba tesöndra ia ba zi töra 1.000 ngawalö li! Hadia gunania ba niha sadölö tödö?

12. (a) Hadia dandra wa iʼasogö waʼauri hegöi famati saro turia sindruhu andrö? (b) Hadia wamangelama nisöndrada moroi ba gangilata daʼa? (Faigi nisura ba gahe zura.)

¹² Idanö fangorifi. Imane khö Hezekieli, ”Gofu hezo mangele nidanö andrö, ba nahia daʼö göi so waʼauri.” Angerönusi hewisa waʼamangele duria zindruhu ba niha si möi ba soi wamati khöda si no tebohouni. Sindruhu ba Zura Niʼamoniʼö zangaʼasogö faʼauri hegöi falöfökhö ba wamati ba niha si hauga zuta sanemaʼö yaʼia. Ba gangilata daʼa göi so wamangelama si tefaudu ba ginötöda iadaʼa: So dania niha si lö moʼameʼegö tödö sindruhu moroi ba Zura Niʼamoniʼö ba laröi Yehowa ba gafuriata. Muʼamaedolagö ira simane nahia solaza-laza ba safönu taimba ba Nasi si Mate.c Enaʼö böi irai tafalua zimane daʼö!​—Baso 5 Moze 10:16-18.

13. Hadia mbörö wa möi famarou dödöda döla geu si so ba gangilata andrö?

¹³ Eu sangaʼasogö soguna hegöi dalu-dalu. Hadia möi famarou dödöda geu si so ba zinga nungo nidanö andrö? Möi! Törö tödöu geu daʼö wa iʼasogö mbua sami ero waŵa ba bulunia tobali dalu-dalu. (Hez. 47:12) Ifuli tefasugi ba dödöda wa lö iböhöli Lowalangi nifosumangeda ba wangaʼasogö soguna khöda hegöi ba wamadöhö fökhö wamati, börö me daʼö zabölö moguna khöda. Tola tawaʼö wa mofökhö ba olofo gulidanö andre ba wamati. Hizaʼi, törö tödöu hadia manö zi no iʼasogö khöda Yehowa. Me no aefa öbaso zi sambua artikel ba majalahda, ba ginötö öʼanunöisi zinunö fangasiwai ba gangowuloa sebua, mazui me no aefa öfaigi video moroi ba organisasi, hadia örasoi wa tefahowuʼö ndraʼugö? Sindruhu-ndruhu wa lö aetu teʼabusoiʼö ita ba wamati. (Yes. 65:13, 14) Hadia möi fangabölöda gö wamati andrö? Möi. Mene-mene si teʼodane-dane ba Daromali Lowalangi zanolo yaʼita faböi mofökhö wamatida, simane famalua fohorö, fakhögusa mazui falömamati. No göi itatugöi Yehowa enaʼö tola tefadöhö niha si no mamalua horö sebua. (Baso Yakobo 5:14.) Sindruhu-ndruhu wa tefahowuʼö ita simane salua ba gangilata Hezekieli sanandrösa ba ngawalö geu.

14, 15. (a) Hadia wamahaʼönia khöda moroi ba nahia sotaimba si lö muhaogö ba gangilata Hezekieli? (b) Hewisa enaʼö so gunania khöda nungo nidanö niʼila Hezekieli?

¹⁴ So göi wamahaʼö nihalöda ba nahia safönu taimba si lö muhaogö andrö. Böi tabaʼa ndrela howu-howu Yehowa khöda. Alai ita na lö si tebohouni, mazui na no mululu manö simane niha sato ba gulidanö sofökhö andre. (Mat. 13:15) Hizaʼi, omasi ita na tasöndra mbua moroi ba nungo nidanö solohe howu-howu andrö. Hewisa lalania? Na tabadu nidanö sindruhu yaʼia daʼö Taromali Lowalangi, manuriaigö ita ba niha, tatema wanuturu lala si fao faʼomasi hegöi fondrara dödö ba fanolo moroi khö ndra satua sokubaloi si no lafahaʼö ira sawuyu si lö faröi ba satua-tua. Na tafalua fefu daʼö, te itörö tödöda nungo nidanö si so ba gangilata Hezekieli. Iʼasogö wangorifi hegöi famadöhö ungo nidanö andrö gofu hezo mangele ia!

¹⁵ Na simanö, hewisa wa sindruhu-ndruhu alua ba zi so miföna wamaʼeleʼö sanandrösa ba nungo nidanö andrö? Datatutunö hewisa wa alua gangilata daʼa ba zi sagörö ulidanö Faradaiso dania.

Alua Gangilata Daʼö ba Waradaiso Dania

16, 17. (a) Hawaʼabölö-bölö waʼamangele nidanö fangorifi dania ba Waradaiso? (b) Hadia dania mbua nitemada ba waʼamangele howu-howu andrö ba Waradaiso?

¹⁶ Hadia tola ökhalaigö hawaʼomuso dödöu dania na auri ndraʼugö ba Waradaiso si fao ösi nomou hegöi si fahuwu khöu? Enaʼö sindruhu-ndruhu alua ia ba waʼaurimö, datatutunö tölu ngawalö niʼamaedolagö ba gangilata Hezekieli sangoromaʼö faʼomasi Lowalangi.

¹⁷ Ungo nidanö solohe howu-howu. Itugu abölö-bölö nungo nidanö andrö ba Waradaiso dania, börö me iʼohe howu-howu ba wamati hegöi ba mboto. Sagötö Famatörö Yesu si Saribu Fakhe, Famatörö Lowalangi zanolo niha si lö faröi ba wanöndra bua moroi ba höli. Itugu ara, itugu moʼahonoa ira! Lö hadöi saʼae fökhö, doto, matiri, rumah sakit mazui asuransi kesehatan! Lö aetu-aetu mangele nidanö fangorifi ba zi hauga zuta niha faʼato si no teʼorifi moroi ba Hamagedo, yaʼia daʼö ”ngawawa sato” sauri moroi ba ”wamakao sabölö-bölö”. (Fam. 7:9, 14) Hewaʼae abölö-bölö waʼamangele nidanö andrö, hizaʼi hulö ha wöi-wöi nidanö satoru daʼö na mufaehusi ia moroi ba howu-howu salua dania. Simane ba gangilata Hezekieli, itugu abölö-bölö waʼamangele nidanö andrö enaʼö tebönökhi fefu zoguna ba niha.

18. Hewisa wa inönöi gulidanö ʼungo nidanö fangorifi’ sagötö Famatörö si Saribu Fakhe?

¹⁸ Idanö fangorifi. Sagötö Famatörö si Saribu Fakhe, amaedola no anönö danö ”nungo nidanö fangorifi”. (Fam. 22:1) So miliaran niha nisusugi dania ba tebeʼe khöra ginötö ba wanöndra faʼauri si lö aetu ba Waradaiso! Daʼö howu-howu nibeʼe Yehowa ba Wamatörönia. So wanusugi ba niha si no mate sato sibai, si no ara tobali tanö si lö faʼabölö. (Yes. 26:19) Hizaʼi, hadia fefu niha nisusugi dania auri ira sagötö faʼara?

19. (a) Hadia zangoromaʼö wa ifangele dania Lowalangi nidanö sindruhu si bohou ba Waradaiso? (b) Ba zi so miföna, hewisa waʼalua gangilata Hezekieli sanandrösa ba nahia ’nitehegö manö moʼasio’?

¹⁹ Fefu niha moguna lafili samösa hadia omasi ira auri sagötö faʼara mazui löʼö. Ba luo daʼö, tebokai gölu-gölu zura si bohou. Daʼö zangoromaʼö wa ifangele nidanö andrö Yehowa si möi fangokafu dödö ba wangombakha sindruhu si bohou mazui fanuturu lala si bohou. Hadia lö ahöli-höli dödöda ba ginötö takhalaigö fefu daʼö? Hewaʼae simanö, so ösa niha sanimbagö howu-howu andrö ba lö moloʼö ira khö Yehowa. Hizaʼi, hewaʼae so zamadaö sagötö Famatörö si Saribu Fakhe, lö tetehegö khöra na lafawukaisi Waradaiso. (Yes. 65:20) Te itörö tödöda gangilata Hezekieli wa so ösa zotaimba ba ”mutehegö manö moʼasio ia” enaʼö lö mowanua ngawalö zauri ba daʼö. Sindruhu-ndruhu wa faʼabodo ba niha sabeʼe högö börö me lö labadu nidanö fangorifi sebua böli! Na no aefa zi saribu fakhe, so ösa ngawawa samadaö sangoʼawögö Satana. Dozi sanimbagö famatörö satulö moroi khö Yehowa, fagölö lua-luara yaʼia daʼö faʼamate sagötö faʼara.​—Fam. 20:7-12.

20. Hadia gamakhoita ba Wamatörö si Saribu Fakhe samasugi ba dödöda sanandrösa ba döla geu niʼila Hezekieli?

²⁰ Eu sangaʼasogö balazo hegöi dalu-dalu. Lö omasi Yehowa na so ba gotaluada zi lö manema faʼauri si lö aetu sahöli-höli dödö. Ibeʼe khöda gamakhoita sanolo yaʼita enaʼö tasöndra waʼauri sagötö faʼara. Moguna sibai gamakhoita daʼa simane eu si so ba gangilata Hezekieli. Ba Waradaiso dania, tenga ha howu-howu ba wamati niʼasogö Yehowa, hizaʼi howu-howu ba mboto. Mamatörö Yesu Keriso hegöi awönia si 144.000 moroi ba zorugo, tobali ira razo sagötö zi saribu fakhe. Börö me no tobali ere zi 144.000 andre, latolo niha si lö faröi enaʼö moʼahonoa ira irege afönu wanemara bua moroi ba höli nibeʼe Keriso. (Fam. 20:6) Angilata Hezekieli sanandrösa ba döla geu si tola muʼa bua ba si tobali dalu-dalu mbulunia, fakhili sibai ia ba wamaʼeleʼö tanö böʼö si sökhi nisura zinenge sotöi Yohane. (Baso Wamaʼeleʼö 22:1, 2.) Bulu geu moroi ba gangilata Yohane ”muʼogunaʼö ba wamadöhö fefu soi”. Börö daʼö, niha si lö faröi si tebai muʼerai faʼato latema howu-howu me no tobali ere zi 144.000 andrö.

21. (a) Hadia nirasoimö ba ginötö öʼangerönusi gangilata Hezekieli sanandrösa ba nungo nidanö? (Faigi kotak ”Elea Side-ide Tobali Ungo Nidanö Sebua!”) (b) Hadia nitutunöda ba faza aefa daʼa?

²¹ Ba ginötö öʼangerönusi gangilata Hezekieli sanandrösa ba nungo nidanö, hadia lö owua-wua dödöu ba itugu aro wanötönau? Sindruhu-ndruhu tarasoi waʼohahau dödö ba zi so miföna! Angeragö daʼa: iʼotarai me föna, no oya wamaʼeleʼö nibeʼe Yehowa enaʼö tola takhalaigö hewisa Waradaiso andrö dania. Sagötö ba zi hauga ribu fakhe, ikaoni niha si fao faʼebolo dödö enaʼö auri ira ba Waradaiso si no ifabuʼu. Hadia so dania ndraʼugö ba daʼö? Te manofu-nofu ndraʼugö, hadia so nahiamö mazui halöwöu ba Waradaiso? Datafatunö faosatö safuria moroi ba gangilata Hezekieli si tola mangeheta khöda faʼaombö dödö.

1, 2. (a) Hadia niwaʼö Yehowa khö Hezekieli? (b) Hadia manö wanofu-nofu nitutunöda?

ANGILATA si bohou niʼila Hezekieli daʼö zamasugi ba dödönia irege ikhalaigö zalua me 900 fakhe silalö ba götö Moze hegöi Yosua. Me luo daʼö, ifatunö Yehowa khö Moze nola Danö Amabuʼula, ba afuriatania ifatunö khö Yosua hewisa wombagi tanö andrö ba mado ndraono Gizaraʼeli. (4 Mo. 34:1-15; Yos. 13:7; 22:4, 9) Me 593 SM, iwaʼö Yehowa khö Hezekieli hegöi khö ndra niha niʼoloiʼö tanö böʼö enaʼö lafuli labagi Danö Amabuʼula andrö ba labeʼe dana khö ndraono Gizaraʼeli ero sambua mado!​—Hez. 45:1; 47:14; 48:29.

² Moroi ba gangilata daʼa, hadia wamahaʼö nihalö Hezekieli hegöi niha niʼoloiʼö tanö böʼö? Hewisa wa möi fangaroʼö nono mbanua Lowalangi gangilata daʼa? Hadia alua gangilata daʼa ba zi sagörö ulidanö?

Angilata si Tobali Weʼe-Weʼe Dödö si Öfa Ngawalö

3, 4. (a) Moroi ba gangilata Hezekieli safuria, hadia zi öfa ngawalö weʼe-weʼe dödö nitema niha niʼoloiʼö? (b) Hadia manö weʼe-weʼe dödö nitutunöda ba faza daʼa?

³ Angilata safuria niʼila Hezekieli tesura ba zi siwa faza ba mbukunia. (Hez. 40:1–48:35) Tobali fangomuso dödö niha niʼoloiʼö gangilata daʼa börö me so öfa ngawalö zi tobali weʼe-weʼe dödö sanandrösa ba ndraono Gizaraʼeli si lö ara tö tebohouni. Si oföna, tebohouni wamosumange satulö ba gosali Lowalangi. Si dua, ira ere hegöi kubalo si sökhi daʼö zondröniaʼö iraono Gizaraʼeli. Si tölu, fefu zangawuli ba danö Gizaraʼeli latema dana khöra moroi ba danö ondröita. Si öfa, Yehowa zi fao khöra mazui so ia ba gotaluara.

⁴ Ba Faza 13 ba 14, no tafatunö hewisa waʼalua zi dombua ngawalö weʼe-weʼe dödö siföföna yaʼia daʼö tebohouni wamosumange satulö ba ladöniaʼö nono mbanua Lowalangi ira kubalo si sökhi. Ba faza daʼa, tatutunö weʼe-weʼe dödö si tölu yaʼia daʼö buʼusa li sanandrösa ba danö ondröita. Ba faza aefa daʼa, tafatunö mbuʼusa li sanandrösa ba waʼatohare Yehowa.​—Hez. 47:13-21; 48:1-7, 23-29.

’Ubeʼe Khömi Danö Andrö si Tobali Ondröita’

5, 6. (a) Hadia ”mbanua” si lö tola löʼö labagi ba gangilata Hezekieli? (Faigi gambara ba wamobörö wamahaʼö.) (b) Hadia geluaha gangilata Hezekieli sanandrösa ba wombagi tanö?

⁵ Baso Hezekieli 47:14. Ba gangilata andrö, iforomaʼö Yehowa khö Hezekieli danö si lö ara tö tobali simane ”Kabu Edena”. (Hez. 36:35) Imane Yehowa, ”Daʼa mbanua si lö tola löʼö mibagi tobali ondröita ba zi 12 mado Gizaraʼeli.” (Hez. 47:13) Hadia ”mbanua” daʼö? Yaʼia daʼö banua Gizaraʼeli si no mubohouni khö ndra niha niʼoloiʼö si no mangawuli. Simane nisura ba Hezekieli 47:15-21, ihaogö wangombakha Yehowa hezo manö zi tobali ola danö.

⁶ Hadia geluaha gangilata sanandrösa ba wombagi tanö andrö? Ba gangilata daʼö ifatunö hezo zi tobali ola ba hawaʼebolo zi no mutatugöi. Daʼa zameʼe faʼafaduhu dödö khö Hezekieli hegöi ba niha niʼoloiʼö wa hasambalö tebohouni mbanua si tumbu yaʼira. Khalaigö hawaʼomuso dödöra me larongo gangombakhata si no muzara-zara moroi khö Yehowa! Hadia sindruhu-ndruhu latema ono mbanua Lowalangi danö ondröita andrö si tobali tana khöra? Tatu manö.

7. (a) Hadia zalua iʼotarai me 537 SM, ba hadia zi tefasugi ba dödöda? (b) Hadia wanofu siföföna nitutunöda?

⁷ Me döfi 537 SM, te mato 56 fakhe me no aefa itema gangilata andrö Hezekieli, so mato hauga ribu niha niʼoloiʼö sangawuli ba danö Gizaraʼeli ba laʼokhögö danö andrö. Salua sahöli-höli dödö andrö ba zilalö, daʼö zamasugi ba dödöda hewisa waʼatedou nono mbanua Lowalangi ba ginötö iadaʼa. Amaedola zi no latema göi danö ondröita. Hadia geluahania? Ibeʼe ginötö Yehowa ba nono mbanuania enaʼö laʼokhögö ba möi ira ba soi wamati. Börö daʼö, moroi ba wamohouni Tanö Amabuʼula, oya zi tobali famahaʼö khöda sanandrösa ba wamohouni soi wamati okhöta nono mbanua Lowalangi iadaʼa. Hizaʼi fatua lö tafatunö wamahaʼönia, databeʼe wanema li ba wanofu andre: Hadia dandra wa soi wamati andrö so ia ba ginötöda iadaʼa?

8. (a) Haniha nifili Yehowa si tobali fangali ndraono Gizaraʼeli ba waʼaniha? (b) Hadia nifotöi soi wamati andrö? (c) Hamega tefasindro soi wamati, ba haniha zi toröi ba daʼö?

⁸ Ba zi sambua angilata nitema Hezekieli ba zilalö, ifatunö khönia Yehowa wamaʼeleʼö sanandrösa ba wamohouni iraono Gizaraʼeli ba alua daʼö dania ba zi sagörö ulidanö ba ginötö tobali Razo ’genoninia Dawido’ sotöi Yesu Keriso iʼotarai me döfi 1914. (Hez. 37:24) Me luo daʼö no ara mutimbagö ndraono Gizaraʼeli ba waʼaniha tobali ono mbanua Lowalangi, ba mufili ndraono Gizaraʼeli ba wamati si tobali fangali yaʼia daʼö niha Keriso nibayoini. (Baso Mataiʼo 21:43; 1 Fetero 2:9.) Tenga ha iraono Gizaraʼeli ba waʼaniha nigati Yehowa tobali Izaraʼeli ba wamati, hizaʼi igati soi ndraono Gizaraʼeli tobali soi wamati mazui faradaiso wamati. (Yes. 66:8) Simane niʼilada ba Faza 17, soi wamati yaʼia daʼö nahia sahono dödö ba wamati. Ba daʼö so ndra niha nibayoini si toröi ba gulidanö nasa ba wamosumange Yehowa iʼotarai me 1919. (Faigi kotak 9B, ”Döfi 1919”) Simanö göi ”mbiri-biri tanö böʼö” sanötöna faʼauri ba gulidanö, ibörögö toröi ira ba waradaiso wamati andre. (Yoh. 10:16) Itugu monönö ba tedou waradaiso wamati andre ba ginötöda, hizaʼi awena afönu tatema howu-howunia na no aefa Hamagedo.

Fagölö-gölö Wombagira Tanö Andrö

9. Hadia zi no izara-zara Yehowa sanandrösa ba wombagi tanö andrö?

⁹ Baso Hezekieli 48:1, 28. Me no ihonogöi nola danö andrö Yehowa, ihaogö wozara-zara hewisa lala wombagi yaʼia. Iʼandrö enaʼö lafagölö-gölösi wombagi tanö ondröita daʼö ba zi 12 mado iʼotarai yöu numalö raya, tebörögö ba mado Dano si toröi ba mbalö tanö yöu ofeta ba mado Gado ba mbalö tanö raya. Ero sambua ondröita, no lafadölö nolania iʼotarai nola gatumbukha ofeta ba Nasi Sebua mazui Asi Mediterania ba Gaekhula.​—Hez. 47:20.

10. Hewisa dödö niha niʼoloiʼö me larongo gamakhoita ba wombagi tanö?

¹⁰ Me ihaogö izara-zara wanutunö lala ba wombagi tanö andrö Hezekieli, hewisa dödö niha niʼoloiʼö me larongo daʼö? Faduhu dödöra wa toföfö lala ba wombagi yaʼia. Tanö ondröita si no labagi-bagi ba zi 12 mado, daʼö zangoromaʼö wa fefu niha sangawuli latema danö ondröita ba soi si no mubohouni. Lö hadöi si lö tanö mazui si lö omo.

11. Hadia wamahaʼönia khöda moroi ba gangilata sanandrösa ba wombagi tanö? (Faigi kotak ”Fombagi Tanö Amabuʼula”.)

¹¹ Hadia zi tobali famahaʼö khöda moroi ba gangilata daʼö? Tanö Amabuʼula si no tebohouni, tebeʼe ia tenga ha khö ndra ere, niha Lewi mazui khö ndra sondröniaʼö, hizaʼi tebeʼe göi ba zi 12 mado maʼafefu. (Hez. 45:4, 5, 7, 8) Simanö göi iadaʼa, tenga ha ba niha nibayoini si toröi ba gulidanö tebeʼe waradaiso wamati, mazui khö ndra sondröniaʼö ono mbanua Lowalangi si farahu ba ”ngawawa sato”, hizaʼi tebeʼe fefu daʼö ba ngawawa sato sibai.a (Fam. 7:9) Gofu hadia halöwöda bakha ba organisasi hewaʼae no ide-ide, taʼokhögö nahia sahono dödö ba halöwö si sökhi ba soi wamati. Sindruhu-ndruhu wa si möi fangomuso dödö!

Dombua Gamaehuta—Hadia Geluahania Khöda?

12, 13. Hadia wanuturu lala nibeʼe Yehowa sanandrösa ba wombagi tanö andrö?

¹² Tola manö abu dödö Hezekieli börö me faböʼö wanuturu lala nitemania moroi khö Yehowa sanandrösa ba wombagi tanö. Tenga simane fanuturu lala nibeʼe Lowalangi khö Moze me mböröta. So dombua zi faböʼö yaʼia daʼö tanö ba niha sowanua ba daʼö.

¹³ Si oföna, tanö. Tebeʼe goroisa khö Moze enaʼö ibagi danö moloʼö faʼato ero sambua mado. (4 Mo. 26:52-54) Hizaʼi ba gangilata Hezekieli, ihaogö izara-zara wanuturu lala khönia Yehowa enaʼö ”fagölö-gölö wombagi” ondröita andrö ero sambua mado. (Hez. 47:14) Eluahania, fagölö fefu dana khö zi 12 mado iʼotarai nola tanö yöu ofeta ba nola tanö raya. Fefu ndraono Gizaraʼeli gofu hadia madora, fagölö-gölö larasoi waʼomuso dödö hegöi faʼasökhi danö satabö sinanö andrö.

14. Hadia gamaehuta wanuturu lala nibeʼe Yehowa khö Hezekieli moroi ba wanuturu lala si so ba Goroisa Moze?

¹⁴ Si dua, niha sowanua ba daʼö. Ba Goroisa Moze, lalumöʼö niha si fatewu ba latehegö khöra ba wamosumange Yehowa, hizaʼi lö tebeʼe khöra danö ondröita si tobali tana khöra. (3 Mo. 19:33, 34) Hizaʼi, faböʼö wanuturu lala nibeʼe Yehowa khö Hezekieli moroi ba wanuturu lala si so ba Goroisa Moze. Imane Yehowa khö Hezekieli, ”Mibeʼe ba niha si fatewu danö si toröi yaʼira tobali ondröita tana khöra.” Na alua daʼö, no iheta gamaehuta sebua Yehowa ba gotalua ’ndraono Gizaraʼeli sindruhu’ moroi ba niha si fatewu. (Hez. 47:22, 23) Iʼila Hezekieli wa fefu niha sowanua ba soi si no tebohouni andrö, fagölö wetarora ba hasara dödöra ba wamosumange Lowalangi.​—3 Mo. 25:23.

15. Moroi ba wanuturu lala sanandrösa ba danö hegöi niha sowanua ba daʼö, hadia zindruhu soʼamakhaita khö Yehowa niʼilada?

¹⁵ Sindruhu-ndruhu wa sahöli-höli dödö wanuturu lala si dombua nitema Hezekieli sanandrösa ba danö hegöi niha sowanua ba daʼö. Tatu monönö waʼafaduhu dödö niha niʼoloiʼö wa fagölö-gölö wameʼe Yehowa khöra tanö andrö hewaʼae na iraono Gizaraʼeli sindruhu ia mazui niha si fatewu samosumange Yehowa. (Esr. 8:20; Neh. 3:26; 7:6, 25; Yes. 56:3, 8) Fanuturu lala daʼö zamaduhuʼö sanandrösa ba zindruhu si möi famarou dödö ba si lö tebulö: Fefu nono mbanua Yehowa fagölö-gölö ebua mbölira ba wamaiginia. (Baso Hagaʼi 2:7.) Daʼa göi zameʼe khöda famarou dödö hewaʼae na ba zorugo tadöna-döna waʼauri si lö aetu mazui ba gulidanö.

16, 17. (a) Hadia gunania khöda me no tafahaʼö ita sanandrösa ba danö hegöi niha sowanua ba daʼö? (b) Hadia nitutunöda ba faza aefa daʼa?

¹⁶ Hadia gunania khöda me no tafahaʼö ita sanandrösa ba danö hegöi niha sowanua ba daʼö? Tefasugi ba dödöda wa fahasara dödö awö walöʼebua dödö zambuana enaʼö oroma ba waʼafatalifusötada ba zi sagörö ulidanö. Lö ebua dödö zambuana Yehowa. Angerönusi daʼa: ’Hadia no uʼoʼö ia? Hadia uʼameʼegö tödö zamosumange Yehowa soroi ba dödö gofu hezo mbanuara mazui lala waʼaurira ba zilalö?’ (Rom. 12:10) Omuso sibai dödöda börö me ibeʼe khöda ginötö Yehowa enaʼö fao ita ba waradaiso wamati. Ba daʼö tafosumange Namada soroi ba dödö ba tarasoi howu-howunia.​—Gal. 3:26-29; Fam. 7:9.

¹⁷ Aefa daʼa, tatohugö wanutunö weʼe-weʼe dödö si öfa ba gangilata safuria nitema Hezekieli yaʼia daʼö buʼusa li wa so Yehowa ba gotalua niha niʼoloiʼö. Hadia wamahaʼönia khöda mbuʼusa li daʼö? Fanema linia so ba faza aefa daʼa.

1, 2. (a) Hadia mbörö wa so danö nifasambua? (Faigi gambara ba guli mbuku.) (b) Hadia weʼe-weʼe dödö nitema niha niʼoloiʼö moroi ba gangilata daʼa?

BA GANGILATA safuria nitema Hezekieli, iʼila zi sagörö tanö nifasambua soguna ba zi sambua ohitö dödö. Lafasambua danö andrö tobali tolo-tolo khö Yehowa, tebai labaliʼö tanö ondröita daʼö ba mado ndraono Gizaraʼeli. Oroma göi khö Hezekieli zi sambua banua sahöli-höli dödö ba adöni dödö niha ba döi mbanua andrö. Moroi ba gangilata daʼa, latema weʼe-weʼe dödö ira niha niʼoloiʼö yaʼia daʼö fao khöra Yehowa ba ginötö mangawuli ira ba mbanuara.

² Ihaogö izara-zara wanutunö khöda Hezekieli sanandrösa ba danö si tobali tolo-tolo andrö. Datafatunö daʼö, börö me oya zi tobali famahaʼönia khöda yaʼita samosumange Yehowa soroi ba dödö.

’Tolo-Tolo Niʼamoniʼö hegöi Banua Sebua’

3. Hadia zi lima faosatö nifasambua Yehowa, ba hadia gunania ero sambua? (Faigi kotak ”’Mufasambua’ Danö si Tobali Tolo-Tolo”.)

³ Ba danö si no mufasambua andrö, so sagörö danö si öfa sagi nifotöi ”fefu danö nibaliʼö tolo-tolo”. Iʼotarai tanö yöu numalö tanö raya ba iʼotarai gatumbukha numalö ba gaekhula, faʼanaunia fatambai 13 kilometer (25.000 siʼu). No mubagi tölu danö andrö. Tanö yawa tebeʼe ba niha Lewi, tanö ba dalu tebeʼe khö ndra ere ba daʼö so gosali. Si dombua andrö mufotöi ia ”tolo-tolo niʼamoniʼö”. Tanö tou mazui ’si töra danö’ si no ide-ide, tobali ”tanö si toʼölö” si teʼuʼu ba mbanua andrö.​—Hez. 48:15, 20.

4. Hadia wamahaʼönia khöda moroi ba danö si tobali tolo-tolo khö Yehowa?

⁴ Hadia zi tobali famahaʼö khöda moroi ba nifatunö Hezekieli sanandrösa ba danö si tobali tolo-tolo niʼamualagö khö Yehowa? Börö me oföna lafasambua danö andrö, awena labagi ero sambua mado, ifatunö Yehowa wa moguna sibai danö nifasambua andrö. (Hez. 45:1) Tatu oya sibai wamahaʼö nihalö niha niʼoloiʼö moroi ba wombagi tanö andrö. Moguna laʼofönaiʼö wamosumange Yehowa ba waʼaurira. Iadaʼa, moguna göi taʼofönaiʼö halöwö ba wamati simane famahaʼö ba Zura Niʼamoniʼö, feʼamöi ba gangowuloa ba fanuriaigö. Na taʼoʼö Yehowa, taʼofönaiʼö wamosumange yaʼia ba waʼaurida sero maʼökhö.

”Ba Gotaluania Dania Mufasindro Mbanua”

5, 6. (a) Haniha zangokhögö banua daʼö? (b) Hadia zi lö iʼamaedolagö banua daʼö ba hadia mbörö?

⁵ Baso Hezekieli 48:15. Hadia geluaha ”mbanua” hegöi tanö ba zi fasuinia? (Hez. 48:16-18) Imane Yehowa khö Hezekieli, ’Banua sebua andrö okhöta ndraono Gizaraʼeli maʼafefu.’ (Hez. 45:6, 7) Börö daʼö, banua hegöi tanö ba zi fasuinia lö farahu ba ’dolo-tolo niʼamoniʼö’ nifasambua tobali tana khö Yehowa. (Hez. 48:9) Datatörö tödöda daʼö, ba tafatunö hadia zi tobali famahaʼö khöda moroi ba gamakhoita si no mutatugöi ba mbanua andrö.

⁶ Fatua lö tatohugö, moguna taʼila hadia zi lö iʼamaedolagö banua daʼa. Si oföna, banua daʼa tenga Yeruzalema awö gosalinia si no tefazökhi mangawuli. Hadia mbörö? Börö me lö hadöi osali niʼila Hezekieli ba gangilatania andre. Si dua, banua daʼa tenga banua si no tebohouni mangawuli ba soi Gizaraʼeli. Hana? Börö me lö irai lafasindro mbanua si fakhili-khili ba daʼö ira niha niʼoloiʼö hegöi ngaʼötöra. Si tölu, tenga ba zorugo so mbanua daʼa. Hadia mbörö? Börö me lafazökhi mbanua daʼa ba ”nahia si toʼölö” manö tenga ba gamaudu nifili tobali naha wamosumange niʼamoniʼö.​— Hez. 42:20.

7. Hadia mbanua si so ba gangilata Hezekieli, ba hadia niʼamaedolagönia? (Faigi gambara ba wamobörö wamahaʼö.)

⁷ Na simanö, hadia mbanua niʼila Hezekieli? Böi olifu ita ba gangilatania andre oroma khönia zi sambua soi. (Hez. 40:2; 45:1, 6) Ifatunö Taromali Lowalangi wa soi daʼö soi ba wamati. Na simanö, tatu banua daʼö banua ba wamati, tenga sindruhu-ndruhu banua. Hadia nikhalaigöda ba ginötö tarongo ngawua wehede ’banua’? Si toʼölönia, takhalaigö nono mbanua si toröi ba zi sambua nahia si no toföfö. Tobali, banua si öfa sagi andrö si fagölö faʼebolo eluahania lala halöwö si no toföfö.

8. Hezo irugi lua-lua lala halöwö andrö ba hana wa tola tawaʼö zimane daʼö?

⁸ Hezo irugi lua-lua lala halöwö andrö? Ba gangilata Hezekieli oroma wa so mbanua daʼö bakha ba soi wamati. Na simanö, lala halöwö andrö zameʼe fanuturu lala ba nono mbanua Lowalangi bakha ba waradaiso wamati. Börö me ba mbanua si toʼölö manö so mbanua daʼö, tenga ba mbanua niʼamoniʼö, tefasugi ba dödöda wa mufalua lala halöwö andrö ba gulidanö tenga ba zorugo. Irugi iadaʼa, lö tebulö latema howu-howu ono mbanua Lowalangi ba waradaiso wamati moroi ba lala wamöfögö halöwö andrö.

9. (a) Haniha manö zi fao ba lala halöwö andrö ba götöda iadaʼa? (b) Hadia dania nifalua Yesu ba Wamatörö si Saribu Fakhe?

⁹ Haniha manö zi fao ba lala halöwö andrö? Ba gangilata Hezekieli, so zi tobali ”sondröniaʼö” ba mbanua sebua. (Hez. 45:7) Yaʼia zamaigi-maigi ono mbanua Lowalangi, hizaʼi tenga ere mazui niha Lewi ia. Sondröniaʼö andrö zamasugi ba dödöda khö ndra kubalo wamati ba götöda andre, manandrösa ia ba niha si lö mubayoini eheha niʼamoniʼö. Börö me farahu göi ndra satua sokubaloi andre ba ”mbiri-biri tanö böʼö”, daʼö mbörö wa si fao fangide-ngideʼö laʼoʼö gamakhoita wamatörö Keriso si so ba zorugo. (Yoh. 10:16) Ba Wamatörö si Saribu Fakhe dania, ifili ba ifataro ndra satua sokubaloi andrö Yesu mazui ira ”sondröniaʼö”, ”ba zi sagörö ulidanö”. (Si. 45:16) Laʼoʼö wanuturu lala moroi ba Wamatörö Lowalangi ba wondrorogö ono mbanuania ba luo daʼö.

”So Yehowa ba Daʼö”

10. Hadia döi mbanua daʼö ba hadia zi tobali weʼe-weʼe dödö moroi ba döinia?

¹⁰ Baso Hezekieli 48:35. Töi mbanua andrö ”So Yehowa ba daʼö”. Töi daʼö zameʼe faʼafaduhu dödö wa tola murasoi waʼatohare Yehowa ba mbanua andrö. Me iforomaʼö khö Hezekieli mbanua si so ba gotalua soi daʼö, hulö ibeʼe Yehowa waʼafaduhu dödö ba niha niʼoloiʼö, ’Ufuli fao khömi!’ Sindruhu-ndruhu wa möi faʼomuso dödö daʼa!

11. Hadia wamahaʼönia khöda moroi mbanua andrö hegöi eluaha döinia?

¹¹ Hadia wamahaʼö nihalöda moroi ba wamaʼeleʼö Hezekieli andre? Ifaduhuʼö khöda töi mbanua andrö yaʼita ono mbanua Yehowa wa lö tebulö fao Yehowa ba nono mbanuania si lö faröi. Iʼabakhaiʼö göi khöda wanutunö töi daʼö wa ohitö dödö mbanua andrö tenga enaʼö mamatörö niha gulidanö, hizaʼi ba wamalua goi-goi Yehowa si fao faʼomasi ba si fatema ba dödö. Duma-dumania, lö itehegö Yehowa ba niha sondröniaʼö ba wombagi-bagi tanö moloʼö fangera-ngera niha. Lala ba wamöföʼö andrö, enaʼö tobali famolakhömi Yehowa sameʼe ondröita mazui sameʼe halöwö ba nono mbanuania, farahu ba daʼö ”niha si numana”.​—Amd. 19:17; Hez. 46:18; 48:29.

12. (a) Hadia zadöni dödöda ba mbanua daʼö, ba hadia geluahania? (b) Hadia zi tobali famasugi ba dödö khö ndra sondröniaʼö ba mbanua niha Keriso?

¹² Hadia nasa zadöni dödöda ba mbanua nifotöi ”So Yehowa ba Daʼö”? Si toʼölönia me föna, mufoʼöli zi sambua banua enaʼö telumöʼö ba lö oya lafazökhi mbawa göli. Hizaʼi, ba mbanua daʼa, so tölu ngawua mbawa göli ero tambai irege faʼoyania 12! (Hez. 48:30-34) Faʼoya mbawa göli andre zangoromaʼö wa aoha sibai ba nono mbanua Lowalangi wamalukhaisi niha samakhoi lala halöwö. Bawa göli si 12 göi zangoromaʼö wa tebokai mbanua daʼö ba ”ndraono Gizaraʼeli maʼafefu”. (Hez. 45:6) Tobali famasugi ba dödö daʼa khö ndra talifusö sondröniaʼö ba mbanua niha Keriso. Omasi Yehowa na lö alawö fahuhuo niha khöra ba latolo fefu zi toröi ba waradaiso wamati.

Lafosumange Lowalangi ba Mohalöwö Ira ba Wotuhini Banua Andrö

13. Hadia niwaʼö Yehowa sanandrösa ba ngawalö halöwö nifalua niha?

¹³ Datafuli ita furi ba götö Hezekieli ba tafaigi hadia nasa nisurania sanandrösa ba gangilata sahöli-höli dödö andre. Ifatunö khönia Yehowa wa oi faböʼö-böʼö lala halöwö niha si toröi ba daʼö. Duma-dumania, so ’zangai halöwö ba gosali’, yaʼia daʼö ira ere hegöi niha Lewi. Mohalöwö ndra ere ba wameʼe sumange nitunu ba mangai halöwö ira föna Lowalangi. Mohalöwö ndra niha Lewi ”ba wamalua ngawalö halöwö sinangea lababaya ba daʼö”. (Hez. 44:14-16; 45:4, 5) So göi ösa zohalöwö tanö böʼö sahatö ba danö andrö ba wotuhini banua daʼö. Haniha ira andrö?

14. Hadia zi tefasugi ba dödöda moroi khö ndra sohalöwö sotuhini banua daʼö?

¹⁴ Ira sohalöwö sotuhini banua daʼö tohare ira moroi ”ba mado ndraono Gizaraʼeli maʼafefu”. Halöwöra yaʼia daʼö mananö sinanö ba lahenaigö ’mbalazo niha sohalöwö ba mbanuara’. (Hez. 48:18, 19 ) Amakhoita daʼa zamasugi ba dödöda ginötö nitehegö khöda. Iadaʼa so dalifusö Keriso si no tebayoini simanö göi ”ngawawa sato” nifataro Yehowa ba wondröniaʼö ono mbanuania. (Fam. 7:9, 10) Fefu zi toröi ba waradaiso wamati tebeʼe khöra ginötö ba wotuhini halöwöra. Lala si oföna si tola tafalua yaʼia daʼö na taʼoʼö wanuturu lala moroi khö zawuyu si lö faröi.

15, 16. (a) Hadia nasa zi tobali famahaʼö khöda moroi ba gangilata Hezekieli? (b) Hewisa wamaluada halöwö simane daʼö?

¹⁵ So nasa sambua tö danö böʼö ba gangilata Hezekieli, ba so wamahaʼö nihalöda ba daʼö sanandrösa ba halöwö fanuriaigö nifaluada. Hadia daʼö? Iwaʼö Yehowa wa niha moroi ba zi 12 mado Gizaraʼeli, si tenga ngaʼötö Lewi, lafalua halöwö daʼö ba zi dombua nahia: bakha ba golayama gosali hegöi ba mbenua soduʼu si so ba mbanua daʼö. Hadia nifaluara? Bakha ba golayama gosali, tohare fefu ngawalö mado ba wamalua famosumange ba labeʼe zumange khö Yehowa. (Hez. 46:9, 24) Ba mbanua sebua andrö, tohare niha moroi ba ngawalö soi ba wotuhini banua daʼö ba latanö zinanö ba mbenua soduʼu andrö. Hadia wamahaʼö nihalöda moroi ba duma-dumara?

¹⁶ Iadaʼa, so ginötö ba ”ngawawa sato” ba wamalua halöwö si fagölö. Lafosumange Yehowa ”ba gosalinia” ba labeʼe zumange fanuno. (Heb. 13:15; Fam. 7:9-15) Manuriaigö ira ba lafaduhuʼö wamatira na labeʼe mbua gera-erara ba manunö ira ba gangowuloa. No sambua noro dödö khöra ba wangofönaiʼö famosumange Yehowa ba waʼaurira. (1 Ng. 16:29) Baero daʼö, oya ginötö si tola lafalua ono mbanua Lowalangi ba wotuhini organisasinia. So zi fao ba wamazökhi hegöi ba wondrorogö Balai Mbanua Lowalangi mazui fasilitas gödo ndraha, ba so göi zohalöwö ba proyek tanö böʼö ba organisasi Yehowa. Tanö böʼönia so zameʼe kefe ba wotuhini lala halöwö. Amaedola zananö sinanö ira ”ba wamolakhömi Lowalangi”. (1 Ko. 10:31) Omuso dödöra ba terou dödöra ba wamalua yaʼia börö me omasi Yehowa ”zumange simane daʼö”. (Heb. 13:16) Hadia no öhaogö öʼogunaʼö ginötö simane daʼö?

”Tadöna-döna Mbanua si Yawa si Bohou ba Tanö si Bohou”

17. (a) Hewisa gangilata Hezekieli andre abölö ebua nasa waʼaluania ba zi so miföna? (b) Sagötö Famatörö si Saribu Fakhe, haniha zanöndra howu-howu moroi ba lala halöwö nifaluara?

¹⁷ Hadia sindruhu-ndruhu alua ba zi sagörö ulidanö gangilata Hezekieli sanandrösa ba danö si tobali tolo-tolo? Sindruhu! Ba gotalua soi daʼö so danö nifotöi ”tolo-tolo niʼamoniʼö”, ba tanö bakhania so ”naha niʼamoniʼö khö Yehowa”. (Hez. 48:10) Na no aefa Hamagedo, gofu hezo toröi ita hasambalö fao khöda Yehowa. (Fam. 21:3) Sagötö Famatörö si Saribu Fakhe, so niha nituyu ba wamalua lala halöwö ba wondrorogö ono mbanua Lowalangi. Lala halöwö nifaluara irugi ba wondrege danö. Si fao faʼomasi, labeʼe wanuturu lala ba niha samazökhi ”tanö si bohou” yaʼia daʼö ono mbanua si bohou.​—2 Fe. 3:13.

18. (a) Hana wa faduhu dödöda lala halöwö nifaluara tefaudu moloʼö famatörö Lowalangi? (b) Hadia zi tobali faʼafaduhu dödöda moroi ba döi mbanua andrö?

¹⁸ Faduhu dödöda wa lala halöwö nifaluara tefaudu moloʼö famatörö Lowalangi. Hadia mbörö? Börö me iʼombakhaʼö khöda Taromali Lowalangi wa so 12 mbawa göli ba mbanua daʼö, fagölö simane ba zorugo yaʼia daʼö Yeruzalema si Bohou si 144.000 nawö Keriso ba wamatörö. (Fam. 21:2, 12, 21-27) Daʼa zangoromaʼö wa lala halöwö nifaluara tefaudu ba Wamatörö Lowalangi ba zorugo ba laʼoʼö fefu gangetulania. Daʼa zameʼe khöda faʼafaduhu dödö wa lö tebulö so wamosumange satulö ba Waradaiso börö me töi mbanua andrö ”So Yehowa ba Daʼö”. Sindruhu-ndruhu sökhi sibai dötönaföda ba zi so miföna!