FAMAHAʼÖ 26
Hadia Mbörö Wa Alua zi Lö Sökhi hegöi Famakao ba Gulidanö Andre?
Na alua zi lö sökhi, te manofu ita, ”Hadia mbörö wa alua daʼa?” Tatu omuso sibai dödöda börö me no ibeʼe khöda wanema li Sura Niʼamoniʼö!
1. Hadia nifalua Zatana irege alua ngawalö zi lö sökhi ba gulidanö?
Mamadaö Gafökha Satana khö Lowalangi. Omasi ia na yaʼia zamatörö niha gulidanö. Andrö wa ifaelungu Gadamo faoma Khawa enaʼö fao ira wamadaö khö Lowalangi. Ifalua daʼö Satana yaʼia me ilimo Khawa. (1 Moze 3:1-5) Iwaʼö Satana khö Khawa wa lö mate ia na iʼa mbua geu andrö. Daʼö walimosa sebua siföföna alua. Andrö wa iwaʼö ba Zura Niʼamoniʼö ”sofaya ia ba ama zofaya”. (Yohane 8:44) Itanögö ba gera-era Khawa wa so zi sökhi si lö nibeʼe Yehowa khöra. Iwaʼö Satana wa abölö omuso dödö niha gulidanö na lö laʼoʼö niwaʼö Lowalangi.
2. Hadia gangetula nihalö Gadamo faoma Khawa?
Oböwö sibai Yehowa khö Gadamo ba Khawa. Itehegö khöra wemanga fefu mbua geu si so ba Kabu Edena. Hizaʼi, so sageu mbua zinanö si tebai laʼa. (1 Moze 2:15-17) Hewaʼae simanö, lahalö gangetula ba wemanga bua geu si no itegu Lowalangi andrö. ”Ihalö mbua geu daʼö [Khawa] ba iʼa”, ba aefa daʼö ”iʼa göi” Adamo. (1 Moze 3:6) Börö me niha soʼahonoa Gadamo faoma Khawa, sindruhunia lö ba dödöra ba wanawö oroisa Lowalangi. Na simanö, me lasawö goroisa Lowalangi daʼö gangetula si no laʼodödögö. Me lafalua daʼö, aekhu ira ba horö ba no latimbagö waʼasinangea Lowalangi ba wamatörö. Angetulara andrö, daʼö mbörö wa tefakao ira.—1 Moze 3:16-19.
3. Hadia lua-luania khöda gangetula Gadamo hegöi Khawa?
Me no fasala Gadamo faoma Khawa, tobali ira niha si lö moʼahonoa ba laröi horö ondröita fefu ba ngaʼötöra. Daʼö mbörö wa lö moʼahonoa niha irugi maʼökhö. Imane Sura Niʼamoniʼö sanandrösa khö Gadamo: ”Simane böröta horö andrö, ha samösa niha zamobörö ba faʼamate andrö börö horö, andrö wa ikhamö fefu niha faʼamate.”—Roma 5:12.
Oya mbörö wa tefakao ita. Duma-dumania, börö gangetula si fasala nihalöda. Tola manö göi börö gangetula si fasala nifalua niha böʼö. Itaria göi tefakao ita börö ginötö hegöi salua si lö mudöna-döna.—Baso Zangombakha 9:11.
ODÖDÖGÖ NASA WANGALUI
Tatutunö dania hadia mbörö wa tebai tatahigö Lowalangi ba ngawalö zi lö sökhi salua ba zi sagörö ulidanö andre. Tafatunö göi hewisa dödö Lowalangi na tefakao ita.
4. Haniha zinangea tatahigö ba gabula dödö salua khöda?
Ato niha zangumaʼö wa Lowalangi zamatörö ulidanö andre. Hadia atulö daʼö? Futa VIDEO.
Baso Yakobo 1:13 hegöi 1 Yohane 5:19, ba beʼe wanema li ba wanofu daʼa:
Hadia tola tatahigö Lowalangi ba ngawalö wamakao hegöi si lö sökhi salua iadaʼa?
5. Hadia zalua me Satana zamatörö ulidanö andre?
Baso 1 Moze 3:1-6, ba beʼe wanema li ba wanofu-nofu daʼa:
Hadia walimosa niwaʼö Zatana?—Faigi ayati 4 ba 5.
Hewisa wangoromaʼö Zatana wa no itaha zi sökhi Yehowa ba niha gulidanö?
Moloʼö Satana, hadia tola lasöndra waʼomuso dödö niha gulidanö hewaʼae lö laʼoʼö niwaʼö Yehowa, Samatörö yaʼira?
Baso Zangombakha 8:9, ba beʼe wanema li ba wanofu daʼa:
Hadia lua-luania börö me tenga Yehowa Zamatörö ulidanö andre?
Moʼahonoa Gadamo ba Khawa ba wamobörö ba toröi ira ba Waradaiso. Hizaʼi, lafondrondrongo niwaʼö Zatana ba mamadaö ira khö Yehowa
Me no mamadaö ira, afönu gulidanö andre horö, famakao hegöi faʼamate
Iheta horö niha Yehowa, famakao hegöi faʼamate. Moʼahonoa fefu niha ba lasöndra waʼauri si lö aetu ba Waradaiso
6. Iʼameʼegö tödö wamakao salua khöda Yehowa
Hewisa dödö Lowalangi na tefakao ita? Faigi hadia nisura Razo Dawido hegöi sinenge sotöi Fetero. Baso Zinunö 31:7 hegöi 1 Fetero 5:7, ba beʼe wanema li ba wanofu daʼa:
Hewisa dödöu me no öʼila wa iʼameʼegö tödö ndraʼugö Yehowa ba gabula dödö hegöi famakao salua khöu?
7. Lowalangi dania zangeheta famakao niha gulidanö
Baso Yesaya 65:17 hegöi Famaʼeleʼö 21:3, 4, ba beʼe wanema li ba wanofu daʼa:
Ifabuʼu Yehowa wa iheta fefu ngawalö zi lö sökhi si no irai alua ba niha gulidanö. Hana wa terara dödöu ba zi no ifabuʼu andrö?
Hadia öʼila?
Me iwaʼö walimosa siföföna Satana, no iböbögö zi lö duhu khö Yehowa. Iʼobousi döi Yehowa, iwaʼö wa Yehowa andrö Samatörö si lö atulö ba si lö faʼomasi. Ba zi lö ara tö, iheta ngawalö wamakao niha gulidanö Yehowa, ba ngaluo daʼö teʼamoniʼö döinia. Eluahania, ifaduhuʼö wa ha famatörönia wondrege zi sökhi. Fangamoniʼö töi Yehowa andrö, daʼö zabölö muʼofönaiʼö ba zi sagörö ulidanö.—Mataiʼo 6:9, 10.
SO ZANGUMAʼÖ: ”Na göna ita famakao, no fanandraigöda daʼö moroi khö Lowalangi.”
Hewisa moloʼö yaʼugö, hadia öbeʼe fanema li?
RAHU-RAHU WAMAHAʼÖ
Afökha Satana hegöi niha siföföna, daʼö zamobörö wa alua ngawalö zi lö sökhi ba gulidanö. Iʼameʼegö tödö zalua khöda Yehowa ba lö ara tö iheta fefu gabula dödö andrö.
Hadia Wamahaʼö si Tola Öhalö?
Hadia walimosa Gafökha Satana nifaʼemania khö Khawa?
Hadia lua-luania khöda me no mamadaö Gadamo faoma Khawa?
Hezo taʼila wa sindruhu-ndruhu iʼameʼegö tödö wamakao salua khöda Yehowa?
ALUI NASA DANÖ BÖʼÖ
Baso hadia geluaha horö moloʼö Sura Niʼamoniʼö.
Baso hadia zi lö atulö niböbögö Gafökha Satana ba Kabu Edena.
”Hana Wa Itehegö So Wamakao Lowalangi?” (Menara Pengawal, 1 Mbaŵa si Sara 2014)
Faigi wanema li si möi fondrara dödö ba wanofu sabua andre.
”Hadia Mbörö Wa Itehegö Lowalangi Ato zi Mate ba Danga Nazi?” (Artikel web)
Faigi waö-waö zi samösa ira matua samahaʼö yaʼia hadia mbörö wa alua wamakao.