Faʼaurida Enaʼö Tefaudu ba Duma-duma Wangandrö Nibeʼe Yesu—Faosatö 1

1. Hewisa wangogunaʼöda Fangandrö Zoʼaya ba ginötö möi ita manuriaigö?

ATO NIHA zotanö ba dödöra Fangandrö Zoʼaya si no tesura ba Mataiʼo 6:9-13. Ba ginötö möi ita manuriaigö, ta tötöi ayati daʼö ba wangombakha ba niha wa famatörö Lowalangi andrö si ndruhu-ndruhu so, si tola mamohouni ulidanö tobali faradaiso. Ngawua wehede ”yateʼamoniʼö döiu” asese taʼogunaʼö daʼa ba wangombakha ba niha wa so döi Lowalangi ba moguna taʼaröuʼö ita moroi ba ngawalö hadia ia zi tola mameʼe teʼoʼaya döinia andrö.—Mataiʼo 6:9.

2. Hezo taʼila wa lö omasi Yesu na muʼoyaʼö li ba wangandrö?

² Hadia omasi Yesu ero mangandrö ita tatötöi wangandrö zoʼaya simane nifalua niha sato? Löʼö. Fatua lö daʼö imane Yesu, ”Ba na mangandrö ami, ba böi miʼoyaʼö li.” (Mataiʼo 6:7) Ba gafuriata, ifahaʼö ndra nifahaʼönia Yesu ba wangandrö, ifuli iʼogunaʼö duma-duma wangandrö andrö, tobali fehede niʼogunaʼönia lö fagölö. (Luka 11:1-4) Fangandrö nibeʼe Yesu andrö ha duma-duma hadia manö zinangea taʼangandröi.

3. Hadia wanofu si tola öʼangerönusi ba ginötö öfahaʼö ndraʼugö ba duma-duma wangandrö nibeʼe Yesu?

³ Ba duho daʼa hegöi ba duho nifatunö ba migu fönada, tafahaʼö ita sanandrösa ba duma-duma wangandrö nibeʼe Yesu. Ba ginötö öfahaʼö ndraʼugö, öʼangerönusi, ’Hewisa wangandrö andre tola moguna ia ba waʼaurigu?’ Ba sabölö moguna yaʼia daʼö ’Hadia no uʼaurifagö ia ba waʼaurigu duma-duma wangandrö nibeʼe Yesu andrö?’

”HE AMA KHÖMA SI SO BA ZORUGO”

4. Hadia zi tobali famasugi ba dödöda moroi ba ngawua wehede ”He ama khöma”? Hana wa yaʼita sauri ba gulidanö andre tola takaoni khönia ”Ama”?

⁴ Ibörögö wangandrö Yesu imane, ”He ama khöma.” Daʼa zamasugi ba dödöda wa Yehowa andrö ama ndra talifusöda ba zi sagörö ulidanö. (I Fetero 2:17) Niha nifili Yehowa si möi ba zorugo no tobali ononia, si ndruhu-ndruhu wa Yehowa namara. (Roma 8:15-17) Gofu haniha zanöndra faʼauri si lö aetu ba gulidanö andre, tola lakaoni ”Ama” khönia. Yehowa zameʼe khöra faʼauri si sökhi ba yaʼia zamönökhi soguna khöra. Lafotöi ira ”ono Lowalangi” na no moʼahonoa ira ba na no aefa itörö ira fanandraigö safuria.—Roma 8:21; Famaʼeleʼö 20:7, 8.

5, 6. Hadia mbuala sebua böli nibeʼe zatua ba ndraono? Ba hadia zinangea nifalua ero samösa iraono? (Faigi gambara ba ngaʼörö 23.)

⁵ Buala sebua böli nibeʼe zatua ba ndraono yaʼia daʼö ba wanolo iraono enaʼö so waʼaboto ba dödöra wa Yehowa andrö ama si so ba zorugo ba lafomaha ndraono enaʼö mangandrö ira khö Yehowa. Samösa dalifusöda si möi ba mbanua niha keriso sakali önö waŵa ba Afrika Selatan imane, ”Iʼoroi me tumbu ndraonogu, fao ndraʼo khöra ba wangandrö ero bongi. Lamane iraonogu alawe wa lö itörö tödöra hadia ngawua wehede ba ginötö mangandrö. Tobali, si lö olifu ira yaʼia daʼö faʼohahau dödö ba ginötö fahuhuo ba wangandrö khö namada Yehowa, ba so khöma waʼahono dödö. Me ibörögö ebua ira, uʼandrö khöra enaʼö lalau mangandrö ba laʼebuaʼö lira ba wangandrö enaʼö uʼila nösi dödöra khö Yehowa. Aefa daʼö, ufomaha ira ba wangandrö simane duma-duma wangandrö nibeʼe Yesu enaʼö fangandröra andrö tefaudu.”

⁶ Me no ebua ira itugu aro wahuwusara khö Yehowa. No mangowalu ira iadaʼa ba khö dalifusöda si sara lala ba wamati ba safönu inötö ba wanuriaigö. Buala sebua sabölö sökhi moroi khö zatua yaʼia daʼö ba wamomaha yaʼira wa Lowalangi Yehowa andrö no so ia khöda. Tobali, ero samösa iraono moguna larorogö wahuwusara khö Yehowa.—Zinunö 5:11, 12; 91:14.

”YATEʼAMONIʼÖ DÖIU”

7. Hadia döi sebua nibeʼe khöda, ba hadia zinangea tafalua?

⁷ Tebeʼe döi sebua khöda me no taʼila döi Yehowa ba tobali ”nituyu ba niha baero, ba döinia andrö”. (Halöwö Zinenge 15:14; Yesaya 43:10) Na mangandrö ita enaʼö, ”Yateʼamoniʼö döi” Lowalangi. Taʼandrö göi khö Yehowa enaʼö böi tafalua hadia ia zi tola motaʼunöisi töinia. Lö omasi ita tafalua simane niha ba götö föna ösa me lö lafalua hadia zi no lawaʼö. Imane Faulo, ”Börö sa ami, wa tetandrawaisi döi Lowalangi ba niha baero.”—Roma 2:21-24.

8, 9. Beʼe duma-duma hewisa Yehowa wanolonia niha sedöna moʼamoniʼö töinia.

⁸ Taʼodödögö wamosumange töi Yehowa. Mate woʼomo dalifusöda ira alawe ba Norwegia me dua fakhe waʼebua ndröfi nononia. Imane talifusöda ira alawe andre, ”Meluo daʼö hulö zi lö fanötöna ndraʼo. Ero maʼökhö uʼandrö waʼabölö khö Yehowa, ero sambua za, enaʼö tola so khögu dödö si sökhi ba sahono. Lö omasi ndraʼo na uhalö gangetula si fasala enaʼö lö tetandrawaisi döi Yehowa ibeʼe Afökha. Omasi sibai ndraʼo uʼamoniʼö döi Yehowa, ba omasi ndraʼo na falukha nonogu khö namania ba gulidanö si bohou.”—Gamaedola 27:11.

⁹ Hadia ifondro-ndrongo wangandrönia Yehowa? Ifondro-ndrongo. Tola aro wamatinia börö me asese fariawö ia khö ndra talifusöda. Lima fakhe aefa daʼö, ifuli mangowalu khö zi samösa talifusöda satua sokubaloi. Ononia iadaʼa no 20 fakhe ba no tebayagö ia idanö. Imane talifusöda ira alawe andre ”Omuso sibai dödögu börö me fao woʼomogu ba wangebuaʼö onogu.”

10. Hewisa Yehowa ba woʼamoniʼö töinia?

¹⁰ Iʼamoniʼö döinia Yehowa ba ginötö ihori fefu niha si no motaʼunöisi töinia hegöi niha sotimbagö famatörönia. (Baso Hezekieli 38:22, 23.) Moʼahonoa fefu niha, he si so ba zorugö hegöi si so ba gulidanö lasuno Yehowa. Fefu ira lafosumange ba laʼamoniʼö döi Yehowa. Ba gafuriatania, ama sebua faʼomasi ”enaʼö hasambalö Lowalangi ba khöra fefu”.—I Korindro 15:28.

”YATOHARE WAMATÖRÖMÖ”

11, 12. Hadia waʼaboto ba dödö nibeʼe Yehowa ba nono mbanuania me döfi 1876?

¹¹ Fatua lö mangawuli Yesu ba zorugo, manofu ndra nifahaʼönia, ”He tua, hadia öfuli öʼazökhi iyaʼe dania nöri ndraono Gizaraʼeli?” Itema lira Yesu wa lö irugi inötö nasa laʼila ha waʼara tebörögö wamatörö Mbanua Lowalangi. Iʼandrö Yesu khöra wa halöwö sabölö moguna yaʼia daʼö halöwö fanuriaigö. (Baso Halöwö Zinenge 1:6-8.) Ifomaha ndra nifahaʼönia ba wangandrö enaʼö tohare Mbanua Lowalangi si no tadöna-döna. Daʼö mbörö wa asese mangandrö ita enaʼö tohare Mbanua Lowalangi.

¹² Me tebörögö wamatörö Yesu ba zorugo, itolo Yehowa nono mbanuania enaʼö aboto ba dödöra hawaʼara alua daʼö. Me döfi 1876, Charles Taze Russell isura duho ”Hamega Aheta wamatörö: Ba Danga Niha baero?” Itutunö wa ”fitu fakhe” ba gangilata Danieli fagölö ira nifaʼeleʼö Yesu ”irege no moʼahonoa götö niha baero andrö”. Ba duho daʼö itutunö khöda wa si dua ngawalö andre no alua me döfi 1914.a—Danieli 4:13; Luka 21:24.

13. Hadia zalua me döfi 1914? Ba hadia geluahania khöda?

¹³ Alua wasuwöta sabölö-bölö ba Eropa me döfi 1914 ofeta ba zi sagörö ulidanö. Fasuwöta andrö iʼasogö lofo sabölö-bölö. Ba gafuriata wasuwöta, döfi 1918, ato niha si mate börö wökhö sabölö-bölö moroi me fasuwö. Fefu zalua andre no ”tandra” nibeʼe Yesu. Tandra andre zangoromaʼö khöda wa no tobali Razo Yesu ba zorugo me döfi 1914. (Mataiʼo 24:3-8; Luka 21:10, 11) Ba ndröfi daʼö, ”ba mofanö ia, si mane si möna, ba enaʼö möna ia”. (Famaʼeleʼö 6:2) Itiboʼö Yesu Gafökha awö zi fao khönia tou ba gulidanö. Alua simane nifaʼeleʼö, ”Ba alai gulidanö, awö nasi, me no möi mitou Gafökha andrö khömi, ba me no ebua wönunia, ba me no iʼila, lö ara nitehe khönia.”—Famaʼeleʼö 12:7-12.

14. (a) Hana wa taʼohe ba wangandrö enaʼö alua Mbanua Lowalangi? (b) Hadia halöwö sabölö moguna tafalua iadaʼa?

¹⁴ Nifaʼeleʼö ba zura Wamaʼeleʼö faza 12 andrö, aboto ba dödöda hadia mbörö wa alua zi lö sökhi ba gulidanö me mamatörö Yesu tobali Razo ba mbanua Lowalangi. Hewaʼae no mamatörö Yesu ba zorugö, Afökha nasa zamatörö ulidanö andre. Hizaʼi, lö aratö ’iʼasiwai wasuwötania’ Yesu, ba wangohori si lö sökhi ba gulidanö andre. Gasa-gasa daʼö, böi taböhöli wangandrö enaʼö alua wamatörö Lowalangi, ba böi adage-dage ita wanuriaigö Banua Lowalangi. Halöwö daʼa no ifaʼeleʼö Yesu, ”ba teturiaigö dania Mbanua Lowalangi andrö turia somuso dödö, ba gulidanö misa, maʼasagörö, ba wamaduhuʼö ba niha fefu, ba awena dania faʼatua danö.”—Mataiʼo 24:14.

”YAʼITÖRÖ ZOMASI NDRAʼUGÖ . . . BA GULIDANÖ”

15, 16. Hadia abönö na ha mangandrö manö ita enaʼö alua gohitö dödö Lowalangi ba gulidanö andre? Tutunö.

¹⁵ Arakhagö 6.000 fakhe ba zi lalö, no alua gohitö dödö Lowalangi ba gulidanö. Imane Yehowa wa fefu nifazökhinia ”sökhi sibai”. (I Moze 1:31) Aefa daʼö, molawa Zatana, iʼotarai daʼö, ato niha si lö omasi mamalua somasi Lowalangi. Hizaʼi, arakhagö walu zuta niha iadaʼa zamosumange Yehowa. Mangandrö ira enaʼö alua gohitö dödö Lowalangi ba gulidanö, ba lafalua gohitö dödö Lowalangi. Ohahau dödö Lowalangi ba wamaigi faʼaurira ba owölö-ölö ira ba wamahaʼö niha tanö böʼö sanandrösa ba Mbanua Lowalangi andrö.

¹⁶ Duma-dumania, samösa dalifusöda nifatenge ba wanuriaigö ba Afrika ni bayagö idanö me döfi 1948 imane, ”Asese ulau mangandrö enaʼö falukha ndraʼo niha somasi ba Daromali Lowalangi enaʼö aboto ba dödöra Yehowa fatua so ginötö. Baero daʼö, fatua lö möido manuriaigö, ulau mangandrö khö Yehowa enaʼö ibeʼe khögu waʼatua-tua ba wamahaʼö niha. Ba lö ubato wangandrö khö Yehowa enaʼö ifahowuʼö niha sawena mamahaʼö yaʼira ba Daromali.” Talifusöda ira alawe si no atua andre, ato niha nitolonia enaʼö aboto ba dödöra Yehowa. Hadia lö olifu ndraʼugö ndra talifusöda si no numalö döfi sowölö-ölö ba wamalua somasi Yehowa?—Baso Filifi 2:17.

17. Hewisa dödöu ba nifalua Yehowa ba niha hegöi ba gulidanö?

¹⁷ Lö taböhöli wangandrö irege alua gohitö dödö Yehowa ba wangohori si faʼudu khönia ba gulidanö. Aefa daʼö, tobali faradaiso gulidanö andre ba ngahönö niha nisusugi. Imane Yesu, ”irugi baŵa dania, ba larongo linia dozi si so ba lewatö ba möi ira yawa”. (Yohane 5:28, 29) Khalaigö atö hawa omuso dödöda na falukha ita niha niʼomasiʼöda! ”Iʼosi dania dawa hörö fefu ba höröda”. (Famaʼeleʼö 21:4) Ato ba gotalua niha nisusugi andrö ”niha si lö atulö”, si lö irai aboto ba dödö zi duhu sanandrösa khö Yehowa hegöi Yesu. Omuso dödöda wamahaʼö yaʼira sanandrösa ba gohitö dödö Lowalangi enaʼö auri ira sagötö faʼara.—Halöwö zinenge 24:15; Yohane 17:3.

18. Hadia manö zabölö moguna ba niha gulidanö?

¹⁸ Ba ginötö tohare Mbanua Lowalangi, teʼamoniʼö döi Yehowa. Awena, alua waʼatulö ba fahasara dödö ba zi sagörö ulidanö. Daʼö nifalua lowalangi ba wanema li si tölu ngawalö wangandrö nifahaʼö Yesu. Ba duho wamahaʼö aefa daʼa, tafatunö zoguna tanö böʼönia ba wangandrö nibeʼe Yesu.