Böi Faröi ba Mbanua Lowalangi

1, 2. (a) Hadia gamakhaitania wa lö faröi khö Lowalangi ba lö faʼawö ita ba wamatörö niha gulidanö? (Faigi gambara ba ngaʼörö 22.) (b) Hezo ato faʼawö niha, ba hadia lua-luania?

ONO Mbanua Lowalangi lö fao ira ba wamatunö-tunö fehede si möi wamabali, simane soi, mbanua, mado ba tanö böʼönia. Hadia mbörö? Börö me taʼomasiʼö Yehowa, lö faröi ita, ba taʼoʼö zomasi ia. (I Yohane 5:3) Gofu hezo toröi ita moguna taʼoʼö goi-goi Lowalangi. Sabölö moguna yaʼia daʼö böi faröi ita khö Yehowa hegöi ba Mbanua Lowalangi andrö. (Mataiʼo 6:33) Daʼa mbörö wa tawaʼö ”tenga moroi ba niha gulidanö” ita.​—Baso Yohane 17:11, 15, 16; Yesaya 2:4.

² Ato niha ba ginötö iadaʼa lö faröi ira ba soira, mado, ba mbanuara, ba hada si toʼölö lafalua, hegöi banua sonekhe faʼolaraga. Lua-luania ato niha si fahindri khö nawönia, fatuwu ira khö nawöra, irege labunu zi manga mböli. Hewaʼae lö fao ita khöra hizaʼi, tola ladönisi ita mazui ösi nomoda enaʼö fao ita khöra irege alua khöda gabula dödö ba falöʼatulö. Aoha khöra wamalua daʼa na no latehegö ira samatörö ba gulidanö irege alua gabula dödö. Hizaʼi, no iwöwöi ita Yehowa enaʼö taʼila hadia zatulö ba si lö atulö. (I Moze 1:27; V Moze 32:4) Hewisa dödöu samösa na alua zi lö atulö? Hadia fao ndraʼugö ba wamatörö niha gulidanö mazui löʼö?

3, 4. (a) Hana wa lö faʼawö ita ba wamatörö niha gulidanö? (b) Hadia nitutunöda ba duho daʼa?

³ Ato niha si faʼawö ba wamatörö niha na alua wasuwöta börö me ira samatörö ulidanö labeʼe waʼafaduhu dödö ba niha, na faʼawö ira ba wamatörö andrö no tobali ono mbanua si sökhi. Hizaʼi, no soloʼö khö Yesu ita. Tobali, lö moguna fao ita ba wamatörö gulidanö andre hegöi ba wasuwöta. (Mataiʼo 26:52) Niha Keriso si ndruhu lö hadöi ba wangera-ngerara wa so wamatörö sabölö sökhi ba gulidanö nifatörö Gafökha. (II Korindro 2:11) Lö omasi farahu ita ba wamatörö niha gulidanö.​—Baso Yohane 15:18, 19.

⁴ Börö me yaʼita niha si lö moʼahonoa, tola manö mangenahö dödöda ba niha si tenga banuada. (Yeremia 17:9; Efeso 4:22-24) Ba duho daʼa, tafahaʼö ita sanandrösa ba goi-goi Zura Niʼamoniʼö enaʼö tola tatimbagö wangera-ngera si lö baga ba niha si faböʼö-böʼö soi khöda. Tatutunö göi hewisa enaʼö lö faröi ita ba Mbanua Lowalangi ba tafahaʼö ita enaʼö taʼoʼö wangera-ngera Yehowa hegöi Yesu sanandrösa ba niha.

HANA WA LÖ FAʼAWÖ ITA BA WAMATÖRÖ NIHA GULIDANÖ

5, 6. Me so ia ba gulidanö, hana wa lö ifaböʼö-böʼöni Yesu wamaiginia niha gofu haniha soi ira, ba hadia mbörö?

⁵ Na tebai tatörö dalu gotalua ba lö faʼawö zamösana ita, haogö angerönusi, ’Hadia nifalua Yesu?’ Me so Yesu ba gulidanö, so waʼafaböʼö wangera-ngera niha Yudaia, Galilea, ba Zamaria. Angeraigö duma-dumania. Lö fahede niha Yehuda ba niha Zamaria. (Yohane 4:9) Ira Farizaiʼo ba niha Sadukaiʼo oya zi lö hasara dödöra. (Halöwö Zinenge 23:6-9) Börö me no lafahaʼö ira niha Yehuda sanandrösa ba huku, lamane tödöra wa abölö atua-tua ira moroi ba niha böʼö. (Yohane 7:49) Niha Yehuda fatuwu ira ba niha sanema beo hegöi ba niha Roma. (Mataiʼo 9:11) Hizaʼi, lö ihalö khönia Yesu hadia zalua andre. Hewaʼae aboto ba dödönia wa iraono Gizaraʼeli andre nifili Lowalangi ba lö tebulö ia wanutunö si ndruhu sanandrösa khö Yehowa, lö irai ifahaʼö ndra nifahaʼönia wa abölö sökhi ira moroi ba niha böʼö. (Yohane 4:22) Si ndruhunia, ifahaʼö ira enaʼö laʼomasiʼö fefu niha.​—Luka 10:27.

⁶ Hana wa lö ifaböʼö-böʼöni Yesu wamaiginia niha gofu haniha soi ira? Börö me Yehowa hegöi Yesu ahakhö dödöra ba niha. Iwöwöi niha Yehowa enaʼö afönu gulidanö. (I Moze 1:27,28) Tobali, lö irai so ba dödö Yehowa hegöi Yesu wa so mbanua, mado, soi sabölö sökhi moroi ba danö böʼö. (Halöwö Zinenge 10:34, 35; Famaʼeleʼö 7:9, 13, 14) Taʼoʼö duma-duma si no labeʼe khöda.​—Mataiʼo 5:43-48.

7, 8. (a) Haʼökhö faʼawö ita, hadia mbörö? (b) Hadia zi tola mangeheta niha gulidanö moroi ba gabula dödö?

⁷ Hadia mbörö wa lö faʼawö ita ba wamatörö niha gulidanö? Börö me taʼoʼawögö Yehowa. Yaʼia zamatörö yaʼita. Imane Afökha ba kabu Edena wa Yehowa tenga samatörö si sökhi ba niha. Omasi Gafökha na so ba wangera-ngera niha wa abölö sökhi nifaluara moroi khö Lowalangi. Ibeʼe khöda ginötö Yehowa hadia faʼawö ita khönia mazui löʼö. Tobali hewisa dödöu samösa? Hadia faduhu dödöu wa nifalua Yehowa abölö sökhi moroi ba nifaluamö? Hadia faduhu dödöu wa ha Banua Lowalangi zi tola mangeheta yaʼita ba gabula dödö? Mazui, hadia tola mamatörö niha he na lö Lowalangi?​—I Moze 3:4, 5.

⁸ Sambua duma-dumania, na so zangandrö mbua wangera-ngera khöu sanandrösa ba gangowuloa si faʼudu khö Lowalangi, niha sondröniaʼö ba wolawa samatörö mazui danö böʼönia, hewisa wanemau li? So göi ba gotaluara zomasi manolo niha soroi ba dödö. Hizaʼi, ha famatörö Lowalangi zi tola mangeheta niha moroi ba wa lö atulö hegöi ba ngawalö gabula dödö. Taʼoʼö wanuturu lala nibeʼe Yehowa ba gangowuloa, tenga simane fangera-ngera niha si fasuida samalua hadia zi sökhi moloʼö yaʼira. Daʼö mbörö wa so wahasara dödö ba gangowuloa niha keriso.

9. Hadia gabula dödö salua khö Waulo moroi ba niha keriso me föna?

⁹ Me götö föna, so ba gotalua niha keriso ba mbanua Korindro lalau fadaʼawa lamane, ”’khö Waulo ndraʼo,’ ’khö Afolo ndraʼo,’ ’khö Gefa ndraʼo,’ ’ba khö Keriso ndraʼo.’” Me irongo Waulo zalua andre tokea ia. Daʼa gabula dödö sebua, börö me lö fahasara dödö ba gangowuloa. Imane Waulo khöra, ”Hadia no fabali keriso?” Iʼamenesi ira Faulo, ”Yaʼami ira talifusö, moroi ba döi Zoʼaya yaʼita andrö, Yesu Keriso, enaʼö hasara limi fefu, ba enaʼö lö falukha ba khömi fabali dödö; miʼatulöʼö, miʼosaraʼö gera-erami ba tödömi.” Moguna göi khöda ba ginötö iadaʼa. Böi so ba gotaluada waʼafabali wangera-ngera.​—I Korindro 1:10-13; baso Roma 16:17, 18.

10. Hadia nifasugi Waulo khö ndra talifusöda si no tebayoini, ba hadia wamahaʼönia khöda?

¹⁰ Ifasugi Waulo ba dödö niha nibayoini wa yaʼira andre ono mbanua zorugo böi laʼabusi tödö ”ngawalö hadia ia, ba gulidanö”. (Filifi 3:17-20)a (Faigi zi no musura ba gahe zura.) Sawuyu si lö faröi yaʼia daʼö tenge-tenge Lowalangi ba Yesu. Na so samösa nifatenge simöi salahi toröi ia ba soi tanö böʼö, lö fao ia na so zalua ba soi daʼö hegöi ba gangowuloa si no lahonogöi ira samatörö ba soi daʼö. Simanö göi, zawuyu si lö faröi lö fao ira ba ngawalö hadia ia zalua ba gulidanö andre hegöi ba gangowuloa si lö faʼawö khö Lowalangi. (II Korindrö 5:20) Yaʼira sauri ba gulidanö lö faröi ira ba Mbanua Lowalangi ba lö fao ira ba gangowuloa si lö faʼawö khö Lowalangi si so ba gulidanö andre.

FAHAʼÖ NDRAʼUGÖ ENAʼÖ BÖI FARÖI BA MBANUA LOWALANGI

11, 12. (a) Hadia gamuata sinangea taʼaröuʼö ita enaʼö lö faröi ita ba Mbanua Lowalangi? (b) Hewisa dödö dalifusöda ira alawe ba niha Serbia, ba hadia zi tola manolo yaʼia sanandrösa ba wangera-ngerania andrö?

¹¹ Ato niha ba gulidanö andre zangumaʼö wa no tefaböbö ira ba mbanua si tumbu ira, si toʼölö mufalua, ba li si fagölö khöra. Asese lasuno mbanua si toröi yaʼira. Tobali, yaʼita niha keriso böi so ba wangera-ngerada zimanö. Moguna tafaböʼöni wangera-ngera simane daʼö hegöi tödöda side-ide enaʼö böi faʼawö ita gofu hadia ia zalua ba gulidanö andre. Hewisa enaʼö tola tafalua daʼa?

¹² Duma-dumania, Mirjetab (Faigi zi no musura ba gahe zura) tumbu ia ba mbanua Yugoslavia. Ba mbanua daʼö fatuwu sibai ira ba niha Serbia. Me no ifahaʼö ia sanandrösa khö Yehowa, aboto ba dödönia wa Lowalangi lö ifaböʼö-böʼöni dödönia ba niha, ba omasi Gafökha enaʼö fatuwu ira khö nawöra. Ba ginötö alua wasuwöta ba gotalua mbanua si toröi yaʼia, ibörögö fatuwu Mirjeta ba lö omasi ia manuriaigö ba niha Serbia. Iʼila wa fasala wangera-ngerania andrö. Mangandrö ia khö Yehowa enaʼö böi so khönia wangera-ngera simane daʼö ba tola merintis ia. Imane Mirjeta, ”Si tola manolo yaʼo yaʼia daʼö na oya ubeʼe ginötögu ba wanuriaigö. Na möido manuriaigö, utandraigö uʼoʼö gamuata Yehowa sebua faʼomasi, ba urasoi samösa wa tola ufaböʼöni wangera-ngeragu.”

13. (a) Hadia zalua khö Zoila ba hadia nifaluania? (b) Moroi ba zalua khö Zoila, hadia zi tobali famahaʼö khöda?

¹³ Samösa dalifusöda ira alawe sotöi Zoila moroi ba Amerika Latin findra ia ba Eropa. Ba gangowuloa niha keriso, so ndra talifusöda moroi ba soi böʼö ba Amerika Latin. Itutunö Zoila so ba gotalua ndra talifusö laʼoʼaya soi si tumbu ia, si toʼölö lafalua hegöi musik moroi ba soinia. Abao sibai dödönia. Mangandrö ia khö Yehowa enaʼö so khönia wanaha tödö ba lö mofönu. Na khöda alua zimane daʼö, hadia nifaluada? So ba gotaluada itaria lö fanaha tödö khöda naso zangoʼaya mbanua si tumbu ita. Lö omasi ita tawaʼö wehede daʼö mazui tahöni-hönisi wa soida zabölö sökhi moroi ba danö böʼö. Lö omasi ita aboto wahasara dödö ba gotalua ndra talifusöda hegöi ba niha böʼö.​—Roma 14:19; II Korindro 6:3.

14. Hadia zi tola manolo yaʼugö enaʼö tola öʼoʼö simane nifalua Yehowa ba niha?

¹⁴ Aboto ba dödöda wa so wahasara dödö ba nono mbanua Yehowa, tobali böi so ba dödöda wa abölö sökhi soi si sambua moroi ba soi böʼö. Hizaʼi, ösi nomo hegöi niha tanö böʼö ba zi fasui yaʼita tola ladönisi wangera-ngerada enaʼö abölö taʼomasiʼö mbanua si tumbu yaʼita. Daʼa zi tola möi mbörö wa fatuwu ita ba soi böʼö. Hewisa enaʼö tola tafaböʼöni wangera-ngerada? Angerönusi tödöu hewisa dödö Yehowa ba niha so suno-suno mbanuania mazui lawaʼö abölö sökhi ira moroi ba niha böʼö. Alui waʼaboto ba dödö sanandrösa ba nifatunöda andre ba ginötö öfahaʼö ndraʼugö samösa mazui ba ginötö mbongi wamahaʼö ba nomo. Aefa daʼö, andrö wanolo khö Yehowa enaʼö tola öʼoʼö simane nifaluania ba niha.​—Baso Roma 12:2.

15, 16. (a) Börö me faböʼö ita moroi ba niha böʼö, hewisa wamaigira yaʼita? (b) Hewisa zatua ba wanolo iraonora enaʼö lö faröi ira khö Yehowa?

¹⁵ Omasi ita tafosumange Yehowa si fao tödö si lö sinegu, daʼa mbörö wa faböʼö ita moroi ba nawöda sohalöwö, awöda ba zekola, si falazi omo khöda, mazui si fahatö khöda. (I Fetero 2:19) No ifangelama ita Yesu wa fatuwu niha khöda börö mefaböʼö ita moroi ba niha böʼö. Törö tödöu wa lö omasi ira khöda börö me lö faʼaboto ba dödöra Mbanua Lowalangi. Lö laʼila hadia mbörö wa lö faröi ita ba Mbanua Lowalangi, tenga ba wamatörö niha gulidanö.

¹⁶ Gofu hadia niwaʼö ba nifalua niha khöda, böi faröi ita khö Yehowa ba taʼoʼö hadia niwaʼönia. (Danieli 3:16-18) Tola manö abua khö ndra si bohou ebua na faböʼö ira moroi ba nawöra. Yaʼami satua, mitolo ndraonomi enaʼö lö ataʼu ira ba zekola. Tola manö ataʼu ndraono na lö labeʼe yawa dangara ba mandera mazui ba ngaluo sebua sasese lafalua niha. Ba mbongi wamahaʼö ba nomo, mitolo ira enaʼö laʼila hewisa dödö Yehowa na lafalua daʼö. Fahaʼö ndraonou enaʼö tola ladunö-dunö hadia zi faduhu dödöra si fao fehede si sökhi. (Roma 1:16) Aefa daʼö, tolo ndraonou enaʼö fao ami ba wodunö-dunö khö ndra guru hadia zi faduhu dödömi.

AMEʼEGÖ TÖDÖ FEFU NIWÖWÖI YEHOWA!

17. Hadia gamuata sinangea taʼaröuʼö ba hadia mbörö?

¹⁷ Si toʼölönia omasi ita gö si toʼölö taʼa, li niʼogunaʼöda, ba si toʼölö nifalua ba danö si tumbu yaʼita. Tobali, hadia so ba dödöda wa abölö sökhi niʼomasiʼöda moroi ba niʼomasiʼö niha böʼö? Omasi Yehowa si fao faʼomuso dödö na taʼogunaʼö fefu ngawalö hadia ia nifazökhinia. (Zinunö 104:24; Famaʼeleʼö 4:11) Tobali, hadia gunania fatandro ita wa abölö sökhi nifaluada moroi ba niha böʼö?

18. Hadia lua-luania na taʼoʼö lala wangera-ngera Yehowa?

¹⁸ Omasi Yehowa na fefu niha lafahaʼö ira sanandrösa khönia, lafosumange ia, lasöndra waʼauri si lö aetu. (Yohane 3:16; I Timoteo 2:3, 4) Omasi ita tafondro-ndrongo ba tatema na so zameʼe mbua wangera-ngera moroi khö ndra talifusöda, hewaʼae faböʼö ba wamaigida asala tefaudu ba zomasi Yehowa. Na tafalua daʼö, tasöndra waʼomuso dödö ba fahasara dödö ba gotalua ndra talifusöda ba wamati. Börö me lö faröi ita khö Yehowa hegöi famatörönia, lö faʼawö ita gofu hadia ia wamatörö ba gulidanö andre. Fatuwu ita waʼasiliawa ba fahindrisa ba gulidanö nifatörö Gafökha andre. Taʼandrö sibai saohagölö khö Yehowa me no ifahaʼö ita irege so khöda wangide-ngideʼö hegöi wangomasiʼö faʼatulö. Hulö simane Dawido me iwaʼö, ”Hiza waʼasökhi, ba ha lö omasiʼö, na ha sara dödö moroi yomo zi fatalifusö!”​—Zinunö 133:1.