Uʼolembai Zindruhu Hewaʼae Na Lö Tanga ba Taʼiogu

Me döfi 1960 tumbu ndraʼo ba 17 fakhe ndröfi mamagu me götö daʼö. Iröi ndraʼaga bapagu me fatua lö tumbu ndraʼo. Toröi ndraʼo hegöi mamagu khö ndra tuagu ba Burg, sambua banua side-ide nifotöi Republik Demokrasi Jerman, mazui Jerman Timur döinia iadaʼa. Ato niha si lö faduhu tödö khö Lowalangi ba daʼö, ba simanö göi nösi nomoma. Moloʼö yaʼaga, lö hadöi Lowalangi.

Itugu ebua ndraʼo, ba iʼameʼegö tödö sibai ndraʼo tuagu. Ifaogö ndraʼo ba ngawalö halöwö, simane ba woʼanöisi töla geu ba wogaragazini dahania. Börö me iraono nasa ndraʼo, omasido wamalua daʼö. Sahono tödö waʼaurigu ba omuso-muso dödögu.

SIKHO SOMBULÖʼÖ FAʼAURIGU

Samuza maʼökhö, so zikho sabölö-bölö salua me fitu fakhe ndröfigu. Awena dua fakhe me no ubörögö weʼamöi ba zekola. Me mangawulido ba nomo, uʼanöisi döla listrik. Me ofeta ndraʼo ba waʼalawa si-8 meter moroi ba dete danö, lita ndraʼo börö me iʼosisi mbotogu arus listrik. Me maoso ndraʼo ba rumah sakit, tebai urasoi dangagu saʼe. Abölö-bölö waʼakhozinia, ba hasambalö mutaba dangagu börö zokho sebua andrö enaʼö lö telangui ndrogu. Tola ökhalaigö hewisa dödö ndra mamagu hegöi tuagu. Börö me iraono nasa ndraʼo, lö aboto sibai ba dödögu hewisa lua-luania ba waʼaurigu na lataba dangagu.

Me no aefa mangawuliga moroi ba rumah sakit, ifuli möi ndraʼo ba zekola. Laʼoʼaya ba latuliʼö ndraʼo ira awögu, ba lö uʼila ulau mbalögu. Afökhö sibai dödögu ba wehedera hegöi ba nifaluara. Ba gafuriata, labeʼe ndraʼo ba Zekola Birkenwerzer, yaʼia daʼö Sekolah Khusus Penyandang Cacat. Börö me fandrö-ndröu zekola moroi ba nomo, lö sagu khö ndra mamagu hegöi tuagu ba wamalukhaisi yaʼo. Awai andrö tola falukha ndraʼo khöra na libur. Ba zi fulu fakhe tenga ba ngai mamagu hegöi tuagu so ndraʼo.

LÖ TANGA BA TAʼIO

Ufomaha ndraʼo ba wangogunaʼö ahegu ba wamalua hadia ia. Hadia tola ökhalaigö hewisa wangogunaʼö sendro hegöi garafu ba gahe? Tola ufalua daʼö. Ufomaha göi ndraʼo wangogunaʼö ahegu ba wobundra ifögu hegöi ba wosukhu mbugu. Ibörötaigö göi uʼogunaʼö kode gahe wahuhuosa ba niha. Ahegu ba tobali tangagu.

Me ibörötaigö ebua ndraʼo, omasido sibai wombaso buku fiksi ilmiah. Itaria ukhalaigö uʼokhögö danga robot zi tobali fanolo khögu ba wamalua hadia ia. Me 14 fakhe ndröfigu, ibörötaigö ulau moroko. Umane tödögu wa daʼö zi tola mameʼe khögu faʼafaduhu dödö ba urasoi wa hulö simane niha böʼö göi ndraʼo. Ba itaria umane-mane tödögu, ’Tola ufalua göi zimane daʼö. Soroko andrö niha si no ebu-bua, he si so mazui si lö tanga.’

Uʼoyaʼö uʼogunaʼö ginötögu ba wamalua hadia ia ba ufaogö ndraʼo ba aktivis sosial. Tobali ndraʼo samösa moroi ba gotalua Free German Youth, sambua organisasi sosial ndraono si bohou ebua nituhini wamareta, ba tobali ndraʼo sekretaris, sambua halöwö si tohude. Fao ndraʼo wanunö, wamaehagö puisi, hegöi olahraga ba zi cacat. Me no tamat ndraʼo sekola, ibörötaigö mohalöwö ndraʼo ba perusahaan si so ba mbanua daʼö. Me no ebu-buado, asese uʼogunaʼö famakhili danga börö me omasido hulö simane ndramatua böʼö ndraʼo.

UʼOLEMBAI ZINDRUHU SI SO BA ZURA NIʼAMONIʼÖ

Samuza inötö me ubaloi-baloi kereta api weʼamöi ba wohalöwö, so samösa ndra matua sangondrasi yaʼo. Isofu khögu hadia tola ukhalaigö na ifuli ifangawuli daʼiogu si dombua Lowalangi. Ambö aboto ba dödögu. Sindruhu wö sa wa omasido na ifuli mangawuli daʼiogu si dombua, hizaʼi moloʼö yaʼo lö tola alua niwaʼönia andrö! Börö me ateis ndraʼo, andrö wa faduhu dödögu wa lö hadöi Lowalangi. Iʼotarai daʼö, uʼalui lala enaʼö lö falukhado khönia.

Lö ara aefa daʼö, so nawögu wohalöwö sogaoni yaʼo weʼamöi ba wamalukhaisi satuania. Me mabadu-badu kofi, ibörötaigö lafatunö khögu ira satuania sanandrösa khö Lowalangi Yehowa. Awena sibai urongo wa so döi Lowalangi. (Zinunö 83:19) Hizaʼi, umane tödögu, ’Lö hadöi Lowalangi, gofu haniha döinia, hasambalö sa uʼalui lala ba wamaduhuʼö khö ndra niha daʼa wa fasala niwaʼöra andrö.’ Börö me simane daʼö lala wangera-ngeragu andrö wa fao dödögu ba wahuhuosa khöra sanandrösa ba Zura Niʼamoniʼö. Hizaʼi, lö hadöi si tobali dane-dane khögu wa sindruhu lö hadöi Lowalangi.

Ba ginötö mafahaʼö ndraʼaga sanandrösa ba nifaʼeleʼö Zura Niʼamoniʼö, arara manö ba adudu waʼafaduhu dödögu wa lö hadöi Lowalangi. Oya wamaʼeleʼö si no alua hewaʼae no ngaotu ma ngahönö fakhe no lasura ia. Ba zi sambua famahaʼö, mafagölösi hadia zalua ba gulidanö andre ba nifaʼeleʼö nisura ba Mataiʼo faza 24, Luka faza 21, ba II Timoteo faza 3. Hulö simane dandra-tandra si tobali fanolo khö doto ba wotatugöi wökhö zi samösa niha, salua nitutunö ba nifaʼeleʼö andrö zanolo yaʼo ba wangai angetula wa no so ita ba ”götö safuria”.a Ahöli dödögu. Tola uʼila hörögu waʼalua zi no tefaʼeleʼö andre.

Faduhu dödögu wa no sindruhu zi no ufahaö yaʼo andre. Ibörötaigö ulau mangandrö khö Lowalangi Yehowa ba uböhöli woroko, hewaʼae no töra 10 fakhe ndraʼo niha si sandru ba woroko. Utohugö manö wamahaʼö yaʼo ba Zura Niʼamoniʼö ba zi döfi faʼara. Me 27 mbaŵa si Öfa 1986, ufabayagöʼö ndraʼo idanö ba zi sambua baʼa nidanö, börö me götö daʼö, lö mutehe khö ndra Samaduhuʼö Yehowa wamalua halöwöra ba Jerman Timur.

MANOLO NIHA BÖʼÖ

Börö me lö latehe halöwöma ba daʼö, andrö wa ba gorahua side-ide ba nomo-omo owulo ndraʼaga ba ha maʼifu ndra talifusö niʼilagu. Ba zi lö utötöna, latehegö khögu ira Samatörö weʼamöi ba Jerman Barat, ba ba daʼö latehegö khö ndra Samaduhuʼö Yehowa ba wamalua halöwöra. Ba awena sibai möido ba kebaktian sebua ba uʼila ngahönö waʼato ndra talifusö ira matua hegöi ira alawe. Sindruhu-ndruhu ahöli dödögu.

Me no aefa adudu Tembok Berlin, awena latehegö saʼe khö ndra Samaduhuʼö Yehowa ba wamalua halöwöra. Awena saʼe ohahau dödöma ba wamosumange Lowalangi Yehowa. Omasido udouʼö menaʼö ginötögu ba wanuriaigö. Hizaʼi, ataʼudo falukha ba niha sawena uʼila. Ailado börö me cacat ndraʼo ba lö toʼölö ndraʼo fariawö ba niha. Tobali, me döfi 1992, utandraigö ulau merintis ba uhalö zi 60 za sara waŵa. Omuso sibai dödögu wamalua daʼö. Andrö wa uhalö gangetula ba wamalua yaʼia ero waŵa ba lö uböhöli irugi tölu fakhe.

Itörö tödögu ngawua wehede Zura Niʼamoniʼö, ”Haniha zamomo, zi lö amomo ndraʼo göi?” (II Korindro 11:29) Hewaʼae na cacat ndraʼo, so nasa khögu wangera-ngera ba tola muhededo. Andrö wa uforege wamalua fondrege zi sökhi ba wanolo niha böʼö. Börö me lö tangagu, abölö ahakhö dödögu ba niha si cacat. Uʼila hewisa waʼafökhö wamalua hadia ia zomasi tafalua ba lö khöda faʼabölö wamalua yaʼia. Andrö wa omasido ubeʼe wamarou dödö ba niha si so fangera-ngera simanö. Manolo niha göi zameʼe khögu faʼomuso dödö.

ITOLODO YEHOWA ERO MAʼÖKHÖ

Atulö wö sa, itaria so khögu wa ide-ide dödö. Fefu daʼö börö me omasido na hulö ndra matua tanö böʼö göi ndraʼo. Ero maʼökhö oya zi tola ufalua samösa, hizaʼi abölö oya ginötö, famorege, hegöi faʼabölö niʼogunaʼögu moroi ba niha böʼö. So wamarou dödö khögu ero maʼökhö yaʼia daʼö, ”Ulawa manö fefu, börö zangabölöʼö yaʼo andrö.” (Filifi 4:13) Ero maʼökhö, ibeʼe khögu wanolo Yehowa ba wamalua halöwögu ”simane” niha böʼö. Aboto ba dödögu wa lö irai iröi ndraʼo Yehowa. Andrö wa lö omasido göi uröi ia.

Ifahowuʼö ndraʼo Yehowa, ibeʼe khögu nösi nomo si lö irai usöndra me iraono hegöi ba waʼebua-buagu. Usöndra woʼomo si sökhi sotöi Elke, sangomasiʼö yaʼo hegöi sebolo tödö. Baero daʼö nasa, zuta waʼato ndra Samaduhuʼö Yehowa tobali talifusögu ba wamati ba zi sagörö ulidanö.

Terara dödögu ba nifabuʼu Lowalangi sanandrösa ba waradaiso, wa hasambalö ’ibohouni fefu hadia ia’, simanö göi daʼiogu. (Famaʼeleʼö 21:5) Aboto ba dödögu nifabuʼu andrö na uʼangerönusi nifalua Yesu me so ia ba gulidanö. Ba zi sabata, ifadöhö gahe sombuyu ba ifadöhö dalinga si no tetaba. (Mataiʼo 12:13; Luka 22:50, 51) Buʼusa li Yehowa hegöi dandra zahöli-höli dödö nifalua Yesu zangaʼaroʼö tödögu wa ba zi lö aratö hasambalö ahori so fefu ndroto-ndrotogu.

Howu-howu sebua khögu yaʼia daʼö aboto ba dödögu sanandrösa khö Yehowa. No tobali ia amagu ba awögu, sondrorogö ba sangabölöʼö yaʼo. Fao dödögu khö Razo Dawido, me isura, ”Baʼa-baʼagu Yehowa . . . no teʼorifi ndraʼodo; andrö owua-wua dödögu.” (Zinunö 28:7) Hasambalö uʼolembai zindruhu andrö ba waʼaurigu. Uʼolembai ia hewaʼae na lö tanga ba taʼiogu.