Na Iʼerogö Yehowa Niha Niʼomasiʼöu

1. Hadia nirasoida na so niha niʼomasiʼöda niʼefasi moroi ba mbanua niha Keriso?

HADIA so niha niʼomasiʼöu si no muʼefasi moroi ba mbanua niha Keriso? Na so, tatu manö afatö dödöu. Imane talifusöda ira alawe sotöi Hilda, ”Me no 41 fakhe mangowalu ndraʼo, mate woʼomogu. Uwalinga daʼö gabula dödö fondrege zebua ba waʼaurigu.b Hizaʼi, me ihalö gangetula onogu matua ba wondröi banua niha Keriso, foʼomonia, hegöi iraononia, urasoi wa daʼö gabula dödögu sabölö ebua moroi ba gabula dödö si no irai utaögö ba zilalö.”

2-3. Moloʼö Sinunö 78:40, 41, hewisa dödö Yehowa na so nono mbanuania sangerogö yaʼia?

² Khalaigö hewisa waʼafatö dödö Yehowa me so ösa nösi nomonia ba zorugo sangerogö yaʼia. (Yud. 6) Khalaigö göi hawaʼafökhö dödönia me asese sibai mamadaö khönia ndraono Gizaraʼeli niʼomasiʼönia. (Baso Zinunö 78:40, 41.) Yafaduhu dödöu wa afökhö göi dödö Namada sebua faʼomasi si so ba zorugo na so niha niʼomasiʼöu sangerogö yaʼia. Aboto ba dödönia waʼafökhö nirasoimö. Börö waʼahakhö dödönia, hasambalö ibeʼe khöu wanolo hegöi famarou dödö.

³ Ba artikel daʼa, tatutunö hadia zinangea tafalua ba wanema fanolo moroi khö Yehowa na so niha niʼomasiʼöda sangerogö yaʼia. Tatutunö göi hewisa lalada ba wanolo ira talifusöda ba mbanua niha Keriso na alua khöra gabula dödö simane daʼa. Hizaʼi si oföna, datatutunö hadia lala wangera-ngera si fasala sinangea tatimbagö.

BÖI TAHIGÖ NDRAʼUGÖ

4. Hadia nirasoi ndra satua na so ndraonora sangerogö Yehowa?

⁴ Na so ndraono sangerogö Yehowa, si toʼölönia laʼangeragö ira satuara hadia zinangea lafalua menaʼö ba wanolo iraonora andrö enaʼö lö tebulö lafosumange Yehowa. Imane si samösa talifusöda ira matua sotöi Luke me no muʼefasi nononia matua moroi ba mbanua niha Keriso, ”Utahigö ndraʼo, ba no göi irai uʼangifigö zalua andrö. Itaria meʼedo, ba afökhö dödögu.” Imane talifusöda ira alawe sotöi Elizabeth, sanaögö abula dödö simane daʼö, ”Asese uwaʼö tödögu wa no fasala ndraʼo wamalua noro dödögu tobali si samösa ina. Urasoi wa lö mofozu ndraʼo ba wamahaʼö onogu matua ba wangomasiʼö Yehowa.”

5. Haniha zinangea mutahigö na so niha sangerogö Yehowa?

⁵ Böi olifu ita wa no itehegö khöda Yehowa wangai angetula samösa. Eluahania, tola tafili hadia taʼoʼö niwaʼönia mazui löʼö. So ösa ndraono sangai angetula ba wamosumange Yehowa si fao faʼalöfaröi, hewaʼae na lö nibeʼe ndra satuara duma-duma si sökhi khöra. Hizaʼi, so göi ndraono sangai angetula ba wangerogö Yehowa me no ebua-bua ira, hewaʼae na no laforege ira satuara ba wamahaʼö yaʼira sanandrösa ba zindruhu. Daʼö zangoromaʼö wa iraono andrö zangai angetula hadia lafosumange Yehowa mazui löʼö. (Yos. 24:15) Börö daʼö, yaʼami ira satua, na so ndraonomi sangerogö Yehowa, böi mitahigö ami!

6. Hadia lua-luania ba ndraono na so zatuara sangerogö Lowalangi?

⁶ Itaria, so zatua sondröi sindruhu hegöi ösi nomonia. (Si. 27:10) Na alua daʼö, hasambalö afatö dödö ndraono börö me no labaliʼö duma-dumara zatuara andrö. Imane Esther me laʼefasi bapania moroi ba mbanua niha Keriso, ”Asese meʼe ndraʼo tenga ha börö me no iröi zindruhu bapagu, hizaʼi börö me no ihalö gangetula wa lö saʼae ifosumange Yehowa. Uʼomasiʼö sibai bapagu. Börö daʼö, me laʼefasi ia moroi ba mbanua niha Keriso, aombö dödögu hewisa waʼaurinia dania. Asese fawuka gera-eragu.”

7. Hewisa dödö Yehowa ba ndraono na so zatuara niʼefasi moroi ba mbanua niha Keriso?

⁷ Yaʼami iraono, na so zatuami niʼefasi moroi ba mbanua niha Keriso, faoga khömi ba waʼabu dödö. Yafaduhu dödömi wa aboto ba dödö Yehowa waʼafökhö nirasoimi. Iʼomasiʼö ami ba iʼameʼegö tödö waʼalöfaröi niforomaʼömi, ba simanö göi dödöma khömi. Böi olifu ami wa tenga yaʼami nitahigö na lahalö gangetula si fasala ira satuami. Simane si no tatutunö moroi yawa, no itehegö Yehowa ba niha gulidanö ero zamösana ba wangai angetula samösa. Börö daʼö, dozi niha si no molulu faʼauri khö Yehowa ba tebayagö idanö, ”iluʼi-luʼi sa noro dödönia zamösana”.​—Gal. 6:5, nis.

8. Hadia zi tola tafalua gasa-gasa lö sangawuli nasa niha niʼomasiʼöda khö Yehowa? (Faigi göi kotak ”Angawuli khö Yehowa”.)

⁸ Na so niha niʼomasiʼöu sangerogö Yehowa, tatu ötötöna enaʼö ifuli ia ba mbanua niha Keriso. Gasa-gasa lö sangawuli ia nasa, hadia zi tola öfalua? Forege ba wangaʼaroʼö famatiu. Na öfalua daʼö, no öbeʼe duma-duma si sökhi ba nösi nomou tanö böʼö hegöi ba niha si no muʼefasi andrö. Tola göi ösöndra waʼabölö ba wanaögö abula dödöu. Börö daʼö, datatutunö hadia manö zi tola öfalua ba wangaʼaroʼö famatiu.

LALA ENAʼÖ LÖ TEBULÖ ARO WAMATIU

9. Hadia manö zi tola öfalua enaʼö ötema waʼabölö moroi khö Yehowa? (Faigi göi kotak ”Ayati si Möi Fondrara Dödö Na No Iröi Yehowa Niha Niʼomasiʼöu”.)

⁹ Forege ba wangaʼaroʼö famatiu ero maʼökhö, ba böi böhöli wamalua daʼö. Hewisa wangaʼaroʼöu famatiu hegöi famati nösi nomou? Moguna owölö-ölö ndraʼugö ba wombaso hegöi ba woʼangerönusi Taromali Lowalangi, ba böi böhöli weʼamöi ba gangowuloa. Na öfalua daʼö, tola ötema waʼabölö moroi khö Yehowa. Imane Joanna me iröi zindruhu bapania hegöi talifusönia alawe, ”Urasoi waʼahono dödö me ubaso waö-waö waʼauri niha samosumange Yehowa ba Zura Niʼamoniʼö, simane Abigaila, Esitera, Yobi, Yosefo, hegöi Yesu. Duma-dumara andrö zameʼe khögu famarou dödö hegöi fanolo enaʼö tola uʼokhögö lala wangera-ngera si tefaudu. Baero daʼö, tefarou göi dödögu me ufondrondrongo zinunö si so ba JW Broadcasting.”

10. Moloʼö Sinunö 32:6-8, hadia zinangea öfalua enaʼö tola ötaögö gabula dödöu?

¹⁰ Tutunö khö Yehowa fefu gabula dödöu. Na fawuka gera-erau, böi böhöli wangandrö khönia. Andrö wanolo moroi khö Lowalangida sebua faʼomasi enaʼö tola öʼokhögö lala wangera-ngera simane niʼokhögönia sanandrösa ba gabula dödö salua khöu. Tola göi öʼandrö khönia enaʼö ’ibeʼe khöu waʼaboto ba dödö ba ituturu khöu lala sinangea ötörö’. (Baso Zinunö 32:6-8.) Sindruhu sa, tola manö abua khöu wanutunö khö Yehowa hadia nirasoimö. Hizaʼi, aboto sibai ba dödönia waʼafökhö nitaögömö. Iʼomasiʼö sibai ndraʼugö, ba iʼandrö khöu enaʼö ötutunö khönia fefu nösi dödöu.​—2 Mo. 34:6; Si. 62:7, 8.

11. Moloʼö Heberaiʼo 12:11, hana wa moguna tafaduhusi tödö degu-tegu nibeʼe Yehowa si fao faʼomasi? (Faigi göi kotak ”Fangefasi​—Tegu-Tegu Nibeʼe Yehowa si Fao Faʼomasi”.)

¹¹ Tuhini gangetula ndra satua sokubaloi. Yehowa zameʼe amakhoita ba wangefasi niha samalua horö sebua moroi ba mbanua niha Keriso. Ibeʼe degu-tegu andrö börö me daʼö lala fondrege zi sökhi ba wanolo niha sangerogö yaʼia hegöi ba wolumöʼö niha tanö böʼö. (Baso Heberaiʼo 12:11.) Te so ösa ndra talifusöda ba mbanua niha Keriso sangumaʼö wa fasala gangetula nihalö ndra satua sokubaloi ba wangefasi si samösa niha samalua horö. Hizaʼi si toʼölönia, niha sangumaʼö daʼö lö omasi ira latutunö gamuata si lö sökhi nifalua niha niʼefasi andrö. Böi olifu ita wa lö ahori taʼila hewisa zindruhunia zalua. Börö daʼö, yafaduhu dödöu wa no laforege ira satua sokubaloi si fao ba panitia pengadilan ba wamalua hadia niwaʼö ba Zura Niʼamoniʼö hegöi ba wosalahini Yehowa tobali sangetuʼö huku.​—2 Ng. 19:6.

12. Hadia mbua nitema ndra talifusöda börö me latuhini degu-tegu nibeʼe Yehowa?

¹² Na ötuhini gangetula nihalö ndra satua sokubaloi ba wangefasi niha niʼomasiʼöu moroi ba mbanua niha Keriso, sindruhunia no ötolo ia ba wangawuli khö Yehowa. Imane Elizabeth si no mututunö moroi yawa, ”Abua sibai khöma ba wanimbagö fariawösa khö nonoma matua. Hizaʼi, me no ifuli ia khö Yehowa, ifaduhuʼö wa sinangea muʼefasi ia. Ba gafuriata, iwaʼö wa oya wamahaʼö si sökhi si tola ihalö. Daʼö zamaduhuʼö ba dödögu wa no fondrege zi sökhi degu-tegu nibeʼe Yehowa.” Imane göi foʼomonia Mark, ”Itutunö khöma onoma matua wa omasi ia mangawuli ba mbanua niha Keriso börö me lö fariawö ndraʼaga khönia. Omuso sibai dödögu börö me itolo ndraʼaga Yehowa ba woloʼö amakhoitania.”

13. Hadia zanolo yaʼugö ba wanaögö abula dödöu?

¹³ Tutunö khö ndra si fahuwu khöu hadia nirasoimö. Beʼe ginötöu fariawö khö ndra talifusöda saro ba wamati enaʼö lö taya wanötönamö. (Amd. 12:25; 17:17) Imane Joanna si no mututunö moroi yawa, ”Urasoi wa lö hadöi awö-awögu. Tobali, tola utaögö gabula dödögu börö me ututunö fefu nösi dödögu khö ndra si fahuwu khögu nifaduhusigu tödö.” Hizaʼi, hewisa na so ndra talifusöda sangumaʼö fehede si lö tefaudu irege monönö waʼabu dödöu?

14. Hana wa moguna taforege enaʼö ’lö tebulö khöda waʼebolo dödö zamösana ba faoma taʼefaʼö zala nawöda soroi ba dödö’?

¹⁴ Foromaʼö waʼebolo dödö khö ndra talifusöda. Böi tötöna wa oi fehede si sökhi manö nifaʼemara. (Yak. 3:2) Börö me lö moʼahonoa ita, böi tokea ndraʼugö na so ösa ndra talifusöda si lö mangila hadia zinangea lawaʼö mazui na lö laʼodödögö wangafökhöiʼö tödöu moroi ba wehedera. Törö tödöu mene-mene nibeʼe zinenge sotöi Faulo, ”Hewaʼae na so mbörö waʼabao dödömi, böi tebulö khömi waʼebolo dödö zamösana ba faoma miʼefaʼö zala nawömi soroi ba dödö.” (Kol. 3:13) Imane si samösa talifusöda ira alawe me muʼefasi nononia moroi ba mbanua niha Keriso, ”No itolo ndraʼo Yehowa ba wangefaʼö sala ndra talifusöda, sangafökhöiʼö tödögu me laforege ba wameʼe khögu famarou dödö.” Hadia zinangea lafalua ira talifusöda ba wanolo ösi nomo niha si no muʼefasi?

FANOLO MOROI BA MBANUA NIHA KERISO

15. Hadia zinangea tafalua ba wanolo ösi nomo niha si no muʼefasi moroi ba mbanua niha Keriso?

¹⁵ Moguna fahuwu ndraʼugö ba nösi nomo niha si no muʼefasi ba foromaʼö khöra waʼasökhi dödö. Ifaduhuʼö talifusöda ira alawe sotöi Miriam wa aombö dödönia weʼamöi ba gangowuloa me no muʼefasi dalifusönia ira matua. Imane, ”Ataʼudo na so wehede niha dania. Hizaʼi sindruhunia, ato ndra talifusöda si fao khögu ba waʼabu dödö, ba lö lafaʼema wehede sagafökhö sanandrösa khö dalifusögu. Börö wanolo moroi khöra, urasoi wa tenga ha yaʼo zabu tödö.” Imane göi talifusöda ira alawe tanö böʼö, ”Me no muʼefasi nonoma matua moroi ba mbanua niha Keriso, ato ndra si fahuwu khöma si möi mondrara tödöma. Hewaʼae na lö laʼila hadia zinangea lawaʼö, fao ira khögu weʼe ba so göi ösa zamaʼoheʼö sura si möi fondrara dödögu. Sindruhu-ndruhu wa möi fanologu fefu nifaluara!”

16. Hadia nifalua mbanua niha Keriso ba wameʼe fondrara dödö hegöi fanolo ba nösi nomo niha si no muʼefasi?

¹⁶ Böi böhöli ba wanolo ösi nomo niha si no muʼefasi. Moguna öforomaʼö khöra waʼomasi ba öfarou dödöra, töra moroi ba zilalö. (Heb. 10:24, 25) Itaria, so ösa nösi nomo niha si no muʼefasi moroi ba mbanua niha Keriso sorasoi wa hulö göi no muʼefasi ira, börö me lö omasi fahuhuo khöra saʼae ndra talifusöda. Böi tehegö larasoi zimane daʼö! Moguna tasuno waʼalöfaröi niforomaʼö ndra si bohou ebua ba tabeʼe khöra wamarou dödö na so zatuara samöhöli ba wamosumange Yehowa. Imane Maria me ihalö gangetula foʼomonia ba wondröi banua niha Keriso hegöi ösi nomonia, ”So ösa ndra si fahuwu khögu si möi ba nomogu, ba latolo ndraʼo ba wondrino gö hegöi ba wamahaʼö iraonogu. Latöfaigö ba dödöra waʼafökhö nirasoigu ba fao ira khögu weʼe. Laʼoʼawögö göi ndraʼo na so zamato-matou yaʼo. Sindruhu-ndruhu tefarou dödögu ba nifaluara andrö!”​—Rom. 12:13, 15.

17. Hadia zinangea lafalua ira satua sokubaloi ba wondrara tödö nösi nomo niha si no muʼefasi moroi ba mbanua niha Keriso?

¹⁷ Yaʼami ira satua sokubaloi, mibeʼe ginötömi ba wangaʼaroʼö ösi nomo niha si no muʼefasi moroi ba mbanua niha Keriso. No tebeʼe khömi noro dödö si tohude ba wondrara tödöra. (1 Te. 5:14) Börö daʼö, mifahuhuo khöra fatua lö tebörögö hegöi na no teʼasiwai gangowuloa. Mifalukhaisi ira, ba miʼohe ira ba wangandrö. Tola fao ami khöra ba wanuriaigö mazui mikaoni ira wefao khömi ba wamahaʼö zi sambua omo. Börö me kubalo ba mbanua niha Keriso ami, moguna miforomaʼö waʼahakhö dödö, faʼomasi, ba foʼameʼegö tödö khö ndra biri-biri Yehowa sabu tödö.​—1 Te. 2:7, 8.

BÖI TAYA WANÖTÖNAU BA FADUHUSI TÖDÖ YEHOWA

18. Moloʼö 2 Fetero 3:9, hadia nitötöna Lowalangi ba niha samalua horö sebua?

¹⁸ ”Lö omasi [Yehowa] na tekiko fazamösa. Omasi ia enaʼö dozi lafalalini gera-erara”. (Baso 2 Fetero 3:9.) Hewaʼae na no ifalua horö sebua si samösa niha, lö tebulö wa sebua böli waʼaurinia ba wamaigi Lowalangi. Böi olifu ndraʼugö wa no ibeʼe Yehowa mbuala sebua böli, yaʼia daʼö faʼauri Nononia niʼomasiʼönia, ba wangöhöli niha sebua horö. Si fao faʼomasi, iforege Yehowa wanolo yaʼira, ba itötöna enaʼö lafuli ira khönia. Daʼö wamahaʼö nihalöda moroi ba gamaedola Yesu sanandrösa khö nono selungu. (Luk. 15:11-32) Ato zondröi sindruhu si no mangawuli khö Namada sebua faʼomasi si so ba zorugo, ba omuso sibai dödö ndra talifusöda ba wanemaʼö yaʼira mangawuli. Irasoi waʼowua-wua dödö talifusöda Elizabeth, si no mutötöi moroi yawa, me ifuli latemaʼö nononia ba mbanua niha Keriso. Imane, ”Uʼandrö sibai saohagölö khö ndra talifusöda samarou tödögu enaʼö lö taya wanötönagu.”

19. Hana wa tola tafaduhusi tödö Yehowa?

¹⁹ Tola tafaduhusi tödö Yehowa. Lö irai ibeʼe wanuturu lala si möi famaʼalada. Yaʼia andrö Amada safönu faʼahakhö dödö ba faʼoböwö, sangoromaʼö faʼomasi ba niha samosumange hegöi sangomasiʼö yaʼia. Yafaduhu dödöu wa lö iröi ndraʼugö Yehowa na alua khöu gabula dödö. (Heb. 13:5, 6) Imane Mark si no mutötöi moroi yawa, ”Lö irai iröi ndraʼaga Yehowa. Lö tebulö itolo ndraʼaga ba wanaögö abula dödö.” Simanö göi, lö mamalö ibeʼe khöu Yehowa ’waʼabölö sahöli-höli dödö’. (2 Ko. 4:7) Daʼö mbörö wa tola öforomaʼö waʼalöfaröi ba lö taya wanötönau hewaʼae na so niha niʼomasiʼöu sangerogö Yehowa.