Fanofu Zombaso

Ba 3 Moze 19:16, no tesura goroisa andre: ”Böi miʼodödögö wangalui lala enaʼö mate nawömi.” Hadia geluahania, ba hadia wamahaʼö si tola tahalö moroi ba goroisa andrö?

Iʼoroisi ba ndraono Gizaraʼeli Yehowa enaʼö laʼamoniʼö gamuatara. Börö daʼö, imane khöra, ”Böi mifangörö-ngörö ami ba nomo nawömi wamatunö si lö duhu. Böi miʼodödögö wangalui lala enaʼö mate nawömi. Yaʼo Yehowa.”—3 Mo. 19:2, 16.

Ba li Heberaiʼo, ngawua wehede ”wangalui lala enaʼö mate nawömi”, tola mufoʼeluaha ia tobali ”mosindro ba wolawa do nawömi”. Hadia geluahania ”mosindro ba wolawa”? Iwaʼö buku referensi Yahudi sanutunö buku 3 Moze wa ngawua wehede daʼö, ”abua khöda wangila eluahania börö me lö taʼila sibai geluaha lala wehede [niʼogunaʼö ba daʼa] ba li Heberaiʼo, si tola mufoʼeluaha tobali ’böi hatöʼögö wosindro’.”

So ösa zagalawa sekola samakhai ngawua wehede daʼa ba ayati 15 sangumaʼö, ”Böi mifuyuʼö zindruhu na miʼetuʼö huku. Böi faʼawö ami ba niha daʼö ha börö me numana mazui kayo ia. Mitörö zatulö khö nawömi na miʼetuʼö huku.” (3 Mo. 19:15) Na atulö niwaʼöra andrö, oroisa si so ba ayati 16 sangumaʼö wa tebai mosindro nono mbanua Lowalangi ba wolawa si samösa niha, eluahania tebai lafalua zi lö atulö ba gödo zanguhuku, ba lala halöwöra, mazui yomo ba nomora. Tebai göi falimo ira ha enaʼö so harera. Sindruhu sa, tebai tafalua zimane daʼö. Hizaʼi sindruhunia, so lala sabölö tefaudu enaʼö tola aboto ba dödöda geluaha ngawua wehede si so ba ayati 16 andrö.

Nehegö atö ngawua wehede si oföna ba ayati 16. Iwaʼö Lowalangi khö nono mbanuania wa tebai laböbögö zi lö duhu khö nawöra. Abölö lö sökhi wamöbögö si lö duhu moroi ba wamatou-tou awö, hewaʼae sindruhunia tola alua gabula dödö na tafatou-tou nawöda. (Amd. 10:19; Sango. 10:12-14; 1 Ti. 5:11-15; Yak. 3:6) Si toʼölönia, niha samöbögö si lö duhu, ifaʼema walimosa ba wangobousi töi niha böʼö. Tola manö ifaduhuʼö waya sanandrösa ba niha böʼö, hewaʼae na tola teʼala waʼauri niha daʼö, simane salua khö Naboti. Me so ösa ndra matua samöbögö khönia si lö duhu, latebu kara Naboti hewaʼae na lö fasala ia. (1 Ra. 21:8-13) Niha samöbögö si lö duhu hulö no ”mosindro ia ba wolawa” niha böʼö börö me iʼalui lala enaʼö mate nawönia, simane nitutunö ba ngawua wehede si mendrua ba 3 Moze 19:16.

Tola manö iböbögö zi lö duhu si samösa niha börö me fatiu dödönia khö nawönia. Imane 1 Yohane 3:15, ”Dozi si fatiu tödö khö dalifusönia no samunu niha daʼö, ba aboto ba dödömi wa lö isöndra waʼauri si lö aetu samunu niha.” Baero daʼö, me no aefa ifaʼema goroisa nisura ba 3 Moze 19:16, itohugö wangumaʼö Lowalangi, ”Böi so ba dödömi watiusa khö dalifusömi.”—3 Mo. 19:17.

Börö daʼö, ngawua wehede sadöni dödöda nisura ba 3 Moze 19:16, ibeʼe wamasugi ba dödö ba niha Keriso. Moguna tatimbagö lala wangera-ngera si lö sökhi ba böi taböbögö zi lö duhu ba niha böʼö. Na taböbögö zi lö duhu khö zi samösa niha ha börö me fatuwu ita khönia mazui afökhö dödöda khönia, eluahania no ”mosindro ita ba wolawa” yaʼia. Daʼö göi zangoromaʼö wa fatiu dödöda khönia. Moguna latimbagö gamuata simane daʼö ira niha Keriso.—Mat. 12:36, 37.