2 Samuela

6 TI liu fakapotopoto ai e Tavita e tau tagata oti kua fifili ia Isaraela, ne tolugofulu e afe.

2 Ti matike a Tavita, ti fano a ia mo e motu oti ne fakalataha mo ia, i Paala-Iuta, ke ta hake ai e lautolu mai he mena ia e puha he Atua, kua ui ai ke he higoa, ko e higoa ni a Iehova Sapaota ko ia kua haele ki luga hana haeleaga ke he vaha he tau kerupi.

3 Kua fakaheke ai e lautolu e puha he Atua ke he fata fakataveli fou, ti uta ai e lautolu he fale a Apinatapu i Kipeā; ka ko Usa mo Ahio, ko e tau tama tane a Apinatapu, kua takitaki e laua e fata fakataveli fou.

4 Ti uta ai e lautolu mai he fale a Apinatapu i Kipeā, katoa mo e puha he Atua, kua mua atu foki a Ahio ki mua he puha.

5 Ka ko Tavita mo e magafaoa oti a Isaraela ne koli a lautolu ki mua a Iehova, mo e ta e lautolu e tau akau fakatagi oti ne eke aki ke he perosi, mo e tau kitara, mo e tau topā, mo e tau sisitara, mo e tau kumepalo.

6 Kua hohoko atu a lautolu ke he mena ne haha saito ai a Nakano, ti fakaolo atu e Usa hana lima ke he puha he Atua, mo e toto ai, ha kua tupetupe e tau povi.

7 Ti tupu ai e ita a Iehova kia Usa, ti ta ai he Atua a ia ke he mena ia ha ko e hana hehe, ti mate ai a ia ke he mena ia ke he tapa he puha he Atua.

8 Kua mamahi a Tavita ha kua oho mai a Iehova kia Usa; ti fakahigoa ai e ia e mena ia ko Faresa-usa, kua hoko mai ke he aho nai.

9 Kua matakutaku a Tavita kia Iehova ke he aho ia, To hoko mai fefe kia e puha a Iehova kia au?

10 Kua nakai mafai a Tavita ke ta mai kia ia e puha a Iehova ke he maga a Tavita; ka e uta ai e Tavita ke he fale a Opeta-etoma ko e tagata Kata.

11 Ti toka ai e puha a Iehova ke he fale a Opeta-etoma ko e tagata Kata ke he tau mahina ne tolu; ti fakamonuina ai e Iehova a Opeta-etoma mo e hana magafaoa oti.

12 Ti talahau ai ke he patuiki ko Tavita, kua pehe mai, Kua fakamonuina e Iehova e magafaoa a Opeta-etoma, katoa mo e tau mena oti ha ha ia ia ha ko e puha he Atua. Ti fano a Tavita, ti ta hake ai mo e fiafia e puha he Atua mai he fale a Opeta-etoma ke he maga a Tavita.

13 Kua oti e tau lakaaga ne ono he o a lautolu ne uta e puha a Iehova, ti eke poa ai e ia ke he tau povi mo e tau manu gako.

14 Ti koli ai a Tavita, kua fakamalolo ai ni ki mua a Iehova; ti tapulu ai a Tavita ke he efota ie lino.

15 Kua ta hake ai e Tavita mo e magafaoa oti a Isaraela e puha a Iehova mo e kalaga fiafia mo e tau pu ne ulo.

16 Kua ta mai e puha a Iehova ke he maga a Tavita, ti kitekite mai ai a Mekala ko e tama fifine a Saulo he fakamaama, ti kitia e ia e patuiki ko Tavita kua hopohopo mo e koli ki mua a Iehova, ti fakavihia e ia a ia ke he hana loto.

17 Kua utā e laūtōlu e puha a Iehova, mo e tuku atu ai e lautolu ke he hana tokaaga ki loto he fale ie ne eke e Tavita; ti eke ai e Tavita e tau poa huhunu ki mua a Iehova, katoa mo e tau poa fakaaue.

18 Kua oti he eke e Tavita e tau poa huhunu, mo e tau poa fakaaue, ti fakamonuina ai e ia e motu ke he higoa a Iehova Sapaota.

19 Ti tufatufa atu e ia ke he motu oti, ko e motu o tagata oti ia Isaraela, ko e tau tane katoa mo e tau fifine, ke takitokotaha ia lautolu mo e taha areto pukupuku; mo e taha maga kakano, mo e taha fakapotopotoaga fua vine tavaki; ti o ai e motu oti takitaha ke he hana magafaoa.

20 Ti liu atu a Tavita ke fakamonuina hana magafaoa; ti hau ai a Mekala ko e tama fifine a Saulo ke feleveia mo Tavita, ti pehe mai a ia, Ne lilifu ai pihia e patuiki a Isaraela ke he aho nai, ne aki ai e ia hana tapulu ke he aho nai ki mua he tau fekafekau fifine he hana tau fekafekau, tuga ne aki ai he tau tagata matahavala ha lautolu a tau tapulu.

21 Ti pehe atu a Tavita kia Mekala, Ne eke ai ki mua a Iehova, ko ia ne fifili au, ka e tiaki ai e ia hau a matua tane mo e hana magafaoa oti, ti kotofa e ia au ke pule ke he motu a Iehova ko Isaraela ni haia, to koli ai ni au ki mua a Iehova.

22 To talahaua kelea foki au ke mua ke he mena na, mo e fakatokolalo ni au; ka ko e tau fekafekau fifine ne tala mai ai e koe, to lilifu ai au kia lautolu.

23 Ko Mekala foki ko e tama fifine a Saulo, nakai fai tama a ia ati hoko ke he aho ne mate ai a ia.