2 Samuela

7 KUA nofo e patuiki ke he hana fale, kua moua foki e ia e okiokiaga ia Iehova mai ia lautolu oti kua fai fi kia ia he tau fahi oti.

2 Ti pehe atu e patuiki kia Natano ko e perofeta, Kikite mai ā, kua nofo ai au ke he fale arasi, ka ko e puha he Atua, kua ha i ai i loto he tau ie puipui.

3 Ti pehe mai ai a Natano ke he patuiki, Ko e tau mena oti kua finagalo a koe ki ai, kia haele atu a koe mo e eke ai, ha kua fakalataha a Iehova mo koe.

4 Ko e po ia ni ne hoko mai ai e kupu a Iehova kia Natano, kua pehe mai,

5 Kia fano a koe, ti pehe atu a koe ke he haku a fekafekau ko Tavita, kua vagahau mai pehe a Iehova, To ta kia e koe e fale māku ke nofo ai au?

6 Ha kua nakai nofo ai au ke he fale tali mai he aho ne ta hake ai e au e fanau a Isaraela I Aikupito, ke hoko mai ke he aho nai; ka kua faifano ai au ke he fale ie mo e fale uta fano.

7 Ko e tau mena oti ne o fano ai au mo e fanau oti a Isaraela; ne vagahau atu nakai au ha kupu ke he taha magafaoa a Isaraela, ne poaki atu e au ke leveki haku motu ko Isaraela, kua pehe atu, Ko e ha nakai ta ai e mutolu e fale he tau akau arasi maku?

8 Ko e hanai kia tala age pehe a koe ke he haku a fekafekau ko Tavita, Kua vagahau mai pehe a Iehova Sapaota, Ko au ne ta mai a koe he lotopa mamoe, ne mui atu ai a koe ke he tau mamoe, kia eke a koe mo takitaki he motu haku ko Isaraela.

9 Ti ha i ai au mo koe ke he tau mena oti ne fano a koe ki ai, mo e fakaotioti ai e au ki mua hau a lautolu oti ne fai fi kia koe; ti eke ai e au māu e higoa lilifu tuga ne tau higoa he tau iki lalahi ke he lalolagi.

10 Kua tuku atu foki e au e mena ke nofo ai haku a motu ko Isaraela, ti to ai e au a lautolu ke nonofo ai a lautolu ke he motu ha lautolu; ti nakai fagahuatia foki a lautolu, ti nakai liliu favale atu kia lautolu a lautolu ne mahani kelea tuga ne vaha fakamua.

11 Ke kamata mai he aho ne kotofa ai e au e tau fakafili ke pule ke he haku motu ko Isaraela. Kua moua foki e koe ia au e okiokiaga mai ia lautolu oti ne fai fi kia koe; ti talahau atu e Iehova kia koe, ko e eke ha ne fai e Iehova e magafaoa māu.

12 Ka katoatoa ai hau a tau aho, mo e takoto a koe fakalataha mo e hau a tau matua, ti fakatutu ai e au hau a fanau ka mole atu a koe, ko lautolu ke tutupu mai ia koe, to fakatumau foki e au hana kautu.

13 To ta e ia e fale ma e higoa haku; ti fakatumau e au e nofoaiki he hana kautu tukulagi.

14 To eke au mo matua hana, ti eke ai a ia mo tama haku; ka hala a ia, ti akonaki atu e au a ia ke he akau he tau tagata, mo e tau ta he fanau he tau tagata;

15 Ka e nakai uta kehe e au haku fakaalofa ia ia, tuga ne uta kehe e au ia Saulo, ne uta kehe ai e au i mua hau.

16 To fakamau e au e magafaoa hau mo e hau a kautu ke tukulagi ki mua hau; to tumau tukulagi hau a nofoaiki.

17 Ke lata mo e tau kupu oti na, mo e fakakiteaga oti na, ne pihia he vagahau atu ai e Natano kia Tavita.

18 Ti fina atu ai e patuiki ko Tavita, mo e nofo a ia ki mua a Iehova; ti pehe atu ai a ia, Haku Iki na e Iehova, ko hai kia au nai? ko hai foki haku a magafaoa kua fakahoko mai ai e koe au ke he aho nai?

19 Ka ko e mena tote ia kia koe, haku Iki na e Iehova, ti kua vagahau mai foki a koe ke he magafaoa he hau a fekafekau ke hoko ni ke he tau hau a mui; Haku Iki na e Iehova na e, kua pihia kia e mahani he tau tagata?

20 Ko e heigoa foki ha kupu ke liu vagahau atu ai a Tavita kia koe? Ha ko koe haku Iki na e Iehova, kua iloa e koe hau a fekafekau.

21 Ha ko e hau a kupu, ke lata foki mo e hau a finagalo kua eke ai e koe e tau mena lalahi oti nai, ke fakailoa mai ai ke he hau a fekafekau.

22 Ko e mena ia kua homo atu a koe Iehova na e ko e Atua na e; ha kua nakai ha i ai taha ke tatai mo koe, ti nakai fai Atua ka ko koe ni, ke lata mo e tau kupu oti kua logona ai e mautolu ke he tau teliga ha mautolu.

23 Ko e motu fe kia ke he lalolagi, kua tatai mo e motu haku ko Isaraela ni, ne haele mai ai e Atua ke laveaki a lautolu ke eke mo motu hana, kia talahau ai hana higoa, ke eke ai foki ma mutolu e tau mena lalahi mo e tau mena ke matakutaku ai, ha ko e motu, ki mua hau a tau tagata ne laveaki e koe māu mai Aikupito, mai he tau motu kehe mo e ha lautolu a tau atua.

24 Kua fakatumau e koe māu e motu hāu ko Isaraela ke eke mo motu hau tukulagi; ko koe foki ko Iehova, kua eke a koe mo Atua ha lautolu.

25 Hanai, Iehova na e ko e Atua na e, ko e kupu ne vagahau mai ai e koe ke he hau a fekafekau mo e hana magafaoa, kia fakamau ai e koe ke tukulagi, ti eke ai, tuga ne vagahau mai e koe;

26 Ti fakalilifu ai tukulagi hau a higoa, kua pehe, Ko Iehova Sapaota, ko e Atua a ia a Isaraela; ko e magafaoa foki he hau a fekafekau ko Tavita, kia fakatumau ai ki mua hau.

27 Ha ko koe Iehova Sapaota na e, ko e Atua a Isaraela kua fakakite mai ke he hau a fekafekau, kua pehe mai, To eke e au ha magafaoa māu; ko e mena ia kua manatu ai au ko e hau a fekafekau ke liogi atu ai e liogi nai kia koe.

28 Hanai, ko e Iki na e Iehova, ko e Atua a koe, ko e hāu a tau kupu ko e moli ni haia; kua vagahau mai foki e koe ke he hau a fekafekau ke he tau mena mitaki nai;

29 Hanai, kia finagalo a koe ke fakamonuina e magafaoa he hāu a fekafekau, kia ha i ai a lautolu ki mua hāu tukulagi; ha ko koe haku Iki na e ko Iehova kua vagahau mai; ko e hau a fakamonuina mai kia monuina tukulagi ai e magafaoa he hau a fekafekau.