Eseta

6 KO e po ia ne mohe alafia ai e patuiki. Ti pehe age ai e patuiki ke ta mai e tohi ne tohi ai e tau tala ke he tau mena ne tutupu ke he tau vaha. Ti totou ai ki mua he patuiki.

2 Ti kitia kua tohi ai e mena ne talahau ai e Moretikai kia Piketano mo Tiresa, ko e tau eunuka tokoua ia he patuiki, ko e tau leveki gutuhala, ne fia fakahoko age e laua e tau lima ha laua ke he patuiki ko Ahasueru.

3 Ti pehe age ai e patuiki, Ko e heigoa kia e mena mitaki mo e lilifu kua eke ai ma Moretikai ha ko e mena na? Ti tali age ai e tau fekafekau he patuiki ne fekafekau atu kia ia, Nakai eke ai ha mena māna.

4 Ti pehe age ai e patuiki, Ko hai kia ha he lotopa? Ha kua fina age ai a Hamanu ke he lotopa i tua he fale he patuiki ke pehe age a ia ke he patuiki ke fakatautau ai a Moretikai ke he akau ne taute ai e ia māna.

5 Ti tali age e tau fekafekau he patuiki kia ia, Kitiala, kua tu mai a Hamanu ke he lotopā. Ti pehe age ai e patuiki, Kia hau a ia.

6 Ti hu mai a a Hamanu, ti pehe age e patuiki kia ia, Ko e heigoa kia e mena ke eke ke he tagata kua loto e patuiki ke fakalilifu ki ai? Ti pehe hifo ai a Hamanu ke he hana loto, Po ko hai kia kua finagalo e patuiki ke fakalilifu atu ki ai, ka ko au ni.

7 Ti tali age ai a Hamanu ke he patuiki, Ko e tagata kua finagalo e patuiki ke fakalilifu ki ai,

8 Kia ta mai e tapulu he patuiki ne tapulu ai e patuiki, mo e solofanua kua heke ai he patuiki, kua tuku ai ke he hana ulu e foufouiki;

9 Kia ta age ai e tapulu na mo e solofanua na ke he lima he taha iki he tau tui ne mua he patuiki, kia fakatapulu ai e lautolu e tagata kua finagalo e iki ke fakalilifu ki ai; kia fakaheke ai foki e lautolu a ia ke he solofanua ke he male he maga, mo e tauhea ai a lautolu ki mua hana, to eke ai pihia ke he tagata kua finagalo e patuiki ke fakalilifu atu ki ai.

10 Ti pehe age e patuiki kia Hamanu, Kia fakaave a, kia uta e koe e tapulu mo e solofanua, tuga he vagahau mai ai e koe, ti eke ai pihia kia Moretikai ko e tagata Iuta, kua nofo ke he gutuhala he patuiki, aua neke tiaki e koe ha mena taha he tau mena oti ne vagahau mai ai e koe.

11 Ti ta age ai e Hamanu e tapulu, mo e solofanua, mo e fakatapulu ai e ia a Moretikai, ti fakaheke foki e ia a ia ke he solofanua ke he male he maga, mo e hea ai ki mua hana, To eke pihia ke he tagata kua finagalo e patuiki ke fakalilifu ki ai.

12 Ti liu atu ai a Moretikai ke he gutuhala he patuiki; ka e alumaki atu a Hamanu ke he hana fale mo e tagi, mo e ufiufi ai e ia hana ulu.

13 Ti tala age ai e Hamanu ke he hana hoana ko Siresa mo e hana tau kapitiga oti e tau mena oti kua hohoko kia ia. Ti pehe age ai hana tau tagata iloilo oti mo Siresa hana hoana, Kaeke ko e tagata he fanau a Iuta a Moretikai, kua kamata a koe ke veli ai ki mua hana, ti nakai kautu a koe kia ia, ka e veli ai ni a koe ki mua hana.

14 Ha ne vagavagahau ai a lautolu mo ia, ti hohoko age ai e tau eunuka he patuiki mo e fakalagalaga atu e lautolu a Hamanu ke fano ke he galue ne taute e Eseta.