Eseta

7 NE o age e patuiki mo Hamanu ke taumafa ai fakalataha mo e patuiki fifine ko Eseta.

2 Ti pehe age foki e patuiki kia Eseta ke he aho ua ke he taumafaaga he uaina, Ko e patuiki fifine na e, ma Eseta, ko e heigoa kia e mena ke tala mai ai e koe? to ta atu ni kia koe; po ke heigoa foki ke ole mai ai e koe? to eke ai ni ke hoko ke he maga ne vevehe ua aki e kautu.

3 Ti tali age ai e patuiki fifine ko Eseta, kua pehe age, Ko e patuiki na e, kaeke kua ofania au e koe, kaeke foki kua mitaki ke he patuiki, kia fakamoui au he ole atu ai au, kia fakamomoui foki haku a motu he olelalo atu ai au;

4 Ha kua fakafua age ai a mautolu, ko au mo e haku a motu, kia fakaoti ai, mo e kelipopo, mo e fakamahakava ai a mautolu, Ane mai foki kua fakafua ai a mautolu ko e tau tane mo e tau fifine ke eke mo tau tupa, po kua fakamate au pete he nakai maeke kia ia kua fai fi mai ke eke ha mena aoga ke lata ai mo e tau mena he patuiki kua maona.

5 Ti tala age ai e patuiki ko Ahasueru; kua pehe age ke he patuiki fifine ko Eseta, Ko hai kia hanā? ko hai kua manatu ke he hana loto ke eke pihia?

6 Ti pehe age ai a Eseta, Ko e tagata kua fai fi mai, mo e favale mai, ko e tagata mahani kelea na ko Hamanu. Ti matakutaku lahi ai a Hamanu ki mua he patuiki mo e patuiki fifine.

7 Ti matike ai e patuiki mo e ita mai he taumafaaga he uaina, kua fano a ia ke he kaina he fale he patuiki. Ti tu ai a Hamanu mo e ole a ia ke he patuiki fifine ko Eseta ke fakamoui ai a ia; he kitia e ia kua mau e manatu he patuiki ke fakahoko age e kelea kia ia.

8 Ne liu age e patuiki he kaina he fale he patuiki ke he fale ne eke ai e taumafaaga he uaina, kua veli foki a Hamanu ke he mohega ha ha i ai a Eseta; ti pehe age ai e patuiki, Ko e mena tapaki kia e ia e patuiki fifine foki ki mua haku ke he fale? Ne to ai e kupu he fofoga he patuiki, ti ufiufi ai e lautolu e mata a Hamanu.

9 Ti pehe age a Harepono, ko e taha ia he tau eunuka ha ha i ai i mua he patuiki, Kitiala, e akau ne taute e Hamanu ma Moretikai ne talahau e mena ne hao ai e patuiki, ha ne tu ai ke he fale a Hamanu, ne limagofulu e kupita hana tokoluga. Ti pehe age e patuiki, Kia fakatautau ai e mutolu a ia.

10 Ti fakatautau ai e lautolu a Hamanu ke he akau ne taute ai e ia ma Moretikai. Ti mauulu ai e ita he patuiki.