Eseta

9 KO e mahina hogofulu ma ua, ko e mahina ko Atara haia, ko e aho hogofulu ma tolu he mahina, kua hoko ke he aho ke fakahoko ai e poaki he patuiki mo e hana fakatufono, ko e aho ne amaamanaki ai a lautolu ne fai fi ke he tau tagata Iuta ke kautu ai kia lautolu, (ka kua liliu kehe ai kia kautu e tau tagata Iuta kia lautolu ne fai fi kia lautolu;)

2 Ne fakapotopoto ai e tau tagata Iuta ke he tau maga ha lautolu ke he tau fahi kautu oti he patuiki ko Ahasueru, ke fakahoko ai e tau lima ha lautolu kia lautolu ne kumi ke ekefakakelea ai kia lautolu; ka e nakai tu mai taha ki mua ha lautolu; ha kua matakutaku ai e tau tagata oti kia lautolu.

3 Ne lagomatai foki ke he tau tagata Iuta he tau iki oti he tau fahi kautu, mo e tau tui, mo e tau pule he motu, mo lautolu ne eke e tau fekau he patuiki; ha kua matakutaku a lautolu kia Moretikai;

4 Ha kua mua a Moretikai ke he magafaoa he patuiki, ne tuogo atu foki a ia ke he tau fahi kautu oti; ha kua mua ue atu e lilifu he tagata na ko Moretikai.

5 Ne keli foki he tau tagata Iuta a lautolu oti ne fai fi kia lautolu, ne keli ai a lautolu ke he pelu, mo e kelipopo, mo e fakamahakava ai a lautolu; ne eke ai e lautolu ha lautolu a manako kia lautolu ne fakavihia mai kia lautolu.

6 Ne keli foki he tau tagata Iuta mo e fakaoti ai i Susana ko e fale he patuiki e tau tagata ne lima e teau,

7 Katoa foki mo Paresaneta, mo Talefono, mo Asefata,

8 Mo Porata, mo Ataleia, mo Aritatu,

9 Mo Paremaseta, mo Arisai, mo Aritai, mo Vaisato.

10 Ko e tau tama tane tokohogofulu ia a Hamanu ko e tama a Hametatu, ko ia ne fai fi ke he tau tagata Iuta mo e kelipopo a lautolu; ka e nakai pipiki e tau lima ha lautolu ke he koloa ha lautolu.

11 Ko e aho ia ne ta age ai ke he patuiki e totouaga he tau tagata ne kelipopo ai i Susana ko e fale he patuiki.

12 Ti pehe age ai e patuiki ke he patuiki fifine ko Eseta, Kua kelipopo mo e fakaoti ai he tau tagata Iuta lima e teau e tagata i Susana ko e fale he patuiki, katoa mo e tau tama tane tokohogofulu a Hamanu; ko e heigoa kia kua eke e lautolu ke he tau fahi kautu oti he patuiki? Hanai, ko e heigoa kia e mena ke ole mai a koe to ta atu ai e au; ko e heigoa kia ke ole mai foki a koe? to eke ai ni.

13 Ti pehe age ai a Eseta, Kaeke kua mitaki ke he patuiki kia toka ai e tau tagata Iuta ha ha i Susana kia eke ai foki e lautolu a pogi pogi ke tuga e fakatufono ke he aho nai, mo e fakatautau ai e lautolu ke he akau e tau tama tokohogofulu a Hamanu.

14 Ti pehe age e patuiki, Kia eke ai pihia. Ti fakamatala ai e fakatufono i Susana. Ti fakatautau ai e lautolu e tau tama tane tokohogofulu a Hamanu.

15 Ti fakapotopoto ai foki e tau tagata Iuta ha ha i Susana ke he aho hogofulu ma fa he mahina ko Atara, ti kelipopo ai e lautolu i Susana tolu e teau e tagata; ka e nakai fofo e lautolu e tau koloa.

16 Ko e tau tagata Iuta oti foki ke he tau fahi kautu oti he patuiki, ne fakapotopoto ai a lautolu ke totoko atu kia momoui ai a lautolu, ti okioki ai a lautolu ia lautolu kua fai fi kia lautolu, ne kelipopo foki e lautolu fitugofulu e afe ti lima e afe tagata ia lautolu ne fakavihia mai kia lautolu; ka e nakai pipiki a lautolu ke he tau koloa,

17 Ko e aho hogofulu ma tolu he mahina ko Atara ne eke ai e tau mena ia; ti okioki ai a lautolu ke he aho hogofulu ma fa, mo e eke e lautolu e aho ia mo aho ke eke ai e galue mo e olioli ai.

18 Ko e aho hogofulu ma tolu mo e aho hogofulu ma fa ne fakapotopoto ai e tau tagata Iuta ha ha i Susana; ti okioki ai a lautolu ke he aho hogofulu ma lima, ti eke e lautolu e aho ia mo aho ke eke ai e galue mo e olioli ai.

19 Ko e mena ia ne eke ai he tau tagata Iuta ha ha he tau maga ikiiki, ko lautolu ne nonofo ke he tau maga nakai puipui, ko e aho hogofulu ma fa he mahina ko Atara mo aho mitaki ke olioli ai, mo aho foki ke eke ai e galue, mo aho foki ke feutaaki ai e tau tufaaga.

20 Ne tohi foki e Moretikai e tau mena ia, ti ta age ai e tau tohi ke he tau tagata Iuta oti ha ha i ai ke he tau fahi kautu oti he patuiki ko Ahasueru, ko lautolu ne tata mai katoa mo lautolu ne mamao atu,

21 Ke fakamau ai kia lautolu ke omaoma ai ke he aho hogofulu ma fa he mahina ko Atara, mo e aho hogofulu ma lima foki ke he tau tau oti,

22 Ha ko e tau aho ia ne okioki ai e tau tagata Iuta ia lautolu kua fai fi kia lautolu, ko e mahina foki ne liliu ai ha lautolu a tagi ke he olioli, mo e aho ne mānu ai ke eke mo aho mitaki; kia eke ai e tau aho ia mo tau aho ke eke ai e galue, mo e olioli ai, mo tau aho foki ke feutaaki ai e tau tufaaga, mo e ta age ai e tau mena fakaalofa kia lautolu ne matematekelea.

23 Ti pulega ai e tau tagata Iuta ke eke mau tuga ne kamata ai a lautolu ke eke, mo e tau mena ne tohi age e Moretikai kia lautolu;

24 Ha ko Hamanu ko e tama a Hametatu ko e tagata Akako ne fai fi ke he tau tagata Iuta oti, ne manatu e ia ke he tau tagata Iuta kia fakamahakava ai e ia a lautolu. Ne eke foki e ia e Puro, ko e vili haia, ke fakaoti ai a lautolu, mo e fakamahakava a lautolu.

25 Ka e fina age ai a Eseta ke he patuiki, ti poaki age ai e ia ke he hana tau tohi kia liu atu ai ke he hana ni a ulu e manatu kelea hana ne manatu ai e ia ke he tau tagata Iuta, kia fakatautau ai foki a ia ke he akau katoa foki mo e hana tau tama tane.

26 Ko e mena ia ne ui ai e tau aho ia ko e tau Puro, ke lata mo e higoa ko Puro. Ko e tau kupu oti foki he tohi na, mo e tau mena ne kitia e lautolu ke he mena na, mo e tau mena ne hohoko kia lautolu,

27 Ne fakamau ai he tau tagata Iuta, mo e talia ai e lautolu ma lautolu mo e fanau ha lautolu, mo lautolu kua fakalataha mai mo lautolu, ke aua neke toe he eke ai e na aho ua ia ke lata mo e tohi ha lautolu ke he hana ni a vaha, ke he tau tau oti;

28 Kia manatu ai foki e tau aho ia mo e eke ai ni ke he tau hau oti, ke he taha magafaoa mo e taha magafaoa, ke he taha fahi kautu mo e taha fahi kautu, ke taha maga mo e taha maga; ke aua neke noa foki e tau tagata Iuta mo e tau aho ia a Puro, mo e nakai toka foki he fakamanatu ai ke he fanau ha lautolu.

29 Ko e patuiki fifine ko Eseta ko e tama a Aviaila, mo Moretikai ko e tagata Iuta, ne tohi ai e laua mo e pule ke fakamau ai e tohi nai, ko e tohi ne ua aki kia Puro.

30 Ne ta age foki e tau tohi ke he tau tagata Iuta oti, ke he tau fahi kautu ne taha e teau uafulu ma fitu a Ahasueru, ko e tau kupu fakaalofa mo e tau kupu ke fakamoli ai,

31 Kia fakamau ai e tau aho ia a Puro ke he tau vaha ke lata ai, tuga he pule a Moretikai ko e tagata Iuta mo e patuiki fifine ko Eseta kia lautolu, tuga foki he kotofa ai e lautolu ma lautolu mo e fanau ha lautolu, ko e tau kupu ke he tau fakakanopogi mo e tagi ha lautolu.

32 Ko e poaki a Eseta ne fakamau ai e tau kupu ia kia Puro; ne tohi ai foki ke he tohi.