Eseta

8 KO e aho ia ne ta age ai he patuiki ko Ahasueru ke he patuiki fifine ko Eseta, e fale a Hamanu ko ia ne fai fi ke he tau tagata Iuta. Ti fina age ai a Moretikai ki mua he patuiki, ha kua tala age ai a Eseta ko e magafaoa a laua mo ia.

2 Ti āki ai he patuiki hana mama ne uta kehe e ia ia Hamanu, mo e ta age ai kia Moretikai. Ne kotofa foki e Eseta a Moretikai ke pule ke he fale a Hamanu.

3 Ti liu vagahau atu ai a Eseta ke he patuiki, kua fakaveli foki a ia ki mua hana tau ve, mo e tagi, mo e ole atu kia ia, kia liliu kehe ai e ia e kelea a Hamanu ko e tagata Akako, mo e hana manatu ne manatu ai e ia ke he tau tagata Iuta.

4 Ti fakaolo age he patuiki e tokotoko auro kia Eseta. Ti matike ai a Eseta mo e tu ki mua he patuiki,

5 Ti pehe age ai a ia, Kaeke kua mitaki ke he patuiki, kaeke foki kua ofania au e ia, mo e tonu foki e mena nai ke he finagalo he patuiki, mo e fiafia foki a ia kia au, kia tohi ke liliu kehe ai e tau tohi ne manatu ai e Hamanu ko e tama a Hametatu, ko e tagata Akako, ne tohi age ai e ia kia fakamahakava ai e tau tagata Iuta, ha ha i ai ke he tau fahi kautu oti he patuiki;

6 Ha kua maeke fefe au ke kitia e kelea ko e hoko ne fai ke he haku a motu? kua maeke fefe au ke kitekite atu ke he haku a magafaoa kua mahaikava?

7 Ti pehe age ai e patuiki ko Ahasueru ke he patuiki fifine ko Eseta, mo Moretikai ko e tagata Iuta, Kitiala kua ta atu e au e fale a Hamanu kia Eseta, kua fakatautau foki e lautolu a ia ke he akau, he fakahoko age e ia hana lima ke he tau tagata Iuta.

8 Kia tohi foki e mua ha ko e tau tagata Iuta, kia pule a mua ke he tau mena ke tohi ai ke he higoa he patuiki, mo e fakamau fakamailoga ai ke he mama he patuiki; ha ko e tohi kua tohi ke he higoa he patuiki mo e fakamau fakamailoga ai ke he mama he patuiki kua nakai maeke ke liliu kehe.

9 Ti ui ai ke he magaaho ia ni ke he tau tohikupu he patuiki, ke he tolu mahina, ko e mahina ko Sevana haia, ke he aho uafulu ma tolu he mahina; ti tohi ai ke lata mo e tau meua oti ne poaki atu ai e Moretikai ke he tau tagata Iuta, mo e tau tui, mo e tau pule he tau motu, mo e tau iki ne pule ke he tau fahi kautu ne kamata mai i Initia ti hoko atu ki Aitiope, ko e taha e teau uafulu ma fitu e fahi kautu; ne tohi age ke lata ai e tohi ke he taha fahi kautu mo e taha fahi kautu, ke lata foki e vagahau mo e taha motu mo e taha motu, ko e tau tagata Iuta foki ke lata mo e tau matatohi ha lautolu mo e vagahau ha lautolu.

10 Ne tohi foki e ia ke he higoa he patuiki ko Ahasueru, mo e fakamau fakamailoga ai ke he mama he patuiki; mo e fakafano age ai e tau tohi he tau tagata heke solofanua, ne heke e lautolu e tau manu mafiti lahi, mo e tau falata ko e tau punua he tau solofanua fifine.

11 Ne toka atu ai he patuiki ke he tau tagata Iuta ha ha i ai ke he taha maga mo e taha maga, kia fakapotopoto ai a lautolu, mo e totoko atu ai kia momoui ai a lautolu, kia fakaoti, kia kelipopo, mo e fakamahakava e tau kau oti he motu mo e fahi kautu ne favale mai kia lautolu, ko e ha lautolu a tau tama ikiiki katoa mo e tau fifine, mo e uta ha lautolu a tau mena mo tau mena ne fofo he tau,

12 Kia eke ai ke he aho taha ke he tau fahi kautu oti he patuiki ko Ahasueru, ko e aho hogofulu ma tolu he mahina hogofulu ma ua ko e mahina ko Atara haia.

13 Ne fakailoa ai ke he tau motu oti e tohi ne tohi ne ta age ke eke mo fakatufono ke he tau fahi kautu oti, kia tauteute ai e tau tagata Iuta ke he aho ia ke lalago atu kia lautolu kua fai fi kia lautolu.

14 Ti o age ai e tau tagata heke solofanua ne heke e tau manu mafiti lahi, mo e tau falata, ne alumaki a lautolu, mo e fakaave ai ha ko e poaki he patuiki. Ne ta age foki e fakatufono i Susana ko e fale he patuiki.

15 Ti fina age ai a Moretikai mai mua he patuiki kua tapulu ai a ia ke he tau tapulu he patuiki, ko e ie uli, mo e ie lino hina, mo e foufou auro lahi, mo e tapulu loa ko e ie lino mo e kula uhi. Ne kalaga fiafia foki mo e olioli ai e maga ko Susana.

16 Ha ha i ai foki ke he tau tagata Iuta e maama, mo e olioli, mo e fiafia, mo e lilifu.

17 Ko e tau mena foki ne hoko ki ai e poaki he patuiki mo e hana fakatufono, ke he tau fahi kautu oti, mo e tau maga oti, ne tutupu ai e olioli mo e fiafia he tau tagata Iuta, ne eke ai foki e galue ti eke ia mo aho mitaki. Ne tokologa foki e tagata he motu ne eke mo tau tagata Iuta; he matakutaku ai a lautolu he tau tagata Iuta.