Iopu

21 TI tali age ai a Iopu, kua pehe age,

2 Kia fanogonogo fakamitaki mai a mutolu ke he haku tau kupu, kia eke foki ia mo fakamafanaaga ha mutolu.

3 Kia fakahautoka mai a kia au, ato vagahau atu e au; ka mole au haku a tau kupu, ti va mai ā.

4 Ka ko au nai kua tagi atu kia au ke he tau tagata? ti heigoa foki e mena ke nakai fakatepetepe ai haku loto?

5 Kia kitekite mai a a mutolu kia au, mo e ofo ai a mutolu, mo e tuku e tau lima ha mutolu ke he tau fofoga ha mutolu.

6 Ka manatu au ki ai, ti fakaatukehe ai au, kua moua foki haku tino he vivivivi.

7 Ko e heigoa kia e mena ne momoui ai e tau tagata mahani kelea, ti hohoko ke he vaha ke momotua ai, mo e fakaloga ai e lautolu e tau koloa ha lautolu?

8 Kua fakatumau e fanau ha lautolu ki mua ha lautolu kua fakalataha mo lautolu, mo lautolu ne tutupu mai ia lautolu kua fakatumau ai a lautolu kua kitekite a lautolu ki ai.

9 Kua monuina e tau fale ha lautolu nakai fai mena ke matakutaku ai a lautolu, nakai ha i ai foki ki luga ha lautolu e akau he Atua.

10 Kua fatu e tau povi ha lautolu mo e nakai to e tau punua, kua fanau he tau povi ha lautolu, ka e nakai fanau maua.

11 Kua fakafano atu e lautolu e tau tama ikiiki ha lautolu tuga ne fuifui mamoe, kua kolikoli foki e fanau ha lautolu.

12 Ne lologo a lautolu mo e ta e topa, mo e kitara, mo e fiafia a lautolu ke he leo he kofe fakatagi.

13 Ne oti ai e tau aho ha lautolu mo e monuina, tuga ne magaaho ke kemo ai e mata ti o hifo ai a lautolu ke he tukuaga.

14 Ne pehe age foki a lautolu ke he Atua, Kia fano kehe a a koe ia mautolu, he nakai fia iloa e mautolu hau a tau puhala.

15 Ko hai kia a Ia hana e malolo oti kana, kia fekafekau ai a mautolu kia ia? ke aoga ha ha foki kia mautolu ka liogi a mautolu kia ia?

16 Kitiala, nakai ha ha he tau lima ha lautolu ha lautolu a monuina, ne mamao ia au e tau pulega ha lautolu ne mahani kelea.

17 Ko e laga fiha kia kua tamate e lamepa he tau tagata mahani kelea, mo e hoko atu kia lautolu ha lautolu a malaia, mo e tufatufa he Atua e tau mena matematekelea ke he hana ita?

18 Kua lata a lautolu mo e tau kakau saito kua havilia he matagi, kua lata foki a lautolu, mo e tau otaota he tau saito kua havilia he afa?

19 Kua pehe atu a mutolu, Kua toka he Atua hana tau hala ma e fanau hana; kia taui atu e ia kia ia, kia iloa ai e ia.

20 Kia kitia he tau mata hana hana malaia, kia inu foki e ia ke he ita hana Hana e malolo oti kana.

21 Ha ko e mena, ko e heigoa kia hana fiafia ke he hana magafaoa ka mole atu a ia, ka kua veveheua ai e katoa he hana tau mahina kua totou?

22 To fakaako atu kia e taha e Atua ke iloilo? ko ia ni ne fakafili a lautolu ne tokoluga.

23 Kua mate taha, ka kua katoatoa ai hana malolo, ha kua nofo fakatekiteki ni a ia, mo e monuina a ia.

24 Kua puke e tau mena ne fagai ai hana tau manu ke he puke huhu, ne molu foki e uho he hana tau hui motua.

25 Kua mate foki taha kua mamahi ni hana loto, mo e nakai kai mo e fiafia a ia.

26 Kua tatakoto fakalataha a laua ke he kelekele, kua ufia foki a laua he tau uaga.

27 Kitiala, kua iloa e au e tau fatuakiloto ha mutolu, mo e tau manatu ne favale mai ai a mutolu kia au.

28 Ha kua pehe a mutolu, Ko fe kia e fale he iki favale, ko fe foki e tau fale ie ne nonofo ai e tau tagata mahani kelea?

29 Nakai kia huhu age a mutolu kia lautolu ne o age he puhala? mo e nakai kia iloa e mutolu e tau fakamailoga ha lautolu?

30 Kua toka ai e tagata mahani kelea mo e aho ke malaia ai; kua takitaki atu a lautolu ke he aho he ita lahi?

31 Ko hai kia ke talahau ai hana puhala ki mua hana? ko hai foki ke taui atu kia ia e tau mena ne eke e ia?

32 Kua uta foki a ia ke he tukuaga, kua leveki foki e taha e tukuaga.

33 Kua humelie kia ia e kelekele he pahua, kua mumui age foki kia ia e tau tagata oti, ko lautolu foki ne mumua atu kia ia nakai ni maeke he totou.

34 Kua eke fefe a mutolu kua fakamafana noa mai kia au? ha ko e pikopiko ha mutolu a tali.