Iopu

22 TI tali age ai a Elifasa ko e tagata Timanu, kua pehe age,

2 Kua aoga kia e tagata ke he Atua, ha ko ia ne iloilo kua aoga a ia kia ia ni?

3 Ko e mena kia ke fiafia ai a Ia hana e malalo oti kana he mahani tututonu a koe? po ke aoga kia kia ia he katoatoa e mitaki hau a mahani?

4 Kua akonaki kia e ia a koe ha ko e hau a matakutaku kia ia, kua o fakalataha a mua mo ia ke he fakafiliaga?

5 Nakai kia lahi hau a hala? nakai fakahiku foki hau a tau mahani kelea.

6 Ko e mena talia noa e koe mai he matakainaga hau e tau mena ke fakamau aki e fakafua? kua aaki foki mo e uta kehe e koe e tau tapulu he tau tagata nonofogati.

7 Nakai age e koe e magavai kia ia ne lolelole he fia inu ke inu ai a ia; ti nakai age foki e koe e tau mena kai kia ia ne fia kai.

8 Ka ko e tagata malolo ne eke e ia e kelekele māna; ne nofo ai foki e tagata lilifu.

9 Ne fakafano noa atu e koe e tau fifine takape; ne fatifati foki e tau lima he tau tama nakai fai matua.

10 Ko e mena ia kua agaagai kia koe e tau hele, kua fakahahaku foki a koe ha ko e matakutaku fakalutukia.

11 Po ke pouli nakai kitia e koe ha mena, mo e vai lahi ne lofia ai a koe.

12 Nakai kia ha ha he lagi i luga e Atua? Kia kitekite a foki ke he tokoluga he tau fetu, kua tokoluga ni!

13 Ne pehe mai foki a koe, Po ke iloa fefe he Atua? Kua maeke kia ke fakafili mai e ia mai he faahi atu he pouli?

14 Kua eke e tau aolagi uli mo mena ke ufiufi aki a ia, kua nakai fioia mai ai e ia; kua haele fano foki a ia ke he mena ne takai aki e lagi.

15 Kua manamanatu nakai a koe ke he puhala tuai ne o ai e tau tagata mahani kelea?

16 Ko lautolu ne uta kehe fakalutukia, ne lofia ha lautolu a tau fakaveaga he fakapuke.

17 Ko lautolu ne pehe age ke he Atua, Kia fano kehe a a koe ia mautolu; mo e pehe, Ko e heigoa kia ke eke a Ia hana e malolo oti kana ma lautolu?

18 Ka e fakapuke e ia e tau fale ha lautolu ke he tau mena mitaki. Kia mamao ia au e tau pulega he tau tagata mahani kelea!

19 Kua kitia he tau tagata tututonu, mo e fiafia ai a lautolu; ko lautolu foki ne mahani hakohako, kua va a lautolu kia lautolu.

20 Kua pehe age, Ko e moli kua hehele kehe a lautolu ne totoko mai kia tautolu, ko e tau mena foki ha lautolu ne toe kua fakaoti ai ke he afi!

21 Kia fakamahani a mua mo ia, ti mafola ai; ko e mena ia ke hoko mai ai e monuina kia koe.

22 Kia talia e koe e fakatufono mai he fofoga hana, mo e tuku a e kupu hana ke he loto hāu.

23 Kaeke ke liu atu a koe kia Ia hana e malolo oti kana, to ati hake ai a koe; kaeke ke tuku mamao atu e koe e mahani hepehepe he tau fale ia hau.

24 Kia tuku e koe hau a auro ke he efuefu, mo e auro mai Ofaira fakalataha mo e tau maka he tau vailele.

25 Ti eke a Ia hana e malolo oti kana mo auro hau, to eke foki a ia mo ario uho ni māu.

26 Ti fiafia ai a koe kia Ia hana e malolo oti kana, mo e haga hake e koe hāu a mata ke he Atua.

27 To liogi a koe kia ia ti fanogonogo mai a ia kia koe; to ta atu foki e koe e tau mena ne omonuo ai a koe.

28 Ko e mena foki kua fakatufono e koe ke eke to fakamau ai kia koe; to kikila ai foki e maama ke he hau a tau puhala.

29 Ka palu hifo e lautolu a koe ki lalo, ti pehe age a koe, Ko e mena ta hake foki ki luga; To fakamoui foki e ia a ia ne fakatokolalo.

30 To laveaki foki e ia a ia he hala; to laveaki ni a ia ha ko e mea he hau a tau lima.