Iopu

7 NAKAI kia kotofa e tau ke tau ai e tau tagata ke he lalolagi? ko e tau aho foki ha lautolu nakai kia tuga e tau aho he fekafekau palepale?

2 Tuga ne fekafekau kua manako lahi ke he ata, tuga foki e fekafekau palepale kua amaamanaki ke he taui he hana gahua;

3 Kua eke ni pihia māku e tau mahina ke mamahi ai, kua kotofa foki kia au e tau po ke matematekelea ai.

4 Ka takoto au ti pehe age au, To matike a fe au, mo e mole atu e po? Ti nakai okioki he kapaliloi ati ahogia.

5 Kua ufiufi ai haku tino he tau uaga, kua kiva ai he kelekele; ne maulu haku a kili, ti liu pela foki ni.

6 Kua mua he vave lahi haku a tau aho ke he vave he akau he tagata lalaga ie, kua oti foki kua noa mo e amaamanaki.

7 Kia manatu a ko e moui haku ko e matagi ni haia; nakai tuai kitia foki haku tau mata e mena mitaki.

8 Nakai liu kitekite mai kia au e tau mata hana kua kitia au; to kitekite mai a koe kia au, ka e nakai ha i ai au.

9 Kua lele e aolagi ti mole atu ni, kua pihia a ia kua hifo ke he tukuaga, nakai tuai hake mai a ia.

10 Nakai tuai liu mai a ia ke he hana fale; to nakai iloa foki a ia ke he mena ne nofo ai a ia.

11 Ko e mena ia nakai taofi e au haku gutu, to vagahau ai e au ke he matematekelea he haku agaga, to tagi atu au ke he mamahi he haku loto.

12 Ko e tahi kia au, po ke tanimo ne kotofa ai e koe taha ke leveki mai kia au?

13 Ka pehe au, Ko e haku a mohega ke mafanatia ai au, ko e haku a mena ne takoto ai ke fakamāmā ai haku a tagi;

14 Ti fakahopo e koe haku ate ke he tau miti, kua fakamatakutaku foki e koe au ke he tau fakakiteaga.

15 Kua manako au ke fofota ai haku ua ke mate; kua lahi haku a manako ke mate ka e tote ke he tau hui motua nai.

16 Kua fakavihia e au ke he haku a moui, nakai fia moui mau au; kia toka e koe au, ha ko e mena fakateaga haku a tau aho.

17 Ko e heigoa kia e tagata kia fakalilifu atu a koe kia ia? mo e manatu mai e koe a ia?

18 Mo e aahi e koe a ia he tau pogipogi oti, mo e kamatamata mau e koe a ia?

19 Nakai haga kehe e koe hau a fofoga ia au ato a fe, mo e toka e koe au ato folo e au haku a ifo?

20 Kaeke kua hala au, ko e heigoa kia kua eke e au kia koe, Ko koe na kua leveki ke he tau tagata? Ko e ha kua eke au mo fakamailoga kia koe, ti eke ai au mo kavega kia au?

21 Ko e ha kua nakai uta kehe ai e koe haku a tau holifono, mo e fakamagalo ai haku a tau mahani kelea? ha ko e mena toe tote ti takoto ai au ke he kelekele; ti kumi fakamakutu foki e koe au ka e nakai ha i ai au.