Iopu

8 TI tali age ai e Piliati ko e tagata Sua, kua pehe age.

2 To vagahau ai a koe ke he tau kupu na ato a fe? to eke foki e tau kupu he fofoga hau mo matagi lahi ato a fe?

3 Kua fakakeu kia he Atua e fakafiliaga? po ke fakakeu kia e tau mena tonu kia Ia hana e malolo oti kana?

4 Kaeke kua hala e fanau hau kia ia, ti tuku atu ai e ia a lautolu ke he tau holifono ha lautolu?

5 Kaeke ke kumi fakamakutu e koe ke he Atua, mo e olelalo atu kia Ia hana e malolo oti kana;

6 Kaeke kua mahani mitaki mo e mahani hakohako a koe, to ala mai a ia ainei ha ko koe, to fakamonuina foki e ia e fale kua eke ai hau a mahani tututonu.

7 Pete he tote hau a kamataaga, to fakalahi hau a fakahikuaga ke lahi mahaki,

8 Kia huhu atu a, ke he hau fakamua, mo e kumi fakamakutu e koe e tau mena ne iloa he tau matua ha lautolu.

9 (Ha ko tautolu ko e tau tagata he aho neafi, nakai iloa e tautolu; ha ko e tau aho ha tautolu ke he lalolagi ko e ata haia.)

10 Nakai kia fakaako atu e lautolu a koe, mo e tala atu e lautolu kia koe e tau kupu mai he tau loto ha lautolu?

11 Kua tupu kia e kome ka nakai ha ha i ai ha pelapela? po ke tupu kia e aaku ka nakai ha ha i ai ha vai?

12 Ka kua tupuolamoui agaia, mo e nakai hahala, ne mua hana fifigo vave he tau vao mui oti.

13 Kua pihia ni e tau puhala ha lautolu oti kua nimo ia lautolu e Atua; to fakaoti foki e amaamanaki he tagata kolokolovao.

14 To helehele kehe hana amaamanaki, ko e hana mena ne tua ki ai foki ko e kaleveleve he kufani haia.

15 To falanaki a ia ke he hana fale ka e nakai mau, to tapiki a ia ki ai, ka e nakai ni tumau ai.

16 Ne tupuola a ia, ka kua lagina, ne totolo foki hana tau la ke he hana kaina.

17 Ne fevihivihiaki hana tau vaka ke he tanakiaga maka, kua kitia foki e ia e mena ne toka ai e tau maka.

18 Kaeke ke fakaoti a ia mai he mena ha i ai a ia, ti fakatikai e ia a ia, kua pehe atu, Nakai kitia e au a koe.

19 Kitiala, ko e fiafia haia he hana puhala, to tutupu mai foki falu he kelekele.

20 Kitiala, nakai tiaki he Atua a ia ne mahani hakohako, to nakai taofi foki e ia e tau lima ha lautolu ne mahani kelea.

21 To fakapuke ai foki e ia hau a fofoga ke he kata, mo e hau a tau laugutu ke he kalaga fiafia.

22 To tapulu ai ke he ma a lautolu kua fakavihia atu kia koe, ko e fale ie foki he tau tagata mahani kelea to nakai ha i ai haia.