Esoto

23 AUA neke talahau e koe e ogo pikopiko; ua kau foki a koe fakalataha mo e tagata mahani kelea, neke eke e koe mo talahau favale.

2 Aua neke mui atu a koe ke he tokologa ke mahani kelea; aua neke vagahau a koe ke he taufetoko ke kau mo e tokologa ke fekakeukeu ai e fakafiliaga.

3 Aua neke fakalilifu a koe ke he tagata nofogati ke he hana taufetoko.

4 Kaeke ke fakataupa a mua mo e povi he tagata kua fai fi kia koe, po ke hana asini kua hehe; kia liuaki atu ai e koe kia ia.

5 Kaeke ke kitia e koe e asini hana kua fakavihia a koe, ha ne takoto ki lalo he kavega hana; a koe neke tiaki e koe a ia, ka e vevete ni e mua fakalataha mo ia.

6 Aua neke fakakeukeu e koe e fakafiliaga he hau a tagata nofogati ke he hana mena ne fakafili ai.

7 Kia fakamamao a koe mo e kupu pikopiko; aua foki neke kelipopo e koe e tagata nakai hala, po ke tagata tututonu; ha kua nakai talahaua tututonu e au e tagata mahani kelea.

8 Aua neke talia e koe e mena fakaalofa; ha ko e mena fakaalofa ke fakapouli aki e tau mata ha lautolu ne maama, ko ia foki ke hepehepe ai e tau kupu he tau tagata tututonu.

9 Ti ua favale a koe ke he tagata kehe, ha kua iloa ni e mutolu e loto he tagata kehe, ha ko e tau tagata kehe a mutolu ke he motu ko Aikupito.

10 Ono ni e tau ke to ai e koe e tau saito ke he hau a fonua, mo e tanaki mai e tau mena ne tutupu ai;

11 Ka ko e tau ne fitu kia toka noa ai e koe, mo e toka atu pihia, kia kai ai he tau tagata nonofogati he hau a motu; ko e tau mena foki kua toe ia lautolu kia kai ia he tau manu he vao; kia eke pihia foki ke he hau a ulu vine mo e hau a ulu olive.

12 Ono ni e aho ke eke ai hau a tau gahua, ka ko e aho fitu ke okioki ai a koe, kia okioki ai hau a povi mo e hau a asini, kia fakamanava foki e tama he hau a fekafekau fifine, katoa mo e tagata kehe.

13 Ko e tau mena oti kua tala atu ai e au kia mutolu, kia omaoma a mutolu ki ai; aua foki neke totoku e mutolu e higoa he tau atua kehe, aua neke logona ai mai he gutu hau.

14 Taki lagatolu ke he tau tau ke eke galue e koe kia au.

15 Kia eke e koe e galue he areto nakai fakaea; fitu ni e aho ke kai ai e koe e areto nakai fakaea, tuga ne poaki e au kia koe, ke he vaha kua kotofa ke he mahina ko Apipa; ha ko e mahina ia ne hau ai a koe i Aikupito; aua foki neke kitia taha ki mua haku kua nakai fai mena;

16 Mo e galue he heleheleaga saito, mo e tau fua uluaki he hau a gahua he to mena ke he fonua; mo e galue he fakapotopotoaga mena kai ke he fakahikuaga he tau, ka oti he fakapotopoto mai he fonua e tau mena ne gahua ai a koe.

17 Taki lagatolu ke he tau tau ke kitia ai e tau tane oti ha ia koe ki mua he Iki, ko Iehova.

18 Aua neke eke poa e koe ke he toto he haku a poa fakalataha mo e areto fakaea; ti ua toka ato a pogipogi e gako he haku a poa.

19 Ko e kamataaga he tau fua uluaki he hau a fonua, kia uta e koe ia ke he fale a Iehova hau a Atua. Aua neke tunu e punua koti ke he puke huhu he hana matua fifine.

20 Kitiala, kua fakafano atu e au ni e agelu ki mua hau ke leoleo a koe ke he puhala, ke fakahoko atu foki e ia a koe ke he mena kua taute e au;

21 Kia fakaeneene a koe ki mua hana, mo e fanogonogo a koe kia ia, aua neke fakahogohogo kia ia, ha ko e mena nakai fakamagalo e ia ha mutolu a tau holifono; ha ko e mena ha ia ia haku a higoa.

22 Kaeke ke fanogonogo ni a koe kia ia, mo e eke e koe e tau mena oti kua tala atu e au, ti eke e au mo tau fi haku a lautolu kua fai fi kia koe, to fakamamahi e au a lautolu kua fakamamahi a koe.

23 Ha ko e mena fano haku agelu ki mua hau, to fakahoko e ia a koe ke he motu he faoa Amori, mo e faoa Heti, mo e faoa Perisi, mo e faoa Kanana, mo e faoa Hivi, mo e faoa Iepusi, to fakaotioti e au a lautolu.

24 Aua neke hufeilo a koe ke he tau atua ha lautolu, ti ua fekafekau a koe ki ai, ti ua eke e koe tuga ne tau mena kua fa eke e lautolu; ka e fakaotioti ni e koe a lautolu, ti tuki malipilipi e koe ha lautolu a tau tupua.

25 Ka e fekafekau a mutolu kia Iehova ha mutolu a Atua, ti fakamonuina e ia hau a tau mena kai, katoa mo e hau a vai, to uta kehe foki e au e mamahi ia koe.

26 Nakai to e tama he taha, ti nakai tufua taha ke he hau a motu; to fakakatoa e au hau a tau aho.

27 Ko e haku a matakutakuina ke fakafano atu e au ke mua kia koe, to tutuli foki e au e tau motu oti ke hoko atu a koe ki ai; to eke e au ke haga tua mai kia koe a lautolu oti kua fai fi kia koe.

28 To fakafano atu foki e au e lago siraga ke mumua kia koe to vega ai mai mua hau e faoa Hivi, mo e faoa Kanana, mo e faoa Heti.

29 Ka e nakai vega a lautolu mai mua hau ke he tau taha neke vao e motu, ti tupu loga ai e tau manu favale ke kai a koe.

30 Ka e vega fakagahoa mo e fakagahoa fakamatafeiga mai mua hau, ato tupu tokologa ai a koe mo e moua e koe e motu.

31 To tuku atu e au hau a tau katofia ke kamata mai he tahi Kula, ti hoko atu ke he tahi he tau tagata Filisitia; ke kamata mai he tutakale, ti hoko atu ke he vailele; ha ko e mena tuku atu e au ke he hau a lima a lautolu kua nonofo ke he motu; to vega foki e koe a lautolu mai mua hau.

32 Aua neke eke e koe ha maveheaga mo lautolu, po ke ha lautolu a tau atua.

33 Aua neke nonofo a lautolu ke he hau a motu, neke fakatupu e lautolu kia koe e hala kia au; ha ko e mena ka fekafekau a koe ke he tau atua ha lautolu, ti eke ia mo matahele kia koe.