Isaia

31 OI te fakaalofa kia lautolu kua o hifo ki Aikupito ke kumi ai e lagomatai; mo e falanaki a lautolu ke he tau solofanua, mo e tua a lautolu ke he tau kariota, ha ko e loga; kua tua foki a lautolu ke he kau heke solofanua, ha kua mua e malolo a lautolu; ka e nakai hagao atu a lautolu kia ia ne Tapu i Isaraela, mo e nakai kumi e lautolu a Iehova.

2 Ka e iloilo ni a ia, kua fakahoko e ia e kelea; nakai liuaki ai e ia hana kupu; ka e matike atu a ia ke tau mo e magafaoa ha lautolu ne mahani kelea, ke totoko atu foki a ia ke he lagomatai ha lautolu kua eke e tau mena kelea.

3 Ko Aikupito ko e tau tagata ni a lautolu nakai ko e Atua; ko e ha lautolu a tau solofanua foki ko e tau tino a lautolu, ka e nakai ko e tau agaga. To fakaolo mai e Iehova hana lima ti tupetupe ai a lautolu ne logomatai mai, to veveli foki a lautolu ne moua e lagomatai; to fakaoti ai fakalataha a lautolu oti ni.

4 Ha kua vagahau mai pehe a Iehova kia au, Tuga ne gugulu e leona, ko e punua leona foki ke he hana tau mena kua hēhē e ia, ka fakapotopoto ai e tau leveki mamoe tokologa ke keli a ia, nakai matakutaku a ia ke he leo ha lautolu; nakai matakutaku foki a ia ha ko e go ha lautolu; to haele hifo pihia a Iehova Sapaota, ke tau ke he mouga ko Siona, ko e hana ni a mouga.

5 Tuga ne kolitu he tau manu ki luga ha lautolu a tau punua, to fakamalu pihia foki e Iehova Sapaota a Ierusalema; to fakamalu ai, mo e laveaki, to fakahao, mo e fakamoui ai e ia.

6 Kia liliu atu ā mutolu kia ia, kua o kehe mamao ai a mutolu, ko mutolu ko e fanau a Isaraela na e.

7 Ha ko e aho ia to takitaha a lautolu mo e tiaki hana tau tupua ario, mo e hana tau tupua auro, ne eke ai ma mutolu ke he ha mutolu a tau lima ke hala ai.

8 To mate foki a Asuria ke he pelu ka e nakai ko e pelu he tagata; to fakaoti foki a ia ke he pelu, ka e nakai ko e pelu he taha tagata taha; to hola kehe a ia he pelu, ko e hana tau fuata foki to eke a lautolu mo tau tagata ke uta ai e tau poa.

9 To fina age a ia he hana taue he matakutaku, to matakutaku ai hana tau iki he matini; kua talahau mai e Iehova ko ia ha ha i ai i Siona hana afi, mo e hana gutuumu ha ha i Ierusalema.