Isaia

32 KITIALA, to pule e patuiki ha ko e mahani tututonu, to pule foki e tau iki ha ko e tonu.

2 To eke foki e tagata ke tuga ne fakamumuliaga mai he matagi, mo e mena ke malu ai ka to e afa, ke tuga ne tau vailele ke he motu paku lā, ke tuga ne malu foki he kau maka lahi ke he motu nakai fai vai.

3 To nakai fakapouli ai e tau mata ha lautolu kua kitekite; to fakateliga mai foki he tau teliga ha lautolu ne fanogonogo mai.

4 Ko e tau loto foki ha lautolu ne fakatepetepe to manamanatu a lautolu ke iloa ai; ko e tau alelo foki ha lautolu ne vagahau koekoe, to fakaave a lautolu ke matala mai ai ha lautolu a vagahau.

5 Nakai tuai talahaua kua mahani mitaki a ia ne mahani kelea; to nakai tuai ui a ia ne fulukovi; ko e tagata fakamokoi.

6 Ha ko e mena to vagahau a ia ne mahani kelea ke he tau mena kelea, to eke e ia e mahani kelea ke he hana loto, to eke e ia e mahani kolokolovao, to vagahau foki a ia ke he tau mena hehe kia Iehova, kia fakamatehoge a ia ne fia kai, kua uta kehe foki e mena ke inu ia ia ne fia inu.

7 Kua kelea e tau lagatau he tagata fulukovi; kua pulega a ia ke he tau lagatau ke fakaoti ai ke he tau kupu pikopiko a lautolu ne matematekelea; ke fakaoti foki e tau tagata nonofogati ka kua vagahau a lautolu ke he tau kupu tonu.

8 Ka ko e tagata fakamokoi kua pulega a ia ke he tau mena ke fakamokoi ai; ko e fakamokoi foki ke tumau ai a ia.

9 Kia mamatike ā mutolu ko e tau fifine ne mahani fakateaga kia fanogonogo mai a ke he haku leo; ko mutolu ko e tau tama fifine kua nonofo fakahanoa, kia fakateliga mai ā mutolu ke he haku a kupu.

10 Ka mole atu e tau mo e falu a aho, ti matakutaku ai a mutolu ko e tau fifine nonofo fakahanoa; kua teao e fuaaga vine, nakai fakapotopoto ai hana tau fua.

11 Kia vivivivi ā mutolu ko e tau fifine ne mahani fakateaga; kia matakutaku ā mutolu ko e tau fifine kua nonofo fakahanoa; kia aki e mutolu ha mutolu a tau tapulu, kia nonofo noa a mutolu, ti felevehi ai a mutolu ke he ie kafu popo.

12 Kua tukituki e lautolu ha lautolu a tau huhu, ha ko e fonua mitaki, ha ko e tau vine fua lahi.

13 To tutupu mai he kelekele he hau a motu e tau akau talatala mo e tau akau fotofoto, to tutupu ni i luga he tau fale kua fiafia ai a mutolu ke he maga kua olioli.

14 Ha kua toka noa e fale iki, ko e maga ne ha i ai e motu o tagata tokologa kua tiaki; ko Ofele mo e kolo to eke ia mo tau ana tukulagi; ko e mena ke fiafia ki ai e tau asini vao, ko e mena ke totolo ai e tau fuifui manu;

15 Ato liligi hifo kia tautolu e Agaga mai luga, ti eke ai e tutakale taluē mo fonua talumelie, to talahau ai foki e fonua talumelie, ko e vao motua.

16 Ti nofo ai e fakafiliaga ke he tutakale taluē, to nofo foki e mahani tututonu ke he fonua talumelie.

17 Ko e mena ke tupu mai he mahani tututonu ko e monuina haia; to tupu mai foki he mahani tututonu e okioki mo e nakai haofia tukulagi.

18 To nonofo foki haku motu ke he mena ke monuina ai, mo e tau fale ke nakai haofia ai, mo e tau okiokihaga ke nonofo fakatekiteki ai.

19 Ka to to ai e uha tuli ke veveli ai e tau akau he vao; to ulu ki lalo foki e maga ke he mena tokolalo.

20 Uhoaki a mutolu kua gana saito ke he tau kauvai oti, kua tuku atu ki ai e tau hui he tau povi mo e tau asini.