Isaia

59 KITIALA, kua nakai fakaku e lima a Iehova ke nakai fakamoui ai e ia, ti nakai tuli foki hana tau teliga ke nakai logona ai e ia.

2 Ka ko e tau mahani kelea ha mutolu kua eke ia mo veveheaga ke he vaha ha mutolu mo e ha mutolu a Atua, ko e tau hala foki ha mutolu ne pa ai e fofoga a Iehova ti nakai fanogonogo mai a ia kia mutolu.

3 Ha kua kelea ha mutolu a tau lima ke he toto, mo e ha mutolu a tau matalima kua kelea ia ke he mahani kelea, kua vagahau pikopiko ha mutolu a tau laugutu, ti talahau ai e tau alelo ha mutolu e tau mena kelea.

4 Nakai ui ai e taha mo e mahani tututonu, nakai taufetoko ai e taha mo e fakamoli; kua tua a lautolu ke he tau mena nakai aoga; ti vagahau pikopiko ai a lautolu, kua fatu a lautolu ke he hala mo e fanau mai e lautolu e mahani kelea.

5 Kua fakapapa ai e lautolu e tau fua he tau gata gagau, kua lalaga e lautolu e tau kaleveleve; ko ia ke kai e tau fufua ha lautolu to mate ni a ia; ko e fufua kua taholi kua hau ai e gata.

6 Nakai eke mo tau tapulu ha lautolu a tau tapulu; ti nakai tapulu ai a lautolu ke he tau mena ha lautolu kua eke; ko e tau gahua ha lautolu ko e tau gahua ia he mahani kelea; ti ha ha he tau lima ha lautolu e mahani favale.

7 Kua tafepoi ha lautolu a tau hui ke he tau mena kelea; kua alumaki a lautolu ke fakamaligi e toto ha lautolu kua nakai hala; ko e tau manatu ha lautolu ko e tau manatu kelea ia; ko e moumou mo e lipilipi ko e tau mena ia ha i ai ke he tau puhala ha lautolu.

8 Nakai iloa e lautolu e puhala ke monuina ai, ti nakai ha i ai e tonu ke he tau mena ha lautolu ne eke; kua fakakeukeu e lautolu ha lautolu a tau puhala; ko lautolu oti ne o ai, nakai iloa e lautolu e monuina.

9 Ko e mena ia ne mamao mo mautolu e fakafiliaga, to nakai moua foki a mautolu he mahani tututonu; ne tatali a mautolu ke he maama, ti kitiala, ko e pouli; ne tatali a mautolu ke kikila mai, ka e o ni a mautolu mo e pouli.

10 Kua tamotamo atu e mautolu ke he kaupa ke tuga ne tau tagata matapouli; kua tamotamo atu e mautolu tuga na lautolu kua nakai fai mata; kua tupetupe a mautolu ke he tupoula ke tuga he magaaho mahegihegi; ne ha i ai a mautolu ke he tau mena pouli kikio, tuga ne tau tagata mamate.

11 Kua go a mautolu oti ni tuga ne tau urosa; ti kololo a mautolu tuga ne tau lupe, ne tatali ni a mautolu ke he fakafiliaga, ka e nakai eke; ne leo a mautolu ke he fakamouiaga, ka e mamao ia mo mautolu.

12 Ha kua fakalahi ha mautolu a tau holifono ki mua hau; kua hokotaki foki a mautolu ke he ha mautolu a tau hala; ha ko e mena ha ha ia mautolu ha mautolu a tau holifono; kua iloa foki e mautolu ha mautolu a tau mahani kelea.

13 Ko e holifono mo e pikopiko kia Iehova; ko e o kehe mo e ha mautolu a Atua; ko e vagahau mo e favale mo e tau kupu fakafualoto; ko e manamanatu mo e vagahau mai he loto e tau kupu pikopiko.

14 Kua fakaliu ki tua e fakafiliaga, kua tu mamao atu e mahani tututonu; ha kua veli e fakamoli ke he male, ti nakai maeke e mahani hakohako ke hu mai.

15 Ti nakai kitia e fakamoli; ko ia ne kalo kehe mo e kelea kua fofo hana tau mena; ti fioia ni e Iehova, ti kelea ni kia ia ha kua nakai fai fakafiliaga.

16 Ne fioia e ia kua nakai fai tagata; ti ofo a ia he nakai ha i ai taha ke olelalo atu; ko e mena ia ne eke ai e fakamouiaga ke he hana ni a lima; ko e hana tututonu foki ne tokotu ai a ia.

17 Ti tapulu ai a ia ke he mahani tututonu tuga ne ufi fatafata, ti ha ha he fufuga hana e potiki tau ko e fakamouiaga; ti tapulu ai a ia ke he tau tapulu he lalago ke eke mo tau tapulu; ti tapulu foki a ia ke he fakamakutu tuga ne tapulu lahi.

18 Ke lata mo e mahani ha lautolu pihia he taui mai e ia, ko e ita kia lautolu kua fai fi kia ia, ko e taui kia lautolu ne ita kia ia; to taui atu e ia ke he tau motu ne tutu ke he hala kau tahi.

19 Ti matakutaku a lautolu ke he higoa a Iehova, mai he fahi lalo; mai he mena foki ne hake ai e la, to matakutaku a lautolu ke he hana lilifu; ha ko e mena to hau a ia tuga ne vailele kua puipui, kua havilia ke he fofoga a Iehova.

20 To haele mai foki e Fakamoui ki Siona, to haele mai foki a ia kia lautolu ia Iakopo kua liliu mai he tau holifono ha lautolu, kua pihia mai a Iehova.

21 Ka ko au ko e haku a maveheaga mo lautolu hanai, kua pehe mai a Iehova, Ko e haku Agaga ha ha i luga ia koe, mo e haku a tau kupu kua tuku atu e au ke he hau a gutu, nakai o kehe ia he hau a gutu, mo e tau gutu he hau a fanau, ke kamata mai he vaha nai, ke hoko ke he tukulagi, kua pihia mai a Iehova.