Isaia

60 KIA matike a, kia maama ā koe, ha kua hoko mai hau a maama; kua hake foki ki luga hau e lilifu a Iehova.

2 Ha ko e mena, kitiala, to ufitia e lalolagi ke he pouli kikio, to ufitia foki e tau motu ke he pouli; ka to haele hake a Iehova ki luga hau, mo e lilifu hana to kitia ai ki luga hau.

3 To o mai e tau motu kehe ke he hau a maama, ko e tau patuiki foki to o mai a lautolu ke he kikila he hāu a hake.

4 Kia hagahaga fano a koe ke he tau fahi oti, mo e kitia e koe, kua fakapotopoto mai a lautolu oti; kua o mai a lautolu kia koe, to o mai hau a tau tama tane he mena mamao, to hapini foki hau a tau tama fifine ke he hau a kahokaho.

5 To kitia ai e koe, mo e olioli; to hopo e ate hau, mo e fiafia lahi a koe; ha ko e mena to liu mai kia koe e koloa he tahi; to hoko mai kia koe e koloa he tau motu kehe.

6 To ufitia e koe ke he lanu kamela loga, ko e tau punua kamela a Mitiana mo Efa; to o mai e lautolu oti i Sipa; to tamai e lautolu e auro mo e pili lipano, to talahau ai e lautolu e tala fiafia ke he fakahekeaga a Iehova.

7 To fakapotopoto kia koe e tau fuifui mamoe oti a Kitara; to fekafekau kia koe e tau mamoe tane a Nepaiota; to o hake a lautolu, ti talia ai a lautolu ke he haku a fatapoa; to fakafulufuluola e au e fale ne ha i ai haku a fulufuluola.

8 Ko hai kia a lautolu kua lele po ke aolagi, ke tuga ne tau lupe foki ke he tau gutuhala ha lautolu?

9 Ha kua tatali kia au e tau motu ne takai he tahi, to mumua foki e tau foulua Tasesa, ke ta mai hau a fanau mai he mena mamao, ko e ha lautolu a ario mo e ha lautolu a auro fakalataha mo lautolu; ha ko e higoa a Iehova hau a Atua, mo ia ne Tapu i Isaraela ha kua fakalilifu e ia a koe.

10 To ati hake he tau tagata kehe hau a tau kaupa; to fekafekau mai kia koe ha lautolu a tau patuiki; ha ko e haku a ita ne ta ai e au a koe, ka ko e haku a fakaalofa ne fakaalofa atu au kia koe.

11 To toka noa mau hau a tau gutuhala nakai ni pa ke he aho mo e po; ke tamai ai kia koe e koloa he tau motu kehe, mo e takitaki mai ai kia koe ha lautolu a tau patuiki.

12 Ha ko e mena to mahaikava e motu mo e kautu kua nakai fekafekau atu kia koe; to fakaoti ni e tau motu ia.

13 To tamai kia koe e tau mena ne talahaua i Lepanona, ko e perosi, mo e titara, mo e tasura fakalataha, ke fakafulufuluola aki e mena ne ha i ai haku a faituga; to fakalilifu foki e au e mena ke tu ai haku a tau hui.

14 Ko e fanau ha lautolu ne favale atu kia koe to o mai a lautolu, mo e hufeilo a lautolu kia koe; ko lautolu oti ne fakavihia a koe to fakaveveli fakafohifo ai a lautolu ke he hau a tau aloalovē; to ui e lautolu a koe, ko e maga a Iehova, Ko Siona ko e maga hana ne Tapu i Isaraela.

15 Ne eke a koe mo motu kua tiaki mo e vihiatia, ti nakai fina age ai taha, ka to eke e au a koe mo motu fulufuluola tukulagi, mo motu ke fiafia ai ke hahau mo hahau.

16 To kai e koe e puke huhu he tau motu kehe, to kai foki e koe e tau huhu he tau patuiki; ti iloa ai e koe au ko Iehova ko e hau a Fakamoui, mo e hau a Laveaki, ko ia ko e Malolo a Iakopo.

17 To tamai e au e auro ke totogi aki e aga kula; ti tamai e au e ario ke totogi aki e lapatoa; mo e apa kula ke totogi aki e tau akau, mo e lapatoa ke totogi aki e tau maka; to eke foki e au hau a tau iki ke mafola, mo e hau a tau pule ke tututonu.

18 To nakai tuai logona e favale ke he hau a motu; ko e moumou mo e lipilipi ko e tau mena nakai tuai logona ia ke he hau a motu; ka to fakahigoa aki hau a tau kaupa Ko e fakamouiaga, mo e hau a tau pahala, Ko e fakahekeaga.

19 To nakai tuai eke e la mo maama māu ke he aho; to nakai tuai fakamaama mai he mahina kia koe ke he hana huhulu mai, ka to eke a Iehova māu mo maama tukulagi, to eke foki hau a Atua mo lilifu hau.

20 To nakai tuai to hau a la, to nakai mole atu foki hau a mahina; ha ko e mena to eke a Iehova māu mo maama tukulagi; ti oti ai e tau aho he hau a tagi.

21 To tututonu foki hau a tau tagata oti kana; to eke ma lautolu e motu tukulagi; ko e huli ne to e au, ko e gahua he haku tau lima, ke eke mo fakahekeaga kia au.

22 Ko e tokogahoa to eke ia mo tokoafe, mo e maga fakateaga to eke ia mo motu malolo; ko au ko Iehova to fakaave au ke eke ke he hana ni a aho.