Tagi Aue a Ieremia

2 OI te! Kua fakapouli ai he Iki ke he hana ita e tama fifine a Siona; kua liti hifo e ia e fulufuluola a Isaraela mai he lagi ke he lalolagi; nakai manatu ai e ia ke he aho he hana ita e mena ne tu ai hana tau ve.

2 Kua fakaotioti he Iki, ka e nakai toka e ia e tau fale oti a Iakopo; kua ulu moumou e ia ke he hana ita e tau taue oti he tama fifine a Iuta; kua fakatatai e ia a lautolu mo e kelekele, kua ekefakakelea e ia ke he kautu katoa mo e hana tau iki.

3 Kua helehele kehe e ia ke he hana ita lahi e tau hoe oti a Isaraela; kua liuaki atu e ia hana lima matau ki mua ha lautolu kua fai fi mai; kua huhunu foki e ia a Iakopo tuga ne afi puhopuho, kua huhunu ai ke he tau fahi oti.

4 Kua loloku e ia hana kaufana tuga a ia kua fai fi mai; kua fakamao e ia hana lima matau tuga a ia kua fai fi mai, ti tamate ai e ia e tau mena fulufuluola oti; kua liligi ai e ia hana ita lahi tuga e afi ke he fale he tama fifine a Siona.

5 Kua eke e Iki ke tuga a ia kua fai fi mai; kua fakaoti e ia a Isaraela; kua fakaoti e ia hana tau fale iki oti, kua moumou e ia hana tau taue; kua fakalahi e ia e tagi mo e mānu he tamafifine a Iuta.

6 Kua huo e ia hana pa ke tuga e pa ne puipui aki e kaina; kua fakaoti e ia e mena ne fakapotopoto ai; kua eke e Iehova ke nimo i Siona e galue mo e Sapati; ko e hana ita lahi ue atu kua fakavihia ai e ia e patuiki mo e ekepoa.

7 Kua tiaki he Iki hana fatapoa, kua fakavihia e ia hana tau mena tapu, kua tuku atu e ia e tau kaupa he hana tau fale iki ke he tau lima hana kua fai fi mai; ne leo lalahi a lautolu ke he fale a Iehova, tuga he eke ke he aho he galue.

8 Ne manatu e Iehova ke ulu moumou e kolo he tama fifine a Siona; kua fakatoka e ia e fua; ti nakai liu aki atu hana lima ka e fakaotioti ni; kua fakamānu e ia e kaupa mo e kolo; kua fakalolelole ai fakalataha a laua.

9 Kua tomo hana tau gutuhala ke he kelekele; kua moumou mo e fatifati e ia hana tau fakamau fakalava; ko e hana patuiki mo e hana tau iki ha ha he tau motu kehe kua nakai fai fakatufono a lautolu; ko e hana tau perofeta foki nakai moua e lautolu e fakakiteaga mai ia Iehova.

10 Kua nonofo ke he kelekele, ti fakafenono e tau patu he tamafifine a Siona; kua tuku e lautolu e efuefu ki luga he tau ulu ha lautolu; kua pipi e lautolu a lautolu ke he ie talatala; kua tukutukuhifo ke he kelekele e tau ulu he tau tamāfine ikiiki a Ierusalema.

11 Kua pouli haku tau mata he tagi, kua ofoofo noa haku manava, kua maligi haku ate ke he kelekele, ha kua tuki malipilipi e tama fifine he haku motu; ha kua taupogia e tau tama ikiiki mo e tau tama kai huhu ke he tau puhala he maga.

12 Kua pehe age a lautolu ke he tau matua fifine ha lautolu. Ko fe kia e tau fua saito mo e uaina? he taupogia a lautolu tuga e tau tagata kua kafokia ke he tau puhala he maga, he mole atu ha lautolu a tau momoui ke he tau fatafata he tau matua fifine ha lautolu.

13 Ko e heigoa kia e mena ke talahau atu e au kia koe, ko e heigoa kia e mena ke fakatai e au a koe ki ai, ko e tama fifine a Ierusalema na e? Koe heigoa kia e mena ke fakalata e au kia koe ke mafanatia ai a koe, ko e tamāfifine tote na e, ko e tama fifine a Siona na e? Ha kua lahi hau a kafokia tuga ne tahi; ko hai ke fakamalolo aki a koe?

14 Kua kitia hau a tau perofeta e tau fakakiteaga pikopiko mo e tau mena fakateaga ha ko koe; nakai fakakite atu e lautolu hau a tau hala ke liuaki mai hau a paeaaga; ka kua kitia e lautolu ha ko koe, e tau kavega pikopiko mo e tau mena ke fakahehe ai.

15 Kua patipati ha lautolu a tau lima kia koe a lautolu oti ne o age he puhala; kua katakatakē a lautolu mo e luelue ha lautolu a tau ulu ke he tamafifine a Ierusalema, kua pehe age, Ko e maga kia aenei kua talahaua kua katoatoa ai hana fulufuluola; ko e mena ke fiafia ki ai e lalolagi oti?

16 Ko lautolu oti kua fai fi kia koe kua fakamaga ha lautolu a tau gutu kia koe; kua fakakatakatakē a lautolu, kua konokonoi e lautolu ha lautolu a tau nifo; Kua pehe mai a lautolu, Kua fakaoti e tautolu a ia, ko e moli, ko e aho hanai ne leo a tautolu ki ai; kua moua ai e tautolu, kua kitia e tautolu.

17 Kua eke e Iehova e mena ne finagalo ai a ia, kua fakamoli e ia e kupu ne poaki mai ai e ia he tau aho ne aho mua; kua ulu moumou e ia, ti nakai fakaalofa mai a ia; ko ia ne fiafia ai a ia ne fai fi kia koe; kua fakatokoluga e ia e hoe ha lautolu kua eke a koe mo fi ha lautolu.

18 Ne tagi e tau loto ha lautolu ke he Iki, Ko e kaupa na e he tama fifine a Siona, kia tafe hifo e tau hihina mata tuga ne vailele ke he aho katoa mo e po; aua neke okioki a koe; aua neke okioki hau a tau alito mata.

19 Kia matike a, kia ui atu he po ke he kamataaga he tau leoleoaga; kia liligi atu po ke magavai hau a loto ki mua he Iki; kia nikiti atu a kia ia hau a tau lima kia momoui hau a tau tama ikiiki kua taupogia he hoge ke he tau matahala he tau puhala oti.

20 Iehova na e fofoga mai a, mo e kitekite mai a a koe kia lautolu kua eke e koe e tau mena nai ki ai. Ke kai kia he tau fifine ha lautolu a fanau ko e tau tama ikiiki ne hapai he tau lima? Ke kelipopo kia ke he faituga he Iki e ekepoa mo e perofeta.

21 Kua takoto ke he kelekele i fafo e tau tama mo e tau patu; ko e haku a tau tamāfine ikiiki mo e haku a tau fuata kua keli he pelu; ne kelipopo e koe a lautolu ke he aho he hau a ita; ne keli e koe, ti nakai fakahao e koe a lautolu.

22 Kua ui e koe ke tuga he aho he galue ke he tau mena ke matakutaku ai kua agaagai mai kia au; ti nakai fai tagata kua hao, po ke taha ne toe ke he aho ne ita ai a Iehova; ko lautolu ne hapai e au mo e leveki ai e au, kua fakotioti e ia ne fai fi mai a lautolu.