Tagi Aue a Ieremia

3 KO au ko e tagata kua kitia e matematekelea ke he akau he hana ita.

2 Ne takitaki e ia au mo e ta mai ai e ia au ke he pouli, ka e nakai ko e maama.

3 Ko e moli kua liuaki mai foki e ia hana lima ke akonaki kia au ke he aho katoa.

4 Ko ia ne oti ai haku a kakano mo e haku a kili; kua lipilipi e ia haku a tau huimotua.

5 Kua ati hake e ia e tau kolo ke tau kia au, kua agaagai e ia au ke he mena kona mo e mamahi.

6 Kua fakanofo e ia au ke he tau mena pouli, tuga na lautolu ne mamate ne aho mua.

7 Kua puipui e ia au ke he tau fahi oti ti nakai maeke au ke fina atu; kua fakamamafa e ia haku a tau liliaga apa kula.

8 Ka tagi atu foki au mo e kalaga atu, kua pa mai e ia haku a liogi.

9 Kua puipui e ia haku a tau puhala ke he tau maka tātā, kua fakakeukeu e ia haku a tau puhala loto.

10 Kua eke a ia tuga ne urosa kua takahao kia au, ko e leona foki ke he tau mena galo.

11 Kua fakaliu kehe e ia haku a tau puhala, kua hēhē e ia au; kua fakanofo tokotaha e ia au.

12 Kua loloku e ia hana kaufana, kua fakatu e ia au tuga ne fakamailoga ke fana ki ai.

13 Kua fakakomo e ia e tau fana he hana tagafana ke he haku a na fua.

14 Kua eke au mo vaaga he haku a motu oti, ko e lologo ha lautolu ke he aho katoa.

15 Kua fagai e ia au ke makona ke he tau mena kona, kua fakainu e ia au ke konahia ke he laena.

16 Kua lipilipi e ia haku a tau nifo ke he tau tepu kilikili, kua ufiufi e ia au ke he efuefu.

17 Kua tiaki e koe au ke mamao ai au mo e mafola; kua nimo ia au e monuina.

18 Ti pehe hifo au, Kua fakaoti haku a tua mo e haku amaamanaki kia Iehova.

19 Kia manatu e koe haku a matematekelea mo e haku a ekefakakelea, ko e laena mo e rosa.

20 Kua manatu agaia haku loto ki ai, ti fakamaloku hifo ai a ia ki loto ia au.

21 Kua liu manatu ai haku loto ke he tau mena na, ko e mena ia kua amaamanaki ai au.

22 Ko e fakaalofa a Iehova kua nakai fakaoti ai a tautolu, ha kua nakai mole atu hana fakaalofa hohofi;

23 Ko e fou mai ia he tau pogipogi oti; kua lahi hau a fakamoli.

24 Kua pehe haku loto, ko Iehova ko e haku a tufaaga haia; ko e mena ia ke amaamanaki ai au kia ia.

25 Kua mahani mitaki a Iehova kia lautolu kua tatali atu kia ia, ko e tagata kua kumi kia ia.

26 Kua mitaki ke amaamanaki mo e tatali fakatekiteki ke he fakamouiaga mai ia Iehova.

27 Kua mitaki ke he tagata ke fua e ia e lakau hahamo, he fuata ai a ia.

28 Kia nofo tokotaha a ia, mo e nofo fakalogologo ha kua tuku atu ai e ia ki luga hana.

29 Kia tuku e ia hana gutu ke he efuefu po ke moua nakai e ia e amaamanaki.

30 Kia tuku atu e ia hana kauvehe kia ia ne tuki mai, kia fakapuke ai a ia ke he mā.

31 Ha ko e mena nakai tiaki tukulagi he Iki.

32 Ha ko e mena pete he fakamamahi mai e ia, to liu fakaalofa hohofi noa mai a ia, ke lata mo e hana fakaalofa lahi.

33 Ha kua nakai fiafia a ia ke fakamatematekelea, po ke fakamamahi ai e tau tagata.

34 Ke taholi ki lalo he tau ve hana a lautolu oti kua lili ke he lalolagi.

35 Ke fakakeukeu e fakafiliaga he tagata ki mua hana ne Mua ue atu.

36 Ke fakahehe e tagata ke he hana taufetoko, ko e mena ia nakai fia kitekite ki ai e Iki.

37 Ko hai a ia kua vagahau ti hoko ai ni, ka e nakai poaki mai ai e Iki?

38 Nakai kia to mai ai he fofoga hana ne Mua ue atu e tau kupu kelea katoa mo e tau kupu mitaki?

39 Ko e heigoa e mena ke fegui ai e tagata kua moui, ko e tagata ha ko e hana tau hala?

40 Kia kumikumi e tautolu mo e kamakamata ai e tautolu ha tautolu a mahani, mo e liliu atu ā tautolu kia Iehova.

41 Kia nikiti e tautolu ha tautolu a tau loto fakalataha mo e ha tautolu a tau lima ke he Atua ha ha he lagi.

42 Kua holifono a mautolu, mo e fakafualoto a mautolu; kua nakai fakamagalo mai e koe.

43 Kua ufiufi e koe a mautolu ke he ita, mo e tutuli e koe a mautolu; kua kelipopo e koe, kua nakai fakaalofa mai a koe.

44 Kua ufiufi e koe a koe ke he aolagi, kia nakai hao atu ai ha mautolu a liogi.

45 Kua eke e koe a mautolu mo tau otaota, mo tau mena vihiatia foki ki mua he tau motu.

46 Ko lautolu oti kua fai fi kia mautolu kua fakamaga ha lautolu a tau gutu kia mautolu.

47 Ha ha ia mautolu e matakutaku mo e luo kua eke mo hele, ko e tau mena kua moumou mo e malipilipi.

48 Kua tafe hifo e tau vailele he tau mata haku ha kua tuki malipilipi e tama fifine he haku a motu.

49 Kua lele hifo e tau hihina mata he haku a tau mata, nakai okioki, kua lele hifo nakai noa.

50 Ato fofoga mai a Iehova, mo e kitekite mai a ia mai he lagi;

51 Ko e haku a tau mata ne mamahi ai haku loto ha ko e tau tama fifine oti he haku a maga.

52 Ko lautolu ne fai fi teao mai kia au, kua tutuli fakalahi e lautolu au, tuga ne manu lele.

53 Kua fakaoti e lautolu haku a moui ke he luo, ti liti mai e lautolu e maka ki luga ia au.

54 Ne lofia hoku ulu he vai, ne pehe au, Kua mate ni au.

55 Iehova na e ne ui atu ke he hau a higoa mai he luo ke he tau mena hokulo.

56 Ne logona e koe haku a leo; aua neke haga kehe hau a fofoga mo e haku a oi mo e haku a tagi.

57 Ne fakatata mai a koe ke he aho ne ui atu ai au kia koe; ne pehe mai a koe, Ua matakutaku a koe.

58 Ko e Iki na e, kua eke e koe haku a taufetoko; kua laveaki e koe au.

59 Iehova na e kua fioia e koe haku a ekefakakelea; kia eke e koe haku a fakafiliaga.

60 Kua oti he fioia e koe ha lautolu a fia taui mai, mo e ha lautolu a tau manamanatuaga oti kia au.

61 Iehova na e, kua logona e koe ha lautolu a ekefakakelea mai, mo e ha lautolu a tau manamanatuaga oti kia au;

62 Ko e tau kupu ha lautolu ne tutu mai kia au, mo e tau mena kua manamanatu ai a lautolu kia au ke he aho oti.

63 Kia kitekite a koe, ke he ha lautolu a nonofo ki lalo mo e ha lautolu a tutu ki luga, kua eke e lautolu au mo lologo ha lautolu.

64 Iehova na e, to taui atu e koe kia lautolu, ke lata mo e tau mena ne eke ai he tau lima ha lautolu.

65 To tuku atu e koe kia lautolu e loto mao, ko e hāu a fakamalaia ia kia lautolu.

66 To tutuli e koe a lautolu ke he hau a ita, mo e fakaoti e koe a lautolu mai lalo he lagi a Iehova.