Levitika

18 KUA, vagahau mai a Iehova kia Mose, kua pehe mai,

2 Kia vagahau atu a koe ke he fanau a Isaraela, ti pehe atu a koe kia lautolu, Ko au ko Iehova ko e ha mutolu a Atua.

3 Aua neke eke e mutolu, tuga ne tau mena kua fa eke ke he motu ko Aikupito, ne nonofo ai a mutolu; ti ua eke foki e mutolu tuga ne tau mena kua fa eke ke he motu ko Kanana ka fakahoko atu e au a mutolu ki ai; aua neke fifitaki foki a mutolu ke he ha lautolu a tau mahani.

4 Kia eke e mutolu haku a tau fakafiliaga, ti taofi foki e mutolu haku tau fakatufono, kia o ai a mutolu; ko au ko Iehova ko e ha mutolu a Atua.

5 Kia taofi e mutolu haku a tau fakatufono mo e haku a tau fakafiliaga; ka eke he tagata, e tau mena ia, ti moui ai a ia; ko au ko Iehova.

6 Aua neke fakatata taha ia mutolu ke he taha tagata he hana magafaoa, ke fakanofonoa ai hana kakano; ko au ko Iehova.

7 Aua neke fakanofonoa e koe hau a matua tane, po ke hau a matua fifine, ko e hau a matua fifine ni a ia, aua neke fakanofonoa e koe a ia.

8 Aua neke fakanofonoa e koe e hoana he hau a matua tane, ko e kakano haia he hau a matua tane kua tokanoa.

9 Aua neke fakanofonoa e koe hāu a mahakitaga, ko e tama fifine he hau a matua tane, po ke tama fifine, he hau a matua fifine, po ke fanau mai a ia ia laua, po ke fanau ai a ia he nakaila nonofo a laua.

10 Aua neke fakanofonoa e koe, e tama fifine he hau a tama tane, po ke tama he hau a tamafifine; ha ko e kakano hau haia kua toka noa.

11 Ko e tama fifine foki he hoana he hau a matua tane, ne fanau mai a ia laua mo e matua tane hau, aua neke fakanofonoa e koe a ia, ko e hau a mahakitaga ni a ia.

12 Aua neke fakanofonoa e koe e mahakitaga he hau a matua tane; ko e magafaoa ni a ia he hau a matua tane.

13 Aua neke fakanofonoa e koe e matakainaga he hau a matua fifine; ko e magafaoa ni a ia he hau a matua fifine.

14 Aua neke fakanofonoa e koe e matakainaga he hau a matua tane, aua neke fakatata a koe ke he hoana hana; ko e hoana a ia he matakainaga he hau a matua tane.

15 Aua neke fakanofonoa e koe hau a figona fifine; ko e hoana a ia he hau a tama tane, aua neke fakanofonoa e koe a ia.

16 Aua neke fakanofonoa e koe e hoana he hau a matakainaga; ko e kakano haia he hau a matakainaga kua tokanoa.

17 Aua neke fakanofonoa e koe e fifine katoa mo e hana tama fifine; ti ua uta e koe e tama fifine he hana tama tane, po ke tama fifine he hana tama fifine, ke fakanofonoa ai a ia; ha ko e magafaoa ni a lautolu mo e fifine; ko e mahani kelea haia,

18 Aua neke fai hoana a koe ke he matakainaga he hoana hau, ke fakamamahi ai a ia, ke nonofo a mua mo ia katoa foki mo e taha, ka kua moui agaia a ia.

19 Aua foki neke fakatata a koe ke he fifine ke fakanofonoa e koe a ia, ka kua nofo kehe a ia ha ko e hana kelea.

20 Aua neke momohe ai a mua mo e hoana he tagata ne katofia mo koe, ke kelea ai a koe mo ia.

21 Aua neke tuku atu foki e fanau hau ke o age ki loto he afi kia Moloka; ti ua holitu e koe e higoa he hau a Atua; ko au ko Iehova.

22 Aua neke momohe a mua mo e tane, tuga ne momohe mo e fifine; ko e mena fakalialia haia.

23 Aua neke momohe foki a mua mo e manu, ke kelea a koe ia ia; aua neke tu atu foki e fifine ki mua he manu ke mohe mo ia; ko e mena kelea ue atu haia.

24 Aua neke fakakelea e mutolu a mutolu ke he taha mena he tau mena ia; ha ko e tau mena oti ia ne kelea ai e tau motu ne vega kehe e au ki mua ia mutolu.

25 Ti kelea ai foki e motu; ti taui atu ai e au e tau mahani hepehepe ha i ai; ti fakalua atu ai he motu a lautolu kua nonofo ai.

26 Ko e hanai kia taofi e mutolu haku a tau fakatufono, mo e haku a tau fakafiliaga; aua neke eke foki e mutolu taha mena he tau mena fakalialia na; po ke tagata ne fanau ke he motu, po ke tagata kehe kua nofo ia mutolu.

27 Ha ko e tau mena fakalialia oti ia ne eke he tau tagata he motu ne nonofo fakamua ai kia mutolu, ti kelea ai ni e motu;

28 Neke fakalua atu foki he motu a mutolu, ka fakakelea e mutolu a ia, tuga ne fakalua atu e ia e tau tagata ne fonofo fakamua ai kia mutolu.

29 Aua neke eke e mutolu ha mena taha he tau mena fakalialia na, ko e tau tagata ka eke e tau mena ia, to vevehe kehe ni a lautolu mo e ha lautolu a motu.

30 Ko e hanai, kia taofi e mutolu haku a tau fakatufono, ke ua eke e mutolu ha mena taha he tau mena fakalialia, ne eke ai e lautolu ne nonofo fakamua ai kia mutolu, ti fakakelea ai e mutolu kia mutolu; ko au ko Iehova ko e ha mutolu a Atua.