Levitika

19 KUA vagahau mai a Iehova kia Mose, kua pehe mai,

2 Kia vagahau atu e koe ke he fakapotopotoaga katoa he fanau a Isaraela, ti pehe atu ai kia lautolu, Kia tapu a mutolu; ha ko au nai ko Iehova ko e ha mutolu a Atua kua tapu ni au.

3 Kia takitokotaha a mutolu mo e fakalilifu ke he hana matua fifine, mo e hana matua tane, mo e fakatapu ai haku a tau sapati; ko au ko Iehova ko e ha mutolu a Atua.

4 Aua neke liliu atu a mutolu ke he tau tupua, ti ua eke foki e tau atua lapatoa ma mutolu; ko au ko Iehova ko e ha mutolu a Atua.

5 Kaeke foki ke eke e mutolu e poa fakaaue kia Iehova, kia eke poa a mutolu kia ofania ai a mutolu.

6 Ti kai ai a ia ke he aho ne eke ai e mutolu e poa, katoa mo e aho a pogipogi; kaeke ke toe ha mena ke he aho tolu, kia huhunu ia ke he afi.

7 Kaeke foki ke kai ai ha mena ke he aho tolu, ko e mena fakalialia haia; nakai ni talia ia,

8 Ko e tagata ke kai ai to nofo a ia mo e kelea ha kua holitu ai e ia e mena tapu a Iehova; to vevehe kehe e tagata ia mo e hana motu.

9 Ka helehele foki e mutolu e tau saito he fonua ha mutolu, aua neke helehele e koe ke oti e tau kalakala he kaina hau, aua neke oko foki e koe e tau fua saito kua mokulu ke he kelekele.

10 Aua neke faki foki e tau venevene he tau vine he hau a uluvine, ti ua oko e koe e tau fua kua mokulu he hau a uluvine; ka e toka ia ma e tagata nofogati, mo e tagata kehe; ko au ko Iehova ko e ha mutolu a Atua.

11 Aua neke kaiha e mutolu, ti ua fakavai, ti ua pikopiko foki ko e taha ke he taha.

12 Aua neke omonuo a mutolu ke he haku higoa mo e pikopiko; ti aua neke holitu e koe e higoa he hau a Atua, ko au ko Iehova.

13 Aua neke favale a koe ke he tagata kua katofia mo koe, ti ua fofo foki hana mena; ti aua neke toka ia koe ato a pogipogi e palepale he tagata kua eke hau a gahua.

14 Aua neke kaialu a koe ke he tagata teligatuli, ti ua tuku foki e koe e mena ki mua he tagata matapouli ke tupetupe ai a ia, ka e matakutaku a koe ke he hau a Atua; ko au ko Iehova.

15 Aua neke eke e mutolu e fakafiliaga, mo e mahani hepehepe; ua talia e koe e tagata nofogati, ti ua fakalilifu foki ke he tagata maukoloa; ka e fakafili mo e tututonu e tagata kua katofia mo koe.

16 Aua neke faifano a koe ke he hau a motu mo e feutaaki tala; ti ua fatipiko foki a koe ke he tagata kua katofia mo koe ke mate ai a ia; ko au ko Iehova

17 Aua neke fakavihia e koe hau a matakainaga ke he a loto; kia akonaki e koe ke he tagata kua katofia mo koe ka e ua toka e koe kia ia ha hala.

18 Aua neke taui atu e koe, ti ua taofi e koe hau a ita ke he tau tagata he hau a motu, ka e fakaalofa atu a koe ke he tagata kua katofia mo koe kia tuga na koe kia koe; ko au ko Iehova.

19 Kia taofi e mutolu haku a tau fakatufono; aua neke toka e koe hau a tau manu ke feholiaki mo e tau manu kakano kehekehe; aua neke to foki e koe hau a fonua ke he tau fua mena kakano kehekehe; ti ua fakatapulu ai a koe ke he tapulu he ie lalaga fiofio ke he tau mena kakano kehekehe.

20 Kaeke ke mohe ai taha mo e fifine kua nofo fakatupa, kua fakatutane ke he taha tagata ti nakai fakatau ai po ke toka noa ai a ia, kia fahi ai a ia, ka e ua kelipopo a laua, ha koe mena nakai toka noa a ia.

21 Ti ta mai ai he tane hana poa ha ko e hehe kia Iehova ke he gutuhala he fale uta fano he tutuutaga, ko e mamoe tane ke eke mo poa ha ko e hehe.

22 Ti eke ai he ekepoa e lukutoto ha ko ia ki mua a Iehova ke he mamoe tane he poa ha ko e hehe, ha ko e hana hala kua hala ai a ia, ti fakamagalo ai a ia he hala kua hala ai a ia.

23 Ka hohoko atu foki a mutolu ke he motu, ti to ai foki e mutolu e tau akau kehekehe oti ke eke mo mena kai, ti talahaua nakai peritome e tau fua he tau akau ia; tolu e tau ke eke ia mo mena nakai peritome kia mutolu, aua neke kai ai a ia.

24 Ka ko e tau ne fa kia tapu ai ha lautolu a tau fua oti ke fakaaue ai kia Iehova.

25 Ko e tau foki ne lima aki kia kai ai e mutolu ha lautolu a tau fua, kia fua mai ai kia mutolu ha lautolu a tau fua, ko au ko Iehova ko e ha mutolu a Atua.

26 Aua neke kai ai e mutolu mo e toto; ti ua eke e mutolu e tau lagatau taulātua, aua neke talahau mena foki e mutolu he kitekite ke he tau aolagi.

27 Aua neke hifi pale e mutolu ha mutolu a lauulu; ti ua moumou foki e koe hau a hafe kakau.

28 Aua neke helehele e mutolu ha mutolu a tau kakano ha ko e tau tagata mamate, ti aua neke ta tatau a mutolu; ko au ko Iehova.

29 Aua neke eke fakakelea e koe hau a tama fifine ke eke a ia mo fifine fakataka; neke mahani ai e motu mo e feuaki, ti puke ni e motu ke he mahanai kelea.

30 Kia taofi e mutolu haku a tau sapati, ti maimaina foki a mutolu ke he haku faituga; ko au ko Iehova.

31 Aua neke hagao atu a mutolu kia lautolu ha i ai e tau agaga talahau tuai, aua neke kumi foki e mutolu ke he tau taulātua ke kelea ai a mutolu; ko au ko Iehova ko e ha mutolu a Atua.

32 Kia tu a koe ki mua hana kua ulu hina, kia fakalilifu atu foki ki mua he tagata motua, mo e matakutaku ke he hau a Atua; ko au ko Iehova.

33 Kaeke kua nofo ha tagata kehe ia koe, ke he motu ha mutolu, aua neke favale atu a mutolu kia ia.

34 Ko e tagata kehe ka nofo ia mutolu, tuga ne tagata kua fanau ke he motu a ia, ti fakaalofa atu a koe kia ia tuga na koe kia koe ni; ha ko e tau tagata paea a mutolu ke he motu ko Aikupito; ko au ko Iehova ko e ha mutolu a Atua.

35 Ua fakafili hepehepe e mutolu, ke he ofa, mo e fua tautau, mo e fua ke fafati aki e tau mena puke.

36 Kia ha ha ia mutolu e fua tautau kua tonu, mo e tau maka kua tonu, ko e efa kua tonu, mo e hinu kua tonu; ko au ko Iehova ko e ha mutolu a Atua ne ta mai a mutolu he motu ko Aikupito.

37 Ko e hanai, kia taofi e mutolu haku tau fakatufono oti, ti eke foki e mutolu haku tau fakafiliaga oti; ko au ko Iehova.