Mika

Ko e Tohi a Mika

1 KO e kupu a Iehova ne hoko mai kia Mika ko e Moresi ke he vaha a Iotamo, mo Ahasa mo Hesekia, ko e tau patuiki a Iuta, ke he tau mena ne kitia e ia ki Samaria mo Ierusalema.

2 Kia fanogonogo mai a a mutolu ko e tau motu oti; kia haga mai ā ko e lalolagi na e katoa mo e tau mena ne puke ai, kia talahau ai he Iki ko Iehova hana tau mena kia mutolu, ko e Iki ni mai hana faituga tapu.

3 Ha ko e mena kitiala, kua haele mai a Iehova mai hana haeleaga, kua haele hifo a ia, mo e taholi ai e ia e tau mena tokoluga he lalolagi.

4 To liu puke vai e tau mouga i lalo ia ia, to ihiihi ai e tau pahua, tuga ne pili ke he afi, tuga e vai kua tafe hifo ai he mena papati.

5 Ha ko e holifono a Iakopo kua hoko ai e tau mena oti ia, ha ko e tau hala foki he magafaoa a Isaraela. Ko e heigoa kia e holifono a Iakopo? Nakai kia ko Samaria? Ko e heigoa foki e tau mena tokoluga a Iuta? Nakai kia ko Ierusalema haia?

6 Ko e mena ia to eke e au a Samaria mo tanakiaga maka he fonua, mo mena foki ke to ai e tau vine, to liligi hifo foki e au ki lalo ke he pahua hana tau maka, to fakakite ai e au hana tau fakaveaga.

7 To tuki malipilipi foki hana tau tupua oti kua ta, to huhunu ai foki ke he afi hana tau taui oti, to eke foki e au hana tau tupua oti mo tau mena kua moumou; ha ko e taui he fifine fakataka ne tatanaki ai e ia, to liliu atu foki e tau mena ia ke he taui he fifine fakataka.

8 Ko e mena ia to tagi tatuki ai au, mo e tagi aue ai au, to fano au mo e nakai fai tapulu mo e nakai fai felevehi; to tagi au po ke tau luko, mo e tagi au tuga ne tau iaena.

9 Ha kua kelea hana tau kafokia; ha kua hoko ni kia Iuta; kua hoko ni ke he gutuhala he haku motu, ko Ierusalema.

10 Aua neke talahau ai i Kata, aua neke tagi; kua taveli au ke he efuefu i Petafira.

11 Kia fina age ai mo e nakai fai felevehi mo e ma, ko koe na kua nofo i Safira; nakai fina atu a ia kua nofo i Saanana; ko e tagi tatuki a Petaseli to uta kehe ai ia mutolu e mena ne tu ai a ia.

12 Kua mamahi ni a ia kua nofo i Marota ha ko e monuina; ha kua hoko hifo e malaia ia Iehova ke he gutuhala a Ierusalema.

13 Ko koe na kua nofo i Lakisa, kia fakavē a e kariota ke he solofanua mafiti; ko ia ko e kamataaga he hala ke he tama fifine a Siona; ha kua iloa i loto ia koe e tau holifono a Isaraela.

14 Ko e mena ia to ta age ai e koe ki Moresi-Kato e mena fakaalofa ke mavehe aki; to eke foki e tau fale a Akasipa mo mena fakavai ke he tau patuiki a Isaraela.

15 Ko koe na kua nofo i Masera, to ta mai ni e au kia koe a ia ke eke a koe māna; to hoko ni ki Atulama e lilifu a Isaraela.

16 Kia hifi pale e koe e ulu hau, mo e hehele e koe hau a lauulu ha ko e hau a fanau fakahele, kia fakalaulahi e koe e mena kua hifi tuga ne aeto; ha kua fakapaea atu a lautolu ia koe.