Mareko

11 KUA tata atu tuai a lautolu ki Ierusalema, kua hohoko atu ki Petefake mo Petania, ke he mouga ko Olive, ti fekau atu ai e ia e tokoua a tutaki hana,

2 Kua pehe age kia laua, O a a mua ke he māga ha i mua ia mua; ka hoko ki ai, ti kitia ai agataha e mua e punua asini ha ne fakave ai, nakaila heke ai taha; ti vevete ai e mua, mo e takitaki mai ai.3 Kaeke ke vagahau mai taha kia mua, Kua eke mo ha e mua e mena na? kia tala age ki ai a mua, Kua manako ai e Iki; to fakafano mai ai agataha.

4 Ti o ai a laua, kua moua e punua asini ne fakave ke he tapa gutuhala i fafo ni ke he halatu, ti vevete ai e laua.5 Ti pehe age kia laua e falu ne tutu ke he mena ia Ne vevete mo ha e mua e punua asini?6 Ti tala age ai a laua kia lautolu tuga ne poaki mai ai a Iesu; ti tuku mai ai e lautolu kia laua.

7 Ti takitaki age e laua e punua asini kia Iesu, kua tolo hake foki ha lautolu a tau tapulu ki luga hana; ti heke ai a ia.8 Kua folafola foki he tau tagata tokologa ha lautolu a tau tapulu ke he puhala; ko e falu ne halahala hifo e lautolu e tau la akau, mo e folafola ke he puhala.

9 Kua tauui atu foki a lautolu ne mumua mo lautolu ne mumui, kua pehe, Hosana! Kia monuina a ia kua haele mai ke he higoa he Iki.10 Kia monuina e kautu he matua ha tautolu ko Tavita kua hoko mai ke he higoa he Iki; Hosana ke he tau mena i luga muatua.11 Kua hoko a Iesu ki Ierusalema, mo e hu atu ke he faituga; kua kitekite fano a ia ke he tau mena oti; kua hoko ke he magaaho afiafi, ti haele atu ai a ia ki Petania, fakalataha mo e tokohogofulu ma ua.12 Ko e magaaho pogipogi ne o mai ai na lautolu i Petania, ti fia taumafa a ia.

13 Kua kitia e ia e mati ke he mena mamao, ha ha i ai e tau lau, ti haele age a ia ki ai, po ke moua ai nakai ha mena; kua hoko ki ai ti nakai moua ai ha mena, ko e tau lau ni hokoia; ha kua nakaila hoko ke he vaha he tau mati.

14 Ti tala age a Iesu ki ai, kua pehe age, Aua neke kai he taha tagata ha fua mai ia koe tukumalagi. Na logona foki hana tau tutaki.

15 Kua hoko a lautolu ki Ierusalema; kua hu a Iesu ke he faituga ti kamata ai e ia ke vega ki fafo e tau tagata ne fefakafuaaki ke he faituga, ne tulei e tau lapa he tau tagata ne fakafua tupe, mo e tau nofoa he tau tagata fakafua lupe.

16 Nakai maeke foki e ia ke fina age taha ke he faituga mo e kavega.

17 Ti fakaako atu a ia kua pehe atu kia lautolu, Nakai kia tohi, To talahaua haku a fale, ko e fale liogi he atu motu oti kana? ka kua eke e mutolu mo ana he tau tagata fofo mena.

18 Kua logona he tau tohikupu mo e tau ekepoa ne mua, ti kumi ai e lautolu, po ke eke fefe a lautolu ke tamate a ia; ka e matakutaku a lautolu kia ia, ha kua ofo e moto tagata oti he hana tau kupu.

19 Kua hoko ke he magaaho afiafi, ti haele atu ai a ia ki tua he māga.

20 Ko e magaaho pogipogi kua o age ai a lautolu, kua kitia e mati kua mago, kua hoko ni ke he tau vaka.

21 Ti manatu ai a Peteru, kua pehe age kia ia, Rapai na e, kitiala e mati ne kaialu e koe, kua mago tuai.

22 Ti tala age a Iesu kia lautolu, kua pehe age, Kia tua a mutolu ke he Atua;

23 Ko e moli ke tala atu e au kia mutolu, ko e tagata ka tala age ke he mouga nai, Kia nikiti a koe, mo e liti ke he tahi, mo e nakai mahalohalo hana loto, ka e tua a ia ke hoko ni e mena ne tala age e ia, to eke ni māna e mena ne tala age ai e ia.

24 Ko e mena ia ke tala atu ai e au kia mutolu, ko e tau mena oti kana ka ole atu ai a mutolu ke he tau liogi ha mutolu, kia tua a a mutolu ke moua e mutolu, to eke ai ni ma mutolu.

25 Ka tutu a mutolu mo e liogi, kaeke kua toka ai ia mutolu ha mena kia taha, kia fakamagalo atu e mutolu ki ai; kia fakamagalo ai he Matua ha mutolu ha he lagi ha mutolu a tau hala.

26 Kaeke foki kua nakai fakamagalo atu e mutolu, ti nakai fakamagalo foki he Matua ha mutolu ha he lagi ha mutolu a tau hala.

27 Kua liliu age a lautolu ki Ierusalema, ha ne evaeva a ia ke he faituga, ti o mai ai kia ia e tau ekepoa ne mua, mo e tau tohikupu, mo e tau patu,

28 Kua pehe mai kia ia, Ko e heigoa kia e pule kua eke ai e koe e tau mena na? To age e hai kia koe e pule ia ne eke ai e koe e tau mena na?

29 Ti tala age a Iesu kia lautolu, kua pehe age, Ke hūhu atu foki e au taha kupu kia mutolu kia talahau mai a e mutolu kia au; to tala atu ai e au kia mutolu e pule ne eke ai e au e tau mena nai;

30 Ko e papatisoaga a Ioane, po ke mai he lagi kia? po ke mai he tau tagata? Ati tala mai a kia au.

31 Ti fevagavagahauaki ai a lautolu, kua pehe age, Kaeke ke tala atu e tautolu, Mai he lagi; ti pehe mai a ia, Ti ko e ha nakai talia ai e mutolu a ia?

32 Kaeke ke tala atu e tautolu, Mai he tau tagata; kua matakutaku a lautolu ke he tau tagata, ha ko e taofi ha lautolu oti kia Ioane, ko e perofeta moli a ia.

33 Ti tala mai a lautolu kia Iesu, kua pehe mai, Nakai iloa e mautolu. Ti tala age ai foki a Iesu kia lautolu, kua pehe age, Nakai tala atu foki e au kia mutolu e pule kua eke ai e au e tau mena nai.