Mareko

12 TI kamata ai a ia ke vagahau atu kia lautolu ke he tau fakatai, Ne to he taha tagata e ulu vine, ti puipui aki he pa, kua keli foki e mena ke hihina ki ai e huhua vine, kua ati foki e kolo ti tuku atu e ia ke he tau tagata gahua vine; ati fano ai a ia he fenoga ke he motu kehe.

2 Kua fakafano atu foki e ia e fekafekau ke he tau ka fua ai, ke he tau tagata gahua vine, kia moua ai e tau fua he ulu vine he tau tagata gahua vine.

3 Ka e tapaki e lautolu a ia, mo e fahi, ti fakafano noa mai a ia.

4 Ti liu foki fakafano atu e ia e taha fekafekau kia lautolu; ati taulitimaka ai e lautolu a ia, kua maihi ai hana a ulu, mo e fakafano kehe atu foki a ia mo e eke fakakelea.

5 Ti liu foki fakafano atu ni e ia taha, kua kelipopo e lautolu a ia; ko e falu foki ne tokologa, kua fahi e lautolu falu, ka e kelipopo ni falu.

6 Ti kua toe ni ia ia hana tama tane tokotaha, kua fakahelehele e ia; ti fakafano atu fakamui a ia kia lautolu, kua pehe, To maimaina a lautolu ke he haku a tama.

7 Ka ko e tau tagata gahua vine, kua fevagavagahauaki a lautolu, Ko e hakeaga hanā, o mai a, ke kelipopo e tautolu a ia, ti eke ni e fonua ma tautolu.

8 Ati tapaki ai e lautolu a ia, kua kelipopo, mo e liti ki tua he ulu vine.

9 Hanai, to eke ha he iki hana e ulu vine? To hau a ia mo e fakaoti e tau tagata gahua vine, ti tuku age e ulu vine ke he falu.

10 Ka e nakai kia totou e mutolu e kupu nai he Tohi, Ko e maka ne tiaki he tau tagata ati fale, kua eke a ia mo maka malokuaga tapa ki luga?

11 Ko e mena ia ne eke he Iki, kua ofo a tautolu he kitekite ki ai.

12 Kua fia tapaki e lautolu a ia, ka e matakutaku a lautolu ke he moto tagata; ha kua iloa e lautolu, kua fakatonu e ia e fakatai kia lautolu; ti toka e lautolu a ia, ka e o kehe ai.

13 Ne fakafano mai foki e lautolu e falu a farasaio mo e falu a Herotiano kia ia, ke tauhele e lautolu a ia ke he hana tau kupu.

14 Kua o age a lautolu, kua pehe kia ia, Ko e akoako na e, kua iloa e mautolu kua fakamoli a koe, mo e nakai matakutaku a koe ke he taha tagata, ha kua nakai fakamailoga e koe ha tagata, ka e fakaako atu e koe e puhala he Atua mo e fakamoli; po ke ne lata nakai ke uta e telu kia Kaisara, po ke nakai?

15 To uta kia e mautolu? po ke nakai uta e mautolu? Ka kua fioia tuai e ia ha lautolu a fakavai ti tala age ai a ia kia lautolu, Ko e heigoa e mena kua kamatamata mai ai e mutolu au? ati ta mai a taha tenari ke kitekite au ki ai.16 Ti ta mai ai e lautolu. Ti pehe a ia kia lautolu, Po ke fakatino a hai a enei, mo e tohi nai? Ti tala age ai a lautolu kia ia, Ha Kaisara.

17 Ti tala age a Iesu kia lautolu, kua pehe age, Ati uta a kia Kaisara e tau mena a Kaisara; ka e uta ke he Atua e tau mena he Atua. Ti ofomate ai a lautolu kia ia.18 Kua o mai kia ia e tau satukaio, ko lautolu kua taofi, nakai tuai tu mai taha kua mate; kua hūhu age a lautolu kia ia, kua pehe age,19 Ko e akoako na e, ne tohi mai a Mose kia mautolu, Ka mate e matakainaga he taha tagata, ti toka ai hana hoana kua nakai fai tama, ke hoana ai hana matakainaga ke he hana takape, ke fanau ai ha tama mo e matakainaga hana.

20 Hanai ha i ai e matakainaga ne tokofitu; ne fai hoana fakamua he taokete, kua mate tuai, nakai fai tama.

21 Ti hoana ai hana tehina to he tua ke he fifine, kua mate foki a ia, ka e nakai fai tama; kua pihia foki a ia ne tokotolu aki.

22 Kua katoa e tokofitu ne hoana kia ia, kua nakai fai tama; ati oti ka e mate foki mo e fifine.

23 Hanai, ka hoko ke he liliu foki tutu mai, ka tutu mai ai a lautolu, ko hai ia lautolu ke eke māna e hoana? ha ko e mena hoana e tokofitu kia ia.24 Ti kua tala age a Iesu kia lautolu, kua pehe age, Ka e nakai kia ko e mena ia kua hehe ai a mutolu, he nakai iloa e mutolu e tau Tohi mo e malolo he Atua?

25 Ka liliu foki tutu mai a lautolu ne mamate, ti nakai fai hoana a lautolu, ti nakai fai tane; ka e tuga ne tau agelu he lagi a lautolu.

26 Ka ko lautolu kua mamate, mo e ha lautolu a liliu tutu mai, nakai kia totou e mutolu ke he tohi a Mose e kupu ke he akau talatala kua vagahau he Atua kia ia, kua pehe, Ko au ko e Atua ha Aperahamo, ko e Atua foki ha Isaako, ko e Atua foki ha Iakopo?27 Nakai ko e Atua a ia he tau tagata kua mamate, ka ko e Atua he tau tagata momoui; hanai, kua hehe lahi a mutolu.

28 Kua hau tuai taha he tau tohikupu, kua fanogonogo age ke he hūhu ha lautolu, kua iloa foki e ia kua mitaki hana a vagahau ne tali age ai kia lautolu, ati hūhu age ai a ia kia ia, Ko e poaki fe kua mua ke he tau poaki oti?29 Kua tala age a Iesu kia ia, Mua hanai ke he tau poaki oti, Kia fanogonogo a koe ma Isaraela na e; ko e Iki ha tautolu a Atua, ko e Iki tokotaha a ia.

30 Kia fakaalofa atu foki a koe ke he Iki hāu a Atua mo e hāu a loto katoa, mo e hāu a agaga katoa, mo e hāu a manatu katoa, mo e hāu a malolo katoa Ko e poaki haia kua mua.

31 Ti pihia foki a ia ne ua aki, hanai, Kia fakaalofa atu a koe ke he tagata ne katofia a mua, kia tuga a koe kia koe ni, Nakai fakai taha poaki kua mua ke he na poaki ia.32 Ti pehe age ai e tohikupu kia ia, Ko e moli ma akoako na e, ko e tonu haia kua tala mai ne koe; ko e mena tokotaha ni e Atua; nakai fakai foki taha ko ia ni hokoia.

33 Kia fakaalofa foki kia ia mo e loto katoa, mo e manatu katoa, mo e agaga katoa, mo e malolo katoa; kia fakaalofa foki ke he tagata ne katofia a laua, tuga a ia kia ia, kua mua ia ke he tau poa oti kua huhunu katoatoa, mo e tau poa oti.

34 Kua fioia e Iesu kua tali mai a ia mo e iloilo, ti tala age kia ia, Nakai vaha mamao a koe mo e kautu he Atua. Tali mai he aho ia, kua nakai fakamalolo taha ke hūhu ha mena kia ia.

35 Kua fakaako a Iesu ke he faituga, kua tala age ai a ia, kua pehe age, Kua talahau fefe he tau tohikupu ko e Keriso ko e tama a ia a Tavita?

36 Ha kua pehe mai a Tavita ke he Agaga Tapu, Ne tala age e Iki ke he haku a Iki, Kia nofo a koe ke he haku a fahi matau, ato eke e au a lautolu kua fai fi kia koe mo fakatuaga hui hāu.

37 Hanai, kua totoku e Tavita a ia ko e Iki; ke uta fefe foki a ia mo tama hana. Ne fanogonogo mo e fiafia ai foki e moto tagata tokologa kia ia.

38 Na tala atu foki a ia kia lautolu he hana fakaako atu, A mutolu mo e tau tohikupu, ko lautolu kua fia evaeva mo e tau tapulu leleva, kia fakaalofa mai foki e tau tagata he loto male.

39 Katoa mo e tau nofoa uho he tau sunako, mo e mena mua ke tatakoto ai he tau kaiaga mena.

40 Kua fakaoti e lautolu e tau fale he tau fifine takape, kua liogi fakaleleva foki ke eke mo ufiufi; to moua a lautolu na he fakahala kua mua ue atu.

41 Kua nofo a Iesu ki mua he mena ne toka ai e tau tupe, kua fioia foki e ia e lanu tagata ha ne tolo e tau tupe ke he mena ne toka ai e tau tupe; ne tokologa foki e tau muhu koloa ne tolo ki ai e tau tupe loga.

42 Ti fina age e taha fifine takape kua nofogati, kua tolo ki ai ua e tupe ikiiki, ko e kotane ne taha maka.

43 Ti ui atu a ia ke he tau tutaki hana, mo e tala age a ia kia lautolu, Ko e moli haku ke tala atu ai kia mutolu, kua lahi ni e mena he fifine takape na kua nofogati kua tolo ke he mena kua toka ai e tau tupe ka e tote e mena ha lautolu oti ne tolo ki ai.

44 Ha ko lautolu oti kua tolo e lautolu e falu a mena mai he tau mena loga ha lautolu; ka ko ia kua nofogati, kua tolo e ia hana a tau mena oti ne toka ia ia, ko e hana a tau mena oti ke moui ai.