Ruta

3 KUA pehe mai a Naumi ke he hana figona fifine, Haku tama na e nakai kia kumi e au ha okiokihaga mau kia monuina ai a koe?

2 Hanai, nakai kia ko e magafaoa ha tautolu a Poasa, ko e hana tau fekafekau fifine ne o ai mo mutolu? kitiala, to fakahavili karite a ia ke he po a magaaho ke he mena taholi saito.

3 Kia koukou a koe, ti takai e koe a koe, mo e tapulu ai a koe ke he hau a tau tapulu, ti hifo a koe ke he mena haha saito; ka e aua neke kitia he tagata a koe ato oti he kai mena ai a ia mo e inu.

4 Ka takoto a ia, ti kitekite a koe ke he mena kua takoto ai, ti fano a koe mo e hafagi e kafu ne kafu aki hana tau hui, mo e takoto ai a koe; ti tala atu e ia kia koe e mena ke eke e koe.

5 Ne pehe atu a ia kia ia, ko e tau mena oti kua tala mai e koe kia au, to eke ai ni e au.

6 Ti hifo a ia ke he mena haha saito, ti eke ai e ia e tau mena oti ne poaki mai hana matua fugavai fifine kia ia.

7 Kua kai a Poasa mo e inu, kua fiafia ai hana loto, ti fano a ia ke takoto ke he tapa tanakiaga karite. Ti fano fakatekiteki a ia, ti hafagi e ia e kafu ne kafu aki hana tau hui, ti takoto ai a ia.

8 Kua hoko ke he tuloto po ti matakutaku e tagata, ti fuluhi a ia, kitiala ko e fifine ne takoto ke he hana tau hui.

9 Ti pehe mai a ia, Ko hai a koe? Ti tali atu a ia, Ko au ko Ruta ko e hau a fekafekau fifine; ati fakakafu mai e koe hau a fekafekau fifine ke he kala he kafu hau, ha ko e magafaoa taha a koe mo e tane haku kua mate.

10 Ti pehe mai a ia, Kia fakamonuina e Iehova a koe, haku tama fifine na e; kua homo atu hau a fakaalofa fakamui nai, ke he fakaalofa fakamua hau, he nakai mui age a koe ke he tau fuata, po ke nofogati, po ke muhu mena a lautolu.

11 Ko e hanai, haku tama fifine na e, ua matakutaku a koe; ko e tau mena oti kua tala mai e koe to eke ni e au mau; ha kua iloa he maga oti he haku motu, ko e fifine mahani mitaki ni a koe.

12 Ko e hanai, ko e moli ne magafaoa taha au mo e tane hau ne mate; ka ko e taha tagata he magafaoa fakamua a ia ia maua.

13 Kia nofo ai a koe ke he po nai, ka hoko ke he pogipogi, kaeke ke eke ai e ia e mahani he tagata he magafaoa taha kia koe, kua mitaki, ti eke ai e ia e mahani he tagata he magafaoa taha; ka nakai fia eke e ia e mahani he tagata he magafaoa taha kia koe, to eke ai e au e mahani he tagata he magafaoa taha kia koe; ko e moui a Iehova; kia takoto a koe ato aho.

14 Ti takoto ai a ia ke he hana tau hui, kua hoko ke he aho; ti matike a ia, ka kua nakaila maama ke kitia e tau tagata; kua pehe atu a Poasa, Aua neke iloa he taha kua hau e fifine ke he mena haha saito.

15 Ti pehe mai a ia, Ta mai hau a tapulu, mo e fofola ai; ne fofola ai e ia, ti fafati mai e ia ono e fafati fua karite, ti tuku ki luga ia ia; ti fano ai a ia ke he maga.

16 Ti fina atu a ia he he hana matua fugavai fifine, ti pehe mai a ia, Haku tama na e, ko hai kia a koe? Ti tala age a ia kia ia e tau mena oti ne eke he tagata kia ia.

17 Ne pehe atu foki a ia, ko e tau fafati fua karite nai ne ono ne ta mai e ia kia au, ne pehe mai a ia, Aua neke fano noa a koe ke he hau a matua fugavai fifine.

18 Ti pehe mai a ia, Nofo a a koe haku tama na e, ato kitia e tautolu e mena ke tupu mai ai; ha ko e mena nakai okioki e tagata ato fakaoti ai e ia e mena nai ke he aho nai.