Ruta

4 KUA hake a Poasa ke he gutuhala he maga, kua nofo ai; kitiala ko e tagata he magafaoa ha lautolu ne vagahau ai a Poasa, ne fina age. Ti pehe age a ia, Ko e iki na e, kia afe mai ā koe, mo e nofo ke he mena nai; ti afe age a ia, mo e nofo ai.

2 Ti ta mai e ia e tau patu he maga ne tokohogofulu, ti pehe age a ia kia lautolu, Kia nonofo a mutolu ke he mena nai; ti nonofo ai a lautolu.

3 Ti pehe age a ia ke he tagata he magafaoa ha lautolu, ko e fakatau ne fai a Naumi ne liu mai he motu ko Moapi, e maga fonua he matakainaga ha tautolu ko Elimeleka;

4 Ne pehe age foki au, to tala atu e au kia koe, kua pehe atu, Kia fakatau ai ki mua ha lautolu kua nonofo mai, ki mua foki he tau patu he haku motu; kaeke ke fakatau e koe, ti fakatau ai kaeke ke nakai fakatau e koe, ti tala mai la ke iloa e au; ha kua nakai mua taha kia koe ke fakatau ai; ko au foki ke mui atu kia koe. Ti pehe mai a ia, To fakatau ni e au.

5 Ti pehe age a Poasa, ko e aho ke fakatau ai e koe e fonua mai he lima a Naumi, ti fakatau foki ia Ruta ko e fifine Moapi, ko e hoana hana kua mate; ke ui ai e higoa he tagata kua mate ke he hana tufaaga.

6 Ti pehe age e tagata he magafaoa taha, Nakai maeke au ke fakatau maku neke moumou e au haku tufaaga; kia fakatau e koe e fonua mau, ha kua nakai maeke ia au ke fakatau.

7 Ko e mahani hanai i Isaraela ne aho mua ke he fakatau mai mo e fakatau atu, ke fakamau ai e tau mena oti; ne aki he taha tagata hana afialoalohui mo e age ke he taha, ko e fakatufono ni haia i Isaraela.

8 Ne pehe age e tagata he magafaoa ha lautolu kia Poasa, Kia fakatau ia mau; ti aki ai e ia hana afialoalohui.

9 Ti pehe age a Poasa ke he tau patu mo e motu oti, kua eke a mutolu mo tau fakamoli ke he aho nai, kua fakatau e au e tau mena oti a Elimeleka, mo e tau mena oti a Kiliona mo Mahalona mai he lima a Naumi;

10 Ko Ruta foki ko e fifine Moapi, ko e hoana a Mahalona, kua fakatau e au a ia ke eke mo hoana haku, ke ui ai e higoa he tagata kua mate ke he hana tufaaga, ke aua neke galo ai e higoa hana kua mate ke he hana tau matakainaga, mo e gutuhala he hana maga; kua eke a mutolu mo tau fakamoli he mena ia ke he aho nai.

11 Ti pehe mai ai e tau tagata oti ha ha he gutuhala, katoa mo e tau patu, Kua eke a mautolu mo tau fakamoli ni ke he mena ia; kia eke e Iehova e fifine nai ko e fina atu ne fai ke he magafaoa hau, ke tuga na Rahela mo Lea, ko laua ne ati hake e magafaoa a Isaraela, kia malolo ai a koe i Efarata, mo e talahaua a koe i Petelehema;

12 Kia eke foki e magafaoa hau ke tuga ne magafaoa a Faresa ne fanau mai e Tamara kia Iuta, mai he fanau ke foaki mai ai e Iehova kia koe he tamāfine nai.

13 Ti uta e Poasa a Ruta, ti eke a ia mo hoana hana, kua fina atu a ia kia ia, ti pule a Iehova ke fatu a ia, ti fanau ai e ia e tama tane.

14 Ti pehe mai e tau fifine kia Naumi, Kia fakaaue a kia Iehova kua foaki atu kia koe ke he aho nai taha ke matua ki ai hau a magafaoa, kia talahaua hana higoa ia Isaraela.

15 To eke a ia mo fakamalolo ke he hau a loto, to leveki foki e ia a koe ka motua ai, ha kua fanau ai a ia he figona fifine hau kua fakaalofa kia koe; kua mua he mitaki a ia kia koe ke he tau tama tane ne tokofitu.

16 Ti toto e Naumi e tama, ti tuku ai a ia ke he hana fatafata, mo e leveki e ia a ia.

17 Ko e tau fifine foki ne katofia mo ia ne fakahigoa e lautolu e tama, kua pehe; kua fanau mai e tama tane ma Naumi, ti ui ai e lautolu hana higoa ko Opeta, ko e matua a ia a Iese, ko e matua a Tavita.

18 Ko e tau hau hanai a Faresa; ne fanau e Faresa a Hesarona;

19 Ne fanau e Hesarona a Rama; ne fanau e Rama a Aminatapu;

20 Ne fanau e Aminatapu a Naasona; ne fanau e Naasona a Salemona;

21 Ne fanau e Salemona a Poasa; ne fanau e Poasa a Opeta;

22 Ne fanau e Opeta a Iese; ne fanau e Iese a Tavita.