Isaia

23 KO e kavega a Turo. Kia tagi fekapai a mutolu ko e tau foulua Tasesa, ha kua malŏlŏ tuai a ia; nakai ha i ai ha fale, to nakai fai hala ke hu atu ki ai; kua fakakite atu ai e mena ia kia lautolu mai he motu ko Kitimo.

2 Kia fakanonono ā mutolu ko mutolu kua nonofo ke he motu ke he hala kau tahi, ko e tau tagata fakafua koloa ko e tau tagata Saitonu, ko lautolu ne o atu ke he moana, ne fakapuke aki e lautolu a koe.

3 Ha ha he tau vai lalahi e saito a Sikora, ko e heleheleaga saito mai he vailele ne maukoloa ai a ia; ti eke a ia mo mena ke fakafua ai e tau koloa he tau motu kehe.

4 Kia mā a koe ma Saitonu na e, ha kua talahau mai he tahi, ko e taue ni he tahi kua pehe mai a ia, Nakai mamahi fanau au, to nakai fanau e au, nakai leveki e au e tau taulekaleka, to nakai fakaako e au foki e tau tamāfine tote.

5 Ka kua hoko age e tala ki Aikupito, ti mamahi ai a lautolu he tala ki Turo.

6 Kia o atu ā mutolu ki Tasesa ti tagi fekapai ā mutolu kua nonofo ke he motu ne takai he tahi.

7 Ko e ha mutolu a maga fiafia kia a enei, ko e hana kamataaga mai he vaha ne aho mua? To uta ai a ia he hana tau hui ke he mena mamao ke nofo ai.

8 Ko hai kia ne pule ke eke e mena nai ki Turo ko ia ne tufatufa ai e tau foufouiki? ko e hana tau tagata fakafua koloa ko e tau iki ni a lautolu, ko e hana tau tagata fakafua mena ko e tau tagata lilifu he lalolagi a lautolu.

9 Kua pule ai a Iehova Sapaota, kia fakahiku ai e ia e hula he tau mena fulufuluola oti, mo e eke mo mena fakateaga e tau iki lilifu oti he lalolagi.

10 Kia fina atu a koe ke he hau a motu, tuga ne vailele, ko e tama fifine a Tasesa na e, nakai tuai fai pipi a koe.

11 Ne fakaolo atu e ia hana lima ki luga he tahi, ti vivivivi ai e tau kautu, ne poaki mai e Iehova ki Kanana ke moumou ai hana tau taue.

12 Kua pehe mai a ia, Nakai liu foki a koe ke hula ko e tamāfine tote, ko e tama fifine a Saitonu kua pehia he favale; kia matike a ti fano ā koe ki Kitimo; ka e nakai moua ai e koe ha okiokihaga māu ke he mena ia.

13 Kitiala e motu ko Kaletaia; ko e motu ia nakai tuai ha ha i ai, ne fakatu a Asuria a ia ma lautolu ne nonofo ke he tutakale; kua fakatu e lautolu ha lautolu a tau kolo, kua ulu ki lalo e lautolu hana tau fale iki; kua eke e lautolu a ia mo mena malŏlŏ.

14 Kia tagi fekapai ā mutolu ko e tau vaka Tasesa, ha kua malŏlŏ ai ha mutolu a tau kolo.

15 Ko e aho foki ia ke galo ai a Turo ke he tau tau ne fitugofulu, ke tuga ne tau aho he patuiki tokotaha; ka mole atu e tau tau ne fitugofulu, ti eke ai a Turo ke tuga e lologo he fifine fakataka.

16 Kia toto ā e kitara, ti takai ā koe e maga, ko e fifine fakataka na e, kua nimo; kia ta malie e koe e kitara; ti lologo fakalahi ā kia manatu ai a koe.

17 Ka mole foki e tau tau ne fitugofulu to ahi e Iehova a Turo; to liu atu a ia ke he hana taui, ti feuaki a ia mo e tau kautu oti he lalolagi, ke he fuga kelekele.

18 Ka ko e hana tau mena ka moua katoa mo e hana taui to fakatapu ia ma Iehova; nakai tatanaki ai e tau mena ke loga, to nakai toka ai mo taoga; ka ko e hana tau mena ka moua to eke ia ma lautolu kua nonofo ki mua a Iehova, kia kai a lautolu ke mamakona ai, kia eke ai foki e tau tapulu fulufuluola.