Ko E Lagomatai Ne Mua Ma Lautolu Kua Maanu

KO E MOMOKO HE GALO E FAKAHELE KE HE MATE KO E MATAKUPU NE LAHI E KUMIKUMI HE MAGAAHO NEI. Ka kua fakakite he magaaho fakamua, ko e fakatonuaga lotomatala ne fa lagotatai mo e pulotu kua mai fakamua atu he Tohi Tapu. Talahau he mena nei e takitakiaga mauokafua he Tohi Tapu. Ti loga atu foki e fakatonuaga mitaki i loto he Tohi Tapu. Foaki mai e tau vala tala ne nakai fai mena foki ke moua ai ti fakamafanatia lahi ki a lautolu ne maanu.

• Fakamooliaga ko e tau fakahele ha tautolu ne mamate kua nakai matematekelea

  “Ko lautolu ne mamate nakai iloa e lautolu ha mena” he talahau he Tohi Tapu ia Fakamatalaaga 9:5. “Kua mate ai [ha lautolu] tau manatu.” (Salamo 146:4) He fakatatau mo e mena nei, kua fakatatai he Tohi Tapu e mate ke he mohe tokolologo.​—Ioane 11:11.

• Ko e taofiaga malolō ke he Atua fakaalofa kua tamai e mafanatia

  Pehē e Tohi Tapu ia Salamo 34:15: “Ko e tau fofoga a Iehovaa kua hagao ia kia lautolu ne tututonu, mo e hana tau teliga foki ke he kalaga ha lautolu.” He fakakite e tau logonaaga ha tautolu he liogi ke he Atua kua mua ue atu ke he tuluiaga mitaki po ke puhala he fakatotoka e tau manatu ha tautolu. Kua lagomatai ai a tautolu ke taute e fakafetuiaga mitaki mo e ha tautolu a Tufuga ka foaki ki a tautolu e malolō ke mafanatia ai.

• Ko e vahā mitaki i mua ke onoono atu ki ai

  Manamanatu ke he vahā mitaki i mua ka fakaliu tu mai a lautolu he tukuaga ke moui he lalolagi! Talahau tumau he Tohi Tapu e magaaho ia. He fakamaama e tau tuaga he lalolagi he magaaho ia, pehē e Tohi Tapu “to holoholo kehe he Atua e tau hihina mata oti mai he tau mata ha [t]autolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.”​—Fakakiteaga 21:3, 4.

Tokologa ne talitonu ki a Iehova, ko e Atua he Tohi Tapu kua foaki ki a lautolu e malolō ke fahia ke he maanu, he falanaki ke he amaamanakiaga ke liu kitia e tau fakahele ha lautolu ne mamate. Ma e fakatai, ko Ann ne mate e taane ne 65 e tau he mau, ne pehē: “Fakamafana he Tohi Tapu au kua nakai matematekelea e tau fakahele ha tautolu kua mamate mo e to fakaliu tu mai he Atua a lautolu ne fakamau e ia he manamanatuaga haana. Manatu pihia au ka manamanatu au ke he taane haaku ne mate, ti ko e fua kua maeke au ke fahia ke he mena ne tupu ki a au!”

Ko Tiina ne totoku he kamataaga he tau fufuta vala tala nei, ne pehē: “Tali mai he aho ne mate a Timo, logona hifo e au e lalagoaga he Atua. Logona hifo e au e lima malolō ha Iehova ne lagomatai au he magaaho fakaatukehe. Ti mooli lahi ki a au e maveheaga he Tohi Tapu ke he liu tu mai. Fakamalolō ki a au ke fakatumau ato liu au ke kitia a Timo.”

Ko e tau logonaaga pihia ne fatiaki he tau miliona tagata ne talitonu kua mauokafua e Tohi Tapu. Pete kua logona hifo e koe kua nakai mooli po ke miti noa e tau talahauaga he Tohi Tapu, lata a koe ke kumikumi hifo ke kitia e fakamooliaga kua hako e fakatonuaga mo e tau maveheaga i loto. Liga to moua e koe e lagomatai lahi he Tohi Tapu ma lautolu ne maanu.

FAKAAKO ATU FOKI KE HE AMAAMANAKIAGA MA LAUTOLU KUA MAMATE

Kitekite e tau vitiō hagaao ki ai he faahi kupega hila ha mautolu he jw.org

KO E HEIGOA E TUAGA HA LAUTOLU KUA MAMATE?

Ko e heigoa e mena ka tupu ka mamate a tautolu? Ko e tali he Tohi Tapu kua fakamafana mo e atihake a tautolu

Onoono ki lalo he FATATOHI > TAU VITIŌ (Tau Vitiō: TOHI TAPU)

MANAKO NAKAI A KOE KE HE TAU TALA MITAKI?

Ha kua loga lahi e tau tala kelea, maeke a koe ke moua i fe e tau tala mitaki?

Onoono ki lalo he TAU FAKAAKOAGA HE TOHI TAPU > MAFOLA & FIAFIA