Veveheaga 104

Logona e Leo he Atua ke Laga Toluaki

HA HA agaia he faituga, ne mamahi a Iesu ke he mate ka hoko mafiti mai ki a ia. Ko e hana matapatu mena ne manamanatu ki ai ko e lauia fefe e tuaga he hana Matua, ati liogi a ia: “Ma Matua na e, fakaheke a ke he hau a higoa.”

Ko e mena ia, ko e leo lahi mai he lagi, ne fakapuloa: “Kua fakaheke au ki ai, ato liu foki fakaheke au ki ai.”

Ne ofomate e moto tagata ne tutu agaagai ai. “Ne vagahau taha agelu kia ia,” he kamata e falu ke talahau. Ka e pehe e falu ko e pakulagi. Ka ko e moli, ko Iehova ko e Atua ne vagahau! Ko e mena nei, nakai ko e magaaho fakamua la ia he logona e leo he Atua hagaao ia ki a Iesu.

Ko e papatisoaga ha Iesu, he tolu mo e hafa e tau tau fakamua, ne logona e Ioane ko e Papatiso e Atua ne pehe hagaao ki a Iesu: “Ko e haku a Tama fakahele hanā, kua fiafia na au kia ia.” Ko e falu a magaaho he mole e Paseka ko e oti la ia, he magaaho ne faliu a Iesu i mua ha lautolu, ne logona e Iakopo, Ioane, mo Peteru e fakapuloaaga he Atua: “Ko e haku a Tama fakahele hanā, kua fiafia au kia ia; kia fanogonogo a mutolu kia ia.” Ko e magaaho nei, ke lagatolu aki, he Nisana 10, fa e aho to hoko e mate ha Iesu, ko e leo he Atua ne liliu e tau tagata ke logona. Ka ko e magaaho nei ne vagahau a Iehova ke logona he tau tagata tokologa!

Ne fakamaama e Iesu: “Nakai ko au ne hau ai e leo nei; ka ko mutolu.” Ne foaki mai e fakamoliaga ko Iesu moli e Tama he Atua, ko e Mesia he maveheaga. “Ha ne fakafili ainei e lalolagi nai,” he matutaki e Iesu, “to vega ainei e iki he lalolagi nai.” Ko e moui fakamoli ha Iesu, kua tuga, fakamoli ko Satani ko e Tiapolo, ko e pule he lalolagi, kua lata tonu ke “vega,” ke tamate.

Ne tuhi ke he tau fua he hana a mate ne fai, ne pehe a Iesu: “Ko au foki ka ta hake au mai he kelekele, ti futiaki mai e au e tau tagata oti kia au.” Ko e hana a mate ne nakai ko e kaumahala, ha ko e puhala mai he mena ia, to futiaki mai e ia e falu ki a ia ke maeke ia lautolu ke fiafia e moui tukulagi.

Ka e totoko e moto tagata: “Kua fanogonogo a mautolu ke he Fakatufono, to tumau muatua e Keriso tukulagi. Ti kua tala mai fefe e koe, Ke lata ai he ta hake e Tama he tagata? Ko hai e Tama nai he tagata?”

Pete ni he loga e tau fakamoliaga, putoia ai foki e logona e leo he Atua, ko e laulahi ne nakai tali tonu ko Iesu e Tama he tagata moli, ko e Mesia he maveheaga. Ka e, he taute e ia he ono mahina fakamua he Galue he Tau Fale Api, ne vagahau agaia a Iesu hagaao ki a ia “e maama” mo e fakamalolo hana tau tagata fanogonogo: “Kia talia e mutolu e maama he toka ai e maama ia mutolu, kia uta a mutolu mo fanau he maama.” Mole he talahau e ia e tau mena nei, ne fano a Iesu mo e fakamumuli, kakano ni ha kua hagahagakelea hana moui.

Ko e nakai tua he tau Iutaia ki a Iesu ne fakamoli e tau kupu ha Isaia hagaao ke he tau ‘mata he tau tagata ne pouli mo e tau loto ne maō ti nakai liliuina ke fakamalolo.’ Ne kitia e Isaia e fakakiteaga he lotopa ha Iehova he lagi, putoia ai a Iesu he hana lilifu fakamua to eke a ia mo tagata ne fakalataha mo Iehova. Ka e taha e mena, ko e tau Iutaia, ke fakamoliaki e tau mena ne tohi e Isaia, ne ulu kafilo mo e tiaki e tau fakamoliaga ko Ia nei ko e ha lautolu a Fakahaoaga ne mavehe ai.

Ka ko e taha fahi, tokologa ko e tau pule (lautolu ia he fakafiliaga tokoluga Iutaia, ko e Saneheturini) ne tua ki a Iesu. Ko Nikotemo mo Iosefa mai i Arimataia e tokoua mai he tau pule nei. Ka ko e tau pule, he magaaho tonu ia, ne kaumahala ke fakapuloa ha lautolu a tua, he matakutaku neke vega kehe mai he ha lautolu a tau tutuaga he sunako. Kua lahi atu e tau mena ne nakai moua e lautolu nei!

Ne mailoga atu foki e Iesu: “Ko e tagata ke tua mai kia au, nakai tua mai a ia kia au, ka ko ia ne fakafano mai au. Ko e tagata foki kua kikite mai kia au, kua kikite atu a ia kia ia ne fakafano mai au. . . . Kaeke foki ke fanogonogo taha ke he haku a tau kupu, ka e nakai talia ai, nakai fakahala e au a ia; ha ko e mena nakai hau au ke fakahala e lalolagi, ka kia fakamomoui e au e lalolagi. . . . ko e kupu ne vagahau atu e au ke fakahala aki a ia ke he aho fakamuiaki.”

Ko e fakaalofa ha Iehova ma e lalolagi he tau tagata ne omoomoi a ia ke fakafano mai a Iesu, ti ko lautolu ne tua ki a ia ka liga ke fakamoui. Ko e fakamouiaga he tau tagata to falanaki ni ke he ha lautolu a omaoma ke he tau mena ne fakaako age he Atua ki a Iesu ke vagahau. Ko e fakafiliaga to fakahoko he “aho fakamuiaki,” he Pule Afe Tau he Keriso.

Ne fakahiku e Iesu he pehe: “Ha ko e mena nakai vagahau noa au, hoko au; ka ko e Matua ne fakafano mai au, ko ia ni ne tuku mai kia au e poaki ke he tau mena ke tala atu ai e au, mo e tau mena ke vagahau ai e au. Kua iloa foki e au ko e hana poaki ni ko e moui tukulagi haia. Ko e hanai, ko e tau mena kua vagahau e au, tuga ne tala mai ai e Matua kia au, ke pihia foki he vagahau e au.” Ioane 12:​28-50; 19:​38, 39; Mataio 3:17; 17:5; Isaia 6:​1, 8-10.

▪ Ko e heigoa e tau magaaho tolu ne logona e leo he Atua hagaao ki a Iesu?

▪ Kitia fefe he perofeta ko Isaia e lilifu ha Iesu?

▪ Ko hai e tau pule ne tua ki a Iesu, ka ko e ha ne nakai fakapuloa e lautolu a ia ke he tau tagata?

▪ Ko e heigoa e “aho fakamuiaki,” mo e ko e heigoa e matapatu ke fakafili aki e tau tagata he magaaho ia?