Veveheaga 106

Fakakite he Tau Fakataiaga he Ulu Vine

NE HA HA i ai a Iesu he faituga. Ko e oti la ia e fakatupetupe e ia e tau takitaki lotu ne poaki he fia iloa ko e pule mai ha hai ne taute e ia e tau mena nei. Ka e nakai la tokotoko mitaki a lautolu mai he ha lautolu a tupetupe, ne huhu a Iesu: “Ka e fefe kia ha mutolu a manatu?” Ne puhala aki e ia e fakataiaga, ti fakakite e ia ki a lautolu ko e vahega tagata moli fefe a lautolu ia.

“Ko e taha tagata ne tokoua e na tama tane hana,” he talahau e Iesu. “Kua fina atu a ia ke he tama fakamui, kua pehe atu, Teme na e, fano a koe ke he aho nai ke gahua ke he haku a ulu vine. Ati tala mai ai a ia, kua pehe mai, Nakai fano au, Ka e tokihala fakamui a ia, ti fano. Kua fina atu foki a ia ke he tama uluaki, kua pihia foki hana kupu kia ia. Ati tala mai ai a ia, kua pehe mai, Ko e Iki na e, to fano au; ka e nakai ni fano a ia. Ko hai ia laua tokoua ne eke e loto he matua ha laua?” he huhu e Iesu.

“Ko e tama fakamui,” he tali he hana tau tagata totoko.

Ne fakamaama e Iesu: “Ko e moli, ke tala atu e au kia mutolu, Kua mumua atu kia mutolu e tau telona mo e tau fifine fakataka ke he kautu he Atua.” Ko e tau tagata oko tukuhau mo e tau fifine fakataka ne nakai talia ke fekafekau ke he Atua he magaaho fakamua. Ka ko e magaaho fakamui, tuga e tama fakamui, ne tokihala mo e fekafekau ki a ia. Ka ko e taha fahi, ko e tau takitaki lotu, tuga e tama uluaki, ne talahau ko e fekafekau ke he Atua, ka e taha e mena, tuga he mailoga e Iesu: “Ha ko e mena hau a Ioane [ko e Papatiso] kia mutolu ke he puhala he tututonu, ti nakai talia e mutolu a ia; ka e talia a ia he tau telona mo e tau fifine fakataka; kua iloa foki e mutolu, ka e nakai tokihala fakamui a mutolu, mo e talia a ia.”

Ne fakakite foki e Iesu ko e kaumahala he tau takitaki lotu ia, nakai ni ko e tiaki e fekafekau ke he Atua. Nakai, ko e kelea muikau pauaki a lautolu, ko e tau tagata tane kelea muikau. “Ko e taha patu,” he talahau e Iesu, “ne to e ulu vine, kua puipui e ia ke he pa, kua keli ai e mena ke hihina ki ai e huhua vine, kua ati ai foki e kolo, kua tuku atu e ia ke he tau tagata gahua vine; ati fano ai a ia he fenoga ke he motu kehe. Kua tata tuai e vaha ke motua ai e fuaaga, ati fakafano atu ai e ia hana tau fekafekau ke he tagata gahua vine, kia moua ai hana tau fua. Ati tapatapaki ai he tau tagata gahua vine hana tau fekafekau; kua fahi e lautolu taha, ti kelipopo taha, ka e taulitimaka taha. Ati liu foki fakafano atu e ia falu a fekafekau, kua mua he tokologa ia lautolu ne mumua; ka e eke pihia foki a lautolu kia lautolu.”

Ko e “tau fekafekau” ko e tau perofeta ne fakafano he “patu” ko Iehova ko e Atua, ke he “tau tagata gahua vine” he hana “ulu vine.” Ko e tau tagata gahua vine nei ko e tau takitaki ne hukui e motu a Isaraela, ko e motu ne talahau he Tohi Tapu ko e “ulu vine” he Atua.

Ha kua eke fakakelea mo e kelipopo he “tau tagata gahua vine” e “tau fekafekau,” ne fakamaama e Iesu: “Ati fakafano fakamui atu ai [he iki he ulu vine] hana tama tane kia lautolu, kua pehe, To maimaina a lautolu ke he haku a tama tane. Ka ko e tau tagata gahua vine, kua kitia atu hana tama tane, ati vagavagahau ai a lautolu, Ko e hakeaga hanā; o mai la ke kelipopo e tautolu a ia, ka e eke ma tautolu hana kaina! Ati tapaki ai e lautolu a ia, kua tulei atu a ia ki tua he ulu vine, ti kelipopo ai e lautolu a ia.”

Ko e magaaho nei, ne hagaao atu a ia ke he tau takitaki lotu, ne huhu a Iesu: “Hanai, ka hau e iki hana e ulu vine, to eke ha e ia ke he tau tagata gahua vine ia?”

“To fakaotioti ni e ia e tau tagata mahani kelea ia,” he tali he tau takitaki lotu, “ti tuku atu e ia e ulu vine, ke he falu a tagata gahua vine, ko lautolu ke ta age kia ia e tau fua ke he tau tau.”

Ne fakailoa e lautolu e fakafiliaga ki a lautolu ni mo e nakai iloa, ha ko e mena putoia a lautolu he tau Isaraela ko e “tau tagata gahua vine” he motu a Iehova ko e “ulu vine” ha Isaraela. Ko e fua ne amanaki a Iehova ki ai mai he tau tagata gahua vine ia ko e tua ke he hana Tama, ko e Mesia moli. Ha ko e ha lautolu a kaumahala ke foaki mai e fua ia, ne poaki a Iesu: “Nakai kia totou e mutolu ke he tau Tohiaga Tapu [he Salamo 118:​22, 23], Ko e maka ne tiaki he tau tagata ati fale, kua eke a ia mo maka malokuaga tapa ki luga; ko e mena haia ne eke e Iehova, kua ofo a tautolu he kitekite ki ai? Ko e mena ia ke tala atu ai e au kia mutolu, To uta kehe ia mutolu e kautu he Atua, ka e age ke he taha motu ke ta mai ai e tau fua hana. Ko ia ke veli ki luga he maka ia, to mafatifati a ia; ka ko ia ka to hifo ki ai e maka to malipilipi ai a ia.”

Ko e tau tohikupu mo e tau ekepoa ne mua ne mailoga la ia ko e vagahau a Iesu ki a lautolu, ti manako a lautolu ke kelipopo a ia, ko e tonuhia ke he “hakeaga.” Ti ko e monuina ke pule fakalataha ke he Kautu he Atua to utakehe mai ia lautolu ko e motu, mo e motu fou he ‘tau tagata gahua he ulu vine’ ka taute, ko ia ka fua mai e tau fua kua lata.

Ha kua matakutaku e tau takitaki lotu he moto tagata, ne ui a Iesu ko e perofeta, ne nakai lali a lautolu ke kelipopo a ia he magaaho ia. Mataio 21:28-46; Mareko 12:1-12; Luka 20:9-19; Isaia 5:1-7.

▪ Ko e hagaao ki a hai e tau fanau tokoua he fakataiaga fakamua ha Iesu?

▪ Ko e tala fakatai ke ua aki, ko e hagaao ki a hai e “patu,” ko e “ulu vine,” “ko e tau tagata gahua vine,” ko e “tau fekafekau,” mo e “hakeaga”?

▪ Ko e heigoa e mena ka tupu ke he ‘tau tagata gahua he ulu vine,’ mo e ko hai ka hukui a lautolu ia?