Tau Huhu mai he tau Tagata Totou
◼ Kua lata ke malolo lahi fefe e totokoaga he Kerisiano ke he fagaiaga toto ne fita he poaki po ke ne fakaata he pule malolo he hopoaga fakafili?
Kehekehe lahi e tau tutuaga takitokotaha, ti kua nakai ha ha i ai e matafakatufono katoatoa ke he mena nei. Kua talahaua e tau Kerisiano ma e fakalilifuaga lahi he ‘uta kia Kaisara e tau mena a Kaisara,’ he omaoma ke he tau matafakatufono he fakatufono he motu. Ka e, kua iloa e lautolu kua lago pauaki lahi ki a lautolu ke tuku atu “ke he Atua e tau mena he Atua,” ke nakai holifono ke he hana tau matafakatufono.—Mareko 12:17.
Kua fakatutala a Roma 13:1-7 (NW), ke he fakafetuiaga faka-Kerisiano ke he fakatufono he motu ko e tau “pule malolo ne mua.” Kua ha ha he tau fakatufono ia e pule malolo ke taute e tau matafakatufono po ke tuku mai e tau takitakiaga, kua fa mahani ke omoi atu e tau mena mitaki ma e laulahi he tau tagata. Mo e ‘fua’ he tau fakatufono ‘e pelu’ ke taute ke mau ha lautolu a tau matafakatufono mo e ‘ke fakakite e ita ki luga ki a ia ne taute e tau mena kelea ne hagaao ke he ha lautolu a tau matafakatufono.’ He fakalilifu ke he tau pule malolo ne mua, kua manako e tau Kerisiano ke omaoma ke he tau matafakatufono mo e tau fifiliaga he hopoaga fakafili, ka e kua lata e fakalilifuaga nei ke he mena kua lata. Kaeke ke ole atu ke he Kerisiano ke nofo taha ke he taha mena kua holifono ai e matafakatufono tokoluga atu he Atua, kua lata ke mua ai e matafakatufono he atua; kua tu ai he tuaga fakamua.
Falu he tau matafakatufono ne ha ha i ai e mitaki he vaha fou nei kua liga fakaaoga hehe ke taute e pule ke fakaata e omoiaga he fagaiaga toto ke he Kerisiano. Ke he mena nei kua lata ni e tau Kerisiano ke taute e tuaga taha ne taute he aposetolo ko Peteru: “Kua lata a tautolu ke omaoma ke he Atua ko e pule ka e nakai ke he tau tagata.”—Gahua 5:29, NW.
Ne poaki atu a Iehova ke he tau Isaraela: “Kia mauokafua lahi ni e fifiliaga ke nakai kai e toto, ha ko e toto ko e solu ni mo e kua nakai lata a koe ke kai e solu fakalataha mo e vala kakano.” (Teutaronome 12:23, NW) Ko e liliuaga Tohi Tapu Iutaia he tau 1917 kua totou: “Kia tumau hokoia ni ke nakai kai e toto.” Mo e ne tuku mai e Isaac Leeser e kupu taha ia: “Kia mauokafua ni ke nakai maeke ke kai e toto.” Kua tuga kia e mena ia ke fakateaga po ke mena nakai taute gahua e tau fekafekau he Atua ke omaoma ke he hana matafakatufono?
Kua fakalataha mo e kakano mitaki e loto mauokafua katoatoa he tau Kerisiano ke omaoma ke he Atua, pete ni kaeke kua talahau mena kehe e fakatufono ki a lautolu. Kua tohi e Tagata Pulotu Fakaako Tokoluga ko Robert L. Wilken: “Nakai talia ni hokoia e tau Kerisiano ke gahua kautau [Roma] ka e nakai talia a lautolu ke uta e feua ofisa ke he tau tagata po ke uta e kotofaaga ke pule ke he tau taone.” (The Christians as the Romans Saw Them) Ka nakai talia kua kakano ke fakamailoga ai ko e tau tagata moumou matafakatufono po ke fakahala ke he pa tau ha Roma.
Kua lata foki e tau Kerisiano he vaha nei ke tumau, mauokafua lahi e fifiliaga ke nakai holifono e matafakatufono he atua, pete ni kaeke kua tuku he mena ia a lautolu ki loto he taha mena hagahaga kelea tuga ke he tau fakatufono he motu. Ko e matafakatufono tokoluga lahi mahaki he lagi mo e lalolagi katoatoa—ko e matafakatufono he Atua—kua loto ke kalo kehe mai a lautolu he fakaaoga hehe he toto, tuga ni ne poaki atu ke he tau Kerisiano ke kalo kehe mai he mahani feuaki (mahani holifono he fakatane mo e fifine). Kua ui aki he Tohi Tapu e tau puipuiaga nei “ko e tau mena ni hokoia ke lata.” (Gahua 15:19-21, 28, 29) Ko e matafakatufono pihia he atua ko e mena nakai kua lata ke uta fakamama, tuga ko e mena ke omaoma ni ki ai kaeke kua lata po ke nakai moua mai ha mena vihi. Kua lata ni ke omaoma ke he matafakatufono he Atua!
Kua maeke ai mogoia a tautolu ke loto fakaaue, ko e ha e Kerisiano fuata ne talahau mai he lau tohi 29 ne talaage ke he hopoaga fakafili ko e “ke he hana manamanatu ko e oho pule noa e fagaiaga toto ke he hana tino mo e ne fakatatai ai ke he fakapilo pule noa.” To fai fifine Kerisiano nakai, fuata po ke fuakau, ka nofo taha ki lalo ti nakai tau ke he fakapilo pule noa, pete ni kaeke kua ha ha i ai e pule ne moua mai he matafakatufono he motu ko e maeke e mahani feuaki he keli ke taute mahani fakatane mo e fifine?
Ke tuga ia, ko ia ne 12 e tau tau he moui ne fatiaki mai he lau tohi ne nakai toka ai ha fakauaua to ‘tau a ia ke he ha mena he fagaiaga toto ne fakaata he pule he hopoaga fakafili mo e malolo katoa kua maeke ia ia ke moua he magaaho, to kaa a ia mo e taufetului, ke toho kehe e nila huki ke he lima hana mo e to lali ke moumou e toto i loto he taga ne tautau i luga he hana mohega.’ Kua mauokafua lahi hana a fifiliaga ke omaoma ke he matafakatufono he atua.
Ne fano kehe mai a Iesu he matakavi he magaaho ne manako e moto tagata tokologa ke taute a ia mo patuiki. Ke tuga ia, kaeke kua liga lahi ke fakaata he pule he hopoaga fakafili e fagaiaga toto, liga to fifili ai e Kerisiano ke kalo kehe mai he mena mukamuka ke moua ai e holifono pihia ke he matafakatufono he Atua. (Mataio 10:16; Ioane 6:15) Ke he magaaho taha ia ni, kua lata e Kerisiano ke fakailoilo ke kumi e taha puhala levekiaga vai, ti kua taute ai e laliaga moli ke tumau e moui mo e ke liu moua e tino malolo.
Kaeke kua taute he Kerisiano e tau laliaga fakamalolo lahi ke kalo kehe mai he holifono ke he matafakatufono he Atua ke he toto, liga to manamanatu e tau pule malolo ko e tagata moumou matafakatufono a ia po ke taute a ia ke maeke ke fakahala. Kaeke kua tupu moli e fakahala, kua maeke e Kerisiano ke onoono ki ai tuga e matematekelea ma e tututonu. (Fakatatai 1 Peteru 2:18-20.) Ka e ke he tau mena loga, kua kalo kehe mai e tau Kerisiano he fagaiaga toto mo e mai he levekiaga iloilo he matakau taute vai ti malolo ai, ti kua nakai tupu mai e tau mena vihi kelea mau he feua matafakatufono he motu. Mo e mua atu e aoga lahi ki ai, ne taute tumau e lautolu ha lautolu a fakamoli ke he ha lautolu a Foakiaga-Moui mo e Fakafili mai he lagi.