Hokotaki he tau Tagata Tukuogo he Kautu

Falanaki a Lautolu ki a Iehova

NE POAKI e Iehova e tau Fakamoli a Iehova ke fakamatala e tala mitaki he Kautu ke he lalolagi katoa ke maeke ai he tau tagata he tau motu oti kana ke moua ai e magaaho ke iloa ai e lalolagi fou he Atua. I loto he falu he tau motu, tumau ha ko e tau fakaohoohoaga he vahega fekafekau lotu a Kerisitenitome, ne taofi ai ha tautolu a gahua. Pihia e mena ne tupu i loto he taha motu i Afelika. Ka e taute he tau Fakamoli a Iehova he kavi ia e mena taha ne taute he Patuiki ko Tavita. Ne pehe a ia: “Kua tua au ke he Atua; nakai matakutaku au.” (Salamo 56:11) Kua fakakite he tau mena ne fa mahani e tau matakainaga ha tautolu ki ai i loto he motu ia kua falanaki a lautolu ki a Iehova mo e matutaki atu tumau mo e gahua aoga lahi hana.

Ko e Fakamoli gahua ulu faiaoga i loto he taha aoga ne mautali tumau ke omaoma ke he “Atua ko e pule ka e nakai ke he tau tagata,” he talahau hana tutokotaha ke he tau feua fakatufono he Motu. (Gahua 5:29, NW) Ne keli kelea lahi a ia mo e amaamanaki ni to fakafili ko e tagata afokau. Ne manamanatu e tau tagata oti to tamate ni a ia. Ka e pete ni, ko e Fakamoli, ne falanaki ki a Iehova. Ne tumau hana fakamoli mo e fakamaama e tau kakano he hana tuaga ne hake mai he hana loto manamanatu hifo. Ko e taui? Ne noa mai he holifono e fifiliaga hana mo e liuaki atu ke he hana maaga, ti fakamolemole atu e tau hukui he Fahi Motu ne keli a ia. Ne liuaki e Fakamoli nei ne tumau e fakamoli ke he feua fakaako mo e tuku hake ke he tuaga tokoluga ko e tagata tivi he tau aoga!

Ko e tagata takitaki he fakatokaaga he taha aoga ne taha e faiaoga Fakamoli ne tuku kehe ai. Taha e mahina he mole ai ne talia he tagata takitaki fakatokaaga nei ke uta e tohi You Can Live Forever in Paradise on Earth (Maeke Ia Koe ke Moui Tukulagi i Loto he Lalolagi Parataiso) mai he tagata foafoa uho mo e talia ke fakaako Tohi Tapu. He mole mai he oti e tau veveheaga 6, ne fakaoti e ia hana gahua takitaki fakatokaaga he aoga, mo e kamata a ia mo e hana hoana ke o ke he tau feleveiaaga oti he tau Fakamoli a Iehova. He taha pogipogi Aho Tapu ne ofo lahi mitaki e faiaoga ne tuku kehe, he feleveia mo e tagata tane ne tuku kehe a ia mo e iloa ko e ha ha i ai a ia he puhala ke taute mo matakainaga fakaagaga.

Ko e taha mena ne fa mahani ki ai mai he motu taha nei kua fakatai atu ke he puhala ne fakaako he tau Fakamoli a Iehova e fakalilifu ma e fakatokaaga mo e gahua a Iehova mo e taute mau ke mea e fakatokatokaaga. Ko e tagata foafoa uho ne gahua he matakavi mamao ne fa mahani mo e tau totokoaga loga. Ha kua hau a ia he taha matakau magafaoa mo e he matakavi kehe, ne manako e tau fi he kupu moli ke vega kehe a ia mai he maaga. Ka e pete ni ne tuhi atu e pule he maaga ke he hana tau mahani mitaki mo e tau taui mitaki he hana fekafekauaga mo e kua nakai fakaata hana vega kehe. Ne mailoga he pule ko e talimai he hoko mai e tagata foafoa uho, kua fakalilifu e tau tagata ke he pule malolo ne pule, he totogi ha lautolu a tau tukuhau mo e taute lagataha he fahi tapu e gahua puhala tu he maaga.​—Roma 13:1, 7.

Ti hoko ke he taha po ne moua ai e taha Fakamoli he taute e mahani faivao mo e fifine nakai ko e Fakamoli. Kua ha ha i ai e talahaua kelea, mo e ko e tagata foafoa uho ne ui atu ki mua he pule, ne loma atu ki a ia, he pehe: “Hanai hau a matakainaga tane ne moua he taute e mahani faivao. Ko mutolu ko e tau Fakamoli a Iehova ne nakai kehe mai he falu he tau lotu.” Ka e pete ni, ne fakamama atu e tagata foafoa uho: “Pete ni he nakai mitaki katoatoa, kua kehe mai a mautolu he falu he tau lotu ha kua nakai ono kehe a mautolu he tau gahua ha lautolu ne taute e tau agahala kelea lahi.”

Ko e Fakamoli ne taute e mahani faivao ne taute magaaho i loto he fale puipui mo e totogi fakahala. Ke lafi ki ai, ne fakaoti hana fakalatahaaga mai he fakapotopotoaga ha ko e tagata taute mena hehe nakai tokihala. Ne nava e loto hana ne pule ke he tauteaga nei mo e taofi ai e tau gutu ha lautolu ne fakafiufiu e tau Fakamoli a Iehova. Ne vagahau mai pehe a ia ne pule: “Kia nakai vagahau kelea lahi ke he tau Fakamoli a Iehova. Kua ha ha ia lautolu e kupu moli. Ne nakai taute gahua pihia e falu lotu.”

Ko e tau Fakamoli ne mahani fakamoli i loto he motu ia kua muitua ke he fakatonutonuaga mai ia Salamo 37:3: “Kia tua a koe kia Iehova, mo e eke e mahani mitaki, kia nofo ai a koe ke he motu, mo e kai e fakamoli.” To falanaki nakai a tautolu ki a Iehova ke tuga ne taute he tau Kerisiano nei?