Tau Aho he Perofetaaga a Tanielu mo e ha Tautolu a Tua

“[“Fiafia,” NW] a ia kua tatali atu mo e hoko atu a ia ke he tau aho taha e afe mo e tolu e teau mo e tolugofulu ma lima e aho.”​—TANIELU 12:12.

1. Kua kaumahala he ha e tokologa ke moua e fiafia lahi moli, mo e tututaki e fiafia lahi moli ke he heigoa?

MANAKO e tau tagata oti ke fiafia. Ka e gaogao ni, kua pihia he vaha nei. Ko e ha? Ko e vala, kakano ha kua tokologa kua onoono ke he tau mena hepe ke moua ai e fiafia lahi. Kua kumi fiafia ke he tau mena tuga e fakaakoaga he tau aoga, muhukoloa, ko e feua, po ke tutuli ke fai pule. Ka e taha e mena ke he hafagiaga he hana Lauga he Mouga, ne matutaki atu e Iesu e fiafia lahi mo e logonaaga hifo he taha kua lata ai ni ke fai mena fakaagaga, fakaalofa hofihofi noa, mea e loto, mo e tau mahani kua pihia foki. (Mataio 5:3-10) Ko e vahega fiafia lahi ne vagahau a Iesu ki ai, ko e mena moli mo e tumau.

2. Hagaao ke he perofetaaga, ko e heigoa ka takitaki atu ke he fiafia lahi he magaaho fakahiku, mo e heigoa e tau huhu kua malagaki mai kua hagaao ke he mena nei?

² Ma lautolu ne fakauku ne toe hifo agaia he vaha fakahiku, kua fai tutakiaga e fiafia lahi mo e taha mena foki. I loto he tohi a Tanielu, kua totou e tautolu: “Kia fano a koe, ma Tanielu na e, ha kua puipui mo e fakamau fakamailoga ai e tau kupu ato hoko ke he vaha he fakahiku ai. [“Fiafia,” NW] a ia kua tatali atu mo e hoko atu a ia ke he tau aho taha e afe mo e tolu e teau mo e tolugofulu ma lima e aho.” (Tanielu 12:9, 12) Ko e vaha he magaaho fe kua maluia ai he tau aho kua 1,335 nei? Kua fiafia he ha a lautolu ne momoui mai ia lautolu? Kua putoia nakai e mena nei ke he ha tautolu a tua he vaha nei? Kua lagomatai a tautolu ke tali e tau huhu nei kaeke ke liliu a tautolu ke onoono ke he magaaho i tua ne tohi e Tanielu e tau kupu nei, ke he magaaho ku ne mole atu ai e tokanoaaga a Isaraela mai he fakapaeaaga i Papelonia mo e ke he tau ke tolu aki a Kuresa ko e patuiki a Peresia.​—Tanielu 10:1.

Tamai he Liuaki Maiaga e Fiafia Lahi

3. Ko e heigoa e mena ne taute he Patuiki ko Kuresa kua tamai e fiafia lahi mahaki ke he tau Iutaia mahani fakamoli he tau 537 F.V.N., ka ko e heigoa e monuina ne nakai age e Kuresa ke he tau Iutaia?

³ Ma e tau Iutaia, ko e tokanoaaga mai i Papelonia ko e magaaho fakaolioli lahi moli. He mole he fakauka e tau Iutaia ke he 70 e tau tau ke he fakapaeaaga, ne uiina e Kuresa Lahi Mahaki a lautolu ke liliu ki Ierusalema ke liu ke talaga e faituga a Iehova. (Esera 1:1, 2) Ko lautolu ne talia kua o atu ai fakalataha mo e amaamanakiaga muatua, ti kua hohoko atu ke he ha lautolu a motu he tau 537 F.V.N. Ka e pete ni ia, nakai uiina e Kuresa a lautolu ke liuaki mai e kautu i lalo he taha ohi he Patuiki ko Tavita.

4, 5. (a) Ko e magaaho fe ne kaumahala ai e pule patuiki a Tavita? Ko e ha? (e) Ko e fakamafanatiaaga moli fe, ne foaki mai e Iehova, ko e to liuaki age ne pule patuiki ha Tavita?

⁴ Kua muaatu e aoga he mena ia. Ke he lima e tau senetenari fakamua, ne mavehe a Iehova ki a Tavita: “To fakamau e au e magafaoa hau mo e hau a kautu ke tukulagi ki mua hau; to tumau tukulagi hau a nofoaiki.” (2 Samuela 7:16) Kua nakai fiafia, ha kua tokologa ai e ohi fakapatuiki a Tavita ne fakakite moli e aga totoko, mo e lahi mahaki e fakamaligi toto he motu, ti kua fakaata ai e Iehova he tau 607 F.V.N., e pule fakapatuiki a Tavita ke kaumahala. Ko e vala ni he vaha ku ne nonofo i lalo he tau Makapi, ka ko e magaaho ne mole ai ne nonofo na Ierusalema i lalo he pule he tau motu kehe ati hoko ke he hana moumouaga ke ua aki he tau 70 V.N. Ti kua kamata ai he tau 537 F.V.N., e “tau vaha he tau motu kehe,” ko e vaha ne nakai fai tama tane a Tavita ne pule fakapatuiki.​—Luka 21:24.

⁵ Ka e pete ni ia, kua nakai nimo e Iehova hana mavehega ki a Tavita. Ke he tau fufuta he tau fakakiteaga mo e tau miti, ne fakakite e ia he puhala mai he hana a perofeta ko Tanielu e tau mena ka tutupu ke he lalolagi he vaha i mua, ka holo loa atu ke he tau senetenari, tali mai he magaaho kua pule katoatoa a Papelonia ke he lalolagi ati hoko atu ke he magaaho ka liu foki e taha patuiki ne tupu mai he mataohiaga a Tavita ke pule ke he kautu he tau tagata a Iehova. Ko e tau perofetaaga nei, ne fakamau hifo he Tan tau veveheaga 2, 7, 8, mo e 10-12 a Tanielu, ne fakamafana atu moli ke he tau Iutaia mahani fakamoli to hoko atu ni ke taute moli e nofoaiki a Tavita ke “tumau tukulagi.” Ti kua moli ni, kua tamai he fakakiteaga he tau kupu moli pihia e fiafia lahi ke he tau Iutaia ne liliu atu ke he ha lautolu a motu he tau 537 F.V.N.!

6. Iloa fefe e tautolu to fakamoli ne falu he tau perofetaaga a Tanielu he magaaho ha tautolu?

⁶ Kua tokologa e tau tagata fakahokohoko tala ke he Tohi Tapu, ne talahau ko e tau perofetaaga a Tanielu kua fakamoli ti teitei katoatoa oti ato fanau mai a Iesu Keriso. Ka kua maaliali, ne nakai pihia e mena nei. Ia Tanielu 12:4, ne tala age e agelu ki a Tanielu: “Kia puipui a e koe e tau kupu, mo e fakamau fakamailoga ai e koe e tohi, ato hoko ke he vaha ke fakahiku ai; to tafepoi tafeliuaki foki e tau tagata tokologa, to tupu lahi ai foki e mahani iloilo.” Kaeke kua lata ne tohi a Tanielu ke veveu​—ke fakakite mai hana kakano katoatoa​—he magaaaho he fakahikuaga ni hokoia, kua moli ai kua lata ne falu he hana tau perofetaaga ke hagaao ke he magaaho ia.​—Kikite Tanielu 2:28; 8:17; 10:14.

7. (a) Ti kua oti he magaaho fe e tau magaaho kua kotofa ke he tau motu kehe, mo e ko e heigoa mogoia e huhu mafiti kua lata ke tali? (e) Nakai ko hai e “tupa fakamoli mo e lotomatala”?

⁷ He tau 1914, ne oti e tau magaaho ne kotofa ke he tau motu kehe, mo e kamata ai e magaaho he fakahikuaga he lalolagi nei. Ko e Kautu ha Tavita kua liuaki mai, nakai ki Ierusalema he lalolagi, ka e ke he mena nakai kitia he “tau aolagi.” (Tanielu 7:13, 14) He magaaho ia, kakano ha kua tupuolamoui e “tau titania” ko e tapuaki Kerisiano fakavai, ti kua nakai mahino maaliali ai e tutuaga he puhala Kerisiano moli​—ko e mena kua pihia ni ke he tau mata he tagata. Ka e pete ni ia, kua lata ke ha ha i ai e tali ke he huhu aoga lahi: “Ko hai moli kia e tupa fakamoli mo e lotomatala?” (Mataio 13:24-30; 24:45, NW) Ko hai he lalolagi ka hukui e Kautu ne liuaki mai ha Tavita? Nakai ko e ha Tanielu a tau matakainaga he tino, ko e tau Iutaia. Kua fita he tiaki a lautolu kakano he nakai tua a lautolu mo e veveli ki lalo ha ko e Mesia. (Roma 9:31-33) Kua nakai fakaai ke moua ai e tupa fakamoli ke he vahaloto he tau fakatokatokaaga a Kerisitenitome! Kua fakakite mai moli he tau gahua kelea ha lautolu kua nakai iloa e Iesu a lautolu. (Mataio 7:21-23) Ti ko hai mogoia a ia?

8. Ko hai ne fakakite moli mai ko e “tupa fakamoli mo e lotomatala” a lautolu he vaha fakahiku? Kua iloa fefe e tautolu?

⁸ Kua nakai tuai fakauaua, ko e matakau tote he tau matakainaga fakauku a Iesu ne kua iloa he tau 1914 ko e Tau Tagata Fakaako Tohi Tapu, ka e tali mai he tau 1931 kua iloa ko e Tau Fakamoli a Iehova. (Isaia 43:10) Ko lautolu ni hokoia ne fakailoa e liuaki maiaga he Kautu ke he matohiaga a Tavita. (Mataio 24:14) Ko lautolu ni hokoia ne fakatumau ke vevehe kehe mai he lalolagi mo e fakatokoluga e higoa a Iehova. (Ioane 17:6, 14) Mo e ki luga ni ia lautolu hokoia kua ha ha i ai e fakamoliaga he tau perofetaaga he Tohi Tapu ne hagaao ke he tau tagata he Atua he vaha fakahiku. Kua ha ha i ai he tau perofetaaga nei e fufuta he tau vaha fakaperofetaaga ne tohia i loto he veveheaga 12 a Tanielu ne kua fakalataha ai e tau aho 1,335 kua maeke ke tamai e fiafia lahi.

Ko e Tau Aho 1,260

9, 10. Ko e heigoa e tau mena tutupu ne fa kitia mau ai he “tau, mo e tau tau, mo e maga ne veveheua aki e tau” ia Tanielu 7:25, mo e talahau mai he falu tohiaga tapu fe, e vaha ne tatai ki ai?

⁹ Ia Tanielu 12:7, kua totou a tautolu ke he vaha he perofetaaga fakamua: “Ke hohoko e tau mena ia, ke he tau, mo e tau tau, mo e maga ne veveheua aki e tau; ka oti ke tuki malipilipi ai e ia e malolo he motu tapu, ti hohoko ai e tau mena oti ia.”a Kua talahau mai foki e vaha taha nei ia Fakakiteaga 11:3-6, ne pehe mai, ko e to tui he Tau Fakamoli he Atua e tau kalaie taga ka fakamatala ati tolu mo e hafa e tau tau mo e kelipopo ai mogoia. Kua totou agaia e tautolu ia Tanielu 7:25: “To fai kupu a ia kia ia ne Mua ue atu, mo e fakaoti e ia e tau tagata tapu hana ne Mua ue atu, to manatu e ia ke liliu kehe e tau tau mo e fakatufono; to tuku atu foki a lautolu ke he hana pule ato mole atu e tau mo e tau tau, mo e maga ne veveheua aki e tau.”

¹⁰ I loto he perofetaaga fakamui nei, ko e pule he lalolagi ke lima aki “a ia,” ka totou mai ia Papelonia. Ko e “hoe tote” a ia, ti ko e vaha he hana pule ka moua ai he Tama he tagata “e pule, mo e fakahekeaga, mo e kautu.” (Tanielu 7:8, 14) Ko e hoe fakatai nei, ko e pule atu motu a Peritania mai he kamataaga, ne kua tupu hake he vaha he felakutakiaga fakamua he lalolagi ke eke ko e pule katoua he lalolagi ko Peritania-Amerika, ne kua lilifa lahi ni e pule he mogonei ke he tau Fahi Kaufakalataha. Ke he tolu mo e hafa e tau magaaho, po ke tau tau, to fakatupetupe lahi he pule nai a lautolu ne tapu, mo e lali ke liliu e tau magaaho mo e matafakatufono. Ati hoko ai fakamui, kua tuku age na lautolu ne tapu ke he hana lima.​—Kikite foki Fakakiteaga 13:5, 7.

11, 12. Ko e heigoa e tau mena tutupu kua takitaki atu ke he kamataaga he tau aho 1,260 he perofetaaga?

¹¹ Kua fakamoli fefe e tau perofetaaga fetataiaki oti nei? Ke he tau tau loga fakamua ato hoko e Felakutakiaga I he Lalolagi, ne hataki atu e tau matakainaga fakauku a Iesu, to kitia ai ke he tau 1914 e fakaotiaga he kotofaaga he vaha he tau motu kehe. He magaaho ne mavete mai e felakutaki, kua kitia moli ai kua nakai fakateliga ke he hatakiaga. Ne fakaaoga e Satani hana “manu favale,” ko e fakatokatokaaga politika he lalolagi, ne kua lahi e pule he Pule atu Motu a Peritania he magaaho nai, he lali “ke liliu kehe e tau tau mo e fakatufono,” ke nakai hoko e magaaho ka tu hake e pule he Kautu he Atua. (Fakakiteaga 13:1, 2) Ka e kaumahala na ia. Ne fakatu ne Kautu he Atua i luga he lagi, ko e mena kua mamao ligo ke he lima he tagata.​—Fakakiteaga 12:1-3.

¹² Ma e Tau Tagata Fakaako Tohi Tapu, kua kakano nukua e felakutakiaga ko e magaaho kamatamata. Tali mai ia Ianuari he tau 1914 ne fa fakakitekite e lautolu e kifaga Photo-Drama of Creation, ko e fakatataaga faka-Tohi Tapu kua futiaki e tau onoonoaga ke he perofetaaga a Tanielu. Ke he Takaiaga he Pole Tokelau, he vaha mafana he tau ia, kua mavete mai e felakutaki. Ia Oketopa, kua oti e vaha ne kotofa. He oti e tau ia, kua fakatalitali a lautolu ne fakauku ne toe agaia ke he favaleaga, tuga kua kitia moli mai he matakupu kua fifili ma e tau 1915, ko e ha Iesu a huhu ke he hana tau tutaki, “Kua maeke nakai a mua ke inu haku a kapiniu?” ko e mena kua fakave ai ia Mataio 20:22, he King James Version.

13. Fakamatala fefe e Tau Tagata Fakaako Tohi Tapu he tui e tau kalaie taga he vaha he tau aho 1,290 mo e to tupu e heigoa he fakahikuaga he vaha taha ia?

¹³ Ha ko e mena ia, kua kamata ai ia Tesema he tau 1914 e matakau tote he tau fakamoli nei ‘ke fakamatala mo e tui ai e ie talatala’ ke he fakaukaaga fakatokolalo he fakailoa e lautolu e tau fakafiliaga a Iehova. Ti kua tokologa ne ofomate lahi, he tau 1916, he mate a C. T. Russell, ko e pelesiteni fakamua he Watch Tower Bible and Tract Society. He tolomaki atu e velagia he felakutaki, kua feleveia a lautolu mo e favaleaga kua hane fa e hake ki luga. Kua tuku falu he fale puipui. Ko e tau tagata, tuga a Frank Platt i Igilani mo Robert Clegg i Kanata, ne kua fakakikiveka he tau pule malolo mahani kelea patoki. Ati hoko ai fakamui, ia Iuni 21 he tau 1918, ko e pelesiteni fou ko J. F. Rutherford, fakalataha mo e tau takitaki he Watch Tower Bible and Tract Society, kua fakahala ha ko e tau hokotaki fakavai, ke tuku leva he fale puipui. Ti kua hoko ai, ke he fakahikuaga he vaha he perofetaaga, kua kelipopo ai he “hoe tote” e fakatokaaga ke gahua fakamatala ke he tau tagata.​—Tanielu 7:8, King James Version.

14. Kua hiki kehe fefe e tau mena ma lautolu kua fakauku ne toe agaia he tau 1919 mo e he mole atu foki?

¹⁴ Kua perofeta mai he tohi a Fakakiteaga e mena ka mui mai. Ko e mena ka mole atu e vaha ku nakai gahuahua​—ne talahau tuai mai kua tolu mo e hafa e tau aho he fakaloloa he ­puhalatu he mamate​—ti kua ­liliu ai a lautolu ne fakauku ne toe agaia ke momoui mo e gahuahua. (Fakakiteaga 11:11-13) Ia Mati 26, he tau 1919, kua fakatokanoa e pelesiteni mo e tau takitaki he Watch Tower Bible and Tract Society, mo e moua e lautolu he magaaho fakamui kua holoholo kehe katoatoa e tau hokotakiaga fakavai ne tuku aki a lautolu. He mole agataha ha lautolu a fakatokanoaaga, ne kamata e tau fakauku ne toe agaia ke liu fakatokatoka ke taute foki e tau gahua. Ati ke he fakamoliaga he oi malaia fakamua a Fakakiteaga, kua o mai he pahua nakai gahuahua a lautolu tuga e tau akarava fakaagaga kua o mai fakalataha mo e ahua matolu, ti kua fakakite ai e vaha pouligia i mua ma e tau lotu fakavai. (Fakakiteaga 9:1-11) He vaha he tau tau gahoa ne mumui mai, kua fagai fakaagaga a lautolu mo e nonofo mau tauteute ke he tau mena i mua. He tau 1921 ne taute fakailoa e lautolu e tohi fou, The Harp of God, kua talaga pauaki ke lagomatai aki a lautolu ne fou mo e tau fanau ke iloa e tau matapatu kupu moli he Tohi Tapu. (Fakakiteaga 12:6, 14) Kua tutupu e tau mena oti nei he magahala he taha matapatu vaha hikitaki muatua foki.

Ko e Tau Aho 1,290

15. Ke he puhala fe kua maeke a tautolu ke fuafua e kamataaga he tau aho 1,290? Oti he magaaho fe e vaha he mena nai?

¹⁵ Kua pehe e agelu ki a Tanielu: “Ke kamata mai he vaha kua uta kehe ai e poa huhunu mau, ke hoko atu ke he vaha ke tuku ai e mena vihiatia ke moumou aki, ko e katoa he tau aho ko e taha e afe, ti ua e teau ti hivagofulu e aho.” (Tanielu 12:11) I lalo he Matafakatufono a Mose, ne fa tugi e “poa huhunu mau” i luga he fatapoa he faituga i Ierusalema. Ka e nakai foaki hake he tau Kerisiano e tau poa huhunu, ka kua foaki tumau e lautolu e poa huhunu fakaagaga. Ne hagaao e kupu a Paulo ke he mena nei he magaaho ne pehe a ia: “Hanai, kia uta mau e tautolu e poa fakaheke ke he Atua kia ia ni, ko e fua haia he tau laugutu ha lautolu, kua fakaaue atu ke he hana higoa.” (Heperu 13:15; fakatatai Hosea 14:2.) Kua uta kehe e poa mau nei ia Iuni he tau 1918. Ti ko e heigoa mogoia, “e mena vihiatia”​—ko e vala ke ua aki kua lata ke kumi ke kitia? Ko e Tau Motu Kautaha, kua omoomoi he tau pule ne kautu he fakahikuaga he Felakutaki I he Lalolagi.b Kua vihiatia ai kakano ha kua tuku he tau takitaki a Kerisitenitome ke he tuaga he Kautu he Atua, kua fakatautui aki ai e Kautaha mo amaamanakiaga ni hokoia he tagata ma e mafola. Ne fakatu e Kautaha ia Ianuari he tau 1919. Kaeke ke totou e tautolu e tau aho 1,290 (tolu e tau, fitu e mahina) mai he magaaho ia, to hohoko atu na tautolu ki a Sepetema he tau 1922.

16. He fakahikuaga he tau aho 1,290 kua kitia moli fefe kua mau tauteute na lautolu ko e tau fakauku ne toe agaia ke gahua?

¹⁶ Ti ko e heigoa mogoia ka tupu? Ko e Tau Tagata Fakaako Tohi Tapu he magaaho nai kua hauhau, kua tokanoa mai ia Papelonia Lahi, mo e kua mau tauteute ke papale atu. (Fakakiteaga 18:4) Mai he fonoaga i Cedar Point, Ohio, F.K.A., ia Sepetema he tau 1922, kua kamata mo e nakai matakutaku a lautolu ke tukuogo e tau fakafiliaga he Atua ki a Papelonia. (Fakakiteaga 8:7-12) Kua kamata moli e gagau he tau akarava ke mamahi! Ke lafi ki ai, kua kamata foki e oi malaia ke ua aki a Fakakiteaga. Ko e moto Kerisiano tokologa ne heke solofanua​—ne kua ha ha i ai fakamua a lautolu ko e tau fakauku ne toe agaia mo e ke he magaaho fakamui kua tupu tolomaki lahi ai ha ko e moto tagata tokologa​—ne pua atu ke he lalolagi katoa. (Fakakiteaga 7:9; 9:13-19) E, kua tamai he fakahikuaga he tau aho 1,290 e olioli ke he tau tagata he Atua.c Ka e fakatalitali mai e tau mena lalahi.

Ko e Tau Aho 1,335

17. Kamata mo e oti he magaaho fe e tau aho 1,335?

¹⁷ Kua pehe mai ia Tanielu 12:12: “[“Fiafia,” NW] a ia kua tatali atu mo e hoko atu a ia ke he tau aho taha e afe mo e tolu e teau mo e tolugofulu ma lima e aho.” Ko e tau aho 1,335 po ke tolu e tau, valu mo e hafa e tau mahina, ne kitia moli ai kua kamata he fakahikuaga he vaha fakamua ne kua mole laia. He totou mai ia Sepetema 1922, kua tamai he mena nei a tautolu ke he fakahikuaga he tau tuputupu (he Takaiaga Pole Tokelau) he tau 1926. Ti ko e heigoa ne tupu he vaha he tau aho 1,335 ia?

18. Fakakite he tau mena moli fe i tuai he tau 1922 kua ha ha agaia e holo ki mua kua lata ke taute?

¹⁸ Pete ni kua kitia e hagahaga hikiaga muaatu he tau mena tutupu he tau 1922, ka e kitia moli ni, kua manako agaia ne falu ke he tau mena kua mole. Kua fakaaoga agaia e tau Studies in the Scriptures, ne tohia e C. T. Russell, mo matapatu tohi ke fakaako ki ai. Ko e taha foki, ko e tohi tote ne laulahi e tufatufaaga ko e Millions Now Living Will Never Die, ne fakailoa e onoonoaga ko e tau 1925, ka kamata ai e fakamoliaga he finagalo he Atua hagaao ke he liuakiaga he lalolagi ke he Parataiso mo e liu tu mai ha lautolu ne mahani fakamoli i tuai. Kua tuga kua teitei e fakaukaaga ha lautolu ne fakauku ke fakaoti katoatoa ai. Ka e pete ni ia, kua nakai logona he tau loto he falu ne feoaki mo e Tau Tagata Fakaako Tohi Tapu e omoiaga ke foaki atu e tala mitaki ke he falu.

19, 20. (a) Kua hiki fefe e tau mena loga he tau tagata he Atua he vaha he tau aho 1,335? (e) Ko e heigoa e tau mena tutupu kua fakamailoga aki e fakaotiaga he vaha he tau aho 1,335 mo e fakakite e lautolu e heigoa ne hagaao ke he tau tagata a Iehova?

¹⁹ He holo atu e tau aho 1,335 kua hiki kehe oti e tau mena nei. Ke fakamalolo aki e tau matakainaga, ne fakatoka hifo e tau fakaakoaga tumau fakamatakau ke he Watch Tower. Kua pehi fakalahi ke gahua ke he fonua. Ne kamata mai ia Me he tau 1923, kua uiina e tau tagata oti ke fai vala gahua ke he fekafekauaga he fonua he Aho Ua fakamua he tau mahina oti, mo e fakatoka kehe e taha magaaho he feleveiaaga he fakapotopotoaga he lotoga he fahi tapu ke fakamafana atu ki a lautolu ke he gahua nei. Ia Aokuso he tau 1923, ke he toloaga i Los Angeles, i California, F.K.A., kua fakakite mai ai, ko e tala fakatai a Iesu ke he tau mamoe mo e tau koti to eke ai ni ke fakamoli fakamua ato hoko e Pule he Afetau. (Mataio 25:31-40) Kua kitia ai he tau 1924 e kamataaga he letio WBBR, ne fakaaoga ke fakapuloa e tala mitaki mai he ogo matagi. Ti kua fakakite mai he fufuta tohi Watch Tower, ia Mati 1, tau 1925, e tala ko e “Fanauaga he Motu,” ne kua fakakite e hikiaga he maamaaga ke he veveheaga 12 a Fakakiteaga. Ati hoko ai fakamui kua maeke ne tau Kerisiano mahani fakamoli ke moua e maama hako he tau mena tutupu miha he tau tau 1914-19.

²⁰ Kua oti e tau 1925, ka e nakaila hoko e fakaotiaga! Tali mai he atu tau 1870, kua fekafekau e Tau Tagata Fakaako Tohi Tapu fakalataha mo e aho ke he loto manamanatu​—fakamua ko e tau 1914, ti ko e tau 1925. He magaaho nei, kua iloa tuai e lautolu kua lata na lautolu ke fekafekau ke hoko ke he magaaho kua loto na Iehova ki ai. Kua ha ha i loto he fufuta tohi he Watch Tower ia Ianuari 1, he tau 1926 e tala kua hikitaki muaatu “Ko hai ka fakalilifu a Iehova?” ne lagaki hake fakalahi e aoga muaatu he higoa he Atua, tuga kua nakaila taute pihia fakamua. Ati fakahiku kua hoko ai ia Me he tau 1926 i London, Igilani, e fonoaga kua talia e fifiliaga ne fakahigoa “Ko e Fakamoliaga ke he tau Pule he Lalolagi.” Kua tukuogo fakahako he mena nei e kupu moli kua hagaao ke he Kautu he Atua mo e fakaotiaga he lalolagi a Satani. Ne fakatoka mai foki he fonoaga taha ia e tohi ne lauia kelea ko e Deliverance, ti ko e tohi fakamua he fufuta tohi taha ia kua fakatautui aki e tau Studies in the Scriptures. Ti kua eke tuai ke haga ki mua e tau tagata he Atua he mogonai, nakai ki tua. Kua hoko ai tuai e tau aho 1,335 ke he fakahikuaga.

21. Ko e heigoa e kakano he fakaukaaga ke he vaha he tau aho 1,335 ma e tau tagata he Atua he magaaho ia i tua, mo e heigoa ma tautolu e kakano he fakamoliaga he perofetaaga ne hagaao ke he vaha nai?

²¹ Kua nakai loto e falu ke taute e tau hikiaga ke lata mo e tau mena nei, ka ko lautolu ne fakauka kua fiafia moli. Ti lafi ki ai, ka liliu a tautolu ke onoono ki tua ke he tau fakamoliaga he tau vaha fakaperofetaaga nai, to fiafia foki a tautolu kakano ha kua fakamalolo ai ha tautolu a tau loto mauokafua, kua moli ni ko e matakau tote he tau Kerisiano fakauku ne momoui he tau magaaho ia, ko e tupa fakamoli mo e lotomatala. Ke he tau tau tali mai he magaaho ia, kua tolomaki lahi mahaki e fakatokatokaaga a Iehova, ka e tu agaia ne tupa fakamoli mo e lotomatala he hana uho, ke takitaki a ia. Ti kua fiafia lahi ha mogoia, he iloa ko lautolu ne fakauku mo e falu a mamoe, kua lahi agaia e fiafia ne hane fakatalitali mai! To kitia e mena nei ka onoono a tautolu ke he taha perofetaaga foki a Tanielu.

[Tau Matahui Tala]

Maeke Nakai ia Koe ke Fakamaama?

◻ Kua iloa fefe e tautolu to fakamoli e falu he tau perofetaaga ia Tanielu he magaaho ha tautolu?

◻ Ko e ha kua maeke ai a tautolu ke loto mauokafua, ko lautolu ne fakauku ne toe agaia ko “e tupa fakamoli mo e lotomatala”?

◻ Ne kamata mo e oti he magaaho fe e tau aho 1,260?

◻ Ko e heigoa e fakahauhauaga mo e liuakiaga ne tamai he tau aho 1,290 ki a lautolu ne fakauku ne toe agaia?

◻ Kua fiafia he ha a lautolu ne fakauka ati hoko ke he fakahikuaga he tau aho 1,335?

[Puha he lau 20]

TAU VAHA HE PEROFETAAGA A TANIELU

Tau aho 1,260:

Tesema 1914 ki a Iuni 1918

Tau aho 1,290:

Ianuari 1919 ki a Sepetema 1922

Tau aho 1,335:

Sepetema 1922 ki a Me 1926

[Fakatino he lau 17]

Tali mai he tau 1919 kua kitia maaliali ko e “tupa fakamoli mo e lotomatala” a lautolu ne fakauku ne toe agaia

[Fakatino he lau 19]

Matapatu Ofisa he Tau Motu Kautaha i Geneva, Suisalani

[Credit Line]

Ata he UN